དབྱིན་ཇིའི་རྒྱལ་སྲས་ཝིལ་ལིམ་དང་ཁོང་གི་དགའ་རོགས་ཁེ་ཁྲི་མི་ཌིལ་ཁྲོན་གཉིས་གྱི་གཉེན་སྟོན་ལ་ཉིན་ཁ་ཤས་ལས་མི་འདུག གཉེན་སྟོན་གྱི་འགྲོ་སོང་སྤྱིར་དབྱིན་ཇིའི་རྒྱལ་ཁབ་གཞུང་གིས་གཏོང་འོས་པ་ཞིག་ཡིན་མོད་དེང་སྐབས་སུ་དབྱིན་ཡུལ་ལ་དཔལ་འབྱོར་གྱི་དཀའ་ངལ་ཅུང་ཟད་འཕྲད་བཞིན་པར་བརྟེན་རྒྱལ་པོའི་བང་མཛོད་རང་ནས་གཏོང་རྒྱུར་ཞལ་བཞེས་ཐོབ་འདུག གཉེན་སྟོན་ཆུང་སེ་བ་ཞིག་ལས་གྲ་སྒྲིག་མེད་སྟབས་འགྲོ་སོང་ལ་མ་མཐར་ཌོ་ལར་ས་ཡ་བཞི་བཅུ་ལས་མི་ཉུང་ཙམ་ལ་ཚོད་དཔག་བྱེད་ཀྱིན་ཡོད་འདུག རྒྱལ་སྲས་ཝིལ་ལིམ་ལགས་དང་ལྷ་ལྕམ་ཁེ་ཁྲི་ལགས་གཉིས་ནི་༢༠༠༡ལོར་གཙུལ་ལག་སློབ་གྲར་སྒྱུ་རྩལ་ལོ་རྒྱུས་ཀྱི་སྡེ་ཚན་དུ་སློབ་སྦྱོང་བྱེད་སྐབས་སུ་འཕྲད་པ་རེད། ཁེ་ཁྲི་ལགས་ནི་འབྱོར་འབྲིང་གྲལ་རིམ་༼ཆེད་ལས་ཅན་གྱི་ལས་ཀ་བ་ཁྱིམ་ཚང༽གྱི་ཁྱིམ་ཚང་ནས་ཡོང་བ་ཞིག་ལས་སྐུ་དྲགས་ཀྱི་བརྒྱུད་པ་གང་ཡང་མ་རེད། དེར་བརྟེན་མི་དཀྱུས་མ་ཞིག་རྒྱལ་ཁབ་མང་པོའི་དབུ་ཁྲིད་དུ་གྱུར་པའི་རྒྱལ་པོ་ཚང་གི་མནའ་མར་གྱུར་པ་དེ་ལ་མི་མང་པོའི་དོ་སྣང་འདྲེན་བཞིན་ཡོད་འདུག གཅིག་བྱས་ན་ཁེ་ཁྲི་ནི་མ་འོངས་པར་རྒྱལ་མོར་འགྱུར་སྲིད་པ་རེད།

དེང་རབས་རྒྱ་གར་གྱི་མུ་སྟེགས་པའི་སློབ་དཔོན་ཆེན་པོ། ཆོས་ལུགས་ཀྱི་དབུ་ཁྲིད། རྫུ་འཕྲུལ་ལ་དབང་བར་གྲགས་པ། སྤྱི་ཚོགས་ཀྱི་ཞབས་ཕྱི་དང་ཤེས་ཡོན་མཁོ་སྤྲོད་པ་ཆེན་པོ་ས་ཡེ་བྷ་བྷ་མཆོག་གི་སྙུང་གཞི་ཇེ་ལྗིད་དུ་འགྲོ་བཞིན་པར་ཁོང་གི་རྗེས་འཇུག་ཚོས་སེམས་ཁྲལ་ཆེན་པོ་བྱེད་བཞིན་པ་དང་རྒྱ་གར་གྱི་གསར་ལམ་ཁག་ཏུ་གླེང་གཞི་ཆེན་པོ་གྱུར་འདུག དེ་བཞིན་དུ་ཁོང་གི་བརྒྱུད་འཛིན་ངོ་མ་སུ་ཞིག་ལ་གཏན་འཁེལ་མིན་ཡང་གླེང་གཞི་ཆེན་པོར་གྱུར་འདུག དེ་ཡང་སློབ་དཔོན་འདི་༡༩༢༦ལོའི་ཟླ་༡༡པའི་ཚེས་ཉེར་གསུམ་ཉིན་རྒྱ་གར་ལྷོ་ཕྱོགས་ཀྱི་མངའ་སྡེ་ཨིན་ཌར་ཕར་དྷེ་ཤིར་འཁྲུངས། སྐུ་བྱིས་པའི་དུས་སུ་སྐྱེས་སྟོབས་ཀྱི་ཤེས་རབ་གཞན་དང་མི་མཚུངས་པས་རྩོམ་འབྲི་དང་། ཞབས་བྲོ། རོལ་ཆས་དབུད་དཀྲོལ་སོགས་ལ་མཁས་པའི་ཕུལ་དུ་གྱུར། སློབ་དཔོན་འདི་ནི་རྒྱ་གར་གྱི་མུ་སྟེགས་པའི་སློབ་དཔོན་ཆེན་པོ་སར་དྷི་ཞེས་གྲགས་པའི་སྐུའི་སྐྱེ་བ་ཡིན་པར་ངོས་འཛིན་མཁན་ཡོད། དེང་སྐབས་སློབ་དཔོན་འདིས་འཛམ་གླིང་གི་རྒྱལ་ཁབ་༡༡༤ཙམ་གྱི་ནང་དུ་ཆོས་ཚོགས་བཙུགས་ཡོད་པ་དང་རྒྱ་གར་ནང་དུ་སློབ་གྲྭ་ཆེ་ཆུང་མང་པོ་དང་། སྨན་ཁང་སོགས་སྤྱི་ཚོགས་ཞབས་ཞུའི་ལས་ཀྱི་རྣམ་གྲངས་ཆེས་མང་པོ་ཞིག་ཡོད་པ་རེད།

ཡོལ་མོ་བ་ལ་ཧར་ཁྱལ་བླ་མ་༼མཁན་པོ་འཆི་མེད་ཚེ་རིང་༽ཟེར་བ་ཞིག་ཉེ་ཆར་བལ་ཡུལ་ཀྱི་དཔལ་འབྱོར་བཀའ་བློན་དུ་བསྐོས་པ་རིང་པོ་མ་སོང་བར་ནག་ཉེས་མང་པོ་ཞིག་བགྲངས་ནས་དགོངས་པ་ཞུ་གྲབས་ཡིན་ཚུལ་གྱི་གནས་ཚུལ་མང་པོ་སྤེལ། བླ་མ་ལགས་ཀྱི་ནག་ཉེས་གཙོ་བོ་ཁག་ནི་རྒྱལ་གར་གྱི་མི་སེར་ལག་ཁྱེར་ཡོད་པ་དང་། སྐྱབས་བཅོལ་བོད་མིའི་ལག་ཁྱེར་ཡོད་པ་བཅས་རྒྱལ་ཁོངས་མི་གཅིག་པ་མང་པོར་ཞུགས་པ། འོས་བབ་མེད་པའི་སྤྱི་ཚོགས་ཞབས་ཞུའི་ཐེབས་རྩ་བཙུགས་པ། བོད་རང་དབང་ལས་འགུལ་ལ་མཉམ་ཞུགས་བྱེད་ཀྱིན་ཡོད་པ་དེ་བལ་ཡུལ་གྱི་ལངས་ཕྱོགས་ངོ་མ་ཀྲུང་གོ་གཅིག་གི་སྲིད་ཇུས་དང་འགལ་ཡོད་ཚུལ་སོགས་རེད་འདུག ཡིན་ན་ཡང་དེ་རིང་ཕྱི་དྲོར་བླ་མས་གསལ་འགོད་གསལ་བསྒྲགས་སྤེལ་དེ་ཁོང་ལ་བློན་ཆེན་གྱི་ལས་སྣེ་ལས་དགོངས་པ་ཞུ་འདོད་མེད་ཚུལ་དང་ཁོང་ལ་སྐྱོན་འཛུགས་བྱས་པ་ཚང་མ་ལ་ངོས་ལེན་མེད་ཚུལ་བརྗོད་ཡོད་འདུག