(ནོར་གླིང་མཐོ་སློབ་ཀྱི་སྙན་ངག་མ་ཞིག་ལ་བསྟབས།)

རྟ་ནག་སྐལ་བཟང་ལུང་རིགས།

ཞལ་རས་འཛུམ་ཙམ་འཛུམ་ཙམ་བྱས་པ།།
སྙིང་སྡུག་བློ་ལ་འཐད་པས་ཡིན་ནམ།།
མགོ་བོ་གཡོན་ཙམ་གཡོན་ཙམ་བྱས་པ།།
སྙིང་སྡུག་རྒྱབ་གཟུགས་འཚོལ་བ་ཨེ་ཡིན།།

ནུ་ཟུང་དྲོན་མོའི་རྒྱབ་ཀྱི་གངས་རི།།
ཁྱེད་ཀྱི་སྙན་ངག་ཁུད་ན་བདོག་གམ།།
བྲང་གཞུང་ཚ་བོའི་ངོས་ཀྱི་བརྩེ་བ།།
སུ་དང་གང་གི་ལག་ལ་འཇོག་གམ།།

དེ་ལས་མང་བ་། “མཛེས་མ་སྒྲོལ་མ་འདྲ་བོ་ཁྱེད་ཡིན།” »

རླངས་འདྲེ་བཀོལ།

ཞར་དང་ཞོར་ལ་ཞི་བདེ་གླེང་བའི་ཞི་བདེའི་མི་སྣ་འགའ་ཞིག་དང་།།

ཚད་ལས་བརྒལ་བའི་དཀའ་ཚེགས་སྤྱད་ནས་འཚེ་མེད་འཚོལ་བའི་ཚུལ་ལྡན་ཁྱོད།།

འགྲན་དུ་འདོད་ཀྱང་འགྲན་ཟླ་མི་དོ་འགྲན་མེད་དེད་དཔོན་ཁྱོད་ཉིད་ཅེས།།

གོ་ལའི་ཁྱོན་གྱི་གོ་རྟོགས་ལྡན་པའི་མགོ་བོ་ཅན་ཚོས་གུག་གུག་སྨྲས།།

སྐྱབས་མཆོག་ཁྱེད་ཀྱི་སྐྱབས་མེད་སྐྱོབས་ཕྱིར་རླབས་ཆེན་སྐད་ཀྱིས་འདི་སྐད་བསྐུལ།།

དེ་ལས་མང་བ་། “ཐུགས་ཡིད་མ་སུན།” »

(ཨ་རིར་ཚོགས་པའི་སྐུའི་འཁྲུངས་སྐར་མཛད་སྒོ་མཐོང་རྗེས་སུ།)

ཀིརྟི་སྐྱབས་ཀྱིས།
༄༅།།རྒྱལ་བའི་སྐུ་ཁམས་དྭངས་པས་དགའ་བ་ལ།།
དགུང་ལོ་ཇེ་མཐོར་ཕེབས་པས་སྐྱོ་བ་ལ།།
རྒྱལ་བའི་གདུལ་བྱར་གྱུར་པས་དགའ་བ་ལ།།
རྒྱལ་བའི་བཀའ་བཞིན་མི་ནུས་སྐྱོ་བ་ལ།།
རྒྱལ་བ་བོད་དུ་འཁྲུངས་པས་དགའ་བ་ལ།།
རྒྱལ་བ་ཕྱི་ནས་བགྲེས་པས་སྐྱོ་བ་ལ།།
འཛམ་གླིང་སྤྱི་ནོར་གྱུར་པས་དགའ་བ་ལ།།
བོད་མིས་ནོར་ཉམས་མི་ཆོད་སྐྱོ་བ་ལ།།

དེ་ལས་མང་བ་། “དགའ་སྐྱོའི་ཐོལ་གླུ།” »

བོད། ལྷ་ཀླུ་གཉན་་གསུམ།

འོད་དེ་འཁྲུངས་ཉིན གནམ་སྔོན་པོ་འོད་ཀྱིས་བཀང་
འོད་དེ་འཁྲུངས་ཉིན ས་དོག་མོ་དྲོད་ཀྱིས་བཟུང་
དེ་ནི་ནམ་ཟླ་ཆེས་ཡག་པོ་ཞིག་ཡིན
དེ་ནས་བཟུང་ གནམ་ས་གཉིས་ཀ་འོད་ཀྱི་གཞི་ཁྱིམ་དུ་གྱུར་མྱོང་

བསམ་ཡུལ་ལས་འདས་པའི་སྔ་དགུང་ཞིག་ལ
འོད་ལམ་དུ་མུན་ནག་ཁྲ་བོ་ཞིག་སླེབས
འོད་འོག་གི་འཇིག་རྟེན་ལ་འཁྱགས་པས་བསྡམས
བསྐལ་བ་བཟང་བོ་དེ་དྲན་གསོ་བྱེད་མཁན་ནི
ས་གཞི་དེར་འཚོ་བའི་གངས་རིའི་མི་རྒྱུད་ཅིག
དུས་ད་ལྟའང་འོད་ཀྱི་བཞུད་ལམ་དུ་འཕྲེང་ནས་ཡོད

དེ་ལས་མང་བ་། “འོད་ཀྱི་འཁྲུངས་སྐར་ལ་སྐུར་བ།” »

ཆབ་་བྲག་ཕོ་ཉ།

ཉེ་འདབས་སུ། རི་གྲོང་གི་དབུལ་ཕོངས་སེལ་བའི་ནོར་བུ།
རྒྱང་རིང་དུ། སེམས་ཁམས་ཀྱི་མུན་པ་སེལ་བའི་སྒྲོན་མེ།
ཡིད་བཞིན་ནོར་བུ།
གཉེན་ཉེ་ཚོར། ཆགས་པ་བྲལ་བའི་བརྩེ་ཆེན་གྱི་མ་ཡུམ་དམ་པ།
དགྲ་བོ་ཚོར། སྡང་སེམས་བྲལ་བའི་གཞོམ་མེད་ཀྱི་དགྲ་ཟླ་དམ་པ།
ཡིད་བཞིན་ནོར་བུ།
རྒྱལ་ཁ་རྩོད་ནས་ཕམ་ཁ་མྱོང་བའི་སྤྱི་ཚོགས་འདིར།
ཕམ་ཁ་ཁུར་ནས་རྒྱལ་ཁ་ལེན་པའི་མཁས་མཛངས་ཁྱོད།
ཡིད་བཞིན་ནོར་བུ།
ཚན་རིག་པས། ཁྱེད་ཀྱི་ཀླད་རྩ་ན་གསང་བ་ཞིག་འཚོལ་བར་རེ།
བོད་པ་ཚོས། ཁྱེད་ཀྱི་ཕྱག་འོག་ན་བྱིན་རླབས་ཤིག་ཡོད་པར་རེ།
ཡིད་བཞིན་ནོར་བུ།

དེ་ལས་མང་བ་། “ཡིད་བཞིན་ནོར་བུ།” »

གསེར་རྟ་ཚུལ་ཁྲིམས་འོད་ཟེར།

༄༅།།ཨོཾ་བདེ་ལེགས་སུ་གྱུར་ཅིག །

རྒྱལ་ཀུན་བརྩེ་ཆེན་སྤྱན་རས་གཟིགས་དབང་ཡོངས་རྫོགས་བསྟན་འགྲོའི་མགོན་སྐྱབས་སུ། །
གསུམ་ལྡན་རྡོ་རྗེ་འཛིན་པའི་སྐུར་བཞེངས་རྒྱ་མཚོ་ལྟར་ཟབ་མཛད་འཕྲིན་གྱིས། །
སྲིད་གསུམ་ཞི་བདེའི་དཔལ་དུ་དབང་བསྒྱུར་ཀུན་ཕན་མཁྱེན་བརྩེ་ནུས་པའི་གཏེར། །
མཚུངས་མེད་གཏན་གྱི་སྐྱབས་གཅིག་དཔལ་ལྡན་རྩ་བའི་བླ་མའི་སྡེ་དེར་འདུད། །

འཇིག་རྟེན་ཞེས་བྱའི་གོ་ལའི་ཁྱོན་ན་སྐྱེས་སྦྱང་ལྷག་བསམ་ཉིན་བྱེད་བརྒྱའི། །
གཟི་བྱིན་ཉིན་ལྟར་བླ་ན་འབར་བའི་སྤྱན་རས་གཟིགས་དབང་བཅུ་བཞི་བ། །
བསྐལ་མང་བསགས་པའི་སྤྱི་མཐུན་དགེ་བས་ཁྱོད་སྐུ་འགྱུར་མེད་རྟག་བརྟན་ཞིང་། །
ཀུན་ཕན་རླབས་ཆེན་བཞེད་དོན་གེགས་མེད་ལྷུན་གྱིས་འགྲུབ་པར་སྨོན་ལམ་འདེབས། །

དེ་ལས་མང་བ་། “འཁྲུངས་སྐར་ལ་ཕུལ་བ།” »

འབྲོང་ངུར་ཆོས་རྗེ། རྣམ་གྲོལ་གླིང་།

རྣམ་སྲས་བང་མཛོད་ཅོ་འདྲི་བྱེད་པའི་ཨ་འབྲུག་ཚང་དུ་ལྟེ་ཁྲག་འཐོར།།
ལོངས་སྤྱོད་སྤེལ་ལ་མགོ་བོ་མ་འཐོམས་གངས་རིར་འཁྱུད་པའི་དུང་ཞེན་ཟབ།།
གདོང་དམར་བོད་མིའི་སྐྱིད་སྡུག་ཆེད་དུ་གཅེས་པའི་སྲོག་ཀྱང་ལན་མང་བཤམས།།
འབྲོང་རྒོད་ཁྱོད་ལ་གུས་འདུད་དང་བཅས་བཀའ་དྲིན་རྗེས་དྲན་མི་ཞུ་སུ།།

འཛམ་གླིང་སུམ་གཉིས་དབང་དུ་བསྡུས་ཞེས་མེས་པོ་སྲོང་བཙན་ཆེ་བ་སྒྲོག།
ཕྱག་མདའ་གཅིག་གིས་གླང་དར་བཀྲོངས་ཞེས་ལྷ་ལུང་དཔལ་རྡོར་གཟེངས་སུ་བསྟོད།།
ཧོར་བདུད་མོན་འཇང་ཁྲག་གིས་བཀང་ཞེས་གླིང་རྗེ་གེ་སར་མཆོད་ལ་བྲེལ།།
བྷ་ཏ་ཧོར་སོགས་ཆམ་ལ་ཕབ་ཅེས་མུ་རུབ་བཙན་པོ་བསྔགས་གྱུར་ན།།

དེ་ལས་མང་བ་། “གངས་ཅན་པའི་སེམས་ཁོང་ན་ནམ་ཡང་འགྱིང་བའི་འབྲོང་རྒོད།” »

བསམ་གླིང་ཚེ་རིང་ལྷ་མོ།

སྐུ་ཡི་མཚན་བཟང་དཔེ་བྱད་བརྒྱད་ཅུ་ཡིས་མཛེས་ཤིང།།

ཐུགས་ཀྱི་མཁྱེན་རླབས་མཚུངས་བྲལ་ཤར་ཕྱོགས་ཀྱི་རྒྱལ་སྲས།།

ཞལ་མཇལ་གསུང་ཐོས་ཀྱི་སྐལ་བཟང་གཞིས་ལུས་ཚོར་མེད་ཀྱང།།

གངས་ལྗོངས་བོད་མིའི་སེམས་ན་སྤྱན་རས་གཟིགས་ཁྱེད་ཡིན།།

དེ་ལས་མང་བ་། “མེ་ཏོག་གི་མཆོད་སྤྲིན།” »

དགེ་བཤེས་འཕྲིན་ལས་རྒྱ་མཚོས།

ཀུན་ཏུ་རྨོངས་པའི་དྲི་མ་དག་ཅིང་སྐུ་བཞིའི་དཀྱིལ་འཁོརཡོངས་སུ་རྫོགས།།

མཁྱེན་དང་བརྩེ་བའི་འོད་ཀྱི་སྣང་བས་རྨོངས་པའི་སྨག་ཆེན་དབྱིངས་སུ་བཅིལ།།

བདག་བློ་དང་བའི་མཁའ་རུ་རྩེན་པའི་ལྷ་གཅིག་ཕྱག་ན་པདྨོ་ཡིས། །

བྱིན་རླབས་ཡེ་ཤེས་སྣང་བའི་ཟེར་བརྒྱས་བདག་ཡིད་འཆང་བ་ད་དགྲོལ་ཅིག།

སྐུ་ཡི་མཚན་དཔེ་མཐོང་ཐེངས་རེ་རེར་ལུས་ལ་དད་པའི་སྤུ་ལོང་གཡོ།།

གསུང་གི་དབྱངས་སྙན་ཐོས་ཐེངས་རེ་རེར་ཡིད་ཀྱི་གདུངས་པ་ཀུན་ནས་བཅིལ།།

ཐུགས་བསྐྱེད་ཟབ་མོའི་ཆ་ཤས་རེ་རེར་བསྟན་འགྲོའི་ཕན་བདེའི་རི་མོ་འཁྱིལ།།

ཅུང་ཟད་ཙམ་ཡང་ངལ་བ་མེད་པར་རྟག་ཏུ་གཞན་དོན་སྒྲུབ་ལ་བྲེལ།།

དེ་ལས་མང་བ་། “མ་བསྐུལ་སེམས་ཀྱི་མཆོད་པ།༼༧རྒྱལ་བའི་འཁྲུངས་སྐར་ལ་ཕུལ།༽” »

སྦྲ་རིགས་ཐོགས་མེད། (ལྡི་ལི་གཙུག་ལག་སློབ་གླིང་།)

ལོ་རྒྱུས་ལ་གོད་ཆགས་བྱུང་བའི་དུས་དེ་ནས་བཟུང་།
བོད་ཡུལ་དུ་ཁྲག་དམར་འཁྱིལ་བའི་དུས་དེ་ནས་བཟུང་།

ཁྱེད་ཀྱིས་ཕུགས་བསམ་དང་རྨི་ལམ་གྲངས་མེད་ཅིག་ཁུར་ནས་ལམ་དུ་ཆས་སོང་།
ཁྱེད་ཀྱིས་བྱམས་བརྩེ་དང་གཞན་དོན་རྫོགས་མེད་ཅིག་བསྣམས་ནས་རྒྱང་དུ་བཞུད་སོང་།

ཞི་བདེ་ལ་དགའ་བའི་ཧི་མ་ལ་ཡའི་རྒྱལ་སྲས་ཁྱེད་རང་།
རྟེན་འབྱུང་གིས་བཟི་བའི་ནང་བསྟན་རིག་པའི་བསམ་བློ་བ་ཁྱེད་རང་།

དེ་ལས་མང་བ་། “རྒྱལ་ཁམས་སྐོར་བའི་སློང་མོ་བ།” »

རིག་འཛིན།

ལྷ་གཅིག་གངས་རིའི་ལྷ་སྐལ།།

སྲིད་གསུམ་ཕྱག་ན་པད་མོ།།

དགུང་གྲངས་དོན་དྲུག་ཕེབས་པར།།

འཁྲུངས་སྐར་གླུ་དབྱངས་འབུལ་ལོ།།

དེ་ལས་མང་བ་། “འཁྲུངས་སྐར་གླུ་དབྱངས་འབུལ་ལོ།” »

འབའ་སྲས།

མཚན་བཟང་སྐུ་ཡིས་སྐྱེ་རྒུ་དང་བ་འདྲེན།།
བརྩེ་ཆེན་ཐུགས་ཀྱིས་འགྲོ་རྣམས་རྗེས་སུ་བཟུང་།།
ཡང་དག་གསུང་གིས་བདེ་འགྲོའི་ལམ་སྟོན་པ།།
གངས་ཅན་ཁ་བའི་མགོན་པོའི་ཞབས་ལ་འདུད།།

རཱ་ཛའི་མཚན་སྙན་འཛིན་པ་མང་བྱུང་ཡང་།།
རྒྱལ་ཁབ་ཆོས་ཀྱིས་སྐྱོང་བ་ཁྱོད་ལས་མེད།།
ནགས་མའི་ཀློང་དུ་ལྗོན་པ་མང་སྐྱེས་ཀྱང་།།
ཡོངས་འདུས་ལྗོན་པའི་ཟླ་ལ་འགྲན་ནུས་གང་།།

དེ་ལས་མང་བ་། “༧གོང་ས་མཆོག་གི་སྐུའི་འཁྲུངས་སྐར་ལ་ཕུལ་བ།” »

རྡོ་རྗེ་དབང་ཕྱུག

མུན་པས་བྱེར་བའི་གངས་ཀྱི་འཛིན་མའི་ཁམས།།
སྡུག་བསྔལ་འོ་དོད་ནག་པོས་བཟུང་བའི་མུན།།
མཐར་བྱེད་ཉི་མ་བྱེ་བའི་དཔལ་འཛིན་པ།།
གྲུ་འཛིན་གསེར་གྱི་རི་ལ་མངོན་པར་འཆར།།

དེ་ཚེ་སྐྱེ་དགུའི་བསོད་ནམས་ནགས་མའི་ཚལ།།
དགའ་སྤྲོའི་འཛུམ་པ་གྲོལ་བའི་མེ་ཏོག་གི།
བསུང་ཞིམ་བཀྲ་ཤིས་དགེ་བས་ཡོངས་འཁྱུད་པས།།
བོད་ཁམས་རྫོགས་ལྡན་དཔྱིད་ཀྱི་རི་མོས་བཟུང༌།།

དེ་ལས་མང་བ་། “འཁྲུངས་སྐར་དུས་ཆེན་ལ་ཕུལ་བའི་སེམས་ཀྱི་མཆོད་པ།” »