སེར་བྱེས་དགེ་བཤེས་རོང་པོ་བློ་བཟང་སྙན་གྲགས།
————–
༄༅། །དམ་ཚིག་འོ་ཆུ་དཀར་པོ་གཞི་གཅིག་ཏུ་འཁྱིལ་ནས་ཡུན་རིང་འགྲོགས་ཤིང་འདྲིས་པའི་མཛའ་བཤེས་དམ་པ་ཡོངས་ཀྱི་དགེ་བའི་བཤེས་གཉེན་ཆེན་མོ་རྒན་འཇམ་དཔལ་བློ་ཤེས་མཆོག་གངས་རིའི་ལྗོངས་སུ་སྐུ་མཛད་ཆུ་བོའི་རྒྱུན་བཞིན་འཕེལ་སྐབས་གློ་བུར་དུ་ཞི་བར་གཤེགས་པར་ཡིད་གདུང་དྲག་པོས་མྱ་ངན་ཞུ།
༄༅། །བརྒྱད་ཁྲི་བཞི་སྟོང་གཏམ་གྱི་ཐོག་མཐའ་གཉིས། །
མི་རྟག་གཏམ་གྱི་ཆོས་ཚུལ་འདོམས་མཛད་ཅིང་། །
རྒུད་པ་རྣམ་བཞིའི་ཆོས་ཉིད་མངོན་གཟིགས་ཏེ། །
སྐྱེ་འཆིའི་རྩ་བ་གཅོད་མཛད་རྒྱལ་བ་མཁྱེན། །
བློ༷་ཆེན་ཀུན་བཟ༷ང་ལུང་རིགས་བྱེ་བའི་གཏེར། །
ལོག་རྟོག་རྣམ་གནོན་སེང་གེའི་ངར་སྐད་ཀྱིས། །
མདོ་སྔགས་བསྟན་པའི་སྙིང་པོ་གསལ་མཛད་པ། །
ཙོང་ཁ་པ་ཞེས་གྲ༷གས་པ༷འི་དཔལ་གྱིས་སྐྱོངས། །
འཇ༵མ་རྩུབ་ལེགས་བཤད་སྟོང་ཕྲག་སྨྲ་བའི་ལྕེས། །
དཔ༵ལ་ལྡན་མཁས་པ་ཀུན་གྱི་མགོ་བོ་ལ། །
བློ༵་གྲོས་ཕྱོགས་ལས་རྣམ་པར་རྒྱལ་བའི་དར། །
ཤེ༵ས་རབ་མཆོག་གིས་འཛུགས་པའི་གྲོགས་ཁྱོད་དགོངས། །
ལུས་ཀྱི་མྱུ་གུ་གངས་རིའི་ལྗོངས་སུ་འབུས། །
ཡོན་ཏན་ཁོ་ལག་འཕགས་ཡུལ་ལྷོ་རུ་རྒྱས། །
མཛད་འཕྲིན་སྙེ་མ་བོད་ཁམས་ལྗོངས་སུ་བཞད། །
གློ་བུར་འཇའ་བཞིན་ཡལ་འདིར་བློ་རེ་ཕམ། །
སེར་ཤུལ་ཆོས་ཀྱི་སྡེ་ཆེན་ལུང་རིགས་མཚོ། །
འགོག་མེད་གྱེན་དུ་འཕྱུར་མཛད་ཟླ་བའི་འཛུམ། །
སྟོན་མཚན་རྒྱུ་སྐར་བྱེ་བ་མཛེས་པའི་རྒྱན། །
མི་མངོན་ནུབ་རིར་འཆེལ་ལ་ཞེ་རེ་སྨྲེང། །
ལོ་མང་སྣ་ཚོགས་དཀའ་བ་སྟོང་ཕྲག་གི །
སྣེ་མོར་འཇུས་ཤིང་ཐབས་མཁས་གདོང་ལེན་གྱིས། །
ལུང་རྟོགས་ཡོན་ཏན་ནོར་བུའི་མཛོད་འཆང་བ། །
ཁྱོད་ལྟའི་ཡོན་ཏན་རྫོགས་པ་རེ་གཉིས་ཙམ། །
ཟབ་གསལ་མྱུར་བའི་རྣམ་དཔྱོད་ནམ་མཁའི་གློག །
མི་འཇིགས་སྙིང་སྟོབས་ཟབ་བརླིང་ལྷུན་པོའི་སྤོར། །
དྲག་ཏུ་འཁྱུགས་པའི་ལུང་རིགས་རྣོན་པོའི་གཟི། །
ཕས་ཀྱི་རྒོལ་བ་སྟོང་གིས་བསམ་མི་བཟོད། །
གདན་གསུམ་མཁས་མང་ལུང་རིགས་གཏུགས་པའི་ཚེ། །
འཕགས་བོད་གཞུང་བརྒྱའི་དཀའ་གནད་མདུད་པའི་རྒྱ། །
གོ་རིགས་ཟུང་སྦྲེལ་འཕྲུལ་གྱིས་གྲོལ་བ་ཡི། །
སྐད་གསང་མཐོན་པོའི་སྟངས་སྟབས་ཡིད་ལ་ལྕི། །
མདོ་སྔགས་རིག་གནས་ཤེས་པར་བྱ་བའི་གནས། །
ཕན་ཚུན་ལབ་གླེང་འཕྲོས་པར་འབྱམས་ཀླས་ཏེ། །
ཞོགས་པའི་སྐྱ་རེངས་འཆར་བའི་ཁྱི་སྐད་ཀྱིས། །
ངེད་གཉིས་དཀྲོགས་པའི་གཏམ་རྒྱུད་ཉུང་ཉུང་མིན། །
ཤ་དང་རུས་པ་རྐང་ལ་ཐིམ་པ་ཡི། །
ཕན་ཚུན་གུས་བརྩིའི་སྤྱི་སྒེར་བྱ་བའི་སྒོ། །
དྲན་པའི་མེ་ལོང་དག་པའི་བཞིན་རས་སུ། །
ཡང་ཡང་འཆར་བ་མིག་ཆུ་སྣོན་པ་ཉིད། །
སྔ་ཕྱི་མཁས་དང་འཇམ་མགོན་ཡབ་སྲས་ཀྱི། །
མདོ་སྔགས་གཞུང་ལུགས་དཀའ་གནད་གླེང་བའི་གཏམ། །
ཡིག་ཆ་ཕན་ཚུན་འཛིན་མཚམས་གནད་ཀྱི་འགངས། །
སོ་སོར་འབྱེད་པའི་རྣམ་དཔྱོད་གཞན་ལས་ལྷག །
མདོ་སྔགས་གཞུང་ཆེན་རྩ་འགྲེལ་སྤྱི་མཐའི་གནད། །
ཚིག་དོན་རྣོ་ཞིང་གསལ་ལ་འདྲིལ་བ་ཅན། །
འཆད་ཁྲིད་སྐལ་ལྡན་ཡིད་འཕྲོག་ལེགས་བཤད་ཀྱི། །
འབུམ་ཕྲག་གཞུང་བརྒྱའི་ཉིན་སྲིབ་གསལ་བར་བྱས། །
གཏིང་ཟབ་རྒྱ་ཆེའི་ལྷག་བསམ་ཆུ་ལས་སྐྱེས། །
བསྟན་འགྲོར་ཕན་བདེ་གསུང་གི་བང་རིམ་མཛེས། །
མདོ་སྔགས་ཉི་ཟླའི་རྣ་ལུང་མཐོན་པོ་ཅན། །
གས་ཤིང་འཐོར་བའི་གཏམ་ངན་སྙིང་ལ་གཟན། །
ལྷག་བསམ་དཔུང་སྟོབས་བརྟན་པོས་འཕངས་པ་ཡི། །
རྣག་ཐོག་གཙགས་ཁེལ་སློབ་གསོའི་མདའ་རྣོན་པོ། །
རྗེས་ལུས་མཚང་ལ་ཕོག་ཐུག་རྒོལ་བ་ཡི། །
སྤྱི་སྨན་གསུང་གིས་འཇིག་རྟེན་བློ་མིག་ཕྱེ། །
ས་ཆེན་འོད་ཀྱིས་འགེངས་པའི་མཛད་པ་རེས། །
གངས་ཅན་བོད་དུ་མུན་པའི་དཔུང་བཅོམ་སྟེ། །
ཀུན་གྱི་རེ་བ་རི་བཞིན་མཐོ་བའི་དུས། །
གློ་བུར་དབྱིངས་སུ་ཡལ་འདི་ཅི་ཡིས་ནོངས། །
རིགས་ཞེན་རུས་པ་དཀར་པོའི་གསུང་བཤད་དང་། །
རྣམ་དཔྱོད་གློག་འོད་འཁྱུགས་པའི་འཆད་ཁྲིད་ཀྱི། །
གནམ་གྱི་ཤེད་མོང་འཆང་བའི་ལངས་ཕྱོགས་རྣམས། །
བསྐལ་པ་སྟོང་གིས་བྲིས་པའི་དེབ་ཐེར་ཡིན། །
རྒྱལ་བསྟན་རིན་ཆེན་ནཱ་ལེནྡྲ་ཡི་སྲོལ། །
བོད་བརྒྱུད་ནང་བསྟན་སྐད་ཡིག་རིག་གཞུང་བཅས། །
ཆག་འཇིག་ཕྱི་ནང་རྐྱེན་ངན་འཐབ་དུས་འདིར། །
སྤྱི་སེམས་ལག་ལེན་གྲོགས་ཁྱེད་ཤིན་ཏུ་མཁོ། །
ང་དང་ང་ཡིར་ཤི་སྤར་འཐམས་པ་ཡི། །
ཆེན་པོའི་ཐ་སྙད་འཆང་བ་མང་བཞུགས་ཀྱང། །
གནད་ལ་གཏུགས་ཚེ་མི་སྨྲའི་བརྟུལ་ཞུགས་ཀྱིས། །
རི་བོང་རྡོ་བརྫུས་འཕྲུལ་ལ་སུ་ཡང་འབྱམས། །
སྤྱི་ལ་མཁོ་བའི་མི་རྣམས་ཚེ་ཡིས་གཏུགས། །
ཤེས་འཇོན་ལྷག་བསམ་ཆེ་རྣམས་གཉའ་ནས་གནོན། །
ཕྱོགས་ལྷུང་འཐེན་འཁྱེར་བསྟན་པ་དར་བའི་དུས། །
ཁྱེད་དང་ཁྱེད་འདྲའི་དཔའ་མཛངས་ཡིད་ལ་འཁོར། །
ལྟོས་བཅས་རིས་མེད་གདུལ་བྱ་སྐར་མའི་གྲངས། །
ཡིད་ལ་མྱ་ངན་དགུན་གྱི་གྲང་རླུང་གིས། །
ཟུག་གཟེར་གདུང་ཤུགས་དྲག་པོས་ནོན་པའི་སྙིང་། །
མཆོག་གསུམ་རྒྱལ་བ་རྒྱ་མཚོས་གཟིགས་ལགས་སམ། །
བསྟན་དང་འགྲོ་ལ་སྙིང་ནས་ཤ་ཚ་བའི། །
གཏམ་གྱི་ཆུ་ཀླུང་གྱེན་དུ་འཕྱུར་བའི་དུས། །
གློ་བུར་རྒྱུན་ཐག་ཆད་པའི་གྱོང་གུད་འདིར། །
འཕྲོ་སྐྱོང་གུན་གསབ་བྱེད་ཐབས་སུ་ཡིས་ནུས། །
ལངས་ཕྱོགས་གསེར་གྱི་ཀ་བ་རབ་བརྟན་ཅིང་། །
ཐུགས་སྟོབས་རྩིབས་མ་བརྒྱ་བའི་གདུགས་དཀར་པོ། །
རྣམ་དཔྱོད་གློག་འོད་སྟོང་གིས་མཛེས་པ་ཅན། །
ཡོམ་ཡོམ་འགུལ་ནས་འགྱེལ་ལ་སུ་མི་ཕངས། །
འོན་ཀྱང་ཐུགས་བསྐྱེད་མཚོ་ལྟར་གཏིང་ཟབ་ཅིང་། །
མདོ་སྔགས་མཁྱེན་རབ་མཁའ་ལྟར་ཡངས་པའི་སྟོབས། །
རྣམ་དག་སྨོན་ལམ་རླུང་ཤུགས་ཀྱིས་བསྐྱོད་དེ། །
སྒྱུ་འཕྲུལ་དྲ་བ་འགྱེད་ལ་སུ་ཞིག་ཚོམ། །
ཕྱག་ན་པད་དཀར་འཆང་བ་སྲས་བཅས་དང་། །
རིས་མེད་དགེ་འདུན་འདུས་པ་རྒྱ་མཚོའི་སྡེ། །
ཕྱོགས་ཀུན་ཁྱོད་ལ་གུས་བརྩིའི་སྐྱེ་འགྲོ་རྣམས། །
ཇི་ལྟར་སྨོན་པའི་དོན་ཀུན་གྲུབ་གྱུར་ཅིག །
ཅེས་དམ་ཚིག་འོ་ཆུ་དཀར་པོ་གཞི་གཅིག་ཏུ་འཁྱིལ་ནས་ཡུན་རིང་འགྲོགས་ཤིང་འདྲིས་པའི་མཛའ་བཤེས་དམ་པ། མདོ་སྔགས་རིག་གནས་ཀུན་ལ་ཐོས་བསམ་སྒོམ་གསུམ་དང་འཆད་རྩོད་རྩོམ་གསུམ་གྱི་སྒོ་ནས་བསྟན་འགྲོའི་དོན་རླབས་ཆེན་མཛད་པའི་ཡོངས་ཀྱི་དགེ་བའི་བཤེས་གཉེན་ཆེན་མོ་རྒན་འཇམ་དཔལ་བློ་ཤེས་མཆོག་བོད་གངས་རིའི་ལྗོངས་སུ་ཉིན་མཚན་དབྱེ་བ་མེད་པར་ལུས་སེམས་གཉིས་ཀར་འོ་བརྒྱལ་ཆེ་ཞིང་། བྲེལ་འཚུབ་ཤིན་ཏུ་ཆེ་བའི་མཛད་འཕྲིན་རླབས་ཆེན་རྒྱས་བཞིན་པའི་མུར་གློ་བུར་ཐོག་རྒྱག་ལྟ་བུར་གསོ་ཐབས་དཀའ་བའི་སྙུན་གཞིས་ཡུན་རིང་བསྙུངས་ཤིང་། སེར་ཤུལ་ཁྲི་པ་རིན་པོ་ཆེས་གཙོས་པའི་གྲྭ་ཚང་དང་ཁང་ཚན་འབྲེལ་ཡོད་གཞིས་དགོན་ཁག་དང་བློས་ཐུབ་ཆོས་གྲོགས་ཡོངས་ནས་སྤྱི་བྱེའི་མཐུན་རྐྱེན་ཕངས་མེད་དུ་ཕུལ་ཏེ། བསྟན་འགྲོ་སྤྱི་དང་ལྷག་པར་མདོ་ཁམས་ཕྱོགས་སུ་འཕྲིན་ལས་སྔར་ལྷག་སྐྱོང་བའི་འབད་པ་བརྒྱ་ཕྲག་བསྟེན་ཀྱང་། དགུང་ལོ་༥༡ ཐོག་སྐུ་ཞི་བར་གཤེགས་པ་ཐོས་པས་བློ་ཕམ་དང་ཡིད་གདུང་ཆེན་པོ་བྱུང་། སེར་ཤུལ་དགོན་པས་གཙོས་པའི་བོད་ཕྱི་ནང་གི་འབྲེལ་ཡོད་ལྟོས་བཅས་ཡོངས་ལ་ཐུགས་གསོའི་འཚམས་འདྲི་དང་འབྲེལ། གུས་ནས་ཀྱང་རྒན་དམ་པའི་གང་བཞེད་ཐུགས་ཀྱི་དགོངས་པ་ཟབ་མོ་ཡོངས་སུ་རྫོགས་ཕྱིར། འཕགས་མཆོག་ཕྱག་ན་པདྨོར་གསོལ་ཚིགས་དོད་ཧིན་སྒོར་༥༠༠༠ དང་། ས་སྐྱ་གོང་མ་རིན་པོ་ཆེ་དང་། རྒྱལ་བ་ཀརྨ་པ། དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་བཅས་ལ་ཧིན་སྒོར་༥༠༠ རེ། རང་ཁོངས་བྱ་བྲལ་ཁང་ཚན་རིན་པོ་ཆེར་སྒྲོལ་ཆོག་ཐོག་དགེ་འདུན་པ་རེར་ཧིན་སྒོར་༥༠ རེའི་སྐུ་ཡོན་དང་། གདན་ས་གསུམ་སོ་སོར་ཧིན་སྒོར་༡༠༠༠ རེ། རྒྱུད་གྲྭ་སྟོད་སྨད་གཉིས་ལ་ཧིན་སྒོར་༥༠༠ རེའི་འབྲེལ་ཙམ་བཞག་སྟེ། དམ་པ་ཁོང་གི་ཐུགས་བཞེད་ལྟར་འགྲུབ་པའི་སྨོན་འདུན་ཞུ་རྒྱུ་དང་། ཁ་སང་བདག་ཅག་ཡོངས་ཀྱི་དགེ་བའི་བཤེས་གཉེན་ཆེན་མོ་སེར་བྱེས་ལུང་རིགས་སྨྲ་བའི་གཙུག་རྒྱན། རྗེ་ངག་དབང་སངས་རྒྱས་མཆོག་ནས་ཀྱང་ཐུགས་ཚེགས་ཆེན་པོས་ཞལ་པར་ཞིག་གནང་སྟེ། སྤྱན་ཆབ་རྒྱུན་རིང་བསིལ་བཞིན། ངེད་གཉིས་མིད་པ་འགགས་ཏེ་ཡུན་རིང་ཞིག་ལུས། ཁོང་གིས་ཤིན་ཏུ་ཕངས་སྣང་གིས་འབྲེལ་ཡོད་ཚང་མར་ཐུགས་གསོའི་འཚམས་འཕྲིན་ཕྲིས་ཤིག་ཅེས་བཀའ་གནང་བ་དང་། སླད་མར། དགེ་བའི་བཤེས་གཉེན་ཁོང་ལ་འབྲེལ་ཡོད་ཙམ་དུ་མ་ཟད། རིས་མེད་བསྟན་འགྲོའི་དོན་ཆེན་མཛད་མཁན་རྣམས་དང་། ཤེས་ཡོན་སློབ་གསོའི་ཐོག་མ་རིག་པའི་མུན་པ་སེལ་མཁན་ཤེས་ཡོན་པའི་སྡེ་དག་གིས་ཚུལ་འདི་ཞེ་ལ་བཞག་སྟེ། དུས་ཚོད་ཧ་ཅང་གཉན་འཕྲང་གི་སྐབས་འདིར་ནམ་རྒྱུན་སོ་སོའི་སྐབས་འཁྲིའི་ཕྱག་ལས་དང་ལུས་སེམས་ཀྱི་འཕྲོད་བསྟེན། ཟས་དང་སྤྱོད་ལམ་ལུས་སྦྱོང་སོགས་གཟུགས་པོའི་བདེ་ཐང་ལ་གང་ཕན་གང་གཟབ་ཐོག །ཁོང་གི་བསླབ་བྱ་ཁག་ལ་ཉམས་ལེན་དང་། གཞུང་ཆེན་ཁག་གིས་གཙོས་པའི་སློབ་ཁྲིད་ལ་སྔར་ལྷག་སློབ་སྦྱོང་གནང་བ་དང་། ཁོང་གི་གསུང་བཤད་དང་། དཔེ་ཁྲིད། གསུང་རྩོམ་ཁག །གཞན་ཡང་། གཟིགས་དཔེ་མཆན་ཡིག་ཅན་དང་། ཆེས་གནད་འགག་ཅན་ལ་དམར་རྟགས་ཤིག་གེ་འདེབས་པ་ཞིག་ཕྱག་ལེན་ལ་ཡོད་པ་དེ་དག་གནད་འགག་ཧ་ཅང་ཆེ་བ་ཡོད། ད་དུང་ཟུར་འཛར་ཁག །དེ་དག་ཟུར་འདོན་ཕྱོགས་གཅིག་ཏུ་བསྒྲིག་པ་ཡིན་ན་གཞུང་གི་དཀའ་གནད་འབིགས་པ་ལ་ཤིན་ཏུ་ཕན་པའི་བསྟན་བཅོས་པོ་ཏི་ལོངས་པ་ཁ་ཤས་ཡོད་ངེས། ཁོང་གི་ཕྱག་བྲིས་ཧ་ཅང་མཛེས་པོ་ཡོད་པས་དབུ་ཅན་དབུ་མེད་ཀྱི་ཕྱག་བྲིས་དང་འཕྲིན་ཡིག་ཧ་ཅང་མང་པོ་ཡོད་པ་ཞིག་ཡིན་པས་ཕྲན་ཚེགས་རིགས། དེ་བཞིན་སྐུ་པར་དང་། སྔ་ཕྱིའི་བགྲོ་གླེང་དང་གསུང་ཆོས། གསུང་བཤད། མཛད་འཕྲིན་ཆེ་ཕྲ་སྐྱོང་སྐབས་ཀྱི་བརྙན་དང་ཉེར་ཆས་ཁག་གང་མགྱོགས་བསྡུ་ཉར་གྱིས་བསྟན་འགྲོར་ཡུན་རིང་དུ་ཕན་པ་དང་། དགེ་བའི་བཤེས་གཉེན་ཆེན་པོ་ཁོང་གི་ཞལ་སྐྱིན་གནང་བའི་ཐབས་ལ་ཅིས་ཀྱང་འབད་པར་རིགས་ཤིང་། འབྲེལ་ཟབ་སློབ་ཁག་ནས་ཀྱང་ཕ་རྗེས་བུ་ཡིས་ཟིན་པའི་རྣམ་ཐར་སྐྱོང་རྒྱུའི་ཐུགས་དམ་རེ་ཐུགས་ལ་འདོགས་པར་ཞུ་ཞུ། ཞེས་དགེ་བཤེས་རོང་པོ་བློ་བཟང་སྙན་གྲགས་ཀྱིས་ཕྱི་ལོ་༢༠༡༩ ཟླ་༡༠ ཚེས་ ༢༡ སྨྲ་བ་འགགས་ཤིང་ཡིད་ལ་ཡང་ཅི་དྲན་འདི་དྲན་མེད་པའི་སྐབས་ཤིག་སེམས་ལ་གང་ཤར་ཐོལ་བྱུང་ལྟ་བུས་ཤར་མར་བྲིས།།
(རྩོམ་ཡིག་འདི་ PDF ཐོག་གཟིགས་ན་འདིར་ཡོད།)གསེར་འོད་ཀྱིས་འཚེར་ བའི
ཞི་བར་གཟིམས་པ་དགེ་བཤེས་བློ་ཤེས་མཆོག་ཐུགས་དགོངས་བླ་མེད་དུ་བསྐང་ཕྱིར་དུ།མར་མེ་དང་མེ་ཏོག་སོགས་ཀྱི་🕯🕯🕯💴🌸🌸🌸🌸🌻🌻🌻🌻མཆོད་པའི་བསོད་ནམས་འདིས་གང་གི་དགོངས་པར་སྨན་པར་གྱུར་ཅིག🙏🙏🙏🙏
བོད་མདོ་དབུས་ནས། གཞན་ཡང་བཀའ་རྒྱུད་དགོན་དང་རྙིང་དགོན་སོགས་བཤད་གྲྭ་ཆེ་ཁག་རིག་གིས་ཀྱང་་་དགེ་བའི་བཤེས་དམ་པ་ཁོང་གི་དགོངས་ཚོགས་དང་མཆོད་པ་རྒྱ་ཆེར་གནང་ཡོད་གོ་ཐོས་འདུག་་་དེ་ནི་ཤིན་ཏུ་གཏམ་བཟང་བསྟན་པའི་མིག་རྒྱན་ཡིན་ནོ།།🕯🕯🕯🕯🌻🌻🌻🌻
གཉན་འཕྲང་ཅན་གྱི་དུས་སྐབས་འདི་འདྲ་བར་ང་ཚོ་བོད་ལ་གྱོང་ཆེན་པོ་འདི་འདྲ་རག་དགོས་དོན་གང་ཡིན་ནམ། གཞན་བོད་ཀྱི་བསྟན་པ་ཆབ་སྲིད་དང་། སྐད་ཡིག་རིག་གཞུང་དང་བཅས་པ་ལ་ཕྱི་རྗེས་ཆེ་བའི་མི་སྣ་སུ་ཡིན་རུང་། ཆོལ་ཁ་དང་ཆོས་ལུགས་ཀྱི་དབྱེ་བ་མེད་པར་གུས་བརྩི་དང་གདུང་སེམས་མཉམ་སྐྱེད་བྱེད་འོས་པ་དང་། བྱེད་དགོས་ངེས་ཞིག་རེད།
དགེ་བའི་བཤེས་གཉེན་ཆེན་མོ་རྒན་འཇམ་དཔལ་བློ་ཤེས་མཆོག་དགུང་ལོ་ང་གཅིག་ལ་སྐུ་ཞིང་ལ་ཕེབས་པར་ཧ་ཅང་གི་བློ་ཕམ་གྱི་གནས་གཞི་ཞིག་རེད། ཁོང་ལ་སྙིང་དབུས་རྗེས་དྲན་ཞུ།
དགེ་བའི་བཤེས་གཉེན་ཆེན་མོ་རྒན་འཇམ་དཔལ་བློ་ཤེས་མཆོག་དགུང་ལོ་ང་གཅིག་ལ་སྐུ་ཞིང་ལ་ཕེབས་པར་ཧ་ཅང་གི་བློ་ཕམ་གྱི་གནས་གཞི་ཞིག་རེད། ཁོང་ལ་སྙིང་དབུས་ནས་རྗེས་དྲན་ཞུ།
སེར་ཤུལ་དགོན་ལ་བར་ཆད་མང་པོ་བྱུང་སོང་།
ད་ནི་སེར་ཤུལ་ཁྲི་པ་ཟེན་གཤམ་ཕུད་པས་དུས་ལ་བབ་སོ་།
ཁོང་ནི་གྲྭ་བ་མ་ཡི་ན་ལ་སྐྱེ་དམན་དང་ཕྲུ་གུ་ཡང་ཡོད་དོ་།
ད་དུང་གྲྭ་ཆས་འགྱོན་ན་བར་ཆད་མང་ངོ་།
དགེ་བའི་བཤེས་གཉེན་ཆེན་མོ་ཁོང་མ་གྲོངས་ཟླ་གཅིག་ཙམ་གོང་དྲ་ལམ་ནས་རྟེན་འབྲེལ་བསྟོད་པའི་དཔེ་འཁྲིད་ཅིག་མཇལ་བས་བློ་ཡིད་བཀུག་སོང་།
དེ་ནས་བདག་ལ་དྲ་བའི་འབྲེལ་ཐག་ བསྐུར་མཁན་ཕུ་བོ་ལགས་ལ་ཁ་པར་བཏང་ནས། དགེ་བཤེས་ཁོང་གི་དཔེ་འཁྲིད་གཞན་དང་མི་འདྲ་བ་ཞིག་འདུག ངས་ད་གཞི་ནས་རྟེན་འབྲེལ་བསྟོད་པའི་ནང་དོན་གོ་སོང་། དབུ་མ་འཇུག་པ་དང་རྩ་ཤེས་ཀྱི་དཔེ་འཁྲིད་འདྲ་ཡོད་ལ་ང་བསྐུར་རོགས་ལབ་པ་ཡིན།
ངས་ཕུ་བོས་ ཨོ་ཡ་ཡ་ཡ། ངས་བལྟ་ཆོག དགེ་བཤེས་ཁོང་ སྐད་གྲགས་ཆེན་པོ་རེད་ཟེར།
དེ་ནས་ཅུང་མ་མ་འགོར་བར། ཁོང་གཤེགས་པའི་ཡིད་སྐྱོའི་གསར་འགྱུར་གོ་བྱུང་།
ང་ལྟ་བུ་སྒྲ་ཐག་ལ་ཉན་ནས་་སློབ་བུའི་གྲལ་མཐར་སྡོད་མཁན་ཞིག་འདི་འདྲ་སྐྱོ་ན། ཁོང་ལ་དངོས་འབྲེལ་བརྒྱུད་པའི་སློབ་བུ་རྣམས་ཀྱིས་གདུང་བའི་ན་ཟུག་དྲག་པོ་ཇི་ལྟ་བཟོད།།