ཀླུ་སྨྱོན་ཧེ་རུ་ཀ
“ཁ་བ་ནག་པོ་”ངོ་སྤྲོད།
ཁ་བ་ནག་པོ་ཞེས་པའི་སྒྲུང་ཐུང་འདི་ནི་རྩོམ་པ་པོས་དུས་རབས་ཉི་ཤུ་བའི་ནང་དུ་བོད་ནང་དུ་ཡུམ་སྐད་ཀྱི་ལམ་ནས་བྲིས་ཏེ་བོད་ཡིག་གི་དུས་དེབ་གངས་རྒྱན་མེ་ཏོག་སྟེང་བཀོད་པ་དང་། དུས་རབས་འདིའི་ནང་དུ་བོད་ཀྱི་འཁྲབ་ཁྲིད་པ་པད་མ་ཚེ་བརྟན་ལགས་ཀྱིས་རྒྱ་ཡིག་ཏུ་བསྒྱུར་ནས་ལྷ་ས་ནས་འདོན་སྤེལ་བྱེད་བཞིན་པའི་བོད་ཀྱི་རྩོམ་རིག་སོགས་ཀྱི་སྟེང་བཀོད་འདུག་ལ། ཉེ་ཆར་རྩོམ་པ་པོ་རང་ཉིད་དང་མི་གཞན་པ་རེ་ཟུང་མཉམ་འབྲེལ་གྱིས་དབྱིན་ཡིག་ཏུ་ཡང་བསྒྱུར་ཟིན། སྒྲུང་ཐུང་འདི་བརྒྱུད་དེ་རྩོམ་པ་པོས་རྟོག་གཞིག་གསར་རྙིང་གི་འཇིག་རྟེན་མི་འདྲ་བ་གཉིས་སུ་འགྲིམ་སྟེ། དེར་འཚོ་སྡོད་བྱེད་པའི་མི་སོ་སོའི་མཛེས་དཔྱོད་ཀྱི་མཐོང་སྣང་མི་འདྲ་བ་སྣ་ཚོགས་ཞིབ་འབྲི་བྱས་ནས་གནའ་དེང་ཤེས་རིག་གཉིས་རྐྱ་བཀར་ཅིང་ལྷན་དུ་བསྲེས་ཡོད་ལ། འཇིག་རྟེན་འདིའི་གྲུ་ཟུར་གང་རུང་ཞིག་ན་ལུས་པའི་གསང་བ་ལྐོག་གྱུར་གྱི་འདྲི་རྟགས་རེ་རེར་བསམ་གཞིག་བྱས་པ་བརྒྱུད། དོན་དམ་འཕྲུལ་སྣང་འབའ་ཞིག་གི་ངོ་བོར་གྲུབ་ཡོད་པ་གསལ་བཤད་བྱས་འདུག དེ་བས་ཁ་བ་ནག་པོ་ནི་བོད་ཀྱི་སེར་མོ་བས་བྲིས་པའི་སྒྱུ་འཕྲུལ་དངོས་ཡོད་རིང་ལུགས་ཀྱི་བརྩམས་སྒྲུང་ཐོག་མ་དེ་ཆགས་འདུག་པར་བསམས་སོ།། ཀླུ་སྨྱོན་གྱི་ནུ་བོ་གཟི་མིག་གསུམ་པས།
ཁ་བ་ནག་པོ།
ཁོ་རང་རིན་གོང་དམའ་བའི་མགྲོན་ཁང་དེའི་སྒོར་བུད་ནས་སྒྱིད་ལུག་གི་གོམ་པ་སྤོ་བཞིན་ཁྲོམ་སྲང་དུ་ཉུལ། ཉིན་འདི་དག་གི་རིང་ལས་བཟོ་བ་ཡིན་མིན་ཐམས་ཅད་དེ་འདྲའི་བྲེལ་བ་ལ། སྔོན་ཆད་ཀྱི་རྫིག་ཉམས་ཅན་གྱི་མི་ཆེན་དེ་དག་གིས་ཀྱང་ཁུག་ཀྱོག་རེ་ན་ཚོང་རྫས་རྩག་རྩིག་རེ་བཤམས་ནས་ཁུ་སིམ་མེར་བསྡད་འདུག
