ཀླུ་སྨྱོན།
གལ་སྲིད་རང་སེམས་ཟེར་བའི་སྨུག་པ་འདྲ་བོ་འདི་རང་ལ་དབང་བ་ཡིན་ན།
གལ་སྲིད་སྐྱེ་འཆི་ཟེར་བའི་རྨི་ལམ་ལྟ་བུ་འདི་རང་ལག་ན་ཡོད་པ་བདེན་ན།
ངས་རང་གི་བྲང་ཁོག་དྲོན་མོ་ཚལ་བུར་གཤགས་ནས།
དྲག་ཏུ་ལྡང་བཞིན་པའི་སྙིང་དམར་པོ་དེ་ཕྱི་རུ་ཕྱུངས་ནས།
ཁྱེད་ལ་ང་རང་གི་བརྩེ་དུང་གཉོམ་པོ་དེའི་ལྗིད་ཚད་ངོ་མ་དེ་ཤེས་སུ་འཇུག་ན་འདོད།
གལ་སྲིད་དམྱལ་ཁམས་བཅོ་བརྒྱད་ཟེར་བ་ཞིག་མེད་པ་ཡིན་ན།
གལ་སྲིད་གཏམ་དང་མྱི་ཁ་ཟེར་བ་ཞིག་ལ་འཇིགས་མི་དགོས་པ་ཡིན་ན།
ངས་རང་གི་བཅོས་འཛུམ་ཡོད་ཚད་རྒྱབ་ཏུ་གཡུགས་ནས།
ལྷོག་ལྷོག་ཏུ་འཕྱུར་བཞིན་པའི་སེམས་ཁམས་དེ་ཞི་འཇགས་ཡོང་བའི་ཆེད་དུ།
ཁྱེད་ཀྱི་མགུལ་བར་འཁྱུད་ནས་བསྐལ་བ་མེ་ལྟར་འབར་བའི་བར་དུ་འདུག་ན་འདོད།
