རྣ་ལོ།
ཁ་བརྡ་འདི་མ་བཀླགས་པར་ཡུན་རིང་འགོར། བོད་སྐད་བཤད་ས་མ་རེག་པར་ཡུན་རིང་འགོར། བོད་པའི་གྲོགས་པོ་ཚོར་མ་ཐུག་པར་ཡུན་རིང་འགོར། རི་ཆུང་ཆུང་དེའི་སྒང་གི་ཁང་མིག་ཆུང་ཆུང་དེར་ཆུང་མ་དང་མཉམ་དུ་རྩོམ་འབྲིའི་ལས་ཀ་བྱས་ནས་ཟླ་བ་ཁ་་ཤས་ཕྱིན། དེ་རིང་ཆུང་མ་ཕ་ཡུལ་ལ་ལོག་སོང༌། ངས་ཀྱང་ལས་ཀ་ཚར། དྲ་རྒྱའི་ཐོག་གི་བོད་ཀྱི་སྐད་ཡིག་་ཡོད་ས་ཞིག་ལ་འཛུལ། དེ་ནི་ཁ་བརྡ་དྲ་དེབ་འདི་རེད། བོད་ནང་གི་དྲ་དེབ་ཁ་ཤས་སྒོ་བརྒྱབ་འདུག་ མི་ལས་དགུ་ལས་བྱེད་མཁན་ཚང་མ་རྒྱ་རྒན་རོ་ས་འོག་ལ་འཇུག་རྒྱུ་འདི་ཚང་ཡིན། རྒྱ་྄རྒན་འདི་བ་ཚང་མིན་ན། ང་སྔ་མོ་ནས་རང་གི་ཕ་ཡུལ་བོད་ལ་ལོག་ཚར་ཡིན། ངའི་བུ་ཕྲུག་རྣམས་ཀྱང་བོད་ནས་འཚར་ལོངས་བྱུང་ཡོད།
ཡ་ད་ང་སྒེར་གྱི་དོན་དག་དེ་ཚོ་གཡུག་ཤོག་ དེ་ལས་ཁ་བརྡ་གླེང༌།
ད་ཡིན་ན། ཁ་བརྡའི་སྒང་ན་གསར་བུ་ཁ་བདེ་འགའི་ཁ་བརྡར་འདུག
ཁ་བརྡའི་ཐོག་ན། བོད་རང་བཙན་ཡིན་མིན་གྱི་ལབ་གླེང་བྱས་་འདུག
ངས་འདིེར་ཁ་གསལ་བོའི་ཐོག་ནས་ལབ་ཀྱི་ཡིན། དབུས་གཙང་རང་བཙན་ཡིན་པའི་བཟོ་འདྲ་བོ་ཞིག་ལོ་རྒྱུས་ཁག་ན་ཡོད་རེད་མ་གཏོགས། ཁམས་དང་ཨ་མདོ་གཉིས་རང་བཙན་གཙང་མ་ཡིན་པའི་ཁྲིམས་མཐུན་ཡིག་ཆ་དང་ས་ཁྲ་སོགས་ཁུངས་སྐྱེལ་ཅི་ཡང་མེད།
ཞ་སྒབ་པའི་ལག་འཁྱེར་འདྲ་བོ་དང་གཞན་ཆིངས་ཡིག་ཡིན་ལ་མིན་ལ་ཁ་ཤས་བཞག་པ་དེ་ཚོས་རང་བཙན་གཙང་མ་ཡིནཔའི་ཁུངས་སྐྱེལ་ནམ་ཡང་བྱེད་ཐུབ་ཀྱི་མ་རེད། ལོ་རྒྱུས་བཤད་ན༌། དང་པོ་རྒྱ་བོད་གཉིས་ཀའི་ལོ་རྒྱུས་ཞིབ་ཕྲ་བལྟས། དེ་ནས་ཁྱིམ་མཚེས་རྒྱལ་ཁབ་ཁག་གི་ལོ་རྒྱུས་ཞིབ་པར་ཀློགས། དེ་ནས་རྒྱལ་སྤྱིའི་ལོ་རྒྱུས་ཡག་པོ་ཀློགས དེ་མིན་བོད་ཡིག་གི་ནང་ལ་ཡོད་པའི་སྐད་ཆ་ཐ་ཐོར་དེ་ཚོས་ཅི་ཡང་ཁུངས་སྐྱེལ་ཐུབ་ཀྱི་མ་རེད།
མི་ལ་རས་པའི་དངོས་ཡོད་ཀྱི་རྣམ་ཐར་དང་རྟོག་བཟོའི་སྒྲུང་རྣམ།
སྤོབས་པ་མཐའ་ཡས།
མི་ལ་རས་པ་ལ་བསྟོད་སྨད་གང་བྱས་རུང་མི་དངོས་གནས་ཞིག་བྱུང་མྱོང་བ་ལ་རྩོད་པ་མི་འདུག མི་དངོས་གནས་དེ་ག་འདྲ་ཞིག་ཡིན་ཞེ་ན། ཁྱིམ་ཚང་དབུལ་བོ་ཞིག་ནས་འཚར་ལོངས་བྱུང་ཞིང་མཐུ་ལ་བརྟེན་ནས་དགྲ་ཚར་བཅད་སྐད་ཀྱི་ཞེད་སྣང་ཞིག་ཀྱང་བསླངས་མྱོང་བ། བླ་མ་མར་པའི་གཡོག་པོར་གྱུར་པ། གཡོག་ལས་ཀྱི་ཞོར་དུ་མར་པའི་དྲུང་ནས་ཆོས་ཅུང་ཟད་རེ་ཡང་ཐོབ་པ། བླ་རྒན་ཆང་འཐུང་མཁན། བླ་རྒན་ཟེར་ན་ཡང་རབ་བྱུང་མ་རེད། སྣང་བ་སྤྲོ་དུས་ཆོས་གླུ་འདྲ་བོ་ལེན་འདུག་མཁན། ཚེ་སྨད་དུ་ཨ་ནེ་དང་། རྒན་ཆོས་བྱེད་མཁན་གཙོ་བོར་གྱུར་པའི་སློབ་མ་དང་སྦྱིན་བདག་ཀྱང་ཅུང་མང་པོ་ཡོད་པ། དགྲ་འདུལ་གཉེན་སྐྱོང་དང་རྒྱུ་ནོར་གསོག་འཇོག་དང་བུད་མེད་ཉར་བ་སོགས་མ་རབས་ཀྱི་ལས་ཀ་མི་བྱེད་མཁན་གྱི་ཆོས་པ་ངོ་མ་ཉམ་ཆུང་ཞིག་ཡིན་སྟབས་སུ་ཡིན་རུང་བསྟོད་པ་མ་གཏོགས་སྨད་པ་བྱེད་དོན་མེད་པ་དེ་འདྲ་ཞིག་རེད་འདུག
དེ་ལས་མང་བ་། “མི་ལ་རས་པའི་དངོས་ཡོད་ཀྱི་རྣམ་ཐར་དང་རྟོག་བཟོའི་སྒྲུང་རྣམ།” »
བརྩམས་སྒྲུང་དང་སྟོང་ཆ།
ཚེ་རིང་གི་བུ། ཉེ་ཆར་ནས་བཟུང་། བརྩམས་སྒྲུང་གི་དེབ་འདྲ་མི་འདྲ་ཞིག་ལ་ྐློག་འདོད་ཀྱི་སྤྲོ་བ་བརྟས། བློ་སྐྱེད་ཅིག་གི་ཆེད་དུ་ཟེར་ནའང་འདྲ། རང་གི་དང་དོད་ཟེར་ནའང་འདྲ། དུས་ཚོད་དམ་འཛིན་གྱིས་ཅན་རྡི་སྒར་དང་ཐག་རིང་པ་ཞེས་པ་དང་། གངས་རིའི་སྙིང་ཁྲག་ཅེས་པའི་ནོ་སྦེལ་རྩོམ་རིག་བྱ་དགའ་ཐོབ་པའི་བརྩམས་སྒྲུང་དེ་དག་ཀྱང་ྐློག་ཁུལ་བྱས། ནོ་སྦེལ་རྩོམ་རིག་གི་བྱ་དགའ་ཐོབ་ཟིན་པའི་བརྩམས་ཆོས་དེ་དག་ྐློག་ཞོར་དང་སློབ་སྦྱོང་བྱེད་ཡོང་དུས། ནོ་སྦེལ་བྱ་དགའ་ཐོབ་པའི་བརྩམས་ཆོས་ཕལ་མོ་ཆེ་ནི་བརྩམས་སྒྲུང་ཡིན་པ་དང་། བརྩམས་སྒྲུང་གི་ནང་དུ་སྤྱི་ཚོགས་ཤིག་གི་འཚོ་བ་དང་། འཚོ་བ་ལས་འཕྲོས་པའི་སྣང་བརྙན་སྣ་ཚོགས་ཤིག ྐློག་པ་པོའི་སེམས་ལ་ཕྱི་གསལ་ནང་གསལ་གྱིས་གསལ་སྟོན་དང་། དེ་ཡང་གསལ་སྟོན་བྱེད་པ་ཙམ་མ་ཡིན་པར་ྐློག་པ་པོའི་སེམས་ལ་འགུལ་སྐྱོད་གཏོང་ཐུབ་པར་མ་ཟད། གཟུགས་མེད་ཀྱི་བག་ཆགས་ཟབ་མོ་ཞིག་ཀྱང་ངམ་ངམ་ཤུགས་ཀྱིས་སྟེར་ཐུབ་པས། བརྩམས་སྒྲུང་ནི་ནོ་སྦེལ་རྩོམ་ཡིག་བྱ་དགའ་གནང་མཁན་ཚོའི་བསམ་པའི་ནགས་ཁྲོད་དུ་སྐྱེས་པའི་ཙན་དན་ལྟ་བུའང་རེད་ སྙམ། ང་རང་སྡོད་སའི་རྒྱལ་ཁབ་འདིར་མཚོན་ནའང་། བརྩམས་སྒྲུང་ནི་འགྲོ་རྒྱུགས་ཆེ་ཤོས་ཀྱི་གྲས་རེད། ྐློག་ཅེས་པའི་རྩོམ་རིག་དུས་དེབ་ཅིག་སྟེང་དུ། ལོ་རེར་བརྩམས་སྒྲུང་རྐྱང་བའི་དེབ་གྲངས་ཉིས་བརྒྱ་ནས་སུམ་བརྒྱའི་བར་དཔར་གྱི་ཡོད་པའི་རྩོམ་ཡིག་གཅིག་མཐོང་། རྩོམ་ཡིག་འདི་བྐླགས་མ་ཐག ང་ལ་འདང་རྒྱག་ཅིག་སྤྲད་བྱུང་། དེ་ནས་ངས་བོད་ཕྱི་ནང་གཉིས་ལ་བསམ་བློ་ཞིག་བཏང་། དངོས་གནས་སྙན་ངག་པའི་སྡེ་ནི་བཙན་པོའི་སྐབས་ཀྱི་དམག་དཔུང་བཞིན་མང་པོ་ཡོད་པ་རེད་དེ། བརྩམས་སྒྲུང་འབྲི་མཁན་གྱི་སྡེ་ནི་བརྒྱ་ལམ་ན་རེ་ཟུང་ཙམ་ལས་མི་འདུག ངོས་རང་རྒྱ་གར་དུ་ཡོད་དུས་ཀྱི་རིང་། བསམ་ཕྱོགས་གཅིག་པའི་བློས་ཐུབ་ཀྱི་གྲོགས་པོ་སྐོར་ཞིག་དང་ལྷན་དུ་བོད་ཀྱི་བརྩམས་སྒྲུང་གི་སྐོར་ལ་ཁ་བརྡ་མང་པོ་བྱས། བོད་ལ་བྱུང་བའི་བརྩམས་སྒྲུང་གི་ཐོག་མ་གང་རེད་ཅེས་དང་། རྟོག་པ་འཆར་ཡན་རིང་ལུགས་དང་། དངོས་ཡོད་སྒྱུ་འཕྲུལ་རིང་ལུགས་ཞེས་པ་སོགས་གང་འདྲ་ཞིག་ཡིན་མིན་གྱི་སྐོར་ལ་གླེང་སློང་བྱས། དེང་སང་འདང་རེ་བརྒྱབས་ན་དེ་དག་གལ་ཆེན་པོ་མ་རེད། དེ་རིང་ཁ་སང་ང་ལ་སེམས་ཁྲལ་ཞིག་ཡོད་པ་ནི་བོད་ལ་བརྩམས་སྒྲུང་ཁ་ཤས་ཤིག་ལས་མེད་པ་དེ་རེད། དཔེར་ན། བཀྲས་ཟུར་ཚང་གི་གཏམ་རྒྱུད་དང་། ཕལ་བའི་ཁྱིམ་ཚང་གི་སྐྱིད་སྡུག སྟོན་གྱི་རང་སྒྲ འཕོ་འགྱུར་ཟེར་བ་ལྟ་བུའི་སྒྲུང་རིང་དང་། དེ་མིན་གྱི་སྒྲུང་ཐུང་ཁ་ཤས་ཤིག་ལས་མེད། སྒྲུང་རིང་འབྲི་མཁན་མང་པོ་མེད་པའི་རྒྱུ་མཚན་གང་ཡིན་ནམ། སྤྱིར་བརྩམས་སྒྲུང་ནི་མི་རྣལ་མ་ཞིག་གི་ལས་ཀ་དང་། མི་ཞིབ་ཚགས་ཅན་ཞིག་མིན་ཚེ། སྒྲུང་གི་འགོ་བཙུགས་ནས་ཤོག་ངོས་གཅིག་ཀྱང་མ་ཚར་སྔོན་དུ་སྒྲུང་གི་མི་སྣ་བདག་པོ་རྒྱག་མི་ཐུབ། ཡིན་ནའང་། བོད་ཕྱི་ནང་གཉིས་སུ་ཡོད་པའི་ཤེས་ཡིན་པའི་གྲས་སུ་མི་རྣལ་མ་མང་པོ་ཡོད་ཀྱི་རེད་དེ། དེ་ཚོས་སྒྲུང་རྩོམ་འབྲི་བར་ལེ་ལོར་བྱེད་པའམ། ཡང་ན་དུས་ཚོད་གྲོན་པ་ལ་འཕང་སེམས་སྐྱེ་གི་ཡོད་མིན་ཆ་མ་འཚལ་མོད། འོན་ཀྱང་། འདི་ནི་ང་ཚོའི་སྟོང་ཆ་ཞིག་རེད། དྲང་མོར་བཤད་ན། སྒྲུང་རྩོམ་འདིས་མི་རིགས་ཀྱི་བསམ་བློ། མི་རིགས་ཀྱི་འཚོ་བ། མི་རིགས་ཀྱི་འདུ་ཤེས། མི་རིགས་ཀྱི་ལྟ་བ། མི་རིགས་ཀྱི་ཁྱད་ཆོས་སོགས་ཞིབ་འབྲི་བྱེད་ཐུབ་པར་མ་ཟད། ཧ་ལམ་སྒྲུང་རྩོམ་གཅིག་པུ་ལས་གཞན་གྱིས་འདི་ལ་རྔོ་མི་ཐོགས་སྟབས།…
དྭོགས་དྲི་ཆུང་ཆུང་ཞིག
རྗེ་མི་ལའི་རྣམ་ཐར་དང་མགུར་གླུ་དེ་རང་རྩོམ་མམ་རང་རྣམ་ཞིག་གི་རྣམ་པར་འཛིན་གྱི་འདུག་ལ། བོད་པ་མང་པོ་ཞིག་གིས་དེ་དག་མི་ལའི་གསུངས་ལ་བརྩིས་ནས། ལུངས་དྲངས་ཀྱི་འདུག ཡིན་ནའི་དོན་དངོས་སུ་དེབ་དེ་མི་ལ་གཤེགས་ནས་ལོ་ཉིས་བརྒྱའི་རྗེས་ལ་བྲིས་པ་ཞིག་ཡིན་པ་ལས། རྗེ་མི་ལའི་གསུངས་མིན་པ་ཐག་གི་ཆོད། དེབ་འདིའི་རྩོམ་པ་པོ་དངོས་ནི་རུས་པའི་རྒྱན་ནམ་གཙང་སྨྱོན་མ་ཡིན་ནམ། ཁ་སྔོན་ཕྱི་རྒྱལ་བའི་མཁས་དབང་ཞིག་ལ་རྗེ་མི་ལའི་རྣམ་ཐར་རྙིང་པ་ཞིག་བརྙེད་པའི་སྐོར་དང་། རྣམ་ཐར་དེའི་ནང་རྗེ་མི་ལའི་ཕ་དེ་མི་ལ་ལོ་ན་མཐོན་པོར་མ་སླེབས་བར་འཚོ་ཞུགས་ཡོད་པའི་སྐོར་བྲིས་པ་མ་ཟད། རྣམ་ཐར་དེ་ཚོའི་ནང་མགུར་དེ་འདྲ་མེད་ཚོད། མཁས་དབང་ཚོས་རྣམ་ཐར་འདི་གང་ལ་ཟེར་གྱི་ཡོད་མེད་དང་། སུས་བྲིས་མེད་མཁྱེན་གྱི་ཡོད་པས། ཁ་ཤས་ཀྱི་ཟེར་ན་རྒྱལ་བ་ཀརྨ་པས་རྣམ་ཐར་”མཛོད་ནང་མ་”ཟེར་བ་ཞིག་བྲིས་ཡོད་ཟེར། ཡིན་ནའི་དེ་གསང་དབང་དམ་པོ་བྱེད་ཀྱི་ཡོད་ཚོད། རྒྱུ་མཚན་ནི་རྣམ་ཐར་དེ་དང་ཡོངས་ཁྱབ་ཀྱི་མི་ནའི་མགུར་དང་རྣམ་ཐར་དེ་གཉིས་ཀྱི་དབར་ལ་ཁྱད་པར་ཆེན་པོ་ཡོད་ཟེར། དེ་བདེན་པ་རེད་པས།
ཀླུ་སྨྱོན་འཆི་བ་ལ་འཇིགས་པའི་སྐོར་ལས་འཕྲོས་པ།
སྤོབས་པ་མཐའ་ཡས།
སྤྱིར་བཏང་འཆི་བ་ནི་འགྲོ་བ་ཀུན་གྱིས་གྱི་གདོང་ལེན་བྱ་དགོས་པའི་ཆོས་ཉིད་ཅིག་ཡིན་སྟབས་ངོས་ལེན་བྱེད་མི་ཐུབ་པ་ཞིག་མིན། དེར་བརྟེན་འཇིག་རྟེན་གྱི་ཆོས་ཉིད་ལ་གོ་རྟོགས་མཐོན་པོར་སླེབས་པ་ཚོར་མཚོན་ན་འཆི་བ་ལ་འཇིགས་པ་མེད། རྗེ་མི་ལས་ཀྱང་། ང་འཆི་བས་འཇིགས་ནས་རི་ལ་ཕྱིན། །ནམ་འཆི་ཆ་མེད་བསྒོམས་བསྒོམས་ནས། །འཆི་མེད་གཉུག་མའི་བཙན་ས་ཟིན། །ད་འཆི་བའི་འཇིགས་པ་བོར་ཏེ་ཐལ། །ཞེས་གསུངས་པ་ལྟ་བུ་ཡིན། མི་མང་པོ་ཞིག་གི་སེམས་ལ་འཆི་བ་ནི་ཆེས་འཇིགས་ཤིང་ཡིད་དུ་མི་འོངས་བས་འཆི་བ་ལ་འཇིགས་པར་རློམ་བཞིན་ཡོད་ཀྱང་ལེགས་པར་བརྟགས་ན་སེམས་མི་བདེ་བའི་ཚོར་སྣང་དེ་ཚེ་འདིའི་སྣང་བ་འགག་པ་དང་འཆི་ཁའི་གནད་གཅོད་ཁོ་ན་ལ་་འཇིགས་པ་མ་ཡིན་ཞིང་གསོན་པའི་མི་ཚེའི་རིན་ཐང་ལ་བསམ་ནས་འཆི་བ་ངོས་ལེན་བྱེད་མི་འདོད་པའི་ཚོར་སྣང་ངམ་ཕངས་སེམས་ཤིག་སླེབས་ཡོང་བ་དེ་ཡིན།
དེ་ལས་མང་བ་། “ཀླུ་སྨྱོན་འཆི་བ་ལ་འཇིགས་པའི་སྐོར་ལས་འཕྲོས་པ།” »
འཆི་བདག་བདུད་ལ་ངོ་ཡ་མེད།
སྐྱེས་ནས་སྐད་ཅིག་ཙམ་ཡང་སྡོད་དབང་དེ་མེད་པར། ། འཆི་བདག་གཤིན་རྗེའི་དྲུང་དུ་བང་རྩལ་གྱིས་རྒྱུགས་པས། ། གསོན་པོ་ཟེར་ཡང་འཆི་བའི་ལམ་ཆེན་དུ་ཞུགས་འདུག ། ཉེས་ཅན་གསོད་སར་འཁྲིད་པའི་སྣང་ཚུལ་འདིས་སྐྱོ་བ། ། རྒྱལ་དབང་སྐལ་བཟང་རྒྱ་མཚོའི་གསུང་མགུར། ཁ་སང་དེ་རིང་ཞིག་ལ་འཆི་བའི་འཇིགས་སྐྲག་ཅིག་མ་བསམས་ས་ཟིག་ནས་ཡོང་གི་འདུག སྐབས་རེར་ནམ་གུང་དང་ལན་རེར་ཉིན་གུང་། ནད་པ་ཟུངས་ཟད་ཅིག་དང་འདྲ་བར་ང་ལ་འཆི་བའི་འཇིགས་སྣང་ཞིག་ཡོང་གི་འདུག བཙོན་མ་སྲོག་ཁྲིམས་བཅད་ཡོད་པ་ཞིག་དང་མཚུངས་པར་ང་ལ་འཆི་ཁའི་ཚོར་སྣང་ཞིག་སྐྱེ་གི་འདུག ཉལ་ཁང་སྟོང་བའི་ནང་དུ་གློག་ཀླད་ལ་ཅེར་དུས་ཀྱང་། བཟང་ས་ཉེ་སའི་མཉམ་དུ་ཟ་འཐུང་ལ་རོལ་དུས་ཀྱང་། མཛེས་སྡུག་ལྡན་པའི་སྤྱི་གླིང་ལ་འཆམ་འཆམ་དུ་འགྲོ་དུས་ཀྱང་། གནམ་གྲུར་བསྡད་དེ་ཐག་རིང་ལ་གུང་གསེང་དུ་བསྐྱོད་དུས་ཀྱང་། གོམ་པ་བརྒྱབ་ནས་ཐག་ཉེ་རུ་རྒྱུགས་བཤར་གློད་དུས་ཀྱང་། ང་ལ་འཆི་བདག་གི་མགྲོན་ཤོག་ཅིག་དུས་ཚོད་ངེས་མེད་ཅིག་གི་ནང་དུ་འབྱོར་ཡོད་པའི་ཚོར་སྣང་འཇིགས་པོ་ཞིག་སྐྱེ་གི་འདུག ལོ་ཚོད་ལ་དཔགས་ན་ད་དུང་འཆི་དགོས་པའི་དུས་ཚོད་མིན་ལ། གཟུགས་གཞིར་བརྟགས་ན་ཡང་ད་རུང་འཆི་དགོས་པའི་ན་ཚ་ཅི་ཡང་མེད། ཡིན་ན་ཡང་། འཆི་བདག་འདི་ངའི་ལུས་སེམས་ཀྱི་གྲུ་ཟུར་ཞིག་ཏུ་གྲགས་མེད་གཟུགས་མེད་ཀྱིས་ཡིབ་བསྡད་ཡོད་པའི་ཚོར་བ་ཞིག་གིས་ཉིན་མཚན་མེད་པར་ངའི་ལུས་སེམས་ཀྱི་ནུས་ཤུགས་གཅོག་གིན་འདུག ངའི་ཕུགས་བསམ་གྱི་རི་མོ་བསུབ་ཀྱིན་འདུག ངའི་སློབ་སྦྱོང་གི་སེམས་ཤུགས་ཀྱང་ཉམས་ཀྱིན་འདུག ཡང་སྐབས་རེར་བསམས་ན་ལོས་ཀྱང་ཡིན། ངའི་གཡས་ནས་རྒན་རྒོན་འཆི་གི་འདུག ངའི་གཡོན་ནས་དར་མ་འཆི་གི་འདུག ངའི་མདུན་ནས་བྱིས་པ་ཡང་འཆི་གི་འདུག་ལ། ངའི་རྒྱབ་ནས་རྒན་དར་གཞོན་གསུམ་སྡེབས་གཅིག་ལ་ཡང་འཆི་གི་འདུག་པས། ང་རང་ཡང་མི་འཆི་བའི་ཡིག་ཆ་དང་ཐེལ་ཙེ། ཡང་ན་ས་ཡིག་ཅིག་སུས་བརྒྱབ་ཡོད་དམ། འཆི་བའི་ཚོར་སྣང་འདིས་སྐབས་རེར་ནམ་གུང་གི་རྨི་ལམ་རིང་མོ་དཀྲོགས་ཡོང་གི་འདུག་ལ། མཚམས་རེར་ཉིན་གུང་གི་ཟ་མ་ཞིམ་པོའི་བྲོ་བ་ཡང་བརླགས་ཡོང་གི་འདུག སྐྱེ་འགྲོ་ཀུན་ལ་མཚོན་ན་སྐྱེ་བ་སྔ་ཕྱི་ཟེར་བ་དེ་ལ་ངོས་ལེན་ཡོད་མེད་གང་ལྟར་ཡང་འཆི་བ་འདི་ནི་ཇི་འདྲའི་འཇིགས་པོ་ཞིག་རེད་ཨང་། ཀུན་གྱིས་གཡོལ་ཐབས་བྱེད་པ་དེ་འཆི་བ་འདི་རེད་ལ་ཀུན་གྱིས་གཡོལ་ཐབས་བྲལ་བ་ཡང་འཆི་བ་འདི་རེད། ལོས་ཡིན། གྲོགས་ཨ་ཁུ་བློ་དར་ཟི་ལིང་ནས་རྒྱ་མིས་བརྡུངས་ནས་བསད། གྲོགས་དགེ་འདུན་བསྟན་པ་ལྷོ་ཕྱོགས་ནས་གློ་ནད་འཕར་ནས་གཤེགས། གྲོགས་བློ་བཟང་ཡེ་ཤེས་ཀང་ར་ནས་སྨན་པས་གཤགས་ནས་བཀྲོངས། དེའི་ཤུལ་དུ་ང་རང་ལ་འཆི་མེད་རྒས་མེད་ཀྱི་གདེང་སྤོབས་ཤིག་སུ་ཡིས་སྟེར། འཆི་བ་མི་དྲན་པའི་མི་རྣམས་ལ་དམིགས་ནས་སྔོན་གྱི་ནང་པའི་སློབ་དཔོན་སྙན་གྲགས་ཅན་དག་གིས་ངེས་པར་འཆི་བ་བསམ་པ། ནམ་འཆི་ངེས་མེད་བསམ་པ། འཆི་བའི་ཚེ་ཆོས་མ་གཏོགས་གཞན་གྱིས་མི་ཕན་པའི་དོན་ཚན་གསུམ་གྱི་སྒོ་ནས་འཆི་བ་དྲན་སྟངས་ཤིག་ཀྱང་གསུངས་ཡོད་པ་རེད་ལ། སློབ་དཔོན་ཞི་བ་ལྷས་གོང་གི་དོན་ཚན་འདི་གསུམ་ལ་དམིགས་ནས། སང་དང་འཇིག་རྟེན་ཕྱི་མ་གཉིས། །སྔོན་དུ་གང་འོང་ཆ་མེད་པས། །སང་གི་ཚིས་ལ་མི་འབད་པར། །ཕྱི་མའི་དོན་ལ་འབད་པར་རིག །ཅེས་པའི་ཁ་ཏ་ཞིག་ཀྱང་བྱས་ཡོད་པ་རེད། འཆི་བའི་འཇིགས་སྐྲག་འདི་མཐར་དེད་ན་ང་རང་མེད་པ་ཆགས་འགྲོ་རྒྱུ་རེད་བསམས་པའི་ཚོར་སྣང་ཞིག་ལ་ཐུག་ཡོད་པ་འདྲ། སྐྱེ་བ་སྔ་ཕྱི་ཁས་ལེན་པའི་ནང་པ་ཞིག་ལ་མཚོན་ན་ཡང་ང་རང་མེད་པ་ཆགས་པའམ་ཡང་ན་རྩ་བརླག་ཏུ་འགྲོ་རྒྱུ་རེད་བསམས་པའི་ཚོར་སྣང་འདི་རང་གིས་འཆི་བ་མི་འདོད་པའི་ཚོར་བ་དེ་ཡོང་གིན་ཡོད་པའམ་འཆི་བ་ལ་ཞེད་པའི་འཇིགས་སྐྲག་དེ་མྱོང་གི་ཡོད་པ་འདྲ། གང་ལྟར་ལོ་ཟླ་འདི་དག་ཏུ་ང་ལ་མཚོན་ན་འཆི་བདག་དེས་ང་རང་འགྲོ་ས་འདུག་ས་གང་སར་རྗེས་དེད་ནས་སླེབ་ཡོང་གིན་ཡོད་པའི་ཚོར་བ་དེ་ཇེ་མང་ནས་ཇེ་འཇིགས་རེད། འཆི་བའི་འཇིགས་སྣང་འདི་དང་འཆི་ཁའི་མནར་གཅོད་གཉིས་ཀྱི་གང་ཞིག་ཚབས་ཆེ་འམ། ངའི་ཉེ་འབྲེལ་སྐྱེས་དམན་ཞིག་ལོ་མང་ནད་ཀྱིས་མནར་ནས་ཤ་ཟད་རུས་པར་ཐུག་ཡོད་ཀྱང་འཆི་ཁའི་དུས་དུ་མནར་གཅོད་དྲག་པོ་ཞིག་གིས་གདུངས་ཏེ་གསར་བུ་རེ་རྐང་ལག་རེ་ལ་འཇུས་ཀྱང་ཐུབ་མི་ཐུབ་ཀི་ཚད་རེད་ཟེར།…
གྲྭ་བ་དང་བོད་མི་
གཡང་སྐྱབས་རྒྱལ། ངས་བོད་ཀྱི་རྒྱལ་རབས་ལ་བསམ་བློ་ཞིག་བཏང་། བོད་ཀྱི་བཙན་པོའི་སྐོར་ལ་བསམ་བློ་ཞིག་བཏང་། དགེ་འདུན་ཆོས་འཕེལ་གྱིས་གསུངས་པ་བཞིན་སུམ་གཉིས་ས་ཡི་ཁྱོན་ལ་དབང་བསྒྱུར་བ་དེ་ལ་བསམ་བློ་ཞིག་བཏང་། དེ་ནས་རྒྱ་བཙོན་ལུག་ལྟར་དེད་ཅེས་པའི་ཏུན་ཧོང་གི་ཚིག་དེ་ཚོ་དྲན། བོད་དམག་གི་ཁྲི་སྡེ་དང་སྟོང་སྡེ་དེ་ཚོ་ཡིད་ལ་འཆར། ཀི་སྒྲ་གྱེར་ནས་དགྲ་ལ་རྒྱུགས་པའི་རྣམ་པ་ཞིག་ཡིད་ལ་འཆར། དེ་ནས་བཙན་པོའི་དུས་རབས་མཇུག་སྒྲིལ་ཏེ་ལོ་བརྒྱ་སོང་། ལོ་ཉིས་བརྒྱ་སོང་། ལོ་སུམ་བརྒྱ་ཙམ་གྱི་མཇུག་དེར་འགྲོ་མགོན་འཕགས་པ་རྒྱ་ཡུལ་ནས་སླར་བོད་ཡུལ་དུ་ཕེབས་པའི་སྐབས་དེར་ཁོང་གིས་དགེ་འདུན་གྱི་སྡེ་ཁྲི་འབུམ་ཞིག་ལ་བསྙེན་བཀུར་མཛད་པའི་གནས་ཚུལ་ཞིག་རྙེད། བོད་ཀྱི་མི་འབོར་དེ་རིམ་གྱིས་དམག་དཔུང་ཞིག་ནས་དགེ་འདུན་པའི་སྡེ་ཞིག་ལ་བསྒྱུར་བ་མཐོང་། འདི་ལ་བསམས་སྐབས་བོད་མིའི་གྲངས་འབོར་དེ་རིམ་གྱིས་ཉམས་པ་ཞིག་ཡིད་ལ་ཤར། པཎ་ཆེན་སྐུ་གོང་མའི་གསུང་ཞིག་ལ། “བོད་ཀྱི་ཕོ་རྣམས་གྲྭ་བ་བྱས་ཀྱང་མོ་སྟོང་པར་ལུས་པ་མེད།”ཅེས་གསུངས་པ་རེད་ཟེར། འདི་ཡང་བདེན་སྲིད། ཡིན་ན་ཡང་ལོ་བརྒྱ་ཕྲག་མང་པོའི་ཡུན་ལ་བསམས་སྐབས་དགེ་འདུན་པའི་གྲངས་འབོར་ཆེ་བ་དེས་བོད་ཀྱི་མི་འབོར་ཇེ་ཉུང་ལ་གཏོང་བའི་ཐད་ནུས་ཤུགས་ཆེན་པོ་བཏོན་ཡོད་པ་རེད་བསམས་བྱུང་། འདི་མིན་ན་རྒྱལ་རབས་ལོ་རྒྱུས་ཀྱི་ནང་གི་མིའི་གྲངས་འབོར་དེ་ཚོ་གང་དུ་ཕྱིན་པ་རེད། འདི་ཡང་གྲོང་གསེབ་རེ་རེའི་ཁྱིམ་མི་དང་གྲྭ་བའི་གྲངས་འབོར་ལ་བརྟག་དཔྱད་ཅིག་བྱས་ན་ཤེས་རྒྱུ་ཞིག་ཏན་ཏན་ཡོད་པ་རེད།
སུམ་རྟགས་ཁ་སྐོང་ཐོ་རེ་མ།
དགེ་འདུན་རབ་གསལ་གྱིས། དུས་གསུམ་རྣམ་དབྱེ་སྟོན་པའི་ཕྲད༎ བོད་ཀྱི་སྐད་ལ་འདི་ལྟར་འགྲེལ༎ རྗོད་པའི་དུས་ཀྱི་རྣམ་དབྱེ་ལ། སྨྲ་བ་བོ་དང་བྱེད་པ་པོའི༎ དབྱེ་བས་རྣམ་པ་གཉིས་སུ་འགྱུར།། སྨྲ་བོ་བྱེད་པོ་གཅིག་ཡིན་ཚེ།། ངས་བྱ་ངས་བྱེད་ལྟ་བུ་ལ།། གི་ཡིན་གི་ཡོད་པ་ཡིན་འབྲི།། བྱེད་པོ་དངོས་སུ་ཡོད་མེད་ཀྱིས༎ ཚིག་ཕྲད་འདི་ལ་ཁྱད་འབྱིན་ཏེ༎ ངས་མཐོང་ང་ཤི་ལྟ་བུ་ལ༎ གི་རེད་གི་འདུག་པ་རེད་འབྲི༎ འདི་ལ་བྱ་བའི་རྣམ་པ་ཡིས༎ འདས་པའི་ཕྲད་ལ་ཁྱད་པར་འབྱིན༎ ཤེས་སོང་གོ་བྱུང་ལྟ་བུ་ཡིས༎ འདི་དག་རིམ་གྱིས་བསྒྲེས་པར་བྱ༎ སྨྲ་བོ་བྱེད་པོ་ལས་གཞན་ཚེ༎ འདས་དང་མ་འོངས་ད་ལྟ་ལ༎ པ་རེད་གི་རེད་གི་འདུག་འབྲི།། སྨྲ་བོས་བྱ་བ་མཐོང་མིན་གྱིས༎ འདས་པའི་ཕྲད་ལ་གཉིས་ཡོད་དེ༎ བྱ་ཚིག་མཐའ་ལ་སོང་དང་བཞག སྦྱོར་བའི་རིམ་པ་ཤེས་པར་བྱ༎ དྲི་བ་དང་ནི་ཐེ་ཚོམ་དང་༎ དེ་བཞིན་མཐའ་བཟུང་ཅན་རིགས་ལ༎ ཡིན་མིན་ཡོད་མེད་གཙོ་བོར་སྤྱོད༎ ཁམས་དང་ཨ་མདོའི་སྐད་ལུགས་ལ༎ དེ་མཚུངས་ཕྲད་ཀྱི་རྣམ་དབྱེ་མཆིས༎ ཕྱིན་ཐལ་འགྲོ་ལེ་ལྟ་བུ་དང་༎ བཏང་ང་བཏང་ཐལ་ལྟ་བུའོ༎ ༼གོང་གསལ་འདི་ནི་གླེང་སློང་གི་བསམ་ཚུལ་ཙམ་ཡིན་ལ། རིམ་གྱིས་རྗོད་པའི་རྣམ་དབྱེ་གཞན་ཡང་འདི་ལྟར་འབྲི་འཆར་ཡིན་པ་ལ་དགོངས་འཆར་གནང་རོགས་ཞུ།༽
ལམ་དབུ་མ་ནི་ཀླད་ཀོར་ཞིག་རེད།
ཚེ་རིང་གི་བུ། ལམ་དབུ་མ་ནི། ཏིན་གྱི་བསམ་བློར་གློ་བུར་དུ་འཁོར་ཡོང་བའི་ཐོད་བརྒལ་གྱི་ཚོད་ལྟ་ཞིག་དང་། རྒྱལ་ལོ་དོན་གྲུབ་ཀྱིས་བཙན་བྱོལ་དུ་ཁྱེར་ཡོང་བའི་བརྗོད་གཞི་གསར་པ་ཞིག གོང་ས་མཆོག་གི་ཐུགས་ཀྱི་ཞིང་བཀོད་དུ་འཁྲུངས་པའི་ཞི་བདེའི་ལྟ་གྲུབ་ཅིག བཙན་བྱོལ་བོད་གཞུང་གི་ཁ་ཕྱོགས་འགྱུར་བའི་གསར་བརྗེའི་ལེའུ་ཞིག ལམ་དབུ་མ་ནི། རྒྱལ་བ་རིན་པོ་ཆེའི་ཞལ་ལས་ཡང་ཡང་གསུང་བའི་བརྡ་ཆད་ཅིག སྐུ་ངོ་ཚོས་མང་ཚོགས་ལ་ཤུགས་ཀྱིས་སྐུལ་གྱིན་པའི་བསྒྲགས་གཏམ་ཞིག རང་སྲིད་རང་སྐྱོང་ལ་རེ་བ་མཁྲེང་བྱེད་ཀྱི་དྲང་བདེན་གྱི་ལྟ་བ་ཞིག བོད་རྒྱའི་གྲོས་མོལ་ཁྲོད་གོམས་སྲོལ་གྱིས་ལྡིང་གིན་པའི་ཞི་བདེའི་ལབ་གླེང་ཞིག ལམ་དབུ་མ་ནི། ཕ་བུ་གཉེན་འཕྲད་ཀྱི་ལོ་ཟླ་བསུ་མཁན་གྱི་དུས་རབས་ཀྱི་ཕོ་ཉ་ཞིག འཐབ་ན་མི་རྒྱལ་བ་མེད་པའི་བཏང་སྙོམས་ཅན་གྱི་གོ་མཚོན་ཞིག ཆོལ་གསུམ་ཆིག་སྒྲིལ་སླར་ཡང་སྡོམ་པའི་གཟུགས་མེད་ཀྱི་སྤོབས་པ་ཞིག གཞིས་ཀར་སླར་ལྡོག་གི་དུས་ཚིགས་གནང་བའི་ལོ་རྒྱུས་ཀྱི་གཟི་བ་ཞིག ལམ་དབུ་མ་ནི། གྲོས་ཚོགས་ཀྱི་བང་རིམ་ཁྲོད་ལྡིར་བའི་བྱམས་དུངས་ཀྱི་བརྗོད་བྱ་ཞིག བོད་ཀྱི་རིག་གཞུང་གི་ལྟ་གྲུབ་ལས་བརྡོལ་བའི་འཚེ་མེད་ཀྱི་ལྷག་བསམ་ཞིག རྒྱ་ནག་ལ་ཡང་ཡང་སྒྲོག་གིན་པའི་དཔྱོད་ཤེས་ཀྱི་རྒྱང་འབོད་ཅིག སྐྱབས་གནས་དང་དཔུང་གཉེན་འཚོལ་བྱེད་ཀྱི་བློ་རིག་གི་བསམ་བློ་ཞིག ལམ་དབུ་མ་ནི། ལོ་རྒྱུས་ཀྱི་དཀྱོགས་མཚམས་ཤིག་ནས་བརྡོལ་བའི་ཐ་སྙད་ཀྱི་རྩིབས་རུས་དཀར་པོ་ཞིག འགྲོ་བ་འདི་མུན་ནག་དོང་ལས་འདྲེན་པའི་དོན་ཡོད་ཀྱི་ཞགས་པ་ཞིག ཞི་བདེ་དང་དྲང་བདེན་གྱིས་བཏེགས་པའི་འོད་སྟོང་གི་དཔལ་འབར་ཞིག བདག་ཅག་གི་ཉམས་སྣང་ལ་མཆེད་ཀྱིན་པའི་རྒྱལ་ཁའི་མེ་ལྕེ་ཞིག ཡང་ན། ལམ་དབུ་མ་ནི། རང་དབང་རང་བཙན་གྱི་མགོ་བོར་ལྕགས་ཕུར་རྡེབ་པའི་ཐོ་བ་ནག་པོ་ཞིག མི་རིགས་འདི་ནམ་ཡང་བྲན་གཤིས་ཀྱིས་འཆིང་བའི་ལྕགས་སྒྲོག་འཁོལ་མ་ཞིག ཆབ་དཔལ་རིག་གསུམ་རྨེག་མེད་དུ་གཏོང་བའི་སྒྱོགས་མདེལ་ངར་མ་ཞིག ལོ་རྒྱུས་འདི་ཚལ་བ་ཚལ་ཕྱེད་དུ་གཤག་བྱེད་ཀྱི་སྲོག་ལྡན་རལ་གྲི་ཞིག ལམ་དབུ་མ་ནི། མི་རིགས་འདི་རེ་བས་ཕོངས་བྱེད་ཀྱི་ཧོལ་རྒྱུག་གི་ཐོད་རྒལ་ཞིག སྲོལ་རྒྱུན་བསམ་བློའི་རྩ་ལག་ནས་འབུས་པའི་སྒེར་གཅོད་ཀྱི་ལྟ་བ་ཞིག ནམ་ཡང་བགྲོད་ན་ཚར་རྒྱུ་མེད་པའི་ཀྱག་ཀྱོག་གི་ལམ་ཕྲན་ཞིག རེ་སྒུག་ཁྲོད་གཟིགས་ཅན་གྱིས་འདར་ཡང་མཐོང་རྒྱུ་མེད་པའི་དུངས་ཞེན་ཞིག ལམ་དབུ་མ་ནི། དུས་རབས་ཀྱི་ལས་དབང་གིས་བཀོད་སྒྲིག་བྱས་པའི་ལྕེབས་ཐག་རིང་པོ་ཞིག གཟི་བརྗིད་ཀྱི་ལོ་རྒྱུས་ཐུར་དུ་འདྲེན་པའི་ལན་ཆགས་ཀྱི་གཏིང་རྡོ་ཞིག གངས་ཅན་པའི་བླ་སྲོག་གི་རྩ་བར་ཐུམ་པའི་འཇིགས་ཉེན་གྱི་ཚོར་བ་ཞིག འཁོས་ཆུང་ཚོའི་སེམས་ཀྱི་སྟོང་ཆ་སྐོང་བའི་ཐབས་བཀོད་ཀྱི་སྲིད་ཇུས་ཤིག ལམ་དབུ་མ་ནི། མི་རབས་འདིའི་བློ་ངོར་འཕྲོད་དཀའ་བའི་རིས་སུ་ལྷུང་བའི་གྲུབ་མཐའ་ཞིག དམར་པོ་ལོག་ལྟ་བ་ཚོས་ནམ་ཡང་ཁས་ལེན་མི་བཏུབ་པའི་རྣམ་རྟོག་གི་རིག་པ་ཞིག མི་ལོ་སུམ་ཅུར་ཇི་ལྟར་བརྩོན་ཀྱང་ཐོན་དངོས་མེད་པའི་རིག་གནས་ཤིག མང་མང་གིས་གོ་བ་ལེན་དཀའ་བའི་དབུ་མ་གཞན་སྟོང་གི་ལྟ་བ་ཞིག ལམ་དབུ་མ་ནི། མི་རིགས་འདི་འཇིགས་ཉེན་ལས་སྐྱོབ་མི་ཐུབ་པའི་མི་རྗེ་སྡར་མ་ཞིག མ་འོངས་པའི་ལོ་རྒྱུས་ཁྲོད་གཡོ་ངེས་པའི་མིང་བརྡ་རྫོབ་པོ་ཞིག ཕྱི་རབས་པ་ཚོས་ལོ་རྒྱུས་ལྟ་ཚུལ་ལ་གནོད་པའི་ལེའུ་ནག་པོ་ཞིག ཁྱོད་དང་ང་ཡི་མཁུར་ཚོས་ན་བཞུར་བའི་སྐྱོ་གདུང་གི་མཆི་མ་རྡོག་པོ་གཅིག་དང་། མདོར་ན། ལམ་དབུ་མ་ནི། ནམ་ཡང་ཀླད་ཀོར་བསྣན་ན་ཀླད་ཀོར་ཐོབ་པའི་ཀླད་ཀོར་ཞིག་མ་ཡིན་ནམ།
ཆོལ་ཁ་གསུམ་དང་ཆོས་ལུགས་བཞི་ཟེར་རམ།
གཡང་སྐྱབས་རྒྱལ། ཆོལ་ཁ་དང་ཆོས་ལུགས་ཀྱི་སྐད་ཆ་བཤད་རྒྱུ་ནི་རྡ་རམ་ས་ལའི་ནང་གི་བརྗོད་གཞི་གནད་འགག་ཅན་ཞིག་ཡིན། མི་ཚང་མས་བརྗོད་གཞི་འདི་འཆད་སྐབས་གཟབ་ནན་གྱིས་བཤད་ཅིང་། བཤད་ཕྱོགས་ནོར་ཚེ་ཉེན་ཁ་ཡང་ཆེན་པོར་བརྩི། ངས་ཟམ་གདོང་རིན་པོ་ཆེའི་གསུང་བཤད་ཅིག་དྲན། ཁོང་གིས། ཆོལ་ཁ་ཆོས་ལུགས་ཀྱི་སྐད་ཆ་འདི་དང་འཐེན་འཁྱེར་འདི་བོད་མིའི་སྤྱི་ཚོགས་ནང་དངོས་གནས་མེད་གསུངས། དེའི་རྒྱུ་མཚན་ནི་གཉེན་སྒྲིག་གི་ཕྱོགས་ནས་ལྟོས་ན་ཤེས། ཁམས་པའི་བུ་མོ་ལ་སྟོད་པའི་མག་པ་ཡོད་ལ། ཨ་མདོའི་ཕོ་གསར་ལ་དབུས་པའི་མནའ་མ་ཡོད་ཟེར། འདི་ལ་རྒྱུ་མཚན་མི་འདུག་ཅེས་དྲན་གྱི་མེད། ཡུལ་ལུང་སོ་སོའི་གོམས་གཤིས་ཀྱི་ཆ་ནས་མཐུན་དང་མི་མཐུན། གཏམ་གྱི་བཤད་ཕྱོགས་ནས་མཐུན་མི་མཐུན། ཟས་ཟ་ཕྱོགས་ནས་མཐུན་མི་མཐུན་སོགས་ལོས་ཡོད། ཡིན་ན་ཡང་འདི་ཆོལ་ཁ་དང་ཆོས་ལུགས་ཀྱི་འཐེན་འཁྱེར་སོགས་ལས་རྒྱང་རིང་བའི་གནད་དོན་ཞིག་རེད། མི་སྒེར་པའི་མི་ཚེ་ལ་བརྟགས་སྐབས་ང་ཚོ་ལ་ཆོལ་ཁ་དང་ཆོས་ལུགས་ཀྱི་བར་འདི་ན་དགྲ་གཉེན་གྱི་ཚོར་བ་ལྗིད་ཏིག་གེ་བ་ཞིག་མེད། ང་ཁམས་པ་ལ་དགའ། ང་ལ་ཁམས་པའི་གྲོགས་པོ་ཡོད། ང་དབུས་པ་ལ་དགའ། ང་ལ་དབུས་པའི་གྲོགས་མོ་ཡོད། ང་ཨ་མདོ་ལ་དགའ། ང་རང་ཨ་མདོ་ནས་ཡིན། ང་ཆོལ་ཁ་གསུམ་ལ་དགའ། ང་ཆོལ་ཁ་གསུམ་གྱི་མི་ཡིན། ཐུགས་རྗེས་གཟིགས། ཆོལ་ཁ་དང་ཆོས་ལུགས་ཀྱི་གླེང་རྙོག་འདི་མ་གསུངས་རོགས། བོན་པོ་ནི་ངའི་ཕ་མེས་ཀྱི་ཆོས་ལུགས་ཡིན། དེང་ངས་བསངས་གསོལ་བྱེད་ཅིང་ལབ་རྩེ་བསྟོད་པ་དེ་ནས་ཡིན། རྙིང་མ་ནི་བོད་ཀྱི་ནང་ཆོས་ཐོག་མ་དེ་ཡིན། བོད་ལ་གྲུབ་ཐོབ་མང་བ་དེ་ནས་ཡིན། བཀའ་བརྒྱུད་པ་ནི་མར་པ་དང་མི་ལའི་ཟབ་ཆོས་ཡིན། བོད་ལ་རི་ཁྲོད་པ་མང་བ་དེ་ནས་ཡིན། ས་སྐྱ་པ་ནི་དགེ་ལུགས་པའི་ཡབ་ཆེན་ཡིན། དགེ་ལུགས་པ་ནི་གྲུབ་མཐའ་ཚང་མ་ལས་བཏུས་པའི་བསྟན་པ་རེད། དགེ་འདུན་གྱི་སྡེ་མང་བ་ནི་དེ་ལས་ཡིན། ངའི་གཡས་གཡོན་ལ་གཟིགས་དང་། ཕ་བོན་པོ་ལ་བུ་རྙིང་མ་བ་ཡོད། བུ་ས་སྐྱ་བའི་ཕ་དགེ་ལུགས་པ་ཡོད། སྤུན་རྙིང་མ་བའི་སྤུན་བཀའ་བརྒྱུད་པ་ཡོད། འདི་ཚོ་ཚང་མ་ངེད་ཀྱི་ཁྱིམ་མི་ཡིན། ཆོལ་ཁ་དང་ཆོས་ལུགས་མ་གསུངས་རོགས། དེ་ལ་འཐེན་འཁྱེར་མ་གནང་རོགས། ངའི་ལག་པ་ནས་འཐེན་ན་ང་ན་གི་འདུག ངའི་མགོ་ནས་མནན་ན་ང་ན་གི་འདུག ངའི་གྲོད་པར་གཞུས་ན་ང་ན་གི་འདུག ཐུགས་རྗེས་གཟིགས།
བགེགས་བར་ཆད་གཅིག
Lhaomodhondup Yutsang
མགོ་ནག་མི་ལ་ཁྱད་མཚར་གྱི་དགེ་མཚན་ཞིག་ལྡན་པ་ནི་རང་གི་མདུན་དུ་ལྷག་པའི་གནད་དོན་ལ་བསམ་ཤེས་པའི་རྣམ་རིག་གི་ས་བོན་ཞིག་ཤ་ཁྲག་གདོས་བཅས་ཀྱི་ཕུང་བོའི་གཤིན་ས་འདིར་བཏབ་ཡོད་པར་འཁུམས་ལ། མི་ཞིག་ཏུ་སྐྱེས་པའི་འོས་འགན་ལྕི་ཤོས་ཀྱང་རྙོག་འཛིང་ཆེ་བའི་རང་བྱུང་ཁམས་དང་སྤྱི་ཚོགས་ཀྱི་ཁོངས་སྣེ་གང་མང་བརྒྱུད་ནས་རང་གི་རྣམ་ཤེས་ཀྱི་རྣོ་དབལ་དར་ཞིང་རྒྱས་པར་བྱས་ཏེ། རང་གི་ཚེ་སྲོག་ལ་ནམ་ཡང་ནུབ་མི་སྲིད་པའི་འོད་མདངས་ཤིག་བསྐྲུན་རྒྱུ་འདི་རེད། དེས་རྐྱེན་པས་མིའི་རིགས་འཕེལ་ནས་ད་བར་མི་བུ་རེ་རེས་རང་གི་རྐང་རྗེས་ས་ལ་བསླན་ཕྱིར་སྡུག་ས་ན་ཡོད་པ་ཐམས་ཅད་ཕྲག་ཏུ་བླངས་ནས་ཕྱིར་རང་བྱུང་ཁམས་དང་སྤྱི་ཚོགས་འཚོ་བར་འཐབ་འཛིང་བྱེད་པའི་དམག་ཐབས་སྣ་ཚོགས་བཏོན་ནས། ལྟ་བ་དང་གྲུབ་མཐའ་ཅི་རིགས་ཀྱི་ཟུང་ཁྲག་ལ་བརྟེན་ནས་འཁོར་བསྐྱོད་བགྱི་བའི་ང་ཚོའི་མིག་ལམ་གྱི་བདེ་ཞིང་སྐྱིད་པའི་དག་ཞིང་འདི་གྲུབ་པ་རེད།
དེ་བས། ང་ཚོས་ཀྱང་རང་ཉེན་ཁ་ལས་སྐྱོབས་ཆེད་ཆོས་ཉིད་ཀྱི་ལམ་ཐིགས་འདི་བསྙེག་དགོས་པ་བསྙོན་མེད་རེད་ལ། དེ་ནི་ང་ཚོས་རང་གི་རྣམ་རིག་ལ་རྒྱ་ཆེ་ཞིང་གཏིང་ཚུགས་པའི་རྒྱུད་ལམ་ཞིག་བཟོ་དགོས་པ་སྟེ། དུས་ལ་རན་པའི་ལག་ལེན་སློབ་གསོའི་རིམ་པ་ཡང་དག་སྒོས་གཅིག་བརྩེགས་གཉིས་བརྩེགས་བྱ་རྒྱུ་འབའ་ཞིག་རེད། དེའང་མཁས་པའི་ཞལ་ལས་མི་ནི་སློབ་གསོའི་ཐོན་འབྲས་ཡིན་པའི་གཏན་ཚིགས་ཀྱི་མེ་ཏོག་འཁྲུངས་འདུག་པ་བཞིན། མི་ཡག་གཙོག་དང་མཁས་བླུན། མིའི་བདེ་སྡུག་སོགས་སློབ་གསོ་རིམ་པའི་ཚད་གཞི་ཡིས་ཐག་བཅད་པ་རང་གི་གཡས་གཡོན་གྱི་མིག་གིས་མཐོང་སར་བལྟས་ཚེ་ཁྲིགས་ཁྲིགས་རེད་ལ། བཙན་བྱོལ་ཁྲོད་ཀྱི་བོད་སྐད་ཡིག་གི་སྐྱ་ཤུར་ཤུར་གྱི་ནམ་ཟླ་འདིས་ང་ཚོ་ལ་གནས་ལུགས་འདི་ནམ་ལངས་ཉི་ཤར་གྱི་ཚད་དུ་དཀྲལ་འདུག་སེམས། ང་ཚོ་ས་འདིར་བྲོས་ཡོང་དོན་ཡང་རང་གི་ངོ་གདོང་མི་འབོར་བ་དང་རང་གི་སྐད་གདངས་མི་བརླག་པར་བདག་ཉར་བྱེད་རྒྱུའི་ཆེད་རེད་དེ། དམིགས་རྣམ་འདིའི་གྲུབ་དོན་ལ་བསམ་ཚེ་ད་ལྟ་མིག་ཆུ་དབང་མེད་དུ་གདོལ་ཚོད་རེད།
བོད་པ་སློབ་ཆེན་པ་ཞིག་གིས་རྒྱལ་སྤྱིའི་མི་དམངས་ལ་སྤྲིངས་བའི་འཕྲིན།
རོ་ལངས་སམ་གཟོར། (བོད་ཨ་མདོ་ནས)
གཅིག
བོད་མི་རིགས་ནི་ཞི་བདེ་ལ་ཧ་ཅང་དགའ་བའི་མི་རིགས་ཤིག་ཡིན། ད་ལྟ་རྒྱ་ནག་སྲིད་གཞུང་གི་ཡ་ང་བའི་གཉའ་གནོན་མང་པོ་མྱོང་བཞིན་ཡོད་ནའང༌། སྔར་བཞིན་དེ་བརྩོན་ལེན་བྱེད་པའི་སེམས་འདུན་གཏན་ནས་ཉམས་ཀྱི་མེད། འཛམ་གླིང་མི་དམངས་ཀུན་གྱིས་ཤེས་པ་ཞིག་ལ་སྤྱི་ལོ་གཉིས་སྟོང་བརྒྱད་ལོའི་ཟླ༣ཚེས༡༤ཉིན་འཛམ་གླིང་གི་མཐོ་སར་གནས་པའི་སྟོད་ཉི་མ་ལྷ་ས་ནས་མགོ་ནག་བོད་པ་ཚོས“ཞི་བའི་ལས་འགུལ”བསླངས་པ་ཀུན་ལ་གསལ་ཆ་ལྡན་པ་ཞིག་རེད། ཡིན་ན་ཡང༌། རྒྱ་ནག་སྲིད་གཞུང་གིས་འཛམ་གླིང་མི་མང་གི་མདུན་སར་དངོས་ཡོད་དང་མཐུན་པའི་དྲང་བདེན་གྱི་ངོ་བོའི་ཕྱོགས་ཙམ་མ་གླེང་བར་དེ་ནི“ཏཱ་ལའི་རུ་ཁག་གི་རྩ་འཛུགས”དང“ལྐོག་ཇུས་ཡིན་ལུགས”དང“མི་རིགས་ཁ་བྲལ་རིང་ལུགས”སོགས་ཀྱི་ནག་ཉེས་འགེལ་ཅི་ཐུབ་དང་སྐྱོན་བརྗོད་སྣ་ཚོགས་ཀྱི་སྒོ་ནས“ཞི་བའི་ལས་འགུལ”གྱི་ངོ་བོ་རྦད་དེ“རྡུང་བརླག་འཕྲོག་བསྲེག”གི་དོན་རྐྱེན་ཞིག་ཡིན་ཚུལ་འཛམ་གླིང་གི་ཁྱོན་ལ་ཁྱབ་བསྒྲགས་བྱས་པ་དེ་རེད། རང་ཉིད་ནང་ཁུལ་དུ་འཚོ་བའི་བོད་པ་ཞིག་གམ་མིའི་རིགས་ཀྱི་གཅེས་སུ་གྲུབ་པའི་རང་དབང་དང་དམངས་གཙོ། འདྲ་མཉམ། བདེན་དོན་ལ་བརྩི་བཀུར་བླ་མེད་གནང་བའི་སློབ་མ་ཞིག་ཡིན་པའི་ཆ་ནས་རྒྱ་ནག་སྲིད་གཞུང་གིས་བོད་མི་སེར་སྐྱ་མང་ཚོགས་ལ་ཐུབ་ཚོད་བཏང་དྲགས་པ་བཟོད་མ་ཐུབ་པ་དང༌། རྒྱ་ནག་སྲིད་གཞུང་གིས་བདེན་པ་རྫུན་དུ་བཅོས་པའི་ཀུན་སྤྱོད་ལ་དགག་བཞག་ནན་མོ་ཞིག་གཏོང་འདོད་པ་བཅས་རང་གི་མཐོང་ཐོས་དང་བསམ་ཚུལ་དེ་དྲང་བརྗོད་ཀྱི་ལམ་ནས་འུ་ཚོའི་ལོ་རྒྱུས་ཀྱི་བདེན་པ་ལ་འགན་ཁུར་བའི་སྐད་ཆ་ཐུང་ངུ་ཞིག་རྒྱལ་སྤྱིའི་མི་དམངས་ལ་བརྗོད་འདོད་པ་ཡིན།
དེ་ལས་མང་བ་། “བོད་པ་སློབ་ཆེན་པ་ཞིག་གིས་རྒྱལ་སྤྱིའི་མི་དམངས་ལ་སྤྲིངས་བའི་འཕྲིན།” »
ནམ་ཉི་མ་ཞིག་ལ་ཕ་མ་དང་དགེ་རྒན་གཉིས་འཛིང་རེ་ཤོར་ཚོད་འདུག
གཡུ་དྲུག་དཀར།
ཉིན་ཤས་སྔོན་ལ་ལས་དོན་ཞིག་གི་རྐྱེན་པས་ཉིན་གཅིག་གི་དགོངས་ཤོག་བླངས་ཏེ་རྡ་སར་ཕྱིན་པ་ཡིན། ཉིན་དེར་རྡ་སའི་ཁྲོམ་ན་དུས་རྒྱུན་དང་མི་འདྲ་བའི་མི་ཚོགས་་གཞན་ཞིག་མཐོང་རྒྱུ་ཡོད་པ་ནི་སྒྲིག་ཆས་གྱོན་པའི་སློབ་ཕྲུག་ཁྱུ་རེ་འདུག་ཚོད་མེད་པར་གང་སར་རྒྱུགས་བཞིན་པ་དེ་རེད་ལ། ཆར་དུས་ཀྱི་རྡ་སའི་ནམ་ཟླའང་སྐྱོ་སྡུག་གི་ཁུར་བོ་ལྕི་མོ་ཞིག་དང་འདྲ་བར་ཕྱོགས་བཅུའི་མགྲོན་པོ་ཡོངས་ལ་ཉོབ་སྣང་དང་དཀའ་ཚགས་ཆེན་པོ་བཟོ་ངེས་ཚོད་དུ་སྣང་ཡང་། རྡ་སའི་རི་ཁུག་གི་ཟ་ཁང་ཆུང་ཆུང་ཞིག་གི་སྦུག་ནས་ངས་རེ་བ་ཆེན་པོས་འཕོང་ཞིང་ཐེ་ཚོམ་དང་དོགས་པའི་རྒྱ་རུ་ཚུད་པའི་ངོ་གདོང་གཞན་ཞིག་མཐོང་པ་དང་། ཞེད་སྣང་དང་འཇིགས་སྐྲག་གི་ཁུར་བོ་ལྕི་མོ་ཞིག་ཁུར་ནས་ཕྱིར་ལོག་དགོས་བྱུང་།
དེ་ཡང་དོན་དག་འབྱུང་རྩ་སློབ་ཕྲུག་དང་ཁོང་ཚོའི་ཕ་མ། དགེ་རྒན་བཅས་ཀྱི་སྟེང་ནས་བྱུང་བ་རེད། ཉིན་དེའི་ཉིན་གུང་ཡོལ་ཙམ་ལ་གྲོགས་པོ་ཞིག་གི་བཀོད་སྒྲིག་བཞིན་ངེད་གཉིས་ཨ་མདོའི་གྲོང་གསེབ་ཀྱི་ཟ་ཁང་ཞིག་ཏུ་འཛུལ་བ་ཡིན། ཟ་ཁང་ནང་དུ་སླེབས་མ་ཐག་ངས་སྔོན་ཆད་འདིར་ཡོང་མྱོང་འདུག་ཨང་སྙམ་ཡང་། སྦྱིན་བདག་དང་ཁོང་གི་ཕྱག་རོགས་པ་སུ་ཡང་ངོ་ཤེས་ཀྱི་མི་འདུག འོན་ཀྱང་། ངའི་གྲོགས་པོ་དང་ཟ་ཁང་གི་སྦྱིན་བདག་གཉིས་ཕན་ཚུན་རྒྱུས་ཡོད་རེད་འདུག ཁོང་གཉིས་ཀྱིས་ཕན་ཚུན་ལ་འཚམས་འདྲི་རེ་བྱས་མ་ཐག ཕར་ལྟོས་ཚོད་ལ་གུང་གསེང་ལ་སླེབས་པའི་སློབ་ཕྲུག་གཉིས་ལོས་ཡིན་བསམ་པའི་བུ་གུ་ཆུང་ཆུང་གཉིས་ཀྱང་སྦྱིན་བདག་གི་གམ་དུ་ཡོང་ནས་བསྡད་པ་དང་། སྦྱིན་བདག་གིས་ འདི་ངའི་ཞི་ལི་མཁར་བྱམས་ཚེ་རིང་དང་འདི་ངའི་ཞི་མོ་གཡང་འཚོ་རེད། ཁོང་གཉིས་ད་ལྟ་རྡ་སྟེང་སློབ་གྲྭར་འགྲོ་གི་ཡོད། ཅེས་ངའི་གྲོགས་པོར་ངོ་སྤྲོད་བྱས་སོང་ལ། ཁོས་མགོ་ནང་ལ་གཡུག་བཞིན་ངའི་གདོང་ལ་ཅེར་ནས་ འདི་ངའི་ཕ་ཡུལ་གཅིག་པའི་ཞི་ལི་དེ་རེད། ཁོ་ད་ལྟ་གསོག་སྒར་སློབ་གྲྭའི་དགེ་རྒན་རེད། ཅེས་ཕར་འགྲེལ་བཤད་བརྒྱབས་བྱུང་པས། ངས་ཀྱང་གདོང་ལ་འཛུམ་ཞིག་མི་སྟོན་ཐབས་ག་མེད་བྱུང་། སྐབས་དེར་ཟ་ཁང་གི་སྦྱིན་བདག་གམ་སློབ་ཕྲུག་གཉིས་ཀྱི་ཨ་ཕས་ཐ་མག་རྐང་གཅིག་ལ་མེ་སྒོ་ཞོར་གློ་བུར་དུ་ཅི་ཞིག་དྲན་པ་ལྟར་་བཙན་བྱོལ་སྤྱི་ཚོགས་ཁྲོད་ཀྱི་བོད་ཡིག་དགེ་རྒན་འདི་ཚོས་ཅི་གང་ཤེས་ཀྱི་མི་འདུག འདི་ཚོ་ངོ་མ་སྐྱོ་བོ་རེད། ཁོང་ཚོར་ཤེས་བྱ་ཡོན་ཏན་མེད་ན། བུ་གུ་ལ་ཅི་ཞིག་སློབ་ཀྱི་ཡོད་ན། བུ་གུ་འཛིན་གྲྭ་དྲུག་དང་བདུན་པ་སླེབས་ནའང་། བོད་ཡིག་སྦྱོར་ྐློག་རྒྱག་ཤེས་ཀྱི་མི་འདུག ངོ་མ་འདི་ཚོ་སྐྲག་ས་རེད། ད་དུང་མི་དགོས་རྒྱུ། བུ་གུ་ཚོར་སྤོ་ལོ་རྩེད་སྟངས་སློབ་ཀྱི་འདུག དེ་མ་བསླབ་དགོས་པ་ཞིག་མ་རེད། བུ་གུ་ཚོ་སྤོ་ལོ་ལ་དགའ་བོ་ཡོད་ཙང་། རང་བཞིན་གྱིས་ཤེས་འགྲོ་གི་རེད། ང་ཚོའི་ཕ་ཡུལ་གྱི་དགེ་རྒན་དེ་ཚོ་འདི་འདྲ་ག་བ་ཡིན་གི་རེད། ཅེས་བརྗོད་བྱུང་པས། ང་ངོ་གནོང་བ་ལྟ་བུ་ཞིག་བྱུང་ལ། ངའི་གྲོགས་པོས་ཀྱང་ང་ལ་བསམ་ཤེས་ཀྱི་ཚུལ་གྱིས་དགེ་རྒན་ཚང་མ་དེ་འདྲ་ཡིན་རྒྱུ་མ་རེད་ཅེས་བརྗོད་མ་ཐག་ སྦྱིན་བདག་གིས་ད་དུང་ཅི་ཞིག་བཤད་རྩིས་འདུག་མོད། མགྲོན་པོ་ཞིག་གིས་དངུལ་རྩིས་ལེན་རོགས་ཞུས་པས་ཁོང་འགྲོ་དགོས་ཐུག་སོང་།
དེ་ལས་མང་བ་། “ནམ་ཉི་མ་ཞིག་ལ་ཕ་མ་དང་དགེ་རྒན་གཉིས་འཛིང་རེ་ཤོར་ཚོད་འདུག” »
བོད་མིའི་ཆིག་སྒྲིལ་ནི་ང་ཚོའི་རེ་བ་གཅིག་པོ་དེ་ཡིན།
འཕན་མྱི།
ཁར་སང་གི་ངའི་རྩོམ་ཡིག་ཐེབས་ཆག་དེ་ཡང་ཁ་ཤས་ཀྱིས་བྐླགས་འདུག་ཅིང་ཁོང་རྣམ་པས་འཛེམས་ཟོན་མེད་པར་དགོང་འཆར་ལྷུག་པོར་གནང་བ་ལ་ཐུགས་རྗེ་ཆེ་ཞེས་ཞུ་རྒྱུ་དང་འདིར་ཡང་གསལ་བཤད་ཀྱི་ཚབ་ཏུ་སྙན་གཙེར་ཅུང་ཙམ་མི་ཞུ་ཐབས་མེད་བྱུང་། ༸གོང་ས་སྐྱབས་མགོན་ཆེན་པོའི་ཞལ་ནས་ཀྱང་ང་ཚོ་ནམ་ཡིན་ཡང་གངས་ཅན་པ་ཟེར་བའི་ཚིག་དེའི་འོག་ཏུ་སྡོད་རྒྱུ་དེ་གལ་ཆེན་པོ་རེད་གསུངས་པ་དེའི་དགོང་དོན་བཞིན་སྟོད་མངའ་རིས་ནས་སྨད་ཁམས་ཀྱི་མཐའ་དར་རྩེ་མདོ་དང་ཨ་མདོའི་མཐའ་མཚམས་བར་གྱི་བོད་མི་རྩམ་ཟན་ཡོད་དོ་ཅོག་རྡོག་རྩ་གཅིག་ཏུ་སྒྲིལ་རྒྱུ་དེ་ནི་ང་ཚོའི་རེ་བ་དང་དམིགས་ཡུལ་ཐ་ན་ང་ཚོ་སྐྱབས་བཅོལ་དུ་སྡོད་དགོས་དོན་ཡང་དེ་ཡིན། ང་ཚོའི་དབུ་མའི་ལམ་དེ་ཡང་ཚད་དམའ་ས་ནས་བཤད་སྐབས་བོད་ཆོལ་ཁ་གསུམ་གཅིག་ཏུ་སྒྲིལ་བའི་མི་རིགས་ས་ཁོངས་རང་སྐྱོང་ཙམ་ཞིག་ལ་བབ་འགྲོ་གི་ཡོད་པ་དེ་རེད། ཆབ་སྲིད་ཀྱི་བསམ་བློ་དང་བསམ་བློ་ཞེས་པ་དེ་ཁོགས་རྒྱ་ཡངས་པོ་དང་དག་སྣང་གི་ལྟ་སྟངས་དང་རྦད་དེ་རྒྱབ་འགལ་དུ་གྱུར་པ་ཞིག་ཡིན་སྟབས་ང་ཚོས་ཕྱི་རྒྱ་ནག་ལ་ལྟོས་ན་ཡང་འདྲ། ནང་སྤུན་ཟླ་བོད་མི་ལ་ལྟོས་ན་ཡང་འདྲ། ཆབ་སྲིད་ཀྱི་ཆེ་ཕྲ་གང་ཞིག་སུས་འཇོན་ཡང་དེ་ཉིད་བོད་གངས་ཅན་པ་ཞེས་པའི་ཁྱབ་ཁོངས་ཡོངས་རྫོགས་ཀྱི་ཐ་སྙད་འདི་བོར་མི་རུང་བ་ཞིག་རེད། གལ་ཏེ་མ་འགྲིགས་པ་ཞིག་ཡོད་ན་དེ་མ་འགྲིགས་པའི་སར་འཇོག་པ་ལས་ཡང་བརྡབས་བསྐྱར་བརྡབས་ཀྱིས་གླེང་ན་ཇེ་བཙོག་ཏུ་འགྲོ་བ་ལས་དགོས་པ་ཅི་ཡོད་སྙམ་པ་ལྟ་བུ་ཞིག་ཡིན་ཡང་རང་རེ་ལ་མི་དགོས་པའི་བྱ་བ་དེ་རིགས་སྲོལ་རྒྱུན་ལྟ་བུར་གྱུར་ན་ཆུང་ས་ནས་བཙན་བྱོལ་བོད་མིའི་མཐུན་སྒྲིལ་དང་ཆེ་ས་ནས་༸གོང་ས་སྐྱབས་མགོན་ཆེན་པོའི་དགོང་གཞི་དང་བོད་རྒྱ་ཆེའི་མི་དམངས་ཀྱི་མངོན་འདོད་ངོ་མ་སྟེ་བོད་གངས་ཅན་པ་ཡོངས་རྫོགས་ཆིག་སྒྲིལ་གྱི་ལས་ལ་ཡང་གནོད་སྐྱོན་གྱི་རྒྱུ་རུ་འགྱུར་མི་སྲིད་པ་མ་ཡིན་པས་ངས་འདི་ལྟར་གླེང་དགོས་བྱུང་སོང་།
མཆན་འགོད་མཁན་འགའ་ཞིག་གིས་ངས་འཕན་པོ་དང་མལ་གྲོ་གུང་དཀར་ཡས་མས་ཀྱི་དེབ་ཅིག་ཕྱོགས་ཀྱིས་དང་སུས་འགོག་མི་ཡོང་ལྟ་བུའི་བཀའ་བཀྱོན་གནང་འདུག་པ་དེ་བདེན་པ་རེད། ཡིན་ན་ཡང་ངས་བཤད་པ་དེ་ང་ཚོ་བོད་མི་མི་རེའི་དེབ་རེ་སྒྲིག་དགོས་ན་འཇོན་ཁག་པོ་རེད། འཇོན་ཐང་ཡོད་མཁན་ཚོས་གངས་ཅན་པ་ཡོངས་རྫོགས་ཀྱི་ཚབ་བྱེད་ཐུབ་ན་ཡག་པོ་བྱུང་འདུག་ཅེས་ཞུ་བཞིན་ཡོད། དཔེར་ན་ནང་མི་སྤུན་མཆེད་གསུམ་གྱི་ནང་ནས་གཅིག་ལ་དངུལ་ཡོད་གཉིས་ལ་དངུལ་མེད་ན་དངུལ་ཡོད་མཁན་དེས་མེད་མཁན་དེ་གཉིས་ལ་རོགས་པ་བྱེད་དགོས་པ་ནང་བཞིན་རེད་ཅེས་ཞུ་བཞིན་ཡོད། འདས་པའི་ལོ་རྒྱུས་ཀྱི་ནང་དུ་བོད་ཀྱི་ཡུལ་ལུང་བྱེ་བྲག་པ་དང་སྡེ་དཔོན་ཉི་ཚེ་བ་ཚོས་རང་མགོ་གར་ཐོན་བྱས་ན་འགྲིགས་འགྲོ་བསམ་པ་དེས་ཐ་མ་ཆག་ཆེ་ཉམས་ང་འདི་ཉོས་པ་རེད། དེ་བཞིན་རང་རེ་བོད་ལ་མཚོན་ན་རང་མགོ་གར་ཐོན་གྱི་ལས་འདི་ཆོལ་ཁ་དང་། སྡེ་ཚོ། མི་སྒེར་གང་ཞིག་ཡིན་ན་ཡང་སྤངས་བྱ་ཞིག་ལས་བླངས་བྱ་ཞིག་མ་ཡིན་སྟབས་འདིས་མཇུག་འབྲས་ཏེ་ཡག་པོ་ཡོང་རྒྱུ་མ་རེད་ཅེས་ཤོད་བཞིན་ཡོད། སྤྱིར་བཏང་ངས་ཁ་བཙུམ་ནས་སྡོད་ཐུབ་ཀྱི་རེད། དེ་བཞིན་ཆོལ་ཁ་གསུམ་གྱི་མི་གཞན་ཚོས་ཀྱང་ཁ་བཙུམ་ནས་སྡོད་ཀྱི་རེད། ཡིན་ན་ཡང་རྒྱ་མིས་ཁ་བཙུམ་རོགས་བྱེད་ཀྱི་མ་རེད། ཉིན་ཞིག་ལ་རྒྱ་མིས་དེ་གོ་སྐབས་ཤིག་ལ་བརྩིས་ཏེ་བོད་ཆོལ་ཁ་གསུམ་གཅིག་ཏུ་སྒྲིལ་ཟེར་བ་ཞིག་ཡོད་པ་མ་རེད། ཏཱ་ལའི་བླ་མ་རང་གི་གཞུང་གི་བཀའ་བློན་དང་སྤྱི་མཐུས་ཟུར་པ་ཚོས་ཀྱང་ཨ་མདོ་བའི་ཆེད་དུ་དེབ་ཅིག་ལོགས་སུ་བཟོས་པ་དེས་ཨ་མདོ་དེ་བོད་ཁོངས་སུ་མ་ཚུད་པའི་དཔང་རྟགས་རེད་ཟེར་ནས་ཏག་ཏག་གྲུབ་འབྲས་ལྡོག་ཕྱོགས་ནས་སྨིན་པའི་ལས་དེ་འདྲར་ཡང་འགྱུར་མི་སྲིད་པས་ང་ཞེད་ཀྱིན་འདུག རྒྱ་མིས་བོད་རྒྱའི་ཁོངས་རེད་ཟེར་ནས་འཛམ་བུ་གླིང་པ་ཕལ་མོ་ཆེ་ཡང་མགོ་འཐོམ་དགོས་པ་ཞིག་བཟོས་པ་དེ་ཚོར་ཡང་གཞི་འཛིན་ས་འདི་འདྲ་རེ་ལས་མེད་པ་རེད།
དེ་ལས་མང་བ་། “བོད་མིའི་ཆིག་སྒྲིལ་ནི་ང་ཚོའི་རེ་བ་གཅིག་པོ་དེ་ཡིན།” »
ས་བྱི་ཞི་རྒོལ་གྱི་དེབ་དང་ཕྱོགས་རེ་བའི་བྱ་བཞག
འཕན་མྱི། ས་བྱི་ཞི་རྒོལ་ཆེན་མོ་ལོ་རྒྱུས་སུ་བཀོད་པའི་དེབ་ཅིག་འགྲེལ་སྤེལ་བྱས་པ་ནི་ཆེས་ཤིན་ཏུ་གལ་གནད་ཆེ་ཞིང་དུས་སུ་བབ་པའི་བྱ་བཞག་ཅིག་ཡིན་མོད། ཡིན་ན་ཡང་ཕྱོགས་དང་རིས་སུ་མ་ཆད་པར་གངས་ཅན་པ་ཡོངས་རྫོགས་ཀྱི་ཚབ་བྱེད་ཐུབ་པའི་དེབ་ཅིག་འདོན་ཐུབ་ན་དེ་ལས་ཀྱང་རྟགས་རྟེན་མ་འཛོལ་བ་ཞིག་ཡོང་རྒྱུ་ཡིན། འོན་ཀྱང་དེའི་རྩོམ་སྒྲིག་པ་དང་། ནང་དོན། ཐ་ན་དབུ་འབྱེད་མཛད་སྒོའི་སྐུ་མགྲོན་ཡན་ཆད་བཅས་མདོར་ན་སྦྱོར་དངོས་རྗེས་གསུམ་ཚང་མ་ཡང་མདོ་སྨད་ཆོལ་ཁ་ཟེར་བ་འདི་གཙོ་བོར་བཟུང་བའི་ཆེས་ཕྱོགས་རེ་བ་ཞིག་ཏུ་གྱུར་པ་འདི་ཡང་བློ་མིག་གུ་དོག་པོ་ཅན་ཞིག་གི་ངོར་བྱས་ན་དེ་ཙམ་མ་འཚམས་པ་ཞིག་ཏུ་གྱུར་འདུག་སྙམ། ཆབ་སྲིད་ཀྱི་ལྟ་སྟངས་ཞེས་པ་དེ་ནི་གུ་དོག་གི་མཐར་ཐུག་པའི་བསམ་བློ་ཞིག་ཡིན་སྟབས་དགྲ་གཉེན་གང་ཕྱོགས་ལ་ལྟོས་ཀྱང་དེ་ཙམ་ཡིད་ངོར་འབབ་པ་ཞིག་མ་བྱུང་བས་འདི་ལྟར་གླེང་དགོས་བྱུང་། དེའི་སྐོར་རྩོམ་སྒྲིག་པ་ཁོ་རང་ཚོའི་བྱས་རྗེས་ངོམ་པ་དང་ཆབ་ཅིག་དུ་སེམས་ནང་གི་ན་ཚ་དེ་ལ་མི་རེག་ཐབས་མེད་ཅིག་ཀྱང་བྱུང་འདུག རྩོམ་སྒྲིག་པ་སྤྱི་ཟུར་ཧོར་གཙང་འཇིགས་མེད་ཟེར་བ་དེས་སྔོན་གླེང་དང་འབྲེལ་བའི་གཏམ་བཤད་དེར་བོད་ཆོལ་ཁ་གསུམ་ལ་ཞི་རྒོལ་བྱུང་རྐྱེན་མདོ་སྨད་ཆོལ་ཁའི་ཤེས་ལྡན་མི་སྣ་སྐོར་ཞིག་རྩ་འཛུགས་བྱས་ནས་བྲིས་པ་ཡིན་ཚུལ་འདུག ས་བྱི་ཞི་རྒོལ་དེ་བོད་ཆོལ་ཁ་གསུམ་ནས་བྱུང་སྟབས་དེ་ལ་དམིགས་བསལ་མདོ་སྨད་ཆོལ་ཁའི་ཤེས་ལྡན་མི་སྣ་གདམས་དགོས་པའི་རྒྱུ་མཚན་མི་འདུག་སྙམ། གལ་དེ་མི་སྣ་གདམས་སྒྲུག་སོགས་ཀྱི་གོ་སྐབས་མ་བྱུང་ནས་རྩོམ་སྒྲིག་པ་ཆ་ཚང་མདོ་སྨད་ཀྱི་ཁོངས་ནས་ཡོང་དགོས་བྱུང་ཡང་ཤེས་ལྡན་གྱི་བོད་མི་སྐོར་གཅིག་ཅེས་བྲིས་པས་ཆོག་པ་ལས་དམིགས་བསལ་གྱི་མདོ་སྨད་པ་སྐོར་ཞིག་སོགས་འབྲི་དགོས་དོན་མི་འདུག་སྙམ། གལ་སྲིད་མི་དེ་ཚོས་ངལ་བ་དང་དུ་བླངས་པའི་བྱས་རྗེས་ཤེས་ཆེད་དུ་རྩོམ་སྒྲིག་པ་སོགས་མི་རང་རང་གི་མིང་བཀོད་ན་འཐུས་པ་ལས་མདོ་སྨད་ཅེས་པའི་ཡུལ་ཕྱོགས་རེ་བ་དམིགས་སུ་བཟུངས་བ་དེས་ཁོ་རང་ཚོའི་བྱས་རྗེས་ཀྱང་ཇེ་ཆུང་དུ་བཏང་འདུག དེ་བཞིན་དཔེ་དེབ་དེའི་ནང་དོན་ཡང་སྔོན་ལ་མདོ་སྨད་ཕྱོགས་སུ་ཁོ་ཚོར་རྒྱུས་ཡོད་སྟབས་དེ་གཙོ་བོར་བྲིས་ཚུལ་སོགས་བཤད་འདུག་ཀྱང་མཁས་པས་བཤད་ན་ཅི་ཡང་བདེན་ཟེར་བ་འདྲ་ཡིན་ན་མ་གཏོགས་ས་བྱི་ཞི་རྒོལ་གྱི་ཆ་ཤས་ཤིག་མ་གཏོགས་འབྲི་མ་ཐུབ་ན་མིང་དེས་ཁྱབ་ཆེ་བའི་སྐྱོན་ཞིག་བྱུང་འདུག སྔོན་ལ་ཞེས་པར་བལྟས་ན་རྗེས་ལ་དབུས་གཙང་དང་མདོ་སྟོད་རྒྱུད་དུ་བྱུང་ཚུལ་ཡང་མུ་མཐུད་ནས་འབྲི་རྒྱུ་ཡིན་པའི་བཟོ་ལྟ་ཡིན་ནམ། དཔེ་དེབ་དབུ་འབྱེད་མཛད་སྒོའི་ཐོག་ཀིརྟི་སྤྲུལ་སྐུ་དང་ཨ་ལགས་འཇིགས་མེད་གཉིས་མགྲོན་འབོད་གཏམ་བཤད་སྤེལ་དུ་འཇུག་པ་དེ་ཡང་དམིགས་བསལ་བ་ཞིག་ཡིན་ཞིང་ཨ་ལགས་འཇིགས་མེད་ཀྱི་གཏམ་བཤད་དེ་ཡང་ཁྱད་མཚར་འདུག ཁོང་གིས་གསུངས་དོན་ལ་རྒྱ་དམར་གྱིས་རྒྱལ་བ་རིན་པོ་ཆེར་སྐྱོན་བརྗོད་འདྲ་མིན་བྱེད་བཞིན་པ་དེར་བོད་གཞུང་སྒེར་སུས་ཀྱང་ལན་འདེབས་མི་བྱེད་པ་དེར་རྒྱལ་བ་རིན་པོ་ཐུགས་ཕམ་ཡོད་ཐོག་ཁོ་རང་ཡང་བློ་ཕམ་ཡོད་ཚུལ་གསུངས་འདུག དེ་བདེན་ན་ཁོ་རང་ཡང་བོད་གཞུང་གི་བཀའ་བློན་ཟུར་བ་ཞིག་ཡིན་པའི་ཆ་ནས་ཁོ་རང་གིས་ལན་བཏབ་ན་གང་མི་འགྲིགས་པ་ཡིན་ནམ། ཧོར་གཙང་འཇིགས་མེད་ཟེར་བ་དེས་བྲིས་པའི་དེབ་དྲང་བདེན་གྱིས་བསླུས་པའི་སློང་མོ་བ་ཞེས་པ་དེའི་ནང་དུ་ཡང་མདོ་སྨད་པ་དགེ་འདུན་ཆོས་འཕེལ་གྱི་ཀླུ་སྒྲུབ་དགོངས་རྒྱན་ལ་དགག་ཡིག་འབྲི་མཁན་དགུ་བྱུང་བའི་ནང་བརྒྱད་ཡིན་ནམ་ཅིག་ཨ་མདོ་བ་ཡིན་པས་ཅིག་འགྲིགས་མི་འདུག་མདོག་མདོག་ཅིག་བཤད་པའི་ཅོལ་ཆུང་གི་བཤད་སྟངས་དེ་ཡང་འདིར་དྲན་བྱུང་། ཁར་སང་དེ་རིང་གཏམ་བརྗོད་རང་དབང་གི་ཁོར་ཡུགས་ཡོད་ས་དེ་ཁ་བརྡ་དྲྭ་རྒྱ་གཅིག་པོ་ཡིན་སྟབས་ངའི་ཁ་བརྡ་དེ་ཡང་འདིར་བཏང་བ་ཡིན། ཁ་བརྡ་དྲྭ་རྒྱ་འདིར་ཡང་ཞུགས་མཁན་མང་པོ་མེད་ཀྱང་རྒྱུན་ལྡན་གྱི་འབྲི་ཀློག་བྱེད་མཁན་ཁ་ཤས་ཤིག་ཡོད་པ་དེ་མཐོང་ཐོས་ཀྱི་རྒྱ་ཁྱོན་གང་འཚམས་ཡོད་མཁན་རྐྱང་རྐྱང་རེད་འདུག་པས་འདིའི་སྐོར་ལ་བསམ་ཚུལ་རེ་གླེང་རོགས།
བོད་ཀྱི་བུད་མེད་བསླུས་འཚོང་།
འབྲོག་རུ་ཆོས་གྲགས།
གནའ་ནས་བཟུང་གངས་ཅན་པ་ཚང་གི་སྤྱི་ཚོགས་ནང་ན་བུད་མེད་རྣམ་གྱི་ཐོག་ལ་ལྟ་སྟངས་ཡག་པོ་ཞིག་བཟུང་མེད་པ་ནི་དམངས་ཁྲོད་ནས་ཡོང་བའི་ཚིག་ཁ་ཤས་ཤིག་གི་ངོ་གདོང་ནས་བལྟས་ན་ཧ་ཅང་གསལ་བོ་ཞིག་རེད། དཔེར་ན་བུད་མེད་ཀྱིས་ཅི་ཤེས། བུང་བུས་ཅི་ཐེག་ཟེར་བ་ལྟ་བུ་དང་ད་དུང་སྐྲ་རིང་མ་དང་བློ་ཐུང་མ། མོ་མཁས་འགོང་པོ། བུད་མེད་ལ་བརྡུང་དགོས། པགས་པ་མཉེས་དགོས། སྨན་སྐྱིད་ས་ནས་མི་བསྡོད། ར་བདེ་ས་ནས་མི་འདུག ད་དུང་ཁྱི་བུ་མོ་གཉིས་ལ་བློ་གཏད་མེད་ཟེར་བ་ལྟ་བུ་སོགས་མང་བོ་ཞིག་ཡོད་པ་རེད། ཡུལ་དུས་ཅི་འདྲ་ཅིག་འགྱུར་ན་འང་ཁོ་ཚོའི་ལས་དབང་གི་ལམ་ཀ་དེ་ད་དུང་འགྱུར་མ་སོང་།
སྤྱི་ཚོགས་ཀྱིས་གནོན་ཤུགས་དེ་འདྲ་ཞིག་གིས་དབང་གིས་ཁོ་རང་ཚོས་ཀྱང་ནག་ཉེས་དེ་ཁས་བླངས་མདོག་གིས་བསྡད་པ་རེད། ཡིན་ན་འང་ངོ་མ་བློས་མི་བཟོད་པ་ཞིག་ནི་དུས་རབས་ཉི་ཤུའི་སྨད་ནས་བཟུང་རྒྱ་ནག་ནང་དམིགས་བསལ་གྱི་བོད་ཀྱི་བུད་མེད་ཚོ་ནག་ཚོང་དུ་གྱུར་བ་དེ་རེད། ངས་གོ་ཐོས་ལྟར་ན་ད་དུང་ཡང་དེའི་ལས་འཕྲོ་བོད་ནང་དུ་ལྷག་ཡོད་སྐོར་མང་བོ་ཞིག་བཤད་ཀྱིན་འདུག
གཤམས་ནས་ང་ཚོས་འདིའི་སྐོར་ལ་ར་རྫ་འཇམ་དབྱངས་སྐྱིད་ཀྱིས་རྒྱ་ཡིག་གི་དྲ་ཐོག་ཅིག་ནས་བསྒྱུར་ཡོད་པ་དེ་ལ་ཅུང་ཙམ་ལྟ།
་
ཟམ་གདོང་རིན་པོ་ཆེ་དང་མཇལ་འཕྲད་ལས་འཕྲོས་པའི་གང་དྲན་གྱི་གླེང་མོལ།
སྤོབས་པ་མཐའ་ཡས།
དྲྭ་གྲོགས་ཚོར་ཀྲ་ཤིས་བདེ་ལེགས་ཞུ། གློག་ཀླད་བེད་སྤྱོད་མ་བྱས་ནས་ཉིན་འགའི་རིང་ངས་ཁྱོད་ཚོ་དངོས་གནས་དྲན་བྱུང༌། ངས་སྔོན་མ་ཞིག་ལ་ཟམ་གདོང་སྤྲུལ་སྐུ་མཇལ་བྱུང༌། ངས་འདི་ལྟར་བཤད་སྐབས་ཁྱེད་ཚོའི་སེམས་ལ་ངས་ཆེད་དུ་མགོ་སྒུར་དང་སྒྱིད་པ་གུག་གུག་གིས་་གྱིས་སྙན་ཞུ་ཐུང་ཐུང་ཞིག་དང་རྔན་པ་ཆུང་ཆུང་ཞིག་ཁྱེར་ནས་ཟམ་གདོང་སྤྲུལ་སྐུའི་དྲུང་དུ་བཅར་བའི་ཚོད་དཔག་བྱེད་རྒྱུ་རེད། དེ་ངས་ཤེས་ཀྱི་ཡོད། ཡིན་ན་ཡང་དོན་དངོས་སུ་དེ་འདྲ་ཞིག་མ་རེད། ཞོགས་པ་ཞིག་ལ་ང་སྨན་རྩིས་ཁང་གི་སྒོ་འགྲམ་བརྒྱུད་ནས་རྡ་རམ་ས་ལ་ཤོད་དུ་འགྲོ་བཞིན་པའི་སྐབས་སུ་སྨན་རྩིས་ཁང་གི་སྒོ་འགྲམ་ལམ་ཁུག་དཀྱོག་དེའི་མཚམས་སུ་གདོང་གཏུག་གིས་ཐུག་བྱུང༌། ངས་རྒྱུན་དུ་ནམ་རྒྱུན་ཁོང་དང་མཉམ་དུ་སྐུ་སྲུང་དང་སྐུ་འཁོར་ཡོད་པར་རློམ་བཞིན་ཡོད་ཀྱང་ཞོགས་པ་དེར་ཁོ་རང་ཁེར་རྐྱང་དུ་ག་ལེར་གངས་ཅན་སྐྱིད་གཤོང་གི་ལས་ཁུངས་ཁག་གི་ཕྱོགས་སུ་ཕེབས་ཀྱིན་འདུག ངས་མ་གཞི་ཁོང་ཚོགས་འདུའི་སྐབས་དང་དེ་མིན་གློག་བརྙན་ནང་ཁོ་ན་ནས་མཐོང་མྱོང་སྟབས་གློ་བུར་དུ་ཐག་ཉེ་དེ་འདྲ་ཞིག་ནས་ཐུག་སྐབས་འདི་ཟམ་གདུང་སྤྲུལ་སྐུ་ཡིན་ནམ་མ་ཡིན་སྙམ་པའི་སྣང་བ་ཞིག་ཀྱང་བྱུང་སོང༌། དེ་ལྟར་བྱུང་སྟབས་གུས་པ་མཚོན་པའི་འཚམས་འདྲི་ཞིག་བྱེད་དགོས་མོད་གང་ཞིག་ཤོད་དགོས་པ་དང་རྣམ་འགྱུར་གང་འདྲ་ཞིག་སྟོན་དགོས་པ་ཡང་ཤེས་ཀྱིན་མི་འདུག ཁོང་ལ་ཐུག་རིག་ཧ་ཅང་གྲུང་པོ་ཞིག་ཡོད་ངེས་རེད། ངའི་གདོང་ལ་གི་རྣམ་འགྱུར་སྟོན་སྟངས་ཞིག་ལས་ཁོང་གིས་ངའི་སེམས་པ་ཡོངས་རྫོགས་མཐོང་སོང༌། ཁོང་གི་ཞལ་ལས་བྱམས་བརྩེའི་ཉམས་ཞིག་མངོན་བཞིན་མཛུམ་མདངས་ཤིག་ཤིག་གནང་བྱུང༌། དེར་ངས་ཀྱང་རིན་པོ་ཆེ་ཞོགས་པ་བདེ་ལེགས་ཞེས་པ་ཞིག་ཁ་ནས་ཐོན་ལ་མི་ཐོན་གྱིས་སྨྲས་པ་ཡིན།
རྒྱུ་མཚན་དེས་ངས་བསམ་གཞིག་མང་པོ་ཞིག་བྱེད་དགོས་བྱུང་སོང་ལ་ད་དུང་ཡང་མཚམས་མཚམས་སུ་ཉམས་རྒུད་དུ་ཐེབས་པའི་མི་རིགས་འདིའི་ལས་དབང་དང་མཉམ་དུ་ཞོགས་པ་དེའི་ཟམ་གདོང་སྤྲུལ་སྐུའི་སྣང་བརྙན་དེ་ཡང་ཚོར་བ་མངར་སྐྱུར་འདྲེས་མ་ཞིག་གི་ངང་ནས་མངོན་ཡོང་གིན་འདུག ཆོས་རྒྱལ་ཁྲི་སྲོང་གིས་སུམ་གཉིས་ས་ལ་མངའ་དབང་བསྒྱུར་སྐབས་ཀྱི་རྟ་དམག་ཁྲི་ཕྲག་གིས་བསྐོར་ཞིང་ཕྱོགས་བཞིའི་རྒྱལ་ཕྲན་སྟོང་གི་གཙུག་རྒྱན་ལ་ཞབས་ཀྱི་པདྨོ་འགོད་པའི་དྲག་ཤུགས་དེ་དང་དཔལ་ལྡན་ས་སྐྱས་བོད་ཆོལ་ཁ་གསུམ་ལ་ཀའ་ལུང་གི་སྤྲིངས་ཡིག་འགྲེམ་པའི་རྫོགས་ལྡན་གྱི་དུས་རབས་དེ་དག་དང་དེ་རིང་གི་ཟམ་གདོང་སྤྲུལ་སྐུ་ལས་ཁུངས་སུ་ཕེབས་སྟངས་བསྡུར་སྐབས་དུས་ཡུན་མི་རིང་མི་ཐུང་ཞིག་ལ་རང་རེའི་རྒྱལ་ཁབ་དེ་འདི་འདྲ་བའི་ཐབས་སྐྱོ་བོ་ཞིག་གི་གནས་སུ་གྱར་འདུག་པ་ཡང་མིག་མཐོང་གི་ལམ་ནས་ངོ་འཕྲོད་བྱུང༌། གངས་ཅན་སྐྱིད་གཤོང་གི་ཐལ་རྡུལ་སྟུག་པོ་དེའི་ཁྲོད་ན་གྲོགས་མེད་ཁེར་རྐྱང་གིས་ཞོགས་པའི་གྲང་རླུང་གདོང་གིས་བསུས་ནས་འདུར་བཞིན་པའི་གནས་བསྟན་བགྲེས་པོ་འདི་ནི་བོད་དང་བོད་ཆེན་པོ་ཞེས་ཡོངས་སུ་གྲགས་པའི་རྒྱལ་ཁབ་དེའི་དེ་རིང་གི་ཆེས་མཐོའི་དབུ་ཁྲིད་རེད།
དེ་ལས་མང་བ་། “ཟམ་གདོང་རིན་པོ་ཆེ་དང་མཇལ་འཕྲད་ལས་འཕྲོས་པའི་གང་དྲན་གྱི་གླེང་མོལ།” »
༢༠༠༨ ལོའི་རྒྱལ་སྤྱིའི་རྩེད་འགྲན་དང་བོད་དོན།
དགེ་འདུན་མཐར་ཕྱིན་གྱིས།
པྱི་ལོ་ ༢༠༠༨ ལོའི་རྒྱལ་སྤྱིའི་རྩེད་འགྲན་དེ་རྒྱ་ནག་ནང་ཚུགས་ཉེར་བོད་པྱི་ནང་དུ་གནས་པའི་བོད་མི་རྒྱབ་སྐྱོར་བ་དང་བཅས་པས་རྒྱ་ནག་ལ་བོད་མིའི་ཐོབ་ཐང་ལ་བརྩི་བཀུར་དགོས་པའི་ངོ་རྒོལ་ཤུགས་ཆེ་བྱས་ཀྱང་བོད་དོན་དྲིལ་གྲགས་ཤུགས་ཆེ་བྱུང་བ་ཙམ་ལས་དོན་དངོས་ཐོག་གྲུབ་འབྲས་གང་ཡང་ལག་སོན་མ་བྱུང་།
ངོས་རང་དུས་སྐབས་དེའི་རིང་ལ་ས་གནས་སུ་བོད་མི་གཞན་མང་པོ་མེད་སྟབས་གཟུགས་མཐོང་རླུང་འཕྲིན་ཁག་དང་བོད་དོན་ལྷན་ཚོགས་མང་པོ་ཞིག་ལ་སྐད་ཆ་བཤད་དགོས་བྱུང་བ་དང་དེ་སྐབས་ཆེད་ལས་གསར་འགོད་པ་འདྲ་མིན་དང་སྲིད་དོན་པ་དང་གཞན་མི་སྣ་མང་པོ་ལ་བཀའ་མོལ་ཞུ་སྐབས་ཁོང་རྣམས་ནས་གསུངས་བབས་ལས་ཁོང་ཚོས་རྒྱལ་སྤྱིའི་རྩེད་འགྲན་འགོ་མ་ཚུགས་ཀྱི་བར་རྒྱ་ནག་ནས་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཐོག་ཡར་རྒྱས་གཏོང་རེས་ལས་འགུལ་གང་ཐུབ་བྱེད་ཀྱི་ཡོད་པ་ཙམ་ལས་ངོ་རྒོལ་དེ་དག་བོད་དོན་ཐོག་ཕུགས་འགྱངས་རིང་པོའི་འཆར་གཞི་ལྡན་པའི་སྲིད་བྱུས་ཞིག་མེད་པ་གསལ་རྟོགས་ཡོང་གི་འདུག
འོན་ཀྱང་བོད་ནང་དང་རྒྱ་གར་དང་བལ་ཡུལ་ནང་བཅས་སུ་གནས་སྡོད་བོད་མི་ཧ་ཅང་མང་པོ་ཞིག་གི་ངོས་ནས་བོད་དོན་ཐོག་དོན་དངོས་ཀྱི་འགྱུར་བ་ངོ་མ་ཞིག་དུས་སྐབས་དེར་འགྲོ་བའི་རེ་བ་ཆེན་པོ་ཞིག་རྒྱབ་ཏེ་ལས་འགུལ་ནང་རང་སྲོག་བློས་གཏང་གིས་ཞུགས་ཡོད་པ་རེད་ལ་བོད་ནང་བོད་མི་མང་པོ་ཞིག་གི་ཚེ་སྲོག་ཡང་བཤོར་ཡོད་ཅིང་། རྒྱ་གར་དང་བལ་ཡུལ་ནང་གི་བོད་མི་ཆེས་མང་པོ་ནས་ཉིན་རེའི་འཚོ་བའི་དཀའ་ངལ་ལ་མ་འཛེམས་པར་དུས་ཚོད་ཉིན་གྲངས་མང་པོའི་རིང་ལུས་སེམས་ཀྱི་དཀའ་སྡུག་དང་དཔལ་འབྱོར་གྱི་འགྲོ་སོང་བཅས་གཏང་ཡོད་པ་ལ་དོན་འབྲས་སོན་ཡོད་པ་ཞིག་སྐབས་བབས་བསྐུལ་སློང་པ་དང་ལམ་བསྟོན་པ་རྣམས་ནས་གསལ་བཤད་མཐིལ་ཕྱིན་ཞིག་མ་གནང་ཚེ་ཕྱིས་སུ་ཁོང་ཚོའི་སེམས་ཤུགས་ཆག་གཞི་དང་བསྐུལ་སློང་གནང་མཁན་རྣམས་ཀྱི་གཏམ་ལ་ཡིད་འཆེས་གཏོར་གཞིར་འགྱུར་ཉན་ཆེ་སྙམ།
དེ་ལས་མང་བ་། “༢༠༠༨ ལོའི་རྒྱལ་སྤྱིའི་རྩེད་འགྲན་དང་བོད་དོན།” »
བོད་མིའི་མི་ཚེ།
ཚེ་ཆོས་སྒྲོན། སྐད་འབོད་རྒྱབ་ག་ལོས་འགྲོ། ཞལ་འདོན་སྐྱོར་ག་ལོས་འགྲོ། འབུལ་བ་ཞལ་འདེབས་ལོས་ཕུལ། བོད་ཀྱི་རང་བཙན་ཆེད་དུ། རང་སྲོག་གློད་ཀྱང་ཅི་འགྱོད།
གཏམ་དཔེ་ཞིག་གི་གོ་དོན་འཚོལ་བ།
དཔོན་པོ་ཁྱི་ལས་ལོད་ཀྱང་། ཁྱི་རྔ་མགོ་ལ་ཁུར།། འདི་ནི་ངའི་ཕ་ཡུལ་གྱི་གཏམ་དཔེ་ཞིག་རེད། གཏམ་དཔེ་འདི་ཁྱེད་རང་གིས་མཐོང་མ་ཐག་སེམས་ལ་གནའ་སྔ་མོའི་བཀས་བཀོད་རྒྱུད་འཛིན་རིང་ལུགས་ཟེར་བའི་འདྲ་རིས་ཤིག་ཁྱེད་ཀྱི་སེམས་ངོར་འཆར་ཡོང་སྲིད། ཁྱེད་ཀྱི་ཁ་ནས་བརྗོད་བཞིན་པའི་དམངས་གཙོ་ཟེར་བའི་ཚིག་ལས་འགལ་ཟླར་ཕྱིན་ཡོད་སྲིད། ཁྱེད་ཀྱི་དེང་རབས་ཀྱི་བསམ་བློ་དེ་དང་མཐུན་ཐབས་མེད་པ་ཞིག་ཡིན་སྲིད། ངས་གཏམ་དཔེ་འདིར་བསམ་བློ་ཅུང་ཞིག་བཏང་བ་ཡིན། འདི་དམག་འཁྲུག་དང་དཀའ་ངལ་གྱི་ལོ་ཟླ་མང་བོའི་བརྒྱུད་རིམ་ཁྲོད་ནས་ཡོང་བའི་ཉམས་མྱོང་གི་ཕྱོགས་སྡོམ་ཞིག་ཡིན་པའི་ངེས་ཤེས་སྐྱེ་གི་འདུག འདི་གནད་འགག་ཅན་གྱི་གཡུལ་འཁྲུག་ཅིག་གི་སྐབས་དམག་དཔོན་དང་དམག་མི་བྱིངས་ཀྱི་འབྲེལ་བར་སྐུལ་སྤེལ་གཏོང་བྱེད་ཅིག་ཡིན་པ་མ་ཟད་རྒྱལ་ཕམ་དང་འབྲེལ་བ་ཡོད་པའི་དམག་དོན་གྱི་ཚིག་གལ་ཆེན་པོ་ཞིག་ཡིན་ངེས་རེད། དེ་མ་ཟད་གཏམ་དཔེ་འདི་ད་ལྟ་དམངས་གཙོའི་དུས་སྐབས་སུའང་གནད་འགག་སྐབས་མཁོ་ངེས་ཆེན་པོ་ཡིན་པར་འདོད། ཡང་གོང་གི་གཏམ་དཔེ་འདི་དང་རྗེས་འབྲེལ་གྱིས་ངས་ཁྱེད་ཚོར་ ་་ལེ་བདའ་་ ཟེར་བའི་ཕ་སྐད་འདི་ངོ་སྤྲོད་བྱེད་ན་འདོད་བྱུང་། ལེ་བདའ་ནི་དོན་དག་ཅིག་མ་བྱུང་བའི་རྗེས་གཅིག་ཁག་གཅིག་ལ་དཀྲི་བ་ལ་ཟེར། མང་པོ་ཞིག་མཉམ་རུབ་ཀྱིས་དོན་ཆེན་གང་ཞིག་སྒྲུབ་པར་འབད་ནས་དོན་དག་དེ་མ་འགྲུབ་པའི་སྐབས་ཕན་ཚུན་ལེ་བདའ་བྱེད་པ་དེ་ཆེས་ཐ་ཆད་དུ་བརྩི། དེ་ནི་དོན་དག་རྗེས་མ་དེའང་མི་འགྲུབ་པའི་སྔ་ལྟས་ལྟ་བུ་བཀྲ་མི་ཤིས་པ་ཞིག་ཏུ་བརྕི་བས་ངའི་ཕ་ཡུལ་དུ་དམག་ཕམ་ནའང་ཕན་ཚུན་ལ་ལེ་བདའ་བྱེད་པའི་སྲོལ་ཆེར་མེད། གཅིག་བྱས་ན་ང་ཚོ་ཚང་མའི་ཕ་ཡུལ་གཅིག་པ་ཡིན་རྒྱུ་རེད། ཁ་སང་དེ་རིང་ང་ཚོའི་སྤྱི་ཚོགས་ནང་དང་། ལྷག་པར་དུ་ཤེས་ལྡན་མི་སྣའི་ཁྲོད། གཞན་བཀའ་ཟུར་རྣམ་པའི་ཁྲོད་བཅས་ཕྱོགས་གང་སར་ལེ་བདའ་བྱེད་པའི་ཆམས་ནད་ཅིག་ཁྱབ་ཡོང་གི་ཡོད་པ་མ་ཟད་ཁ་བརྡ་དྲ་ཚང་དུའང་མི་ཁ་ཤས་ལ་ཆམས་ནད་དེ་འགོས་ཡོད་པའི་མངོན་རྟགས་གསལ་པོ་འདུག ད་ཁྱེད་ཚོས་ཨ་ཁུ་འབྲོག་པའི་གཤིས་ཀ་དེ་སྲིད་དོན་ནང་ཁྱེར་ཡོང་གི་འདུག་དགོངས་སྲིད། ཡིན་ན་ཡང་ལེ་མདའ་དང་གཏམ་བརྗོད་རང་དབང་གཉིས་ལ་གོ་བ་ལོགས་སུ་དགར་ནས་ལེན་རོགས་ཞུ། ང་ཚོས་མི་མང་གིས་འདེམས་པའི་མི་མང་གི་གཞུང་དང་མི་མང་གིས་འདེམས་པའི་མི་མང་གི་སྤྱི་འཐུས་ཞྭ་བཞིན་བཀུར་བར་བྱ། དཔོན་པོ་ཁྱི་ལས་ལོད་ཀྱང་། ཁྱི་རྔ་མགོ་ལ་ཁུར། མ་འདེམས་སྔོན་གཟབ་གཟབ་ཀྱིས་བརྟག་པར་བྱ། ནམ་རྒྱུན་ནས་སྐྱོན་དང་ནོར་འཁྲུལ་ཡོད་ན་ཁ་སངས་པོས་བསྲང་བར་བྱ། ཕོ་རབ་གཅིག་གི་བློ་རྩེ་ལས། ཕོ་འབྲིང་གསུམ་གྱི་གྲོས་བསྡུར་དགའ་བས་དོན་དག་གང་ཞིག་མ་སྒྲུབ་སྔོན་རྣམ་དཔྱོད་དང་ལྡན་པའི་ངང་བགྲོ་གླེང་ལྷུག་པོར་བྱ། རྗེས་སུ་ལེ་བདའ་མེད་པར་བྱ། བསམ་བློ་སྔོན་ལ་ཐོངས་ན་མཁས་པ་ཡིན། འགྱོད་པ་རྗེས་སུ་སྐྱེས་ན་གླེན་པ་ཡིན།