རང་སྐྱོན་ངོས་ལེན་མ།

སོག་མདའ།

ཁྱིམ་གྱི་བཟའ་ཟླ་བོད་པའི་རིགས་རྒྱུད་མིན།།
སྒོ་ཡི་སྒོ་ཁྱི་འབྲོག་གི་སྟག་ཕྲུག་མིན།།
རང་ཉིད་འདུག་ས་བོད་པའི་ཕ་ས་མིན།།
རང་ཉིད་སུ་ཡིན་མ་ཤེས་ཧད་དེ་ཡོད།།

སྐད་ཆ་བཤད་པ་བོད་སྐད་གཙང་མ་མིན།།
ལྭ་བ་གོན་པ་བོད་ལྭ་གྲལ་དག་མིན།།
ཁ་ཟས་ཟ་བ་བོད་ཟས་ངོ་མ་མིན།།
བོད་པ་གཙང་མ་ཡིན་མིན་ཐེ་ཚོམ་ཡོད།།

སྐེ་ན་འཁྱིལ་བའི་བ་སོའི་ཕྲེང་བ་མེད།།
ལག་ན་སྐོར་བའི་མ་ཎིའི་འཁོར་ལོ་མེད།།
ངག་ནས་འདོན་པའི་ཡིག་དྲུག་མ་ཎི་མེད།།
བོད་པ་ཡིན་མིན་སྐད་ཆ་དྲིས་ནས་ཡོད།།

གཞུང་རྒྱུད་དྲང་བའི་གཤིས་བཟང་ཡིད་ན་མེད།།
གཞན་ཕན་བསམ་པའི་སེམས་རྒྱ་ཁོག་ན་མེད།།
གུས་པའི་ཚིག་གི་ཞེ་ས་བློ་ན་མེད།།
ཡ་རབས་བོད་པ་ཡིན་མིན་དོགས་པ་ཡོད།།

ཕུག་ན་མཆོད་ཁྲིར་བཤམས་པའི་ཐང་ཀ་མེད།།
བར་ན་མཆོད་པ་འབུལ་སའི་མཆོད་རྐོང་མེད།།
འདབས་ན་གཙང་སེལ་བྱེད་པའི་གཟིམ་སྤོས་མེད།།
བོད་པའི་སྲོལ་རྒྱུན་ཉར་མིན་དོགས་པ་ཡོད།།

ཕྱི་ན་བསང་གསོལ་ཕུད་སའི་བསང་ཁྲི་མེད།།
གམ་ན་ཚ་གསུར་ཕུལ་སའི་གསུར་རྐོ་མེད།།
ལོགས་ན་འཕྲེད་ཀྱིས་འཐེན་པའི་དར་ལྕོག་མེད།།
བོད་པའི་ཁྱིམ་ཚང་ཡིན་མིན་དོགས་པ་ཡོད།།

སྒོ་ན་རྡང་ལ་འདོགས་པའི་སྒོ་ཕྱུགས་མེད།།
ཞིང་ན་ཡུར་མ་ཡུར་པའི་འབྲུ་རིགསམེད།།
དགོན་ལ་མཆོད་མཇལ་བྱེད་སའི་འདུ་ཁང་མེད།།
བོད་པའི་གནས་ཡུལ་རང་གིས་བོར་ནས་ཡོད།།

བྱམས་སྐྱོང་སེམས་ནས་བྱེད་སའི་ཕ་མ་མེད།།
བརྩེ་བ་གཅིག་ལ་བརྒྱུས་པའི་ཕུ་ནུ་མེད།།
སེམས་ཀྱི་གཏིང་ནས་གཅེས་པའི་བུ་ཕྲུག་མེད།།
རང་སེམས་བོད་པ་ཡིན་པ་བོར་ནས་ཡོད།།

སྦྲ་ནག་གྲུ་བཞིའི་གཡང་གི་མགོ་སྦྲ་མེད།།
སྒྲོ་བ་སྣུམ་པོ་བརྩིགས་པའི་དོ་བོ་མེད།
སྒྱེད་བུ་འོ་ཇ་སྐོལ་སའི་ཐབ་ཀ་མེད།།
བོད་ཁྱིམ་གཙང་མ་ཡིན་མིན་དོགས་པ་ཡོད།།

གནའ་གཏམ་རིང་མོ་བཤད་པའི་ཨ་མྱེས་མེད།།
ཨ་མེད་མེད་དགུ་བཤད་ནས་ཁེད་པ་མེད།།
གེ་སར་སྒྲུང་རིང་བཤད་པའི་སྒྲུང་བ་མེད།།
གནའ་མྱི་བོད་པ་ཡོད་མིན་ཐེ་ཚོམ་ཡོད།།

ཨ་ལ་ཐ་ལ་འགུགས་པའི་དྲུག་འགྱུར་མེད།།
ལ་གཞས་དབྱངས་ལ་འགུགས་པའི་རྩེད་ར་མེད།།
རྟ་ནག་སྒྲོག་འགྲོས་ལེན་པའི་གླིང་བུ་མེད།།
བོད་པའི་དབྱངས་རྟ་ཨེ་ཡོད་ཐེ་ཚོམ་ཡིན།།

མེད་མེད་འདྲ་བའི་མུ་གེའི་སྐད་ངན་འདི།།
རང་གིས་རང་ལ་བྲིས་པའི་ཐེར་འདོན་ཡིན།།
ང་དང་མཚུངས་པའི་མི་འདྲ་ཡོད་གྱུར་ན།།
ཀུན་གྱི་བགོ་བྱ་བྱས་ཀྱང་རང་དབང་ཡིན།།