(སློང་མོ་བ་ཞིག་གི་གླུ་སྐད་ཉན་རྗེས།)
བོད། ལྷ་ཀླུ་གཉན་གསུམ།
མགོ་ནག་བོད་པ་ཞེས་རང་གིས་རང་ལ་དེ་ལྟར་འབོད་མཁན་གྱི་བོད་མི་དག་ཡར་འགྲོ་མར་འགྲོ་བྱེད་སའི་བཞི་མདོ་ཞིག་ནས། ཁྱེད་ཀྱིས་རིགས་རུས་ཀྱི་བླ་སྲོག་དང་འདི་ཕྱིའི་སྐྱབས་གནས་དག་གི་མཚན་ནས་ཤུགས་ཀྱིས་བོས། ང་ནི་སློང་མོ་བ་ཡིན། ངའི་མི་རིགས་ཀྱང་ང་རང་བཞིན་སློང་མོ་བ་རེད་ཅེས་བཤད་ཀྱི་འདུག ཤུ་རེ་གོ ངའི་མིག་ཆུ་ཐང་དུ་ལྷུང་གྲབས་བྱས་སོང་། ཡིན་ཡང་། ངས་རྒྱང་རིང་ཞིག་ནས་ཁྱོད་ཀྱི་སྐད་ངག་ལ་ཉན་ནས་བསྡོད་པ་ལས། ངས་ཁྱེད་ལ་གང་ཡང་བྱེད་ཐུབ་ཀྱི་མི་འདུག ཁྱོད་ཀྱི་སྐད་ཀྱི་གདངས་ན། གསོན་ཉམས་ཤིག་འདུག ཁྱོད་ཀྱི་སྐད་གདངས་སུ་རིགས་ཀྱི་མདུན་པ་འཕྱོ་བཞིན་འདུག ཁྱོད་ཀྱི་སྒྲ་སྐད་ཀྱི་སྣེ་རུ་འཐམ་ནས། ཁ་བ་ཅན་ལ་ཅི་ཞིག་ཡོད་པ་དང་། ཅི་ཞིག་ཡོད་པ་ནས་བཞུད་ཟིན་པ་དག་ལ་རྗེས་དྲན་བྱས། ཁྱོད་ཀྱི་དོན་དངོས་སུ་སྒོར་མོ་སློང་གི་མི་འདུག ཁྱོད་ཀྱི་རིགས་ཞེན་སློང་གི་འདུག ཁྱོད་ཀྱི་ལ་རྒྱ་སློང་གི་འདུག ཁྱོད་ཀྱི་སྙིང་སྟོབས་སློང་གི་འདུག ཁྱོད་ཀྱི་སེམས་ཤུགས་སློང་གི་འདུག ཁྱོད་ཀྱི་གཅིག་སྒྲིལ་སློང་གི་འདུག ཁྱོད་ཀྱི་མི་ཞིག་ལ་དགོས་པ་དེ་དག་ལས་གཞན་གང་ཡང་སློང་གི་མི་འདུག
