པདྨ་ཚེ་དབང་ཤཱསྟྲི།
____________________________
རང་ཡུལ་གངས་ཅན་གྱི་ལྗོངས་དེ་རྒྱ་ནག་གིས་དྲག་པོའི་བཙན་བཟུང་བྱས་ཏེ་མི་ལོ་དྲུག་ཅུ་ལྷག་འགྲོ་བའི་སྐབས་སུའང་། བོད་དོན་བདེན་མཐའ་གསལ་རྒྱུའི་སྐྱ་རེངས་ཙམ་ཡང་འཆར་རྒྱུ་མེད་པའི་ཁར། གཞིས་བཞུགས་བོད་མིའི་གནས་སྟངས་ནི། ཉིན་རེ་ཞིང་ཇེ་ཞན་ཇེ་སྡུག་ཏུ་འགྲོ་བཞིན་པ་དང་། བྱེས་འབྱོར་རྣམས་ནི། རིམ་པས་ནུབ་ཕྱོགས་ཡུལ་གྲུ་ཁག་གི་ནང་དུ་ཁ་ཐོར་དགུ་ཐོར་དུ་འགྲོ་བཞིན་པའི་གནས་སྐབས་འདིར། འདས་དོན་ལ་ཕྱི་མིག་ཅིག་བལྟས་ཏེ་མནོ་བསམ་གཏོང་སྐབས་གཞིས་བྱེས་གཉིས་ཀའི་ནང་དུ་སྤོབས་པ་དང་། དགའ་མགུ་ཡི་རངས་བྱེད་འོས་པའི་གྲུབ་འབྲས་གཟེངས་སུ་ཐོན་པ་མང་དག་ཅིག་བྱུང་ཡོད་ཀྱང་། གངས་ཅན་པ་ས་ཡ་དྲུག་ལ་རིང་ནས་སྙིང་དུ་བརྣག་པའི་འདོད་པའི་དོན་དེ་ནི་ད་དུང་ཡང་ཐག་རིང་དུ་གནས།
