ང་བོད་མི་ཞིག

བར་ཕུ་ཕུན་ཚོགས།

ང་བོད་མི་ཞིག་ཡིན་པས།
གངས་ལྗོངས་ང་ཡི་ཕ་ཡུལ་ཡིན།
གངས་ཆབ་ང་ཡི་ཟུངས་ཁྲག་ཡིན།
གངས་རི་ང་ཡི་སེམས་པ་ཡིན།
གངས་ཕྲུག་ང་ཡི་སྤུན་ཟླ་ཡིན།

ང་བོད་མི་ཞིག་ཡིན་པས།
མཐོ་ཚད་བཞི་སྟོང་དགུ་བརྒྱར་གནས།
རྒྱ་ཁྱོན་ས་ཡ་གཉིས་ལྷག་སྤྱོད།
རྒྱལ་རྒྱུད་སྲོང་བཙན་སྒམ་པོ་ཡོད།
རྒྱལ་ས་བོད་ཀྱི་ལྷ་ས་ཡིན།

ང་བོད་མི་ཞིག་ཡིན་པས།
ཕ་རྒྱུད་སྤྲེའུ་རྒན་ཤེས་རབ་ཅན།
མ་རྒྱུད་བྲག་སྲིན་བྱམས་སེམས་ཅན།
བོད་སྐད་བདག་གི་ཕ་སྐད་ཡིན།
བོད་ཆས་བདག་གི་ཆས་གོས་ཡིན།

ང་བོད་མི་ཞིག་ཡིན་པས།
བོད་ཟས་སྦྲང་སྦྲང་དཀར་རྩམ་པ་ཡོད།
བོད་ཡིག་དབྱངས་གསལ་སོ་བཞི་ཡོད།
བོད་རིགས་ས་ཡ་དྲུག་ཅུ་ཡོད།
བོད་ཟོག་ཞི་འཇམ་འབྲི་གཡག་ཡོད།

ང་བོད་མི་ཞིག་ཡིན་པས།
དགའ་ས་བོད་པའི་མི་རིགས་ཡིན།
སྡོད་ས་བོད་མིའི་སྤྱི་ཚོགས་ཡིན།
བརྡ་སྤྲོད་བོད་ཀྱི་སྐད་ཡིག་ཡིན།
སྦྱང་བྱ་བོད་ཀྱི་རིག་གཞུང་ཡིན།

ང་བོད་མི་ཞིག་ཡིན་པས།
མགོ་ན་དབུ་ཁྲིད་བཟང་པོ་ཡོད།
བདེ་སྡུག་གཟིགས་པའི་དཔོན་པོ་ཡོད།
འོག་ན་ཆབ་འབངས་དྲང་པོ་ཡོད།
མཐུན་སྒྲིལ་སྟོབས་ཤུགས་རྒྱས་ནས་ཡོད།

ང་བོད་མི་ཞིག་ཡིན་པས།
དུང་སེམས་བོད་ལ་བཅངས་ནས་ཡོང་།
རེ་སྒུག་བོད་ལ་བཅོལ་གྱིན་ཡོད།
ལེགས་སྐྱེས་བོད་ལ་ཕུལ་ན་འདོད།
སྐྱིད་སྡུག་བོད་ལ་འདྲེས་ནས་ཡོད།