སྦྲ་རིགས་ཐོགས་མེད། (ལྡི་ལི་གཙུག་ལག་སློབ་གླིང་།)
ལོ་རྒྱུས་ལ་གོད་ཆགས་བྱུང་བའི་དུས་དེ་ནས་བཟུང་།
བོད་ཡུལ་དུ་ཁྲག་དམར་འཁྱིལ་བའི་དུས་དེ་ནས་བཟུང་།
ཁྱེད་ཀྱིས་ཕུགས་བསམ་དང་རྨི་ལམ་གྲངས་མེད་ཅིག་ཁུར་ནས་ལམ་དུ་ཆས་སོང་།
ཁྱེད་ཀྱིས་བྱམས་བརྩེ་དང་གཞན་དོན་རྫོགས་མེད་ཅིག་བསྣམས་ནས་རྒྱང་དུ་བཞུད་སོང་།
ཞི་བདེ་ལ་དགའ་བའི་ཧི་མ་ལ་ཡའི་རྒྱལ་སྲས་ཁྱེད་རང་།
རྟེན་འབྱུང་གིས་བཟི་བའི་ནང་བསྟན་རིག་པའི་བསམ་བློ་བ་ཁྱེད་རང་།
རིག་འཛིན།
ལྷ་གཅིག་གངས་རིའི་ལྷ་སྐལ།།
སྲིད་གསུམ་ཕྱག་ན་པད་མོ།།
དགུང་གྲངས་དོན་དྲུག་ཕེབས་པར།།
འཁྲུངས་སྐར་གླུ་དབྱངས་འབུལ་ལོ།།
འབའ་སྲས།
མཚན་བཟང་སྐུ་ཡིས་སྐྱེ་རྒུ་དང་བ་འདྲེན།།
བརྩེ་ཆེན་ཐུགས་ཀྱིས་འགྲོ་རྣམས་རྗེས་སུ་བཟུང་།།
ཡང་དག་གསུང་གིས་བདེ་འགྲོའི་ལམ་སྟོན་པ།།
གངས་ཅན་ཁ་བའི་མགོན་པོའི་ཞབས་ལ་འདུད།།
རཱ་ཛའི་མཚན་སྙན་འཛིན་པ་མང་བྱུང་ཡང་།།
རྒྱལ་ཁབ་ཆོས་ཀྱིས་སྐྱོང་བ་ཁྱོད་ལས་མེད།།
ནགས་མའི་ཀློང་དུ་ལྗོན་པ་མང་སྐྱེས་ཀྱང་།།
ཡོངས་འདུས་ལྗོན་པའི་ཟླ་ལ་འགྲན་ནུས་གང་།།
རྡོ་རྗེ་དབང་ཕྱུག
མུན་པས་བྱེར་བའི་གངས་ཀྱི་འཛིན་མའི་ཁམས།།
སྡུག་བསྔལ་འོ་དོད་ནག་པོས་བཟུང་བའི་མུན།།
མཐར་བྱེད་ཉི་མ་བྱེ་བའི་དཔལ་འཛིན་པ།།
གྲུ་འཛིན་གསེར་གྱི་རི་ལ་མངོན་པར་འཆར།།
དེ་ཚེ་སྐྱེ་དགུའི་བསོད་ནམས་ནགས་མའི་ཚལ།།
དགའ་སྤྲོའི་འཛུམ་པ་གྲོལ་བའི་མེ་ཏོག་གི།
བསུང་ཞིམ་བཀྲ་ཤིས་དགེ་བས་ཡོངས་འཁྱུད་པས།།
བོད་ཁམས་རྫོགས་ལྡན་དཔྱིད་ཀྱི་རི་མོས་བཟུང༌།།
དེ་ལས་མང་བ་། “འཁྲུངས་སྐར་དུས་ཆེན་ལ་ཕུལ་བའི་སེམས་ཀྱི་མཆོད་པ།” »
(༧གོང་ས་མཆོག་གི་འཁྲུངས་སྐར་ལ་ཕུལ།)
ནེ་རོ་གཙུག་ལག་སློབ་གྲྭ་ཆེན་མོ། ཤེས་རབ་རྡོ་རྗེ།
དུས་རབས་གསར་རྙིང་བསྣོལ་བའི་ལོ་རྒྱུས་ཀྱི་དཀྱོགས་མཚམས་ཤིག་ན།
ཤར་ནུབ་ཤེས་རིག་འཐབ་པའི་དེང་རབས་ཀྱི་ཁུགས་སོ་དེ་ན།
ལོ་རྒྱུས་དང་གཟི་བརྗིད་ཀྱི་གླེགས་བམ་ཁུར་བའི་འཛམ་གླིང་གི་ཡུལ་སྐོར་བ་ཁྱེད།
གཞན་ཕན་དང་བྱམས་བརྩེའི་ལྷུང་བཟེད་ཐོགས་པའི་ཞི་བདེའི་སློང་མོ་བ་ཁྱེད།
ཁྱེད་རང་ཡང་སྙིང་གནས་གང་ཞིག་ཏུ་ཕེབས།
ཁྱེད་རང་སུ་ཞིག་གི་ཆེད་དུ་འདི་ལྟར་མི་ཡུལ་དུ་སློང་མོར་ཕེབས་དགོས་བྱུང་།
ཐེ་བོ་དཀོན་མཆོག་ཤེས་རབ་ནས་ཕུལ།
༼༧གོང་ས་ལྷ་མིའི་རྣམ་འདྲེན་མཆོག་ཕྱི་ལུགས་ལྟར་དགུང་གྲངས་༧༦ལ་ཕེབས་པའི་སྐུའི་འཁྲུངས་སྐར་ལ་གུས་འདུད་དང་བཅས་བཀྲ་ཤིས་བདེ་ལེགས་འབུམ་ཕྲག་ཞུ་བ་དང་ཆབས་ཅིག མགོན་པོ་གང་གི་མཛད་བཟང་ལ་བསྟོད་པ་བདེན་དོན་གསལ་བའི་ཉིན་བྱེད་ཅེས་བྱ་བ་འདི་ཡང་ཆེད་དུ་འབུལ་ལམ་ཞུ་རྒྱུ་ཡིན།༽
༄༅། །༧གོང་ས་༧སྐྱབས་མགོན་༧རྒྱལ་དབང་སྐུ་ཕྲེང་བཅུ་བཞི་བ་ཆེན་པོ་མཆོག་ལ་བསྟོད་པ་བདེན་དོན་གསལ་བའི་ཉིན་བྱེད་ཅེས་བྱ་བ་བཞུགས་སོ། །
ན་མོ་གུ་རུ་ལོ་ཀེ་ཤྭ་ར་ཡ།
གང་ཞིག་ཆོས་གཅིག་ལག་ཏུ་མཆིས་གྱུར་ན།།
དེ་ཡིས་ཆོས་ཀུན་ལག་ཏུ་མཆིས་སོ་ཞེས།།
གསུང་རབ་ཀུན་ལས་ཡང་ཡང་བསྔགས་པ་ཡི།།
ཐུགས་རྗེའི་ཡིད་བཞིན་ནོར་བུ་དེ་ལ་བསྟོད།།
གང་གི་རང་མདངས་མ་འགགས་ཡིད་འོང་མཚན་དཔེའི་བཞིན་ལག་སྐུར།།
ཤར་བས་གསང་གསུམ་འཕྲིན་ལས་གྲིབ་བསིལ་སྣུམ་པོར་སྐྱེ་དགུ་རྣམས། །
ཀུན་ནས་ངལ་བསོས་ཞི་བདེའི་འབྲས་བཟང་སྤྱོད་ལ་འགོད་མཛད་པ།།
༧རྒྱལ་དབང་བསྟན་འཛིན་རྒྱ་མཚོ་ཡོངས་འདུའི་ལྗོན་བཟང་གང་དེར་འདུད།།
སྤོབས་པ་མཐའ་ཡས།
གལ་སྲིད་ང་ཚོར་རྒྱལ་དབང་ལྔ་པ་ཆེན་པོ་ལྟ་བུ་ཁ་ཤས་ཤིག་ཡོད་ན་བོད་ཀྱི་གནས་སྟངས་འདི་འདི་ལས་ཡག་ཅིག་ཡོང་རྒྱུ་ཡིན་པ་དང་། རྒྱལ་དབང་ལྔ་པ་ཆེན་པོ་ལྟ་བུ་མང་ཙམ་ཞིག་ཡོད་ན་འཛམ་བུ་གླིང་འདི་ཡང་འདི་ལས་བཟང་ཞིག་ཡིན་ངེས་རེད། རྒྱལ་དབང་ལྔ་པ་ཆེན་པོ་ཁོ་ནའི་བཀའ་དྲིན་ལ་བརྟེན་ནས་འཛམ་གླིང་གི་ཡང་རྩེ་འདིར་སླར་ཡང་སྟོབས་འབྱོར་དང་ཞི་བདེས་འཚོ་བའི་རྒྱལ་ཁབ་ཆེན་པོ་ཞིག་གི་གཟི་བྱིན་ངོམ་ཐུབ་པ་བྱུང་ཡོད། རྒྱལ་དབང་ལྔ་པ་ཆེན་པོ་གཅིག་པུའི་ཐུགས་རྗེ་ལ་བརྟེན་ནས་དགོན་བླ་དང་ཆོས་རྒྱུད་བར་གྱི་འགལ་བ་ཛ་དྲག་པོ་དག་ཀྱང་རྩོད་པ་ཆོས་སུ་ཕྱོགས་སུ་ཞི་བའི་གོ་སྐབས་ཅིག་ཐོབ་ཡོད། དེའི་མཐུ་ལས་དེ་རིང་གི་དུས་འདིར་ཡང་བོད་མི་རིགས་དང་། བོད་ཀྱི་རིག་གནས། བོད་བརྒྱུད་ནང་བསྟན་ཆོས་ལུགས་ཞེས་ཟུར་དུ་ཐོན་པ་དང་། འབུར་དུ་ཐོན་པ། གཟེངས་སུ་ཐོན་པ་ཞིག་གནས་ཐུབ་པ་འདིའི་ཆ་ཤས་ཕྲ་མོ་རེ་རེ་བཞིན་རྒྱལ་བ་ལྔ་པ་ཆེན་པོའི་བཀའ་དྲིན་མཛད་རྗེས་ཀྱི་བདག་རྐྱེན་དང་ཁ་འབྲལ་ཐབས་མེད་པའི་རང་བཞིན་དུ་གྱུར་ཡོད།
དེ་ལས་མང་བ་། “རྒྱལ་དབང་ལྔ་པ་ཆེན་པོའི་འདས་མཆོད་སྐབས་ཀྱི་ཚོར་སྣང་ཐུན་གཅིག” »
ས་དཀྱིལ་ཚེ་བཀྲ།
ལྷ་བསང་གཏོང་རོགས། ཆོས་དུང་འབུད་རོགས།
ཁྱེད་རང་མ་གཞི་ནས་བསང་ཁྲི་སྔོན་པོ་ཞིག
ཁྱེད་རང་གདོད་མ་ནས་ལྷ་སྒྲུང་ནག་པོ་ཞིག
རེབ་གོང་ཨཱ། ཕ་ཡི་རུས་ཟད་ཅིང་མ་ཡི་ཟུངས་འཐོར་བའི།
ལོ་རྒྱུས་ཀྱི་བླ་མཁར་སྨུག་པོ་ཨང་།
ཁྱེད་ནི། མཚམས་ལན་རེ་རེར།
མཐོན་པོའི་སྒང་ན་རྒྱུ་བའི་བསིལ་མོ་རླུང་དང་འདྲ་ཞིང་།
ཁྱེད་ནི། མཚམས་ལན་རེར།
དམའ་མོའི་གཞོངས་ན་འབབ་པའི་དྭངས་མོ་ཆུ་དང་མཚུངས་ཏེ།
བཙན་པོའི་སྙིང་ན་ཁྲག་དྲོན་ལྷོག་ལྷོག་འཁོལ་ཅིང་།
ཟེར་འོད་ལམ་ལམ་འཚེར་བའི་རོང་བོ་དགོན་ཆེན་ཉིད་ནི།
སྔོན་མོའི་སྤང་ན་འགྱིང་བའི་སྦྲ་ནག་ཁེར་རྐྱང་ངམ།
སྨུག་པོ་རྫ་ན་གཤར་བའི་འབྲོང་རྒོད་དར་མ་ཨང་།
དོལ་སྨྱོན།
༡༽
སེམས་སོང་བུ་མོའི་བཞིན་རས་མཐོང་དུས་སྨྱོན་པ་མི་སྨྱོ་རང་སྨྱོ་རེད།།
སེམས་ཀྱི་ཕྱི་ནང་སྨུག་པས་བཏུམས་དུས་སྙན་ངག་མི་འབྲི་རང་འབྲི་རེད།།
ཡོད་ཚད་མུན་པའི་ཟབ་སར་འཐིམ་དུས་རྒུན་ཆང་མི་འཐུང་རང་འཐུང་རེད།།
ཐམས་ཅད་ཐལ་བའི་རྡུལ་དང་འདྲེས་དུས་སྨྱོན་པ་མི་ངུ་རང་ངུ་རེད།།
༢༽
མེ་ཏོག་ལྟ་བུའི་འཇིག་རྟེན་འདི་ཉིད་མྱ་ངམ་བྱེ་མའི་ཐང་དང་མཚུངས།།
འཚོར་ཤུགས་སྐྱེན་པའི་རྣམ་དཔྱོད་འདི་ཉིད་རྡོ་ཡིས་རྨས་པའི་བྱ་དང་མཚུངས།།
མཛེས་ཉམས་དོད་པའི་འཁོར་ཡུག་འདི་ཉིད་མི་སྡུག་གཤིན་རྗེའི་གླིང་དང་མཚུངས།།
ཡོད་ཚད་སུན་པའི་རྒྱུ་རུ་གྱུར་དུས་སྨྱོན་པའི་རྣམ་ཐར་འཁྲབ་འགོ་ཚུགས།།
བསམ་གླིང་ཚེ་རིང་ལྷ་མོ།
སྤྲིན་གྱི་རྒྱུ་བ་ལྷོད་པའི་ཉིན་དེར་སེམས་ཀྱི་རྒྱུ་བ་དེ་བས་ཟབ།།
ཕན་ཚུན་སེམས་ཀྱི་བརྩེ་བའི་བར་ཐག་ཅི་ལྟར་ཟབ་ཅིང་ཉེ་ན་ཡང།།
དྲན་པའི་སྙིང་གཏམ་ཤོད་རྒྱུ་མང་བས་གཏམ་གྱི་གྲོས་འགོ་ག་ནས་གླེང།།
ཟབ་ཅིང་བརླིང་བའི་ཡིད་ཀྱི་སྣ་ཐག་ག་ལེར་འཁྲིས་ལ་ཇི་ལྟར་འཐེན།།
ན་བུན་འཚུབ་མ་རླུང་གིས་དེད་ནས་ལྷུན་པོའི་སྤོ་ལ་རིམ་གྱིས་འཁྱུད།།
ཆར་གྱི་ཟེགས་མས་སྐྲ་ལོ་བརླན་ཀྱང་ད་དུང་ཕྱོགས་དེར་ཅེར་དོན་ཅི།།
ཡིད་ཀྱི་ཞིང་སར་སིམ་ན་འདོད་པའི་ཆུ་མིག་དྭངས་མོ་ཁྱད་འཕགས་ཤིག
ཉིན་མཚན་ཀུན་ཏུ་འདྲེན་བྱེད་མདུན་དུ་རི་མོར་འཕྱོ་འམ་འཕྱང་མོ་ཉུག
རས་པ།
ཅི་འདྲ་ཞིག་ལ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྒྲོམ་གཞི་གསར་བ་ཟེར་གྱི་རེད། འདིའི་ཐད་སྐད་ཆ་དང་པོ་བཤད་ཐུབ་མཁན་ནི་ཀྲུང་གོའི་དམར་ཤོག་གི་མཐོ་རིམ་མི་སྣ་ཁག་ལས་གཞན་སུ་ཡང་མེད་པ་ཡིན། འོན་ཀྱང་། ཁོ་ཚོས་ནམ་རྒྱུན་བཤད་བཞིན་པའི་“ལྟེ་བ་གཅིག་”ཟེར་བ་སྒྲོམ་གཞི་གསར་བ་འདིའི་ནང་དུའང་གླེང་འདུག ལྷག་པར་དུ་ཏང་གི་ཚོགས་ཆེན་ཐེངས་བཅུ་དྲུག་པ་ཞེས་པའི་སྟེང་ཧྥུའུ་ཅིན་ཐའོ་ཡིས་ངེས་པར་དུ་འགྱུར་བ་འགྲོ་དགོས་པ་དང་། ཀྲུང་གོའི་ཁྱད་ཆོས་ལྡན་པར་འགྱུར་བ་འགྲོ་དགོས་པ་སོགས་ཀྱི་གླེང་བྱ་བཏོན་ཡོད་པ་དང་། དེ་ཉིད་གཞུང་འབྲེལ་གསར་ལམ་ཁག་ཏུ་ཕྱིར་བསྒྲགས་བྱེད་ཀྱི་ཡོད་པ་མ་ཟད། སྲིད་བློན་ཝུན་ཅ་པོ་ཡི་བཤད་ཚུལ་དང་ཡང་མཐུན་པ་ཞིག་ཡིན།
དེ་ལས་མང་བ་། “རྒྱ་ནག་དང་ཀྲུང་གོའི་ཁྱད་ཆོས། བོད་ལ་ཅི་ཞིག་ཐོབ་སྲིད།” »
ཀླུ་སྨྱོན་ཧེ་རུ་ཀ
སྔོ་བསང་གི་ནམ་མཁའ་ནས་ཅི་ཙམ་ཉན་ཡང་ཚིམ་པ་མེད་པའི་གདངས་དབྱངས་ཤིག་བཞུར་འོངས།
དབྱངས་རྟ་དེའི་ལྟེབས་གཉེར་རེ་རེའི་བར་ན་མི་ལོ་ཁྲི་ཕྲག་གི་བརྩེ་དུང་གི་རྒྱ་མཚོ་འཁྱིལ་འདུག་ཅིང་།
དབྱངས་རྟ་དེའི་མཛེས་སྡུག་གི་ཕྱི་ཤུན་གྱི་ངོས་སུ་འཇིག་རྟེན་འདིའི་ཆེས་མཛེས་པའི་རྟོགས་བརྗོད་དག་བྲིས་འདུག
གདངས་དབྱངས་དེའི་བཞུར་རྒྱུན་གྱིས་མི་ལོ་སྟོང་ཕྲག་གི་སྐྱོ་གདུང་ཅིག་ཅར་སེལ་ཐུབ་ཅིང་།
གདངས་དབྱངས་དེའི་དྲི་ཞིམ་གྱིས་མི་ཚེ་ཧྲིལ་བོ་ཞིག་གི་སུན་སྣང་ཡང་བསུབ་ཐུབ།
གདངས་དབྱངས་དེ་ཆར་བའི་ཀློང་ནས་ཆར་བ་དང་འགྲོག་སྟེ་འབབ་བཞིན་འདུག་ལ།
དེ་ནི་འཇའ་ཚོན་གྱི་ཀློང་ན་འཇའ་ཚོན་དང་སྡེབས་ནས་འཚེར་བཞིན་འདུག
དེ་ལས་མང་བ་། “ནམ་མཁའི་དབྱིངས་ནས་བཞུར་འོངས་པའི་གདངས་དབྱངས་ཤིག” »
གསལ་ལེ་རྒྱལ།
སྒྲོལ་མ་ཉེར་གཉིས་མ།
དྭངས་གཙང་ཆབ་ཀྱིས་སྐུ་ལུས་འཁྲུས་མ།།
དྲི་ཞིམ་ཆུ་ཡིས་གང་སར་བྱུགས་མ།།
རང་བྱུང་ལུས་ཀྱི་མཛེས་སྡུག་ངོམས་མ།།
དཀར་དམར་རྩི་ཡིས་མངལ་སྒོ་རྒྱན་མ།།
སྒྲོལ་མ་ཉེར་གསུམ་མ།
གླིང་རྫི་དོར་མའི་ཁ་ཐུག་ལྷོད་མ།།
རྟག་ཏུ་ལམ་གྱི་བཞི་མདོ་སྲུང་མ།།
དགྲ་གྲོགས་གཉིས་ལ་དབྱེ་བ་མེད་མ།།
སུ་ཡིས་འཐེན་ན་དེ་ལ་འགྲོགས་མ།།
རིག་འཛིན།
ཕ་མེས་ཡང་མེས་དུས་ལ།།
སྟོབས་འབྱོར་མངའ་ཐང་ཅན་གྱི།།
ཀ་མད་སུམ་ཅུའི་ཁྱིམ་གྱིས།།
གངས་རིའི་མཛེས་སྡུག་བསྐྲུན་སོང་།།
ཡབ་ཆེན་ཐུ་མིས་གཟིགས་དང་།།
ཁྱེད་ཀྱི་བུ་ཕྲུག་མང་པོས།།
ཀ་ཁའི་ཕ་སྐད་བརྗེད་དེ།།
ར་མ་ལུག་སྐད་གསུངས་ཀྱིས།།
ཀླུ་སྨྱོན་ཧེ་རུ་ཀ
བདག་གི་ལྷ་ཁང་གི་རྩིགས་ལྡེབས་སུ་ལོ་ངོ་ཁྲི་ཕྲག་གི་རིང་ཆགས་པས་དྲག་ཏུ་གཟིར་བའི་ལྷ་དང་ལྷ་མོའི་ཚོགས་དག་ཀྱེ།
ད་ནི་གཅིག་གིས་གཅིག་ལ་ཅེར་ནས་མ་འདུག་པར་བྲང་ཤ་རྩུབ་པོ་དང་མྱོས་བུམ་འཇམ་པོ་དག་ཅི་དགར་གཙུབ་བརྡར་བྱོས་ཤིག
དོམ་ནག་སྨྱོན་པ་དང་ས་འབུ་ཐག་ནར་ལ་ཞོན་པའི་ཡི་དམ་ཞི་ཁྲོའི་དཀྱིལ་འཁོར་གྱི་ལྷ་ཚོགས་ཀྱེ།
རྩ་དབུ་མའི་ནང་དུ་འདོད་དགུར་འཁྱིལ་བའི་ཁུ་ཁྲག་དཀར་དམར་གྱི་རྒྱ་མཚོའི་རྦ་རླབས་ཀྱི་ཕྲེང་བ་དག
ཕན་ཚུན་གྱི་སྙིང་རྩ་དང་ཀླད་རྩའི་ནང་དུ་འཁོར་རྒྱུག་རྒྱ་ཡན་དང་བག་མེད་པར་བྱེད་དུ་ཆུགས་ཡ།
དེ་ལས་མང་བ་། “ཉི་མས་ཟླ་བ་བཞུ་སྟངས་ཤིག—རྣལ་འབྱོར་བའི་ཆོས་ལུགས།” »
སེར་ཤུལ་རིན་ཆེན་དོན་གྲུབ
དགེ་བའི་བཤེས་གཉེན་གྱི་མཆོག་མཚང་ལ་རྒོལ་བ་ཡིན།
བཙུན་པའི་མཆོག་སེམས་རྒྱུད་ཐུལ་བ་ཡིན།
གདམས་ངག་གི་མཆོག་རྟག་ཏུ་རང་སེམས་ལ་བལྟ་བ་ཡིན།
དཔལ་མཉམ་མེད་ཇོ་བོ་རྗེས།
དུས་རབས་ཀྱི་རླུང་བུ་དལ་བུར་ལྡིང་པ་དང་དུས་མཚུངས་མི་རྣམས་ཀྱི་སེམས་ཀྱི་ཞིང་སར་འཕོས་པའི་དཔྱོད་ཤེས་དང་ལྟ་ཚུལ་ཡང་རླུང་བུ་དེའི་འཚུབ་ཆ་དང་བསྟུན་ནས་གཡོ་ཞིང་རྒྱུ། བསམ་བློ་མི་འདྲ་བ་དང་དཔྱོད་ཤེས་མི་འདྲ་བ་དེ་ནི་འགྲོ་བ་མིའི་ལྷན་སྐྱེས་རང་བྱུང་གི་ཆོས་ཉིད་ཅིག་ཡིན་ཞིང་ཁྱད་པར་དེས་རྙོག་འཛིང་ཅན་གྱི་ལྟ་གྲུབ་མི་འདྲ་བ་ཁག་དང་དབྱེ་ཞིབ་ཀྱིས་ཐག་གཅོད་དཀའ་བའི་གནས་ལུགས་ཇི་སྙེད་ཅིག་གི་ས་བོན་ཡང་འཇིག་རྟེན་གྱི་ཞིང་སར་བཏབ། འདི་དག་གི་སྐབས་སུ་ཆོས་ལུགས་དང་། རྫུ་འཕྲུལ། ཐར་བ། སངས་རྒྱས་ཀྱི་གོ་འཕང་། བདེ་བ་ཅན་སོགས་ལྐོག་གྱུར་རང་བཞིན་དང་ཕྲ་བའི་རྟོག་ཡུལ་དག་ལ་ཡིད་ཆེས་དང་བློ་གྲོས་ཀྱི་འཇུག་པ་ཇེ་ཉུང་ནས་ཇེ་ཉུང་དུ་གྱུར་ཅིང་དངོས་གཙོ་དང་དངོས་མཐོང་སྨྲ་བའི་ལྟ་ཚུལ་གྱི་ཁྱབ་རྒྱ་ཇེ་ཆེ་ནས་ཇེ་ཆེར་གྱུར།
ལྡོང་ཆུ་ཤེལ། (ལྡོང་ངེ་བསྟན་འཛིན་གྲགས་པ།)
ཐེངས་འདིའི་སྟོན་རླུང་གིས་བཀྱགས་པའི་ཁྲུང་ཁྲུང་གི་གཤོག་རླབས་དཀར་པོ་ལ།
ཁྱོད་ཀྱི་མིག་མཐའ་ནས་ཞུ་མ་ཐུབ་པའི་མུ་ཏིག་རྡོག་པོ་རེ་རེས།
འོད་མདངས་ཟབ་མོའི་འགྲེལ་བབཤད་རེ་རེ་ཁུར་ཏེ།
གངས་རིའི་ཉིན་སྲིབ་ཏུ་ཤུགས་ཀྱིས་འཕྱོ།
མཚོ་མོ་གཞན་ཞིག་གི་གནས་ཚང་ལ་ཤུགས་རིང་འབྱིན་པའི་ངང་བ་ལགས།
ཁྱོད་ཀྱིས་ཅུང་ཙམ་སྒུག་རོགས།
སྙན་ངག་པས། ཁྱོད་དང་རྒྱང་རིང་དུ་ལྷུང་བའི་སྐར་མདའི་རྗེས་ལ།
ཆེས་རྣོ་བའི་མིག་ཟུང་གི་གོམ་འགྲོས་འཁྱོར་བཞིན།
ཆུ་རྒྱུན་དུ་བསྲིངས་པའི་མཛའ་གཞས་དྭངས་མོ་ཞིག་གི་སྣེ་མོར།
འཕག་འཚག་རྒྱག་པའང་ཁྱོད་ཚོའི་ཆེད།
ཐེ་བོ་དཀོན་མཆོག་ཤེས་རབ་ཀྱིས།
ན་མོ་གུ་རུ་མཉྫུ་གྷོ་ཥ་ཡ།
༧རྒྱལ་གསུང་ཡིད་བཞིན་མཚོ་ལས་འཁྲུངས། །
བག་ཡོད་འདབ་བརྒྱ་ཕྱོགས་སུ་གྲོལ། །
ལུགས་གཉིས་གཙུག་ལག་དྲི་བསུང་ཅན།།
དཔལ་ལྡན་ཟམ་གདོང་ཆུ་སྐྱེས་རྒྱལ།
།སྡོམ་གསུམ་ཚུལ་ཁྲིམས་གོས་ཀྱིས་བཀླུབས། །
འཚེ་མེད་ཞི་བའི་སྤྱོད་པས་མཛེས། །
བདེན་དོན་ལྟ་བའི་གདེང་དང་ལྡན། །
ལུགས་གཉིས་མདུན་སའི་རྒྱན་དུ་ཆེ། །
རྣམ་པ་ཀུན་ཏུ་ཁྱོད་ཀྱི་ཐུགས། །
སྙིང་རྗེའི་གཞན་དབང་གྱུར་པ་ཡིས། །
ཤིན་ཏུ་ཉམ་ཐག་གངས་ཅན་པ། །
སྐྱོང་ལ་ཁྱོད་ཉིད་ངལ་མ་གྱུར། །
དེ་ལས་མང་བ་། “༄༅། །མི་༧རྗེ་བཀའ་བློན་ཁྲི་བ་མཆོག་ལ་བསྟོད་པ་ངོ་མཚར་བརྒྱ་ལྡན་ཞེས་བྱ་བ་བཞུགས་སོ།” »
འཆི་མེད།
༼ན་ཆུང་བུད་མེད་རྣམས་ལ་གླེང་མོལ་དུ།༽
མ་ཡུམ བྱམས་སྙིང་རྗེ་དང་ལས་དྲང་བདེན་གྱི་དེ་ཉིད
མ་ཡུམ དཀྱེལ་ཡངས་དང་ལྷག་བསམ་གྱི་མིང་གཞན
མ་ཡུམ ་་་་་་་
མ་ཡུམ གནམ་འོག་ན་གསེར་འོད་ལམ་ལམ་འཕྲོ་ཞིང༌། ཆེས་གཟི་བརྗིད་ཀྱིས་འཕགས་པའི་ཐ་སྙད་དེ་ལགས།
གྲོགས་མོ་རྣམ་པ། ང་ཚོ་ནི་རླབས་ཆེན་གྱི་མ་ཡུམ་དག་ཡིན་པ་སུས་ཀྱང་བསྙོན་དུ་མེད་པས་ན། ནམ་ཡང་ང་རྒྱལ་དང་གཟི་བརྗིད་ཀྱིས་འཚོས་ཆོག་ཆོག་ཡིན། ཡིན་ནའང༌། ང་ཚོས་དོན་དམ་མ་ཡུམ་ཞེས་པའི་ཐ་སྙད་འདིར་འགན་ཁུར་ཐུབ་ཀྱི་ཡོད་དམ། ང་ཚོ་ཚང་མ་མིང་དོན་མཚུངས་པའི་མ་ཡུམ་དག་ཏུ་རུང་ངམ་སོགས་ལྡོག་འདྲི་མང་པོ་ཞིག་དང༌། གཞན་ཡང་བུད་མེད་རྣམས་ནི་ཤེས་རབ་ཀྱི་བདག་མོ་ལགས་པས། མཛངས་པའི་ལས་རྣམས་ཕྱི་ནང་གི་དེབ་ཐེར་ཁག་ཏུ་བཀོད་འདུག་པ་དེས་འཐུས་མོད། ང་ཚོས་ནམ་ཡང་འདས་དུས་ཀྱི་ཁོ་མོ་ཚོའི་མཛངས་པའི་མཛད་པ་དག་ད་ལྟའི་རང་ཉིད་ཀྱི་དར་ཆར་བསྒྲེང་ནས་དུས་འདའ་བར་བྱེད་པ་ནི་ཤིན་ཏུ་ནས་མི་རིགས་པས་ན། ངས་ཀྱང་རང་ཉིད་ཀྱི་བསམ་ཚུལ་དག་ཁྱེད་ཅག་ལ་གྲོས་སུ་འདེབ་པར་འདོད་དོ།།
ལྷོ་ཕྱོགས་ཉི་ཟླ།
མི་རབས་བརྗེ་མཚམས་སུ་རྒས་གཉེར་གྱི་སུལ་ནས་གཉིད་དུ་ཡུར་བའི་གྲོང་ཚོ་ཞིག
—ཁ་བྱང་གི་འགྲེལ་བཤད།
ལོ་ཟླའི་དཀའ་ཚེགས་མང་གང་ཞིག་བརྒྱུད་མཐར།
མི་ལོ་ལྔ་བཅུའི་ཡར་སྔོན་གྱི་ཆེས་གཞོན་ཤ་ཆགས་པའི་རྡ་རམ་ས་ལའི་རི་གྲོང་འདི་ད་ནི་ཡོངས་སུ་རྒས་འདུག་སྟེ།
གོང་ས་མཆོག་གི་མཐོང་གྲོལ་ཞལ་རས་ལ་བགྲེས་གཉེར་བབས་འདུག་པ་འདི་ཡང་གཞན་ཡུལ་ནས་གཞན་དོན་ལ་བསྒྲུབ་རྒྱུ་མང་དྲག་པའི་རྟགས་རེད།
ཟམ་གདོང་བླ་མའི་ངོ་གདོང་སྐྱ་བོ་དེར་ཡང་རྒས་གཉེར་བབས་པ་འདི་བོད་མི་རིགས་ཀྱི་དོན་དུ་སྐུ་ངལ་བསྐྱལ་བས་རྟགས་རེད།
བཀའ་ཤག་ལས་ཁུངས་ཀྱི་ནང་ལ་འཛུལ་སའི་རྡོ་སྐས་ཟད་པོ་དེར་རྒས་གཉེར་བབས་འདུག་འདི་ཡང་སྤྱི་དོན་དུ་ཡར་མར་དུ་ཕེབས་རྒྱུ་མང་དྲག་པའི་རྟགས་རེད།
དེ་ལས་མང་བ་། “ཀླུ་སྨྱོན་གྱི་རྡ་སར་རྒས་གཉེར་བབས་པའི་རྩོམ་དེའི་མཇུག་མཐུད་དེ་བྲིས།” »