(བོད་ཀྱི་དབུ་འཁྲིད་ཏཱ་ལའི་བླ་མར་ཕྱོགས་ངོས་གཞན་ཞིག་ནས་བལྟ་བ།)
གཡུ་ཚང་ལྷ་མོ་དོན་གྲུབ། ཨ་རི།

དང་པོ། ཁ་བརྡ་དྲ་རྒྱའི་སྐུ་དྲིན།
ཉེ་བའི་ཟླ་ཤས་རིང་བོད་ནང་གི་ཛ་དྲག་གི་གནས་བབ་དང་བཙན་བྱོལ་ནང་གི་རེ་བ་མེད་པའི་མཇུག་འབྲས་རྣམས་ཕྱིར་ཐོན་ཡོང་དུས། རྒད་པོ་ངའི་སྙིང་རླུང་སྟོད་ལ་འཚང་ནས་དབུགས་ཐག་སང་ཆད་གནངས་ཆད་དུ་གྱུར་བས། རང་གི་དྲན་ཕྱོགས་ཤིག་ཡིག་ཐོག་ཏུ་ཕབ་ནས་ཕལ་ཆེར་ཁ་ཆེམས་ཀྱི་ཚུལ་དུ་སྤེལ་དགོས་སྙམ་མོད། ང་ཚོའི་སྤྱི་ཚོགས་འདིར་མི་རྒན་འཆི་ཁར་ཁ་ནས་གསེར་ལྟ་བུའི་བསླབ་བྱ་ལེན་རྒྱུ་ཕར་བཞག་ནས་འཆི་ཁ་གཏམ་མ་མང་ཟེར་བའི་སྡིགས་སྲོལ་ཞིག་ཡོད་པ་དང༌། རང་གི་སྐད་ཆ་ཐ་ཐོར་དེར་བསྐྱར་ཞིབ་ཅིག་བྱས་དུས་དེ་ཡང་མི་གཞན་གྱི་ཁ་ནས་ད་བར་ཐོན་མྱོང་མི་འདུག་པས། བཀག་སྡོམ་དང་ཕྱོགས་གཅོད་ཀྱི་ཤེད་ཆེ་ཞིང་ངོ་སྲུང་དང་ཚུལ་འཆོས་ལ་གོམས་པའི་ང་ཚོའི་སྤྱི་ཚོགས་ཁྲོད་ཀྱི་དུས་དེབ་དང་ཚགས་ཤོག དྲ་རྒྱ་དག་གིས་བརྒྱུད་འགོད་བྱས་འེ་ཡོང་སྙམ་ནས་སེམས་འཁྲལ་ཐོལ་མ་ཞིག་བྱས་ཏེ་སྡོད་པར། གྲོགས་པོ་ཞིག་གིས་ཁ་པར་སླེབས་ནས་གསར་དུ་སྒོ་ཕྱེས་པའི་ཁ་བརྡ་དྲ་རྒྱའི་དགེ་མཚན་མི་ཉུང་བ་ཞིག་བརྗོད་བྱུང་པ་ངའི་རྣ་ལམ་དུ་རྨ་བྱའི་རྣ་བར་འབྲུག་སྒྲ་ལྟར་གྱུར་ཞིང༌། གྲོགས་པོའི་ལམ་སྟོན་བཞིན་ཁ་བརྡ་བསྔོགས་ནས་དྲ་ངོས་འདིར་རང་དབང་དང་གུ་ཡངས། དཀྱེལ་ཆེ་ཞིང་སྒམ་ཚུགས་ཆེ་ལ། འགན་འཁྲིའི་སྙིང་སྟོབས་བཅས་ཀྱི་མདངས་ཤིག་ཤར་ཡོད་པ་མཐོང་བས། རང་གི་འཆི་ཁའི་གཏམ་མམ་གོམ་པ་མཐའ་མ་སྤོ་ས་ས་ཞིག་རྙེད་སོང་སྙམ་ནས་དགའ་སྤྲོ་ཚད་མེད་སྐྱེས་ལ། ད་ནི་ཁ་བརྡ་དྲ་རྒྱ་བརྒྱུད་ནས་རང་སེམས་གསོན་པོར་མྱི་ལག་ཏུ་བཞག་ཚར་བས། ཁ་བརྡའི་སྐུ་དྲིན་འཇལ་ཐུབ་ན་མ་གཏོགས་ཤི་ཡང་འགྱོད་པ་མེད།།

གཉིས་པ། རྒན་པོ་ཧོན་ལོག་དང་གསར་བུ་ཀླད་སྟོང༌། ད་དུང་གཞན་དག
ངས་དྲ་ངོས་ཀྱི་བསམ་ཚུལ་ཐད་མིན་གྱི་མཆན་བུ་ཉི་ཤུ་རྩ་གྲངས་ཤིག་ཞིབ་བཀླགས་བྱས་པར། བློ་མཐུན་མང་པོ་ཞིག་གིས་ལྷག་བསམ་རྣམ་དག་གིས་རང་གི་ལྟ་ཙུལ་བརྗོད་འདུག་པར་གུས་བརྩི་དང་སྤྲོ་དགའི་རབ་ཏུ་བརྟས་མོད། ཡིད་ཐང་ཆད་པའི་སྐད་ཆ་རེ་གཉིས་མཐོང་རྒྱུ་འདུག་པ་ནི་རྒད་པོ་ཧོན་ལོག་དང་གསར་བུ་ཀླད་སྟོང་སོགས་རེད། སྐད་ཆ་འདི་དག་མི་རིག་པ་ཅན་གྱིས་བཤད་རྒྱུའི་ཚིག་ཅིག་མ་རེད་དེ། སྔར་ནས་སྐད་ཆ་བཤད་སྟངས་འདིས་ང་ཚོའི་རིག་པའི་དཔའ་བོ་དག་གི་མཁས་བརྒྱ་འགྲན་གླེང་དང་མེ་ཏོག་མཉམ་བཞད་ཀྱི་ཁོར་ཡུག་ལ་གོད་ཆག་ཆེན་པོ་བཟོས་པ་རེད་ལ། དུས་དེང་སང་ཡང་ངན་རྟགས་འདིའི་རྔ་མ་གཅོད་མ་ཐུབ་པ་ནི་ང་ཚོའི་བཀག་རྒྱ་ཆེ་ཤོས་ཤིག་རེད། སྐད་ཆ་འདི་ལྟ་བུ་རེ་གཉིས་ཐོན་ཡང་ང་ཚོའི་དཔེ་དེབ་དང་དུས་དེབ། ཚགས་པར། དྲ་ངོས་ཡོད་ཚད་བཙོག་པ་འཁོར་རྒྱུགས་བྱེད་སར་བསྒྱུར་གྱིན་འདུག་པས། སྨྱུག་འཛིན་པ་ཞིག་བྱེད་རྒྱུ་ཡིན་ཚེ་གནས་ལུགས་བརྗོད་པ་ལས་མི་འཚང་བསྔོགས་མི་ཉན་པའི་རྒྱུན་ཤེས་འདི་གོ་བར་གྱིས་ཤིག་ཅེས་སྨྲའོ།།

དེ་ལས་མང་བ་། “གསལ་འདེབས་དྲུག་སྐོར་མ།” »

ཀླུ་སྨྱོན་གྱི་ལྷུག་རྩོམ་གཡོས་བླུགས་མ་མུ་འགོད།

ཝེ། ཆུ་ཚོད་དགུ་བ་ཟིན་འདུག ད་དུང་ལང་རྒྱུ་མིན་ནམ། ང་རང་གཉིད་སྟུག་པོ་ཞིག་གི་ཀློང་དུ་ཤི་མ་གསོན་དུ་ཡོད་སྐབས། གློ་བུར་བའི་འབོད་སྐད་དེས་རྨི་ལམ་གྱི་ཞིང་ཁམས་ནས་སྐྱི་གཡའ་བའི་འཇིག་རྟེན་མི་ཡི་གསེབ་ཏུ་བསྐྱལ་བྱུང་། མིག་གཉིས་ཉོབ་སྣང་ཆེན་པོས་གཅིག་ཕྱེ་དུས། ཨ་ཙི། གསེར་མདོག་གི་ཉི་འོད་ཅིག་སྒེའུ་ཁུང་ལས་ཐད་ཀར་ངའི་རུས་མགོ་སྐྱི་བཏུམས་ཀྱི་རྐུབ་ལ་འཕྲོས་འདུག་ཅིང་། ཉི་འོད་བན་བུན་དེའི་ཀློང་དུ་མདང་དགོང་གི་ང་དང་ངའི་ཤག་རོགས་ཚོའི་རྟུག་དྲི་ཡིས་མགོ་ཡོམ་འཁོར་ནས་ད་དུང་ཤེས་པ་རབ་རིབ་ཏུ་གྱུར་པའི་དུག་སྦྲང་འགའ་འཁྱར་འཁྱོར་ངང་འཕུར་ལྡིང་བྱེད་བཞིན་ཡོད་པ་མཐོང་གི་འདུག ང་སྒྱིད་ལུག་དང་བཅས་ཡར་ལ་ལངས་དུས། གཅིན་སྐྱག་གིས་ལུས་སྨད་སྦོས་ནས་སྐར་ཆ་རེར་ཡང་བཟོད་ཐབས་མི་འདུག་པས། གཟན་ཤམ་འགྲིག་པོ་ཞིག་ཀྱང་གྱོན་ལོང་མ་བྱུང་བར་གསང་སྤྱོད་བསྙེགས་ནས་བརྒྱུགས་པས། ཁམས་ཚན་ཞིག་གི་གྲུ་ཟུར་ནས་ཅུང་མིན་ན་དགེ་བསྐོས་བཙན་པོ་སྐད་གྲགས་ཡོད་པ་ཞིག་དང་གདོང་ཐུག་བརྒྱབ་བྱུང་། ནམ་རྒྱུན་དང་འདྲ་བར་ཞོགས་ཇ་བཏུངས་རྗེས་ཀླུ་འབུམ་ཁང་ཚན་གྱི་ཉིས་ཐོག་གི་ཡང་སྟེང་དུ་བསྐྱོད་པ་ན། ཡ། དེ་རང་གཟའ་ཟླ་བ་ཡིན་པ་འདྲ་སྟེ། ཆོས་གྲོགས་འགས་དེ་གར་ངའི་ཕ་ཡུལ་དུ་དར་ཁྱབ་ཆེ་བའི་དགུ་འཇིག་འདེད་བཞིན་འདུག

དེ་ལས་མང་བ་། “ངའི་གཟའ་ཟླ་བ་དང་བརྒྱད་པའི་བཅོ་ལྔའི་ཟླ་བ། ད་དུང་ཤི་གསོན་གྱི་ཟླ་བ།” »

སྤོབས་པ་མཐའ་ཡས།
ཞིབ་ཏུ་བཀླགས་སྐབས་དགེ་འདུན་མཐར་ཕྱིན་ཟེར་བ་དེས་གནད་དོན་ཁ་ཤས་ཤིག་བྲིས་འདུག ཁྱོད་ཚོ་གླང་དར་སྐོར་ཞིག་ནས་མར་འབབ་གི་མི་འདུག ངས་ད་དུང་ཁ་ཤས་ཤིག་ཤོད་འདོད་བྱུང༌།
གཞིས་ཆགས་སྲ་བརྟན་བྱ་རྒྱུ་དེ་ཟམ་གདོང་གཞུང་གི་གཞི་རྩའི་སྲིད་ཇུས་སུ་བཞག་ཡོད་ཀྱང་ཁ་ཡོད་ལག་ཡོད་ཀྱིས་ག་འདྲ་འབྱུང་བཞིན་ཡོད་མེད་མ་རྟོགས། གཞིས་ཆགས་ཁག་མང་པོ་ཞིག་སྔོན་དུས་སུ་ས་གནས་ཡུལ་མི་དབུལ་ཕོངས་ཚོར་བསྡུར་ན་འཚོ་བ་ཅུང་ལེགས་ཙམ་ཡོད་ངེས་ཀྱང་དེང་སྐབས་སྔོན་དང་མི་འདྲ་བ་ཞིག་ཡོད་པ་ནི་བོད་པ་ཚོའི་གྱོན་ཆས་ཚོང་ལས་འདི་ལ་ས་ཆོད་ཆེན་པོ་མེད་པར་གྱུར་པ་དེ་གཙོ་བོ་ཞིག་རེད། ཕྱོགས་མཐའི་གཞིས་ཆགས་ཁག་གི་འཚོ་བ་ཧ་ཅང་སྐྱོ་བོ་དང་ལས་ཀ་ཧ་ཅང་ལྗིད་པོ་རེད།
དཔེར་ན། ལ་དྭགས་ལ་གཞིས་ཆགས་ཧ་ཅང་རྒྱ་ཆེན་པོ་ཡོད་པ་དེ་ཚོར་ལྟ་སྐབས་ཕལ་མོ་ཆེ་གཞུང་ལམ་དང་ཁང་པ་བཟོ་སར་འགྲོ་གི་འདུག དེ་ཡང་སྔོན་མར་རྒྱ་གར་བ་དང་ནེ་པ་ལའི་ལས་ཀ་བ་མང་པོ་ཞིག་ས་ཆ་དེ་འགྲིམ་འགྲུལ་ཞན་སྟབས་ལས་ཀ་བྱེད་དུ་འབྱོར་ཐུབ་ཀྱི་མེད་སྟབས་བོད་པ་ཚོས་ལས་ཀ་མང་པོ་དང་ལས་ཀའི་གླ་ཆ་ཡག་ཙམ་ཐོབ་མོད། དེང་དུས་རྒྱ་གར་གྱི་ལས་ཀ་བ་མང་པོ་དང་ལྷག་པར་ཡང་ན་པ་ལའི་ལས་བཟོ་བ་གྲངས་ལས་འདས་པ་ས་དེར་སླེབས་འོངས་ནས་བོད་པ་ཚོར་ལས་ཀ་མང་པོ་མི་ཐོབ་པ་དང་གླ་ཆ་ཡང་དམའ་བོ་ལས་ཐོབ་ཀྱི་མེད།

དེ་ལས་མང་བ་། “དགེ་འདུན་མཐར་ཕྱིན་གྱི་རྩོམ་ཡིག་སྐོར་ལ་བསམ་ཚུལ་ཅུང་ཙམ་བརྗོད་པ།” »

སྤོབས་པ་མཐའ་ཡས།
དགེ་བསྐོས་བཙན་པོ་དང་ཀླུ་སྨྱོན་ཧེ་རུ་ཀ། སྤྲུལ་སྐུ་ཡེ་ཤེས་རྒྱ་མཚོ་ནི་བདུན་ཕྲག་ནས་བདུན་ཕྲག་མཐུད་དེ་དྲྭ་སྟེགས་འདིའི་སྟེང་དུ་གླེང་གཞི་ཞིག་ཏུ་གྱུར་སོང་བས་ད་ནི་དེའི་སྐོར་གླེང་ན་མང་པོ་ཞིག་སུན་ངེས་ཡིན། སུན་མཁན་ཚོས་འདི་ནས་མ་ཀློག་ན་ཡང་ཆོག ངས་ཉེ་སྔོན་ཀླུ་སྨྱོན་ཧེ་རུ་ཀས་དེབ་གསར་ཞིག་དཔར་འགྲེམ་བྱེད་བཞིན་ཡོད་སྐོར་དང་དེབ་དེ་ནི་རང་རེའི་སྤྱི་ཚོགས་ལ་དུས་བབ་གནད་སྨིན་གྱི་དགོས་མཁོ་ཞིག་ཏུ་གྱུར་ཡོད་སྐོར་ངོ་སྤྲོད་ཅིག་བྱས་པ་ཡིན། འོན་ཀྱང་གལ་པོ་ཆེ་ལ་ནན་ཏན་གྱི་དཔེ་བཞིན་རང་གིས་གང་བཤད་པ་དེ་གཞན་ལ་གོ་བརྡ་གསལ་ཐག་ཆོད་ཅིག་འཕྲོད་པའི་རེ་བས་ཡང་དང་བསྐྱར་དུ་བརྗོད་པར་ལ་ལ་ཞིག་གིས་བཀའ་བཀྱོན་ཡང་གནང་བྱུང་།
ང་ལ་མཚོན་ན་སྔོན་བརྗོད་པ་བཞིན་སྤྲུལ་སྐུ་ཡེ་ཤེས་རྒྱ་མཚོན་ནི་རྩོམ་པ་པོ་གྲགས་ཅན་ཞིག་དང་། མཚན་མཐོང་ཆེ་བའི་སྤྲུལ་སྐུ་ཞིག་དུ་ངོས་བཟུང་ཡང་གྲྭ་རྐྱང་དཀྱུས་མའི་གོ་ས་ཁོ་ནར་དགྱེས་པ། གུ་ཡངས་རང་དབང་གི་ཡུལ་སྐོར་བ་ཞིག་ཡིན་པའི་སྐོར་མང་དུ་ཐོས་མྱོང་ཡོད་སྟབས་ཡིད་སྨོན་དང་དགའ་གུས་ཆེན་པོ་ཡོད། ལྷག་པར་ཡང་ང་ལ་མཚོན་ན་ཁོང་གི་རྩོམ་ཡིག་སྤྱི་དང་ལྷག་པར་ཁོང་གི་སྙན་ངག་ཀློག་པར་ཧ་ཅང་དགའ། དེ་ནི་ཁོང་ནི་ངག་སྒོ་ཧ་ཅང་ཡངས་པོ་དང་། ཆོས་སྲིད་གནའ་དེང་གི་རིག་གནས་གང་ལས་གླེངས་ཀྱང་མཁྱེན་རྒྱ་ཆེ་བས་ཁོང་གིས་བྲིས་པའི་སྙན་ངག་དག་ཚིག་གི་སྙན་ཆ་ཙམ་དུ་མ་ཟད་པར་དོན་ཟབ་མོ་བརྗོད་ཀྱིན་འདུག་པས་ཀྱང་ཡིན། ཁོང་ནི་རང་རེའི་སྲོལ་རྒྱུན་གྱི་རྩོམ་དང་། རང་མོས་སྙན་ངག གཞས་ཚིག་སོགས་གང་ཞིག་བྲིས་ཀྱང་ཁ་གསལ་བ། གཏིང་ཟབ་པ། ཚིག་སྙན་པ་བཅས་ཀྱི་ཁྱད་ཆོས་ལྡན་པས་ཕྱོགས་རེ་བའི་མིག་ཅན་དག་དང་མི་མཚུངས། ལྕང་མ་སྐྱེ་ལུགས་ཇི་ལྟར་དྲང་ཡང་ཡོ་ཕྱོགས་ཆུ་ཞེས་པ་བཞིན་རང་རེའི་ཆོས་ལུགས་པའི་རྩོམ་པ་པོ་ཕལ་མོ་ཆེར་ཆོས་ལུགས་ཕྱོགས་ཞེན་གྱི་ན་ཚས་མ་གོས་པ་ཧ་ཅང་དཀོན། དེ་ནི་རང་རེའི་སྤྱི་ཚོགས་འདི་རྒུད་པའི་རྩ་བ་གཅིག་ཏུ་ཡང་གྱུར་ཡོད་སྟབས་ད་ནི་དེ་ལྟ་བུའི་ཉེས་དམིགས་མཐོང་བར་འོས་ཀྱང་རང་རེའི་རྩོམ་པ་པོ་ཕལ་མོ་ཆེར་ད་དུང་ནད་གཞི་དེ་སངས་ཡོད་པ་ཆེར་ཉུང་ཡང་ཀླུ་སྨྱོན་ཧེ་རུ་ཀའི་བརྩམས་ཆོས་གང་ཞིག་ཡིན་ཡང་གངས་རིའི་ལྗོངས་ཀྱི་ཆོས་རྒྱུད་མཐའ་དག་གི་གཞུང་ལུགས་གང་ནས་གླེང་ཡང་ཤེས་ནས་ཐོབ་པའི་དད་པ་དང་དག་སྣང་གིས་ཁེངས་པ་ཁོ་ན་ལས་ཕྱོགས་དང་རིས་སུ་ཆད་པའི་འཐེན་འཁྱེར་གྱི་ཚིག་ཟུར་ཙམ་ཡང་མི་མངའ། སྤྱིར་བཏང་ཁོང་གིས་རྩོམ་ཡིག་དག་ལ་ཚིག་དོན་གང་ཐད་ནས་གསར་བཏོད་ཀྱི་རྣམ་པ་ཞིག་ཀྱང་རྒྱུན་དུ་མཐོང་རྒྱུ་ཡོད།

དེ་ལས་མང་བ་། “དགེ་བསྐོས་བཙན་པོ་དང་ཀླུ་སྨྱོན་ཧེ་རུ་ཀའི་སྐོར་གྱི་འའཕྲོས་བཤད་ཉུང་ངུ་།” »

སྤོབས་པ་མཐའ་ཡས།
ངོ་རྒོལ་ལངས་པའི་ཕྱི་ཉིན་ནས་རྡ་རམ་ས་ལའི་ཚོགས་པ་ཚོས་བོད་མི་དགུ་བཅུ་ལྷག་ཅིག་བསད་སོང་ཟེར་ནས་བཞི་བཅུ་ཙམ་ཞིག་གི་གནས་ཡུལ་དང་མིང་ཐོ་ཚུན་གསལ་བསྒྲགས་བྱས་སོང་། དེ་ནས་མི་རིང་བའི་དུས་ནས་པེ་ཅིང་གི་ཕྱོགས་ནས་དེ་བདེན་པ་མིན་སྐོར་དང་བསད་སོང་བའི་མིང་ཐོའི་ཁོངས་མི་དེ་དག་ལ་ལ་ནི་ད་དུང་གསོན་པོ་བདེར་གནས་ཡིན་ཚུལ་དང་། ལ་ལ་ནི་དེ་ལྟའི་མི་ཞིག་གཏན་ནས་མེད་ཚུལ། ལ་ལ་ནི་མིང་ཙམ་ལས་གསལ་བོ་མེད་པ་སོགས་ལན་འདེབས་བྱས་སོང་། དེ་ལ་རྡ་རམ་ས་ལའི་ཕྱོགས་ནས་གསལ་ཁ་བཏོན་པ་སོགས་བྱེད་ཐུབ་མ་སོང་། དེ་ནས་རིམ་བཞིན་ཡུལ་དེ་ནས་མི་དེ་དང་དེ་ཙམ་བསད་སོང་ཟེར་ནས་བགྲངས་བཞིན་ད་ལྟ་ཉིས་བརྒྱ་ལྷག་ཅིག་ལོངས་ཚར་འདུག པེ་ཅིང་ཕྱོགས་ནས་ཟིང་འཁྲུགས་པས་ལྷ་ས་ནས་མི་ཉི་ཤུ་ཡས་མས་ཤིག་བསད་སོང་ཟེར་བ་དང་གཞན་ཡང་མཚོ་སྔོན་དང་དཀར་མཛེས་སོགས་ནས་ཀྱང་ཕན་ཚུན་རེ་ཟུང་ཞིག་བསད་པ་ཙམ་གསལ་བསྒྲགས་བྱས་ཡོད།
རྡ་རམ་ས་ལའི་ཕྱོགས་ནས་བོད་ཁུལ་གྱི་ས་ཆ་གང་ཞིག་ཏུ་ཟིང་ཆ་ལངས་ཚུལ་དང་ལྷན་དུ་མི་འདི་དང་འདི་བསད་འདུག་ཟེར་ཡང་དེ་དག་གི་འབྱུང་ཁུངས་རུས་མིང་སོགས་གསལ་ཁ་ཡོད་པ་ཧ་ཅང་ཉུང་། བོད་ནང་དུ་གཞུང་གི་བཀག་སྡོམ་དམ་བསྒྲགས་དེ་ཙམ་ཡོད་ཐོག་འབྲེལ་གཏུག་གི་ཆ་རྐྱེན་དེ་ཙམ་མི་བཟང་སྟབས་གནས་ཚུལ་ངོ་མ་མགྱོག་མྱུར་དུ་གོ་བ་དཀའ་ཞིང་གནས་ཚུལ་ལོག་པར་གོ་བ་ཡང་སྲིད། ཡིན་ན་ཡང་རིམ་གྱིས་གནས་ཚུལ་ཇེ་གསལ་དུ་འགྱུར་ངེས་ཡིན་པས་རིམ་བཞིན་ཁ་གསལ་དུ་གཏོང་འོས་ཀྱང་དེ་ནས་སྔགས་འདྲ་ཞིག་བགྲང་ཚར་བ་བཞིན་བསྐྱར་ཞིབ་ཀྱིས་ལམ་ནས་མི་སུ་དང་སུ་བསད། སུ་དང་སུ་རྨས། སུ་དང་སུ་ཞིག་བཙོན་དུ་ཚུད་པ་སོགས་ཐེང་དང་པོའི་ཁྱབ་བསྒྲགས་ལས་ལྷག་ཅིག་གང་ཡང་གོ་རྒྱུ་མི་འདུག

དེ་ལས་མང་བ་། “ད་ལོའི་ངོ་རྒོལ་སྐབས་དངོས་གནས་བོད་མི་སུ་དང་སུ་བཀྲོངས་པ་ཡིན་ནམ།” »