བོད་ལྗོངས་རོགས་སྐྱོར་ནི་རྒྱ་མི་བོད་ཁུལ་དུ་སྤོར་རྒྱུའི་ལྐོག་ཇུས་ཤིག་ཡིན་པ་ལས།
བོད་རང་ལ་གནོད་པ་ལས་ཁེ་ཕན་མེད་པ་མངོན་གསལ་རེད།

རིག་འབྱུང་དཀོན་མཆོག་ཚེ་བརྟན།

ང་ནི་བོད་ལུགས་གསོ་རིག་གི་སྨན་པ་དཀྱུས་མ་ཞིག་དང༌། ད་ཕན་མི་ལོ་ཉེར་གསུམ་རིང༌། སློབ་གྲྭ་ཆེ་འབྲིང་ཆུང་གསུམ་འགྲིམས་ཤིང༌། བོད་ཀྱི་སྲོལ་རྒྱུན་རིག་གནས་དང་དེང་རབས་རིག་གནས་ལ་བག་ཆགས་འཇོག་ཁུལ་བྱས་པ་ཞིག་ཡིན། ད་དུང་མུ་མཐུད་སློབ་གཉེར་དང་ཆབས་ཅིག བྱང་ཨ་རིའི་ཡུལ་ན་དེང་རབས་རྟོག་གེའི་རིག་པའི་སྐོར་ལ་སློབ་གཉེར་བྱེད་བཞིན་ཡོད།
མི་ལོ་ཉེར་གསུམ་རིང་དེའི་རིང༌། རྒྱ་ནག་དམར་ཕྱོགས་གཙོ་འཛིན་མའོ་ཙེ་ཏུང་དང༌། ཏིན་ཞོ་ཕིན། ཅང་ཙེ་མེན། ཧུའུ་ཅིན་ཐོ་བཅས་ཀྱི་དགོངས་པ་གཙོ་བོར་བཞག་པའི་གུང་ཁྲན་ཏང་གི་ཆབ་སྲིད་ལ་སློབ་སྦྱོང་དང༌། མཚོན་བྱེད་གསུམ་གྱི་རིག་པའི་གཞུང་ལུགས་ཀྱི་དགོངས་པའི་སྐོར་ཟིན་བྲིས་སུ་བཏབས་ཏེ་བསྡད་པ་ཡིན། དེ་ནི། རྒྱལ་ཁབ་ལ་འགན་ཁུར་བ་དང་རང་ཉིད་ལ་འགན་ཁུར་བའི་འགྲེལ་བཤད་དང་དེའི་ཁོར་ཡུག་དེ་ནས་འདོད་པ་ཡོད་མེད་ལ་མ་ལྟོས་པར་སྦྱོང་དགོས་ཤིང༌། དེ་སྦྱངས་པའི་ཚད་གཞི་དེས། ད་གཟོད་དགེ་རྒན་དང་སློབ་མར་རྒྱལ་ཁབ་དང་ཏང༌། མི་དམངས་བཅས་ལ་ཤ་ཞེན་གྱི་བསམ་བློ་ཡོད་མེད་ཀྱི་ཚད་གཞི་འཇལ་གྱི་ཡོད། རྒྱུ་མཚན་དེ་འདྲར་བརྟེན། སློབ་ཚན་དེའི་སྐོར་ལ་འབད་བརྩོན་དང༌། མ་འོངས་པའི་ནང་དུའང་སློབ་སྦྱོང་དང་ལག་ལེན་བསྟར་བ་ལ་ཆོད་སེམས་བརྟན་པོ་ཡོད་སྐོར་ཁ་ནས་མ་ཎི་འདོན་འདོན་དང་ལག་ནས་ཕྲེང་བ་བགྲང་བགྲང་གིས་གཏམ་གླེང་བྱས་མྱོང༌། དེ་ནི་ངའི་སློབ་གཉེར་ཁོར་ཡུག་གི་གནས་སྟངས་གྲས་ཀྱི་གཅིག་རེད། ཁོར་ཡུག་འདི་འདྲ་ཞིག་གི་ཁྲོད་སློབ་སྦྱོང་གི་གོ་སྐབས་ཤིག་ཐོབ་པ་དེ་ཡང་སྐལ་བ་བཟང་ཙམ་རེད། ངའི་ལོ་ཚོད་ནང་སློབ་གཉེར་གྱི་གོ་སྐབས་ཁྱོན་ནས་མ་རག་པའང་མང་པོ་ཡོད།
ད་ལོའི་ཕྱི་ཟླ་གསུམ་པ་ནས་བཟུང༌། རྒྱལ་ཁབ་ཀྱི་བརྟན་བརླིང་དང་འབྲེལ་བའི་ཚོགས་འདུ་ཆེ་ཆུང་མང་པོ་བདུན་ཕྲག་རེར་ཐེངས་འཚོགས་པའི་ལས་འགུལ་སྤེལ་བའི་སྐབས་ལ་མཚོན་ན། ང་ཚོའི་ལས་ཁུངས་ཀྱིས་འཇིགས་དངངས་ཆེན་པོ་དང་བཅས་ཏེ། ང་ཚོའི་ལས་ཁུངས་ཀྱི་འགོ་ཁྲིད་རྣམ་པས་གཅིག་ཤོར་གཉིས་ཤོར་གྱི་ཚུལ་གྱིས། རང་རེའི་ལས་ཁུངས་ཀྱི་ལས་བྱེད་མི་སྣ་ཁ་ཤས་ལ་བདེ་འཇགས་ཅུས་ཀྱིས་གསང་བའི་སྒོ་ནས་མྱུལ་ཞིབ་དང་ལྟ་རྟོག་བྱས་དང་བྱེད་བཞིན་ཡོད་སྟབས། སོ་སོའི་ངོས་ནས་གཟབ་ནན་བྱེད་དགོས་པ་ལས། སྐད་ཆ་གང་བྱུང་མང་བྱུང་བཤད་པ་དང༌། ཁ་བྲལ་རིང་ལུགས་ཀྱི་བསམ་བློའི་རྗེས་སུ་འབྲངས་ནས་རྒྱལ་ཁབ་ཀྱི་བརྟན་བརླིང་ལ་གནོད་སྐྱོན་གཏོང་བ་དང༌། ཏང་དང་རྒྱལ་ཁབ་ཀྱི་ཆབ་སྲིད་དང་ཁྲིམས་ལུགས་ལ་འགལ་བའི་ལས་ཀ་ལ་ཞུགས་མི་ཆོག་པ་མ་ཟད། ཕྱི་ལོགས་ནས་འཁྱར་ཡོང་བའི་ཡིག་ཆ་དང་གསར་འགྱུར་གྱི་རིགས་ལ་གང་བྱུང་བལྟ་མི་ཆོག་པ། བོད་ནི་མེས་རྒྱལ་དང་ནམ་ཡང་ཁ་བྲལ་མི་རུང་བའི་གྲངས་ཉུང་མི་རིགས་ཤིག་ཡིན་པ་སོགས་ཀྱི་གཏམ་བཤད་དང་བགྲོ་གླེང་གི་ནང་དོན་དག་ནི། ད་དུང་ངའི་ཡིད་ལ་དྲན་ཐེངས་རེར་ཉིན་བཞིན་གྱི་ཞལ་འདོན་ལྟར་བློ་བྱང་དུ་སོང་ནས་ཡོད།
རྒྱ་ནག་གུང་ཁྲན་ཏང་ལྟར་ན། སྤྱིར་ཆབ་སྲིད་དང་མར་ལེ་རིང་ལུགས་ཀྱི་རྩོད་སྒྲུབ་རིག་པ་ནི། སློབ་གྲྭ་ཆེན་མོ་བས་ངེས་པར་དུ་སྦྱང་དགོས་པའི་སློབ་ཚན་ཞིག་ཡིན་ལ། མི་ཚེ་གང་བོའི་ལས་གནས་སྟེང་ནམ་ཡང་ཁ་འབྲལ་ཐབས་མེད་པའི་ཚོགས་འདུའི་ནང་དོན་གཙོ་བོའང་སློབ་དེབ་འདི་གཙོ་བོར་བཞག་ནས་ཡོང་གི་ཡོད། དེ་བཞིན་སློབ་ཆེན་གྱི་སློབ་མ་མང་པོ་ཞིག་གིས་ཀྱང་དེའི་ཕྱོགས་ལ་ཤུགས་གང་མང་རྒྱག་གིན་ཡོད་ཅིང༌། དེ་ནི། རྒྱལ་ཁབ་ཀྱི་ཆེད་དང་གུང་ཁྲན་ཏང་གང་གི་ཆེད་དུའང་མ་ཡིན་པར། ཁོང་ཚོར་དམིགས་ཡུལ་གཅིག་རང་ཡོད་པ་ནི། གུང་ཁྲན་ཏང་གི་གནམ་འོག་ནས་མདུན་ལམ་ངེས་ཅན་ཞིག་ཐོབ་ཐབས་ཁོ་ནའི་ཆེད་དུ་ཡིན། དཔེར་ན། ཆབ་སྲིད་ཀྱི་སྐར་གྲངས་ནི་རབ་འབྱམས་པ་དང་ཞིབ་འཇུག་སློབ་མར་རྒྱུགས་སྤྲོད་སྐབས་སུ། དངོས་གཞིའམ་ཆེད་ལས་ཀྱི་སློབ་ཚན་ལས་ཀྱང་ཤིན་ཏུ་གཙིགས་སུ་འཛིན་པས་རེད།
བོད་ཀྱི་རིག་གནས་ཀྱི་རྨང་གཞི་མཐུག་ཅིང་ཤེས་ནས་སྨྲ་བ་མང་པོ་ཞིག་གི་མདུན་ལམ་འགོག་བྱེད་ཡོད་ན་མེད་ན་དེ་ཡང་མདོར་དེད་ན་ཆབ་སྲིད་ཀྱི་སྐར་གྲངས་ཀྱིས་ཐག་གཅོད་བྱེད་པ་ཡིན། བོད་ཀྱི་རིག་གནས་ཀྱི་རྨང་གཞི་བརྟན་པའི་སྐད་གཅིག་སྨྲ་བ་མང་པོ་ཞིག་ལ་དེང་རབས་སློབ་གསོའི་ལག་འཁྱེར་མེད་པར་བརྟེན། མི་ཚེ་གང་བོར་མགོ་བོ་དགྱེ་ཡུལ་མེད་པར་གཞི་རིམ་གྱི་ལས་ཀ་ཞིག་ལས་ཐོབ་ཀྱི་མེད་པ་དང༌། སྤྱི་ཚོགས་སྟེང་གི་གོ་གནས་ཆེ་ཆུང་གང་ཡང་ཐོབ་ཐུབ་ཀྱི་མེད། ཐ་ན་རང་ཉིད་ཀྱི་གནས་རིམ་འཕར་བའི་གོ་སྐབས་ཀྱང་ཉུང་ཉུང་ཡིན།

དེ་ལས་མང་བ་། “བོད་ལྗོངས་རོགས་སྐྱོར་ནི་རྒྱ་མི་བོད་ཁུལ་དུ་སྤོར་རྒྱུའི་ལྐོག་ཇུས་ཤིག་ཡིན།” »

༼ད་ལྟ་བ་དུས་དེབ་ལས་ཚན་བཤུ་བྱས༽
༼༡༽
རྒྱལ་བ་གཉིས་པ་འཇམ་དཔལ་སྙིང་པོ་ལ་ཁྱད་པར་བཞི་ལྡན་གྱི་ཚུལ་དུ་རབ་བསྔགས་དད་པའི་མེ་ཏོག་ཅེས་བྱ་བ་བཞུགས་སོ།།
འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ།

ཨོཾ་སྭ་སྟི། མ་ལུས་ཕྱོགས་དུས་རྒྱལ་བའི་མཁྱེན་རབ་གང༌།། གཅིག་བསྡུས་རྗེ་བཙུན་ངག་གི་དབང་ཕྱུག་ནི།། ངུར་སྨྲིག་འཛིན་པའི་གཟུགས་སུ་རྣམ་རོལ་བ།། མཚུངས་མེད་བློ་བཟང་རྒྱལ་བའི་དབང་པོ་ཁྱོད།། རྙོག་བྲལ་ཡིད་ཀྱི་རྒྱ་མཚོ་དྭངས་པའི་ངོས།། དད་པའི་འདབ་སྟོང་བཞད་པའི་གེ་སར་ལ།། དགྱེས་པར་བཞུགས་ནས་མོས་ལྡན་བདག་ཅག་གི།། བསྟོད་པའི་མེ་ཏོག་འཐོར་ལ་ཡུད་ཙམ་དགོངས།། སྟོན་པ་མཆོག་དེས་དཔག་མེད་དཀའ་བ་ཡིས།། བསྒྲུབས་པའི་ཆོས་ཚུལ་ཡིད་བཞིན་རིན་པོ་ཆེ།། བཤད་དང་སྒྲུབ་པའི་རྒྱལ་མཚན་རྩེར་འགོད་པའི།། སྙིང་སྟོབས་རྡོ་རྗེའི་དམ་བཅའ་ཁྱོད་ཀྱིས་བཞེས།། རྒྱུ་སྐར་ཕྲེང་བར་རྒྱུ་སྐར་བདག་པོ་བཞིན།། རྒྱལ་སྲས་རྒྱ་མཚོའི་དབུས་ན་ཁྱོད་ཉིད་ནི།། རྒྱལ་བའི་རྒྱལ་ཚབ་གཅིག་པུར་བསྔགས་པ་ཡི།། སྒྲ་དབྱངས་མཐའ་ཡས་རྒྱལ་བའི་ཞིང་ཀུན་གྲགས།། རྨད་བྱུང་རྒྱལ་སྲས་ཐུ་བོའི་རྣམ་ཐར་མཐའ།། རྫོགས་ཀྱང་ད་དུང་བྱིས་པའི་རོལ་རྩེད་ཀྱིས།། བསྟན་ལ་རིམ་བཞིན་སློབ་པའི་རྫུ་བག་འདིས།། ཡང་དག་ལམ་ལ་སྐྱེ་བོའི་ཚོགས་ཀུན་དྲོངས།། རབ་འབྱམས་མདོ་དང་རྒྱུད་སྡེའི་ཟབ་རྒྱས་གནད།། ཇི་བཞིན་མ་ནོར་འབྱེད་པའི་རྣམ་དཔྱོད་ཀྱིས།། མང་དུ་ཐོས་པ་རྒྱ་མཚོའི་ཚུལ་འཆང་བས།། ལེགས་བཤད་བྱེ་བའི་ཆུ་ཀླུང་གནས་སུ་གྱུར།། སྣ་ཚོགས་གཞུང་ལུགས་སོ་སོའི་དགོངས་པའི་དོན།། རང་བཟོས་དྲི་མ་གཞར་ཡང་མ་མཆིས་པར།། ཚུལ་བཞིན་འགྲེལ་བར་བྱེད་ལ་ཁྱོད་དང་ནི།། མཚུངས་པ་མེད་ན་ལྷག་པ་ལྟ་ཅི་ཞིག ། འདི་ན་གྲུབ་མཐའི་ཚུལ་དང་ཐེག་པའི་གཞུང༌།། རང་འདོད་ཕྱོགས་སུ་ལྷུང་བས་རྣམ་པར་དཀྲུགས།། ཁྱོད་ནི་རྒྱལ་བའི་བསྟན་པ་འབའ་ཞིག་གིས།། དབང་བྱས་ཕྱོགས་མེད་གཟུ་བོའི་ལམ་ལ་རྒྱུ།། ཐོག་མེད་སྲིད་པའི་ས་བོན་དངོས་ཞེན་དགྲའི།། སྲོག་ལ་བདག་མེད་ལྟ་བའི་མཚོན་འདེབས་པར།། ཁྱོད་ཉིད་ལྷག་པར་སྒྲིན་པའི་ངང་ཚུལ་གྱིས།། བདུད་ཀྱི་སྡེ་ཆེན་ཕམ་པའི་ཆོ་ངེ་བསྒྲགས།། སྲས་བཅས་རྒྱལ་བའི་དགོངས་དོན་མ་ནོར་བ།། སྟོང་དང་རྟེན་འབྱུུང་ཟབ་མོའི་དེ་ཉིད་ལ།། ཡིད་ཆེས་གཏིང་ནས་རྙེད་པའི་སྒོ་གཅིག་པུ།། ཁྱོད་ཀྱི་ལེགས་བཤད་རྣམས་ལས་གཞན་པ་གང༌།། ཐེག་མཆོག་སྔགས་ཀྱི་སྙིང་པོར་གྱུར་པ་ཡི།། སྒྱུ་ལུས་འོད་གསལ་གྱིས་མཚོན་ཟབ་མོའི་གནད།། ཇི་བཞིན་བཀྲོལ་བས་དཀྱིལ་འཁོར་བདག་པོས་ཀྱང༌།། ཁྱོད་ལ་ཟླ་བ་བཟང་པོ་འདྲ་བར་བསྔགས།། ལྷག་བསམ་དག་པ་ཁྱོད་ཐུགས་འོ་མའི་མཚོར།། འཇམ་མགོན་ཟླ་བའི་འོད་བཟང་རྟག་འཐུང་བས།། ཕྲིན་ལས་ཟེགས་མ་དཀར་པོ་གཅིག་གིས་ཀྱང༌།། བསིལ་ལྡན་ར་བའི་ཁོར་ཡུག་ཕྱུར་བུར་བཀང༌།། མཐས་ཡས་གཞུང་ལུགས་ཀུན་གྱི་བརྗོད་བྱའི་དོན།། འགལ་བ་མེད་པར་ལམ་གྱི་ཆ་རྐྱེན་དུ།། ཉམས་ལེན་གནད་ཀྱི་གདམས་པར་འཆང་བ་ཡི།། ཀུན་ཕན་བདུད་རྩིའི་མཆོད་སྦྱིན་ཁྱོད་ཀྱིས་བཀྲམ།། རྒྱལ་སྲས་རྣམས་ཀྱི་ཟབ་རྒྱས་སྤྱོད་པའི་ཚུལ།། ཉིད་ཀྱི་མཛད་བཟང་སྣང་བས་གསལ་བྱས་པ།། དེ་ཚེ་ཕྱོགས་རེས་ཁེངས་ལྡན་གཞན་གྱི་ལུགས།། ཉིན་མོར་བྱེད་པས་རྒྱུ་སྐར་བཞིན་དུ་མནན།། རྨད་བྱུང་ཤིང་རྟ་གཉིས་ཀྱི་གཞུང་ལུགས་དང༌།། གྲུབ་མཆོག་རྣམས་ཀྱི་ལེགས་པར་བཀྲལ་བ་ཡི།། ཟབ་མོ་རྡོ་རྗེ་ཐེག་པའི་ལམ་གྱི་འགྲོས།། ཉམས་ལེན་གནད་དུ་སྒྲིལ་བ་ཁྱོད་ཀྱི་སྲོལ།། དེ་ཕྱིར་མདོ་དང་སྔགས་ཀྱི་བསྟན་པ་གང༌།། ཡོངས་རྫོགས་ཆོས་ཀྱི་རྒྱལ་པོ་ཁྱོད་ཀྱི་ནི།། བཤད་དང་སྒྲུབ་པའི་རྒྱལ་ཐབས་རིན་པོ་ཆེ།། སྲིད་པ་གསུམ་གྱི་བླ་ན་མངོན་པར་འཕགས།། བཤད་དང་སྒྲུབ་པ་ཕྱོགས་རེའི་བརྟུལ་ཞུགས་ཀྱི།། འོད་བཟང་སྤྲོ་བའི་བློ་ལྡན་རྒྱུ་སྐར་བརྒྱས།། མཁྱེན་མཆོག་ནམ་མཁའི་ནོར་བུ་ཁྱེད་གཅིག་ལ།། འགྲན་མི་ནུས་ན་སུ་ཞིག་དེ་ལ་བསྙོན།། མཁྱེན་མཆོག་སྟོན་པ་དེ་ཡི་བསྟན་པ་གང༌།། རྣམ་པར་གྲོལ་བའི་འཇུག་ངོགས་མཚུངས་མེད་ལམ།། ནན་ཏན་སྙིང་པོར་མཛད་པའི་བརྩོན་ཆེན་གྱིས།། ཉིན་དང་མཚན་མོ་ཁོར་ཡུག་གཅིག་ཏུ་བཟླུམས།། སྟོང་དང་སྙིང་རྗེ་ཟུང་དུ་འབྲེལ་བ་ཡི།། ལམ་མཆོག་མཚུངས་པ་མེད་ལས་རྒྱལ་སྲས་ཀྱི།། རྣམ་ཐར་རྒྱ་མཚོ་ལྟ་བུའི་རང་བཞིན་ལ།། ཁྱོད་ནི་ཡིད་བཞིན་འདོད་དགུར་རྣམ་པར་རོལ།། ཉེ་བར་ཞི་བ་ཐུགས་ཀྱི་མཁའ་དབྱིངས་སུ།། རླབས་ཆེན་བསོད་ནམས་གསེར་གྱི་སྙིང་པོའི་སྤྲིན།། ཆེས་ཆེར་དཀྲིགས་ལས་ཕན་བདེ་ནོར་བུའི་ཆར།། མ་ལུས་ཞིང་ཀུན་ཏུ་ཡང་ཁྱབ་པར་བརྡལ།། སྒོ་གསུམ་ལྷ་སྔགས་ཆོས་སྐུའི་རོལ་མོ་ཡིས།། ཐ་མལ་སྣང་ཞེན་དྲི་མ་ཀུན་བཀྲུས་ཏེ།། ཟབ་གསལ་བདེ་བ་ཆེན་པོའི་དབྱིངས་ཉིད་དུ།། དཀྱིལ་འཁོར་ཀུན་གྱི་བདག་པོར་མངའ་དབང་འབྱོར།། ཇི་ལྟ་ཇི་སྙེད་ཆོས་ཀྱི་གནས་ཚུལ་ལ།། ཡག་དག་རིགས་པས་དྲངས་པའི་ངེས་ཤེས་ནི།། ཐེ་ཚོམ་སྨག་དང་བྲལ་བའི་ཉམས་མྱོང་གིས།། ཉམས་ལེན་གནད་དུ་འཛུད་པ་ཁྱོད་ཀྱི་སྲོལ།། རྒྱལ་བ་མཆོག་དང་རྒྱལ་སྲས་སེམས་དཔའ་དང༌།། མཁས་ཤིང་གྲུབ་བརྙེས་རྣམས་ཀྱིས་དགྱེས་པའི་ཞལ།། རྟག་ཏུ་ཁྱོད་ལ་ཕྱོགས་པའི་ངང་ཚུལ་གྱིས།། ཟབ་དོན་ཐུགས་ཀྱི་གསང་བ་མངོན་སུམ་འདོམས།། མཚུངས་མེད་རྒྱལ་བ་དགྱེས་པའི་ལམ་བཟང་ནས།། གྲུབ་མཆོག་ནོར་བུའི་གླིང་དུ་གཤེགས་ཁྱོད་ཀྱི།། ཞབས་སེན་ཨུཏ་པལ་གཞོན་ནུའི་ཕྲེང་བ་གང༌།། གྲུབ་བརྙེས་བྱེ་བའི་གཙུག་གཏོར་རྩེ་ན་མཛེས།། ས་སྟེང་ཆུ་ཀུན་ཆུ་གཏེར་ཆེན་པོ་ལ།། གཞོལ་བ་ཇི་བཞིན་ཉིད་ཀྱི་མཛད་པའི་སྒོ།། ཀུན་ཀྱང་རྒྱལ་བའི་བསྟན་པ་རིན་པོ་ཆེ།། ཕྱོགས་དུས་ཀུན་ན་རྒྱས་པའི་ཐབས་སུ་བཤམས།། དམིགས་མེད་སྙིང་རྗེའི་སྟོབས་མཆོག་མཚུངས་མེད་པས།། རིགས་གསུམ་སེམས་པ་དགྱེས་པའི་རྣམ་ཐར་མཐའ།། གངས་ཅན་འདི་ན་ཁྱོད་ཀྱིས་ལེགས་བསྐྱངས་པས།། ད་དུང་དུ་ཡང་བསྟན་པའི་སྣང་བ་འབར།། རིང་ནས་གོམས་པའི་ཐུགས་བརྩེས་བྱིང་ཀུན་ཏུ།། རྒྱལ་བསྟན་འཛིན་པའི་སྨོན་ལམ་མཐུ་གྲུབ་པས།། ཕྲིན་ལས་བཟང་པོའི་ཆ་ཤས་ཙམ་གྱི་ཡང༌།། གྲགས་པས་རྒྱ་མཚོའི་གོས་ཅན་ཀུན་ནས་ཁེབས།། མཁྱེན་རབ་ཉི་མའི་འོད་དང་མཛད་བཟང་གི།། ཨུཏ་པལ་གཞོན་ནུའི་དགའ་ཚལ་རྟག་འགྲོགས་པས།། བརྩེ་ཆེན་སྐྱོབ་པ་རྒྱས་པའི་ལམ་མཆོག་ནི།། ཁྱོད་ལ་ཕྱོགས་སུ་ལྷུང་བ་བཞིན་དུ་བཀུག ། དེ་ཕྱིར་ལྷ་རྣམས་དག་ལས་ལྷ་དབང་དང༌།། པདྨའི་ཚལ་ན་པདྨ་དཀར་པོ་བཞིན།། ཁྱོད་ཀྱི་རིང་ལུགས་གཙང་མའི་གཟི་བྱིན་དེས།། ཕྱོགས་གཞན་གྲུབ་མཐའ་དཔལ་དང་ལྡན་པར་བརྒྱན།། ཐུབ་བསྟན་ཡོངས་སུ་རྫོགས་པའི་སེང་གེའི་སྒྲས།། བསིལ་ལྡན་ར་བ་དཀར་པོའི་ཁོར་ཡུག་ཁྱོན།། ཁྱབ་མཛད་མཚུངས་པ་མེད་པའི་རྣམ་ཐར་གྱིས།། བདུད་སྡེ་བྱེ་བའི་རུ་མཚོན་ཅིག་ཅར་བསྙིལ།། བློ་བཟང་མཁྱེན་པའི་ཉི་མ་གཅིག་གིས་ནི།། ས་སྟེང་གནས་པའི་རབ་རིབ་རྣམ་བཅོམ་པས།། ཡང་དག་རིགས་པའི་ལམ་ནས་ཟབ་རྒྱས་ཆོས།། སྨྲ་བའི་སེང་གེས་ས་ཆེན་རྣམ་པ་བཀང༌།། རྨད་བྱུང་རྣམ་ཐར་གཙང་མའི་མཛད་བཟང་གིས།། ཐུབ་བསྟན་རྙོགས་མར་གྱུར་པ་ཀུན་བགྲུངས་ནས།། བཟང་པོའི་གསེར་དང་མཚུངས་པའི་ཁྲིམས་འཆང་བ།། ངུར་སྨྲིག་འཛིན་པས་ས་འདི་དོག་པོར་བྱས།། ཡང་དག་བསླབ་པ་གསུམ་གྱི་ཉམས་ལེན་དང༌།། རྗོད་བྱེད་སྡེ་སྣོད་གསུམ་གྱི་འཆད་ཉན་གང༌།། ལྷན་ཅིག་འགྲན་པ་བཞིན་དུ་འཕེལ་བ་ཡི།། རླབས་ཆེན་ཕྲིན་ལས་ཁྱོད་ཉིད་གཅིག་པུས་མཛད།། འཕགས་མཆོག་ཁྱོད་ཀྱི་རྣམ་ཐར་འདི་འདྲ་བ།། ཐོས་པ་ན་ཡང་རྒྱལ་སྲས་སེམས་པ་གཞན།། དགའ་བས་སྙིང་གི་ཆུ་གཏེར་གཡོ་ནུས་ན།། བདུད་ཀྱི་ཡིད་ལ་ཟུག་རྔུ་ཅིས་མི་སྟེར།། ཁྱོད་ཀྱི་བརྒྱུད་འཛིན་དམ་པའི་སྐྱེ་བོ་རྣམས།། ཀུན་སྤྱོད་སྨད་དུ་མེད་པའི་ཚུལ་ཁྲིམས་དང༌།། སྐྱོན་བྲལ་རྣམ་དཔྱོད་བཟང་པོའི་ངང་ཚུལ་གྱིས།། ཕྱོགས་ཀྱི་སྐྱེ་བོ་ཀུན་གྱི་གཙུག་ན་མཐོ།། བློ་ཆུང་ཕྲག་དོག་གཡོ་བའི་ངང་ཚུལ་གྱིས།། ཁྱོད་ཀྱི་བསྟན་ལ་ལྷག་པར་གཤེ་ན་ཡང༌།། ངང་ཚུལ་བཟང་པོའི་འོད་བཟང་མ་ཉམས་པས།། སྨག་ལ་ཟླ་རྒྱས་བཞིན་དུ་ལྷག་པར་གསལ།། དེ་ཕྱིར་ཁྱོད་ཀྱི་རིང་ལུགས་རིན་པོ་ཆེ།། པདྨའི་དགའ་ཚལ་ལྟ་བུར་ཡིད་འོང་བ།། ལྷར་བཅས་འགྲོ་བ་དགའ་བའི་མཆོད་སྡོང་འདི།། སེམས་བཅས་སུ་ཡི་སྙིང་ལ་ཕངས་མི་འགྱུར།། བདག་ཅག་འདི་ནས་སྐྱེ་བ་ཀུན་ཏུ་ཡང༌།། ཀུན་སྤྱོད་གཙང་མའི་ཁྲིམས་ལྡན་པདྨའི་སྦུབས།། བློ་མཆོག་འཆར་ཀའི་འོད་དང་ལྷན་ཅིག་པས།། འཇམ་མགོན་དགྱེས་པའི་བརྟུལ་ཞུགས་འཛིན་གྱུར་ཅིག ། བློ་དང་ཚུལ་ཁྲིམས་འཆལ་བའི་ཉེས་ཚོགས་ཀྱིས།། ཁྱོད་ཀྱི་ལུགས་བཟང་གཙང་མ་རྙོག་བགྱིད་ཅིང༌།། དྲི་མེད་བསྟན་ལ་རྨ་སྲོལ་འབྱིན་པ་ཀུན།། བདག་གིས་སྟོབས་ཀྱིས་རྩད་ནས་ཞི་གྱུར་ཅིག ། སྲས་བཅས་རྒྱལ་བའི་ཕྲིན་ལས་ཙོང་ཁ་པའི།། རྣམ་ཐར་མཚུངས་པ་མེད་པའི་བདག་ཉིད་དང༌།། ཀུན་ཏུ་མཚུངས་པའི་ཐབས་མཁས་སྤྱོད་པ་ཡིས།། འཇམ་མགོན་རྒྱལ་བའི་གོ་འཕང་འགྲུབ་གྱུུར་ཅིག །
ཅེས་པའང་གསེར་མདོག་ཅོད་པན་འཛིན་པའི་རིང་ལུགས་པ་ཆེན་པོ་བསླབ་གསུམ་ནོར་བུའི་གཏེར་མཛོད་སྤྲུལ་པའི་སྐུ་བྲག་གཡབ་གདོང་ཀོང་སྤྲུལ་སྐུངག་དབང་དམ་ཆོས་རྒྱ་མཚོའི་ཞལ་སྔ་ནས་རྗེ་ཙོང་ཁ་པ་ལ་བསྟོད་པ་ཤོ་ལོ་ཀ་བཞི་བཅུར་ཉེ་བ་ཞིག་རྩོམས་ཤིག་ཅེས་བཀྲ་ཤིས་པའི་ལྷ་རེག་དང༌། རྗེ་རྒྱལ་བ་གཉིས་པའི་ན་བཟའི་གནང་སྐྱེས་དང་བཅས་ཏེ་བཀའ་ཡི་བསྐུལ་མ་ཡང་ཡང་བྱུང་བ་ལ་བརྟེན་ནས། མི་ཕམ་བློ་བཟང་ཉི་མས་རང་ལོ་སོ་གཉིས་པའི་དུས་སུ་མཛེས་ལྡན་འཆི་མེད་ལྗོན་པའི་དགའ་ཚལ། རིན་ཆེན་བྲག་རི་བརྩེགས་པའི་སྟ་ཟུར་དུ་རང་གནས་བདུད་རྩིའི་ཤིང་གི་སྤྱིལ་བུ་ནས་བསྙེན་མཚམས་ལ་གནས་པའི་ཐུན་གསེང་དུ་སྤེལ་བ་དགེ་ལེགས་མཆོག་ཏུ་གྱུར་ཅིག མངྒ་ལཾ།།

དེ་ལས་མང་བ་། “མི་རིག་འདྲ་ཡོད་ན་དགོད་སྤྱད། ཟོག་རིག་འདྲ་ཡོད་ན་འཁོན་སྤྱད། རྩོམ་རིག་འདྲ་ཡོད་ན་་་་་་་” »

འབྲོག་མྱི།
____________

སྤྲུལ་སྐུ།

ད་ལྟ་གངས་ཅན་བོད་དུ་རྩ་བ་གངས་ལ་ཟུག་ཅིང་རྩེ་མོ་ཧི་མ་ལའི་དབུ་དང་མཉམ་ཞིང༌། ཡལ་འདབ་འཛམ་གླིང་གང་སར་རྒྱས་པའི་རང་ཅག་གི་སྟོན་པ་བླ་ན་མེད་པས་བསྟན་པའི་སངས་རྒྱས་བཅོམ་ལྡན་འདས་ཀྱི་བསྟན་པ་འདི་ཉིད་ནི་དེང་གི་ཆར་ས་སྟེང་འདི་ན་ཆེས་ཁྱད་དུ་འཕཊ་པའི་དེང་རབས་ཚན་རིག་རིག་གནས་དང་མཐུན་པའི་ཁར། གཞན་ཕན་ཞི་བདེའི་ཆོས་ལུགས་རིགས་གཞུང་ཞིག་གི་ངོ་བོའི་སྟེང་འགྲོ་བ་མིའི་རིགས་འདི་བཞིན་འཚོ་ཞིང་རྟེན་པའི་གོ་ལ་ཟླུམ་པོའི་བརྟན་འཇགས་ཞི་བདེའི་ཆེད་ཞབས་འདེགས་ཞུས་དང་ཞུ་མུས་སུ་ཡོད་ཅིང་། ནང་པའི་བསྟན་པ་བོད་ཡུལ་དུ་དར་བའི་ལོ་རྒྱུས་རིང་མོའི་ཁྲོད་འཆད་རྩོད་རྩོམ་གསུམ་ལ་ཤིན་ཏུ་མཁས་པའི་སྐྱེས་ཆེན་དམ་པ་དུ་མས་སྦྱངས་བརྩོན་ཞིབ་འཇུག་དང་བརྒྱུད་འཛིན་གོང་སྤེལ། དེ་དང་འགྲོས་མཉམ་གྱིས་སྒྲུབ་པ་སྙིང་པོར་བྱེད་པའི་སྤོང་བ་པས་ཉམས་ལེན་མཐར་ཐུག་གི་འབྲས་བུ་རུ་གསར་བཏོད་ཀྱི་ཤེས་རབ་ལས་འཁྲུངས་པའི་དམ་པའི་སྐྱེས་རབས་འཛིན་པའི་སྤྲུལ་སྐུའི་ཡང་སྲིད་ངོས་འཛིན་བྱེད་པའི་ལམ་སྲོལ་འདི་གངས་ཅན་བོད་དུ་དར་པ་ནས་བཟུང༌། སངས་རྒྱས་བསྟན་པར་གསོན་ཤུགས་གསར་བ་ཞིག་རྒྱས་ནས་བོད་ཀྱི་ཐུན་མོང་མ་ཡིན་པའི་ཁྱད་ཆོས་དང་ལྡན་པའི་སྤྲུལ་སྐུའི་ལམ་ལུགས་དེ་བྱུང༌།

དེ་ཡང་སྤྲུལ་སྐུ་ཞེས་པ་ནི་སངས་རྒྱས་ཀྱི་ངོ་བོ་ཉིད་སྐུ། ཡེ་ཤེས་ཆོས་སྐུ། ལོངས་སྐུ། སྤྲུལ་སྐུ་ཞེས་པའི་སྐུ་བཞིའི་ནང་གི་སྤྲུལ་སྐུ་ཞེས་པ་དེ་ཡིན་ཞིང༌། སྤྲུལ་སྐུ་ནི་སངས་རྒྱས་རྣམས་རང་ཉིད་སངས་རྒྱས་ཟིན་པའི་རྗེས་སུ་སེམས་ཅན་གྱི་དོན་དུ་གང་ལ་གང་འཚམས་པའི་སྤྲུལ་བ་སྣ་ཚོགས་བསྟན་ནས་འགྲོ་བའི་དོན་མཛད་པ་ལ་ཟེར་ཞིང༌། མ་དག་པའི་དོན་གང་ཞིག་བྱང་ཆུབ་སེམས་དཔའ་ཞིག་གིས་མཛད་དགོས་ཚེ། དག་པའི་སངས་རྒྱས་ཉིད་ནི་བསམ་བཞིན་དུ་མ་དག་པའི་རྣམ་པ་ཞིག་ཏུ་བསྟན་པའི་སྤྲུལ་བའི་གཟིགས་སྐུ་ཞིག་ཡིན་པས་དེ་ལ་སྤྲུལ་བའི་སྐུ་ཞེས་འབོད་སྲོལ་ཆགས་ཡོད།

སྤྲུལ་སྐུ་ངོས་འཛིན་བྱེད་སྟངས།

སྤྲུལ་སྐུའི་ཡང་སྲིད་ངོས་འཛིན་བྱེད་སྲོལ་འདི་ནི་ལོ་ངོ་བདུན་བརྒྱའི་སྔོན་དུ ༡༢༨༤ལོ་ཀརྨ་པ་རང་བྱུང་རྡོ་རྗེ་སྐུ་འཁྲུངས་ནས་དགུང་ལོ་ལྔ་ལ་ཕེབས་སྐབས་གྲུབ་ཐོབ་ཨུ་རྒྱན་པ་རིན་ཆེན་དཔལ་གྱིས་ཀརྨ་པཀྴཱའི་ཡང་སྲིད་འཁྲུལ་བྲལ་དུ་ངོས་འཛིན་ཞུས། དུས་དེ་ནས་བཟུང་བོད་དུ་སྤྲུལ་སྐུའི་ཡང་སྲིད་ངོས་འཛིན་བྱེད་པའི་ལམ་སྲོལ་ཐོག་མ་དེ་དར། ཡིན་ཡང་སྤྲུལ་སྐུ་ངོས་འཛིན་ཞེས་པའི་ཐ་སྙད་འདི་དམིགས་བསལ་དེ་དུས་སུ་བོད་དུ་དར་ཡང་སྤྲུལ་བ་ཞེས་པའི་ཐ་སྙད་འདི་སྔོན་ཆད་ནས་ཡོད་པ་ཞིག་རེད། དཔེར་ན། སྲོང་བཙན་སྒམ་པོ་ནི་སྤྱན་རས་གཟིགས་ཀྱི་སྤྲུལ་བ་ཡིན་ཞེས་བཤད་སྲོལ་ཡོད་པ་ཇི་བཞིན༌། མ་དག་པའི་རྣམ་པ་བསྟན་པའི་སྤྲུལ་སྐུ་ཞེས་པ་དེ་བྱུང་དགོས་དོན་ཐད་ཡང༼མངོན་རྟོགས་རྒྱན༽གྱི་ནང་དུའང༼གང་གིས་སྲིད་པ་ཇི་སྲིད་པར།། འགྲོ་ལ་ཕན་པ་སྣ་ཚོགས་དག། མཉམ་དུ་མཛད་པའི་སྐུ་དེ་ནི།། ཐུབ་པའི་སྤྲུལ་སྐུ་རྒྱུན་མི་ཆད།།༽ ཞེས་གསུངས་པ་ལྟར། སངས་རྒྱས་བྱང་སེམས་ཀྱི་སྤྲུལ་བས་འགྲོ་བའི་དོན་མཛད་དུས་སྲིད་པ་མ་སྟོང་གི་བར་དུ་སྤྲུལ་བ་དེ་གཅིག་ནས་གཅིག་མཐུད་དེ་ཡོང་གིན་ཡོད་ལ༌། སྤྲུལ་བ་ཡོང་སྟངས་དེ་ལ་རིམ་གྱེས་པ་དང་ཅིག་ཆར་བ་གཉིས་ཡོད། རིམ་གྱེས་པ་ནི་སྐུ་གོང་མ་དེའི་དགོངས་པ་ཆོས་དབྱིངས་སུ་བསྡུས་པའི་ཚུལ་བསྟན་རྗེས་སྤྲུལ་བ་རྗེས་མ་དེ་རིམ་བཞིན་ཡོང་བའི་བྱུང་སྟངས་དེ་ལ་ཟེར་ཞིང༌། ཅིག་ཆར་བ་ནི་དུས་མཉམ་དུ་སྤྲུལ་བ་འགའ་རེ་བྱུང་བའི་བྱུང་སྟངས་དེ་ལ་ཟེར།

ཅིག་ཆར་བའི་སྤྲུལ་སྐུ་ལ་དཔེར་ན། རྗེ་དགེ་འདུན་གྲུབ་པ་དང་འཇམ་དབྱངས་ཆོས་རྗེ་ལྟ་བུ། དེ་ཡང་འཁྲུལ་ཞིག་རིན་པོ་ཆེས་༧གོང་ས་ཏཱ་ལའི་བླ་མའི་སྐུ་ཕྲེང་རིམ་བྱོན་གྱི་གསོལ་འདེབས་ཤིག་བརྩམས་ཡོད་པའི་ནང་དུ་འཇམ་དབྱངས་ཆོས་རྗེ་དང་གྲུབ་ཆེན་ནག་པོ་སྤྱོད་པ་གཉིས་ཀྱང་༧གོང་ས་ཏཱ་ལའི་བླ་མའི་སྐུ་ཕྲེང་ནང་བཞག་ཡོད་པ་དང༌། འཇམ་དབྱངས་ཆོས་རྗེ་༧གོང་ས་མཆོག་གི་སྐུ་ཕྲེང་རིམ་བྱོན་ནང་འཇོག་དགོས་དོན་ཐད་འཁྲུལ་ཞིག་རིན་པོ་ཆེས་དམིགས་བསལ་དོགས་སློང་ཞིག་བྱས་ཡོད་པའི་ནང༌། གྲུབ་ཆེན་ནག་པོ་སྤྱོད་པ་དང་འཇམ་དབྱངས་ཆོས་རྗེ་གཉིས། ༧གོང་ས་ཏཱ་ལའི་བླ་མའི་སྐུ་ཕྲེང་རིམ་བྱིན་ནང་འཇོག་དགོས་དོན་གཙོ་བོ་ནི་༧གོང་ས་མཆོག་གི་བཀའ་སློབ་བཞིན་བཞག་པ་ཡིན་ཞེས་བཀོད་ཡོད་པས༌། ༧གོང་ས་རྒྱལ་བ་རིན་པོ་ཆེའི་སྐུ་ཕྲེང་དང་པོ་ནི་རྗེ་དགེ་འདུན་གྲུབ་པ་ཡིན་པ་ཡོངས་གྲགས་ཡིན་པ་མ་ཟད༌། ད་དུང་རྗེ་དགེ་འདུན་གྲུབ་དང་འཇམ་དབྱངས་ཆོས་རྗེ་གཉིས་དུས་མཉམ་དུ་རྗེ་ཙོང་ཁ་བའི་དངོས་སློབ་ཡིན་པས༌། འདི་ལྟ་བུ་ལ་ཅིག་ཆར་བའི་སྤྲུལ་བ་རུ་ངོས་འཛིན་བྱས་ཆོག་པར་མ་ཟད། སྐབས་དེར་དེ་ལ་མ་འདས་སྤྲུལ་སྐུ་ཞེས་མིང་དེ་བཏགས་མེད་པ་མ་གཏོགས་དོན་གྱི་ཆ་ནས་མ་འདས་སྤྲུལ་སྐུ་རུ་ཆགས་ཡོད་པས། མ་འདས་སྤྲུལ་སྐུ་ཞེས་པའང་ཅིག་ཆར་བའི་སྤྲུལ་སྐུ་བྱུང་སྟངས་ཀྱི་ནང་གསེས་སུ་གཏོགས་པ་དང༌། མ་འདས་སྤྲུལ་སྐུ་ཡི་ཡང་སྲིད་ངོས་འཛིན་བྱེད་པའི་སྲོལ་རྒྱུན་དར་ནས་མ་མཐའ་ཡང་ལོ་ངོ་བཞི་བརྒྱ་ལྷག་སོང་ཡོད་པར་སྙམ།

དེ་ལས་མང་བ་། “མ་འདས་སྤྲུལ་སྐུ་རོབ་གླེང་།” »

ཤིས་ཚང་ལྗང་མྱུག
—————
ཉིན་འདི་ཚོར་ངས་༼བོད་ཁམས་ཉུལ་བ་༽ཞེས་པའི་དཔེ་དེབ་གསར་བ་ཞིག་ལ་རོལ་མྱོང་བྱེད་ཀྱིན་ཡོད་ལ། རྩོམ་པ་བོ་ནི་ཨ་འཇམ་དབྱངས་ཚུལ་ཁྲིམས་ལགས་རེད། ཕྱི་ལོ་༢༠༠༦ ལོར་རྩོམ་པ་བོ་ཁོང་གསང་བའི་ངང་བོད་ཁམས་ཡོངས་སུ་བསྐོར་སྐྱོད་བྱས་པའི་མཐོང་ཚུལ་ལ་གཞིགས་ཚེ། ད་ལྟའི་དྲ་ཁང་ནང་གི་འུ་ཚོའི་བོད་མི་ཚོ་ནམ་རྒྱུན་ཁུ་ཚུར་དང་མེ་མདའི་འཐབ་འཁྲུག་སོགས་བྱིས་པའི་རོལ་རྩེད་འདྲ་མིན་ལ་རོལ་བཞིན་ཡོད་ཚུལ་ཡང་ཡང་མཐོང་རྒྱུ་འདུག་པས། ངས་ཀྱང་དྲ་ཐོག་བོད་མིའི་སྐོར་ལ་འདི་ལྟར་བསམ་གཞིགས་ཐེངས་ཤིག་བྱེད་དགོས་བྱུང་།
འགྲོས་སྐྱེན་པའི་བརྡ་འཕྲིན་འཕྲུལ་རིག་གི་རླབས་ཤུགས་ཀྱིས་གོ་ལ་ཧྲིལ་བོར་ཕྱོགས་ཡོངས་ནས་སྒུལ་སྐྱོམ་ཚད་མེད་ཐེབས་པ་དང་འུ་ཚོའི་བོད་མི་རིགས་ཡང་དེ་རིང་གི་བརྡ་འཕྲིན་བརྒྱུད་ལམ་འདིར་དངོས་སུ་འཁྱར་འཁྱོར་གྱི་གོམ་པ་སྤོ་འགོ་ཚུགས་པ་ནི་རྙིང་ཞེན་བག་འཁུམས་ཀྱི་མལ་ནས་འཛམ་གླིང་སྔོན་ཐོན་གྱི་གྲལ་དུ་སྙེགས་པར་བརྩོན་པའི་ལོ་ཟླ་ཞིག་གི་འགོ་མ་དང་། རྟོགས་སད་ཀྱི་རྣམ་རིག་གསར་དུ་རྒྱས་པའི་དན་རྟགས་ཤིག་ཏུ་འཁུམས་པས་ངོ་མ་དགའ་འོས་པའི་དོན་བཟང་ཞིག་ཅི་ལ་མིན། ཡིན་ནའང་། ང་ཚོར་ད་སྔ་བརྡ་འཕྲིན་ལག་རྩལ་ལ་ནང་བྱན་ཆུད་པའི་ཆེད་མཁས་པ་མང་བོ་ཞིག་བྱུང་མྱོང་མེད་ལ། མི་རིགས་སྤྱིའི་གྲངས་འབོར་ལ་དཔག་ན་ད་དུང་དྲ་ཐོག་བོད་མིའི་སྤྱི་ཚོགས་ཡང་ཆེས་ཆུང་ཆུང་ཞིག་ལས་གྲུབ་མེད།
ད་ལྟའི་དྲ་ཐོག་བོད་མི་ཚོའང་ནམ་རྒྱུན་དྲ་ཐོག་ནས་ཆགས་སྲེད་ཀྱི་ལྟད་མོ་འདྲ་མིན་བལྟ་བ་དང་། འགུལ་རིས་ཀྱི་རྩེད་མོ་འདྲ་མིན་རྩེ་རྒྱུར་གོམས་པ་ལས་དྲ་ཐོག་ནས་རང་ཉིད་ལ་མཁོ་བའི་ཤེས་བྱ་གང་ཞིག་ཚུར་ལེན་བྱས་པའི་གནས་བབ་ཧ་ཅང་དམའ་ལ། ནམ་རྒྱུན་དྲ་ཐོག་ཏུ་ཅི་ཞིག་གི་ཆེད་དུ་མ་ཁོམ་པར་ཡོད་ཀྱང་། ད་དུང་གློག་འཕྲིན་(E-mail)ཙམ་ཞིག་གཏོང་མི་ཤེས་མཁན་ཡང་ཉུང་ཉུང་ཞིག་གཏན་ནས་མིན། དེ་བས་དྲ་ཐོག་བོད་མི་ཚོས་ཆུ་ཚོད་ཡོད་ཚད་དེ་ལྟར་བྱིས་པའི་རོལ་རྩེད་ལ་བརྗེ་སྟེ་དོན་མེད་མིག་འབྲས་འཕྲོ་བརླག་ཏུ་གཏོང་བ་ལས་རང་ལ་མཁོ་བའི་བརྡ་འཕྲིན་ཤེས་བྱ་སྣ་གཅིག་ཨེ་ཤེས་བལྟས་ན་དེ་ལ་དོན་སྙིང་ཆེ་བར་འདོད།
ཕྱི་ལོ་༢༠༠༧ ལོར་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་(སྤྱིར་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་སྔོན་མ་ནས་ཡོད་ཚོད་འདུག་པས་འདིར་གཙོ་བོ་ཧི་མ་ལ་ཡའི་བོད་ཡིག་གླེང་གི་ཡོད།) གློག་ཀླད་མ་ལག་གསར་བ་Window Vista དང་ལྷན་དུ་རྒྱལ་སྤྱིའི་ཁྲོམ་རྭར་དངོས་སུ་ཐོན་པ་ནས་བཟུང་བོད་པ་ཚོས་རང་གི་སྐད་ཡིག་གི་ལམ་ནས་ཐད་ཀར་གློག་འཕྲིན་(E-mail)གཏོང་བ་དང་ཆ་འཕྲིན་གླེང་མོལ་(chat)སོགས་བྱེད་ཐུབ་མོད། ད་དུང་བོད་མི་མང་བོ་ཞིག་གིས་བོད་ཡིག་གི་བཀོལ་སྤྱོད་དེ་ལྟར་ཆེ་བ་ཤེས་ཀྱིན་མེད་ལ། དངོས་སུ་ལག་ལེན་དུ་བསྟར་མཁན་དེ་བས་ཀྱང་ཉུང་།
ཉེ་ལམ་ནས་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་སྟེང་བཟོས་པའི་དྲ་ཚིགས་(འདིའི་ཁྲོད་དུ་ཟིན་བྲིས་དང་གླེང་སྟེགས་སོགས་འདུ།)མི་ཉུང་བ་ཞིག་གཅིག་རྗེས་གཉིས་མཐུད་དུ་བྱུང་དང་འབྱུང་བཞིན་པ་ནི་ཡུན་རིང་ཁ་འཐོར་དུ་སོང་བའི་གོ་ལའི་ཉིན་སྲིབ་ཀྱི་བོད་མི་ཚོ་སྐུད་ལམ་གཅིག་ཏུ་ལྷན་འཛོམས་ཐུབ་པའི་གོ་སྐབས་གསར་བ་ཞིག་དང་ཕན་ཚུན་བསམ་ཚུལ་བརྗེ་རེས་བྱ་སའི་གླེང་སྟེགས་སྔར་མེད་པ་ཞིག་ཡིན་ནའང་། ད་ལྟའི་དྲ་ཐོག་བོད་མི་ཚོས་གནས་ལུགས་དང་རྒྱུ་མཚན་ཡོད་པའི་སྒོས་ཕན་ཚུན་ལ་ལྷག་བསམ་དག་པའི་བསམ་བློ་བརྗེ་རེས་བྱེད་པ་ལས་ལྡོག་སྟེ། ཕན་ཚུན་གྱི་སྐྱོན་འཚང་སྔོག་རེས་ཀྱིས་དམའ་འབེབ་དང་ཁྱད་གསོད་བྱེད་པའི་ངན་གོམས་ཤིག་འགོས་བཞིན་པ་ནི་དྲ་ཐོག་བོད་མིའི་ཞན་ཆ་ཆེ་ཤོས་ཤིག་རེད་ལ། མ་འོངས་དྲར་ཞུགས་བོད་མིར་འགོས་འགྱུར་གྱི་ནད་ཡམས་ཚབས་ཆེན་ཞིག་ཀྱང་རེད་ཅེས་སྨྲ་བར་སྤོབས།

དེ་ལས་མང་བ་། “དྲ་ཐོག་བོད་མི་གླེང་བ།” »