གངས་དཀར་སེམས།
དང་པོ།
སྟོན་མཇུག་གི་དུས་འདིར་མི་ཚོས་རི་གྲོང་སྡེ་སྤྱིའི་འགོ་བྱེད་ཚན་པའི་ནང་མི་གྲངས་བཅུ་བརྗེ་བསྒྱུར་རམ་གསར་འདེམས་བྱ་བརྩིས་ཀྱི་སྟ་གོན་རྩོམ་བཞིན་ཡོད། ཡར་ལོ་ཚང་གི་བུ་ཆེ་བའམ། ཕོ་ལོ་ང་བཞིར་སླེབས་པའི་ཚེ་རིང་མགོན་པོའམ་ཚེ་མགོན་ནི་དེ་སྔོན་རི་གྲོང་གི་འགོ་བྱེད་ཚན་པའི་འགན་གཙོ་ཡུན་རིང་བྱས་མྱོང་མཁན་ཞིག་རེད། ཚེ་མགོན་ཁོ་རང་ཆུང་དུས་ཕ་མའི་བཀའ་དྲིན་ལ་བརྟེན་ཡི་གེ་འབྲི་ཀློག་སྦྱངས་ནས་རང་མགོ་ཐོན་ཙམ་ཡོད། ཆེན་པོར་ཆགས་རྗེས་དབང་ཆ་བཟུང་བར་འདོད་མོས་ཡོད་མཁན་ཞིག་ཡིན་རུང་སྒེར་ལ་མདུན་ནས་དཔོན་ཆེན་གྱི་སྣེ་འདྲེན་དང་རྒྱབ་ཏུ་དཔུང་ཤུགས་ཆེར་མེད་པའི་རྐྱེན་གྱིས་ནུས་ཤུགས་ཡོད་རྒུས་བློ་བསྐྱེད་ཇི་ཙམ་བྱས་ཀྱང་རི་གྲོང་འདིའི་འགོ་གཙོ་བརྒལ་བའི་གོང་རིམ་གཞན་གྱི་དབང་ཆ་འདི་ལས་ལྷག་པ་ཞིག་མ་རག་ནས་ལུས།
