འཇུ་སྐལ་བཟང་།
དུས་རབས་གསར་རྙིང་དབྱེ་བའི་མཚམས་ཐིག་ཏུ་འགྲེང་ནས།།
ཤ་མེད་རུས་པའི་དཔུང་བ་ནམ་མཁའ་ལ་བསྒྲེངས་ཏེ།།
སྐྲ་ལོ་རླུང་གིས་བསྐྱོད་བཞིན་དུམ་ཆོད་ཀྱི་ཚིག་གིས།།
རོང་སྨྱོན་འབྲོག་སྨྱོན་འདི་ཚོས་ཅི་ཞིག་རང་འཚོལ་ལམ།།
མ་བསྐོས་བསམ་གཞིག་འཁྱོག་པོ་སྨོན་མཚམས་སུ་མདུད་ཅིང་།།
སྙིང་གི་སྐྱོ་གདུང་སྨུག་པོ་དུད་ཞག་ཏུ་བསྐྱིལ་ཏེ།།
ཤ་རུས་གཏིང་གི་བརྩེ་དུང་མིག་ཆུ་རུ་འཁྲུགས་བཞིན།།
དོན་མེད་མྱ་ངན་ཅན་ཚོས་ཅི་ཞིག་རང་འཚོལ་ལམ།།
རྒན་པོས་བརྩེ་སྐྱོང་གཞོན་པས་ཕུ་དུད་དང་བྲལ་ཞིང་།།
མཐོན་པོས་ཟེ་འཕེན་ཕྱུག་པོས་རྒུད་སྐྱོབས་ཀྱིས་སྤངས་ལ།།
གཞན་གྱིས་ཟུར་ཟ་རང་གིས་ཡི་ཆད་ཀྱང་ཤོར་བཞིན།།
ཁེར་རྐྱང་མགྲོན་པོ་འདི་ཚོས་ཅི་ཞིག་རང་འཚོལ་ལམ།།

དེ་ལས་མང་བ་། “སྙན་ངག་པ་ཚོས་ཡང་སྙིང་ཅི་ཞིག་འཚོལ།” »

(རྒྱལ་གཅེས་དཔའ་བོ་གྲྭ་བློ་བཟང་སྐལ་བཟང་དང་གྲྭ་བློ་བཟང་དཀོན་མཆོག་རྣམ་གཉིས་ལ་སེམས་ཀྱིས་བྱས་པའི་ཕེབས་སྐྱེལ)

ཐེ་བོ་ཤེས་རབ་རྒྱ་མཚོ།

ཉི་ཟེར་མག་མོག་དེའི་ངོགས་ནས

ངས་ཁྱེད་གཉིས་ཀྱི་རྟོགས་བརྗོད་སེམས་ཀྱིས་ཀློག་དུས

ངའི་མིག་ཆུ་སེམས་ཀྱིས་སྒུལ་བྱུང

ཟླ་འོད་རབ་རིབ་དེའི་འོག་ནས

ངས་ཁྱེད་གཉིས་ཀྱི་ཞབས་རྗེས་སེམས་ཀྱིས་འཚོལ་དུས

ངའི་སེམས་པ་མིག་ཆུ་ཡིས་གཤེར་སོང

དེ་ལས་མང་བ་། “རྒྱལ་གཅེས་དཔའ་བོ་རྣམ་གཉིས་ལ་སེམས་ཀྱིསཕེབས་སྐྱེལ།” »

༄༅། །འདྲེན་མཆོག་ཐམས་ཅད་མཁྱེན་པ་གང་ལ་བསྟོད་པ་ངེས་བརྗོད་སྙིང་གི་བདུད་རྩི་ཞེས་བྱ་བ། །

གངས་བུ་རྩེ་རྒྱལ།

གང་ཐུགས་ཡེ་ཤེས་དྲྭ་བའི་མུ་ཁྱུད་འཁོར་འདས་ཆོས་ཀུན་ཅིག་ཅར་བཟླུམས། །
གང་གསུང་འགག་མེད་ཚངས་དབྱངས་རོལ་མོ་ཐ་དད་མོས་པའི་རྗེས་སུ་འགྲོ། །
གང་སྐུ་མཚན་དཔེའི་ལང་ཚོ་གསལ་རྫོགས་སྲིད་པ་གསུམ་ན་ལྷམ་མེ་བ། །
སྐལ་བཟང་རྣམ་འདྲེན་སྟོང་ལས་ཕུལ་གྱུར་ཐུབ་དབང་ལྷ་ཡི་བླ་མར་འདུད། །

དེ་ལས་མང་བ་། “༄༅། །འདྲེན་མཆོག་ཐམས་ཅད་མཁྱེན་པ་གང་ལ་བསྟོད་པ་” »

ངའི་ཕ་ཡུལ་གྱི་ལས་དབང་།
༼ཀླུ་སྨྱོན་རྩོམ་རིག་བྱ་དགའི་འགྲན་རྩོམ།༽
བསོད་ནམས་རྡོ་རྗེ།
དཔྱིད་གསུམ་སྣ་ལྔའི་མེ་ཏོག་ཟེའུ་འབྲུ་གཡུ་སྦྲང་ལས་ཀྱིས་མ་དབང་ཐལ། །
དབྱར་གསུམ་ཆར་ཆུའི་བདུད་རྩིའི་བྲོ་བ་མགྲིན་པའི་རྩ་མདུད་གནས་དང་བྲལ། །
སྟོན་གསུམ་རླུང་བུའི་ཚོར་རེག་བསིལ་མོས་ལུས་སེམས་གཉིས་ལ་དུ་ཁཿ་བསྐྲུན། །
དགུན་གསུམ་ཁ་བའི་འདབ་མ་དཀར་པོས་མེ་ཏོག་སྟོང་གི་དཔལ་སྙིང་བཅོམ། །

ར་ཡིག་གཉིས་པ་རོ་སྒྲུང་བཞིན་དུ་སེར་ཆེན་མེ་ཏོག་གཅིག་ལ་འཁོར། །
ལྷ་བྱ་ཁུ་བྱུག་ནམ་འཕང་བཅད་ནས་ལྷོ་མན་ཕྱོགས་སུ་དལ་གྱིས་ལྡིང་། །
གཡུ་འབྲུག་སྔོན་པོ་དོང་རིམ་དགུ་འོག་མ་བསམ་ལས་ཀྱིས་ཟླ་གསུམ་ལྷག །
ནེ་ཙོས་གསེར་གྱི་རྒྱ་ཕུད་འོག་ནས་ཁ་ལྕེ་བདེ་བའི་རྣམ་འགྱུར་བསྟན། །

དེ་ལས་མང་བ་། “ངའི་ཕ་ཡུལ་གྱི་ལས་དབང་།” »

ཀླུ་སྨྱོན།

སྟོན་མཇུག་འདིར།

རླུང་བུ་ཤུར་ཤུར་དུ་ལྡང་ཞིང་།

སྤྲིན་པ་དག་ཀྱང་ནམ་མཁའི་ངོས་སུ་མགྱོགས་པོར་བཞུད་ཀྱིན་འདུག

སྟོན་མཇུག་ཁོ་ནར་བཞད་པའི་མེ་ཏོག་སེར་པོ་དེ་དག

རྩྭ་སྐྱའི་གསེབ་ན་དབྱར་དུས་ཀྱི་དཔང་རྟགས་ཙམ་ཞིག་ཏུ་མངོན།

དེ་ལས་མང་བ་། “སྟོན་གྱི་ངོ་གདོང་ལས་རང་ཉིད་ལ་ལྟ་བ།” »

༼ཀླུ་སྨྱོན་རྩོམ་རིག་བྱ་དགའི་འགྲན་རྩོམ།༽
—མདོ་ཁམས་ཆུ་བཞི་སྒང་དྲུག་གི་གཙོ་འཛིན་ཨ་འབྲུག་མགོན་པོ་བཀྲ་ཤིས་མཆོག་ལ་རྗེས་དྲན་དུ་ཕུལ།
རླུང་བུ།

གངས་ཅན་གདོད་མའི་ས་འཛིན་ཐུ་བྷོད་ཀྱི།།

དྲག་པོའི་རྟ་དམག་བསྐྱོད་པའི་རྨིག་བཞིའི་སྒྲ།།

ཤར་གྱི་རྒྱ་དང་ནུབ་ཀྱི་ཨ་རབ་སོགས།།

མཐའ་བཞིའི་ཡུལ་ན་རླུང་དང་འགྲོགས་ནས་གྲགས།།

བསགས་པའི་རྒྱུ་ནོར་རིགས་ཀྱི་ཆེད་དུ་བཏང་།།

གཅེས་པའི་སྲོག་ཀྱང་རིགས་ཀྱི་ཆེད་དུ་བསྔོས།།

བཙན་བརྗིད་སྟོབས་ཀྱིས་དྲེགས་པའི་ཐུ་བྷོད་པ།།

གལ་ལ་ཐུག་ན་ལོ་རྒྱུས་འདི་འདྲ་ཡོད།།

དེ་ལས་མང་བ་། “ཆུ་ཆེན་རྣམ་བཞིའི་དྲག་རླབས།” »

བསམ་གླིང་ཚེ་རིང་ལྷ་མོ།

སྟོན་ཟླ་འབྲིང་པོ་དལ་གྱིས་འཆར་བས་སྤྲིན་གྱི་གླང་པོ་རྒྱང་རིང་བྲོས།།
རྟ་བདུན་དབང་པོའི་ཟེར་གྱིས་དྲོས་པས་དམའ་བའི་ས་གཞིར་རྔུལ་གྱི་བརླན།།
རྫི་བོ་བྲལ་བའི་ལུག་ཁྱུ་བཞིན་དུ་སྤྲིན་གསར་ལྷེབ་མོ་ཕྱོགས་བཞིར་བཀྲམ།།
རླུང་བསེར་དལ་བུས་རི་ལྗོངས་མྱུལ་ཞིང་འབྲས་ལྡན་སླེབས་པའི་བརྡ་ཡིག་སྦྱར།།

དེ་ལས་མང་བ་། “གསེར་ལྡན་མ་འཆར་བའི་གླུ།” »

(ཀླུ་སྨྱོན་རྩོམ་རིག་བྱ་དགའི་འགྲན་རྩོམ །)
ཤ་ཀླན་འཇམ་དབྱངས་གྲགས་པ།

རི་བོ་དེའི་འགྱིང་ཉམས་བསམ་ན།
ང་མྱུར་དུ་ཡོད་ཚད་བསྐྱུར་ཏེ་རི་བོ་དེའི་ཕྱོགས་སུ་འགྲོ་བར་འདོད་ཅིང་།
མི་ཚོགས་དེའི་རེ་བར་བསམ་ན།
ངས་ད་དུང་ཅི་ཡང་འགྲུབ་མི་འདུག་པས།
སླར་ཡང་དྲོད་ཁོལ་དབེན་པའི་ཁང་པ་འདི་ནས་གནས་བཅའ་དགོས་བྱུང་།
སྐབས་དེར།ངའི་སྐྱོ་གྲོགས་ཡིན་པའི་ཁྱེད་ཚོ་འདི་ལྟར་ཡིད་མཁར་ཤར་བྱུང་།

དེ་ལས་མང་བ་། “རི་བོ་དེ་དང་མི་ཚོགས་དེ། ད་དུང་དྲི་མེད་ཟེར་བའི་སྙན་ངག་པ་དེ།” »

(ཀླུ་སྨྱོན་རྩོམ་རིག་བྱ་དགའི་འགྲན་རྩོམ)
ཨ་འདུས་སྐལ་བཟང་རྒྱ་མཚོ།
་་་་་་་་་་་་་་་་་མཁས་དབང་དགེ་འདུན་ཆོས་འཕེལ་རྗེས་སུ་དྲན་པ།
ལས་རླུང་རྩུབ་མོའི་ལྡང་ཕྱོགས་ཤིག་གིས་ཁྱེད་ཞལ་དངོས་སུ་མ་མཇལ་ཡང༌།།
བསུབ་པར་དཀའ་བའི་གྲགས་སྙན་རིང་མོ་ད་དུང་གླིང་འདིའི་ཟུར་ན་མཆེད།།
སྐུ་དྲག་གཏུམ་པོའི་ཧམ་སྤྱོད་མིན་ན་ཁྱོད་དང་འུ་གཉིས་ཕྲད་ངེས་མོད།།
ཐོལ་བྱུང་གཤེགས་པའི་གཏམ་རྒྱུད་སྐྱུར་མོས་གདུང་བས་སྙིང་ཡང་རལ་བར་བྱེད།།

དེ་རིང་སློབ་གྲྭའི་དཔེ་ཁང་ནང་ནས་ཁྱོད་ཀྱི་གསུང་འབུམ་དེབ་གསུམ་མཇལ།།
ག་ལེར་ཁོ་བོའི་ཡིད་ཀྱི་ཅང་ཤེས་གསེར་གྱི་ཐང་མར་ཉུལ་བའི་ཚེ།།
རྒྱ་གར་གྲོང་དང་སིངྒ་ལ་སོགས་ཕྱི་ནང་སྣོད་བཅུད་གཙང་མའི་རིས།།
ཤེས་རབ་པུར་རྩེས་ལེགས་པར་བཞེངས་པའི་བཀའ་དྲིན་མཆི་མའི་ཕུང་བོར་གྱུར།།

དེ་ལས་མང་བ་། “ཟླ་གཞོན་ལགས། ཁྱེད་རང་བཞུད་སྔ་སོང༌།” »

( གསས་ཁང་ལེགས་གྲུབ་བྱུང་བའི་དུས་སྟོན་དང་འབྲེལ་བའི་‘‘འབྲས་དཀར་’’ཡིད་ཀྱི་དགའ་སྟོན།)
(ཀླུ་སྨྱོན་རྩོམ་རིག་བྱ་དགའི་འགྲན་རྩོམ་གྱི་ཆེད་དུ་ཕུལ་བ།)
ཧོས་ཕྱྭ་སྲས་དགྱེས་པའི་ཟླ་གཞོན།།
ཀ༽ཨཱོྃ་སྭསྟི།
སྟོང་ཕྲག་བཅོ་བརྒྱད་བགྲང་བྱའི་ཡར་སྔོན་དུ།
འོལ་གླིང་ཞིང་དུ་མཚན་དཔེའི་དཔལ་བརྟས་པའི།།
ཁམས་གསུམ་སྐྱེ་རྒུ་འདྲེན་པ་དམུ་རྒྱལ་སྲས།།
བསྐལ་བཟང་དུས་ཚིགས་འདི་ལ་ཤིས་པར་སྒྲུབས།།

པད་དཀར་འདབ་མ་བརྩེགས་པའི་དབུས་དཀྱིལ་ན།།
རབ་དཀར་དགྱེས་བརྩེའི་འཛུམ་རླབས་གཡོ་བ་མོས།།
རྣམ་དཀར་དགེ་བའི་ལོ་ཟླའི་ཁུག་པ་འདིར།།
འབྲས་དཀར་འཆད་པའི་བུ་ལ་རམ་འདེགས་མཛོད།།

དེ་ལས་མང་བ་། “‘‘འབྲས་དཀར་’’ཡིད་ཀྱི་དགའ་སྟོན།” »

(ཀླུ་སྨྱོན་རྩོམ་རིག་བྱ་དགའི་འགྲན་རྩོམ།)
གཉན་པོ།

ཁྱེད་ལ་མཛེས་སྡུག་གི་ཁ་དོག་མེད་པ་མ་ཡིན་ཏེ
དུད་སྤྲིན་དང་མི་ཚོགས་ཀྱི་ཁ་རླངས
ལུག་ཁྱུ་བཞིན་བར་སྣང་དུ་ཁྱབ་པ་དེས
རྩྭ་ཐང་གི་མི་སེམས་ཡོམ་ཡོམ་དུ་འདར་བར་བྱས

ལྐོག་གྱུར་ལས་ཀྱང་དངོས་ཡོད་མཐོང་དཀའ་བའི་དེ་རིང
ཁྱོད་ཀྱི་ངོ་གདོང་དུ་སུས་ཀྱང་མི་ཚོར་བའི་རི་མོ་འགའ་ཞིག་འདུག
ཐག་རིང་ནས་བལྟས་ཚེ་གྲོང་ཁྱེར་ནི་གཅེར་བུར་ཡོད་པ་མཐོང་ཐུབ་ཅིང
དེ་ཡི་བྲང་གཞུང་དུ་མཛེས་སྡུག་གི་མེ་ཏོག་འགའ་ཞིག་ཀྱང་མངོན་ཡོང
སྙིང་ལ་སྡུག་པའི་རྣམ་འགྱུར་རེ་ཀྱང་མི་སེམས་ཀྱི་མཁའ་དབྱིངས་སུ་སྟོན་ཀྱིན་འདུག

དེ་ལས་མང་བ་། “གྲོང་ཁྱེར།” »

(ཀླུ་སྨྱོན་རྩོམ་རིག་བྱ་དགའི་འགྲན་རྩོམ།)
རྩོམ་པ་པོ། མིག་གསུམ་པ།
ཨི
མཐོ་སྒང་གི་མིང་བྱང་ཞིག་ང་ཚོའི་རུས་རྐང་ལ་བཏབ་པའི་ཕྱི་ཉིན
གོ་རིམ་ཞིག་ལ་སྟོབས་ཀྱིས་འཇུས་ཏེ གནས་ལུགས་གསེད་བཀྲོལ་གྱི་རྟོག་པ་ཡུན་གྱིས་རྙེད
དུས་དེ་ནས་བཟུང “སྒྲུང་ལྡེའུ་བོན་གསུམ”གྱི་སྦྲེལ་ཐག་ལ་འཐིམ་པའི་ང་ཚོས
དཔའ་བོ་སྟག་ལྤགས་ཀྱིས་གཡོགས་པའི་ལོ་རྒྱུས་ཀྱི་གླེགས་བམ་ལས
ཆོས་ཉིད་གཉུག་སེམས་ལ་སྨིན་པའི་ལུང་རྟོག་ཀྱི་གངས་རི་བརྒལ་ཚུལ་དེ
རྨུ་ཐག་ཅིག་གི་སྣེ་མོ་ནས་གོ་ལའི་ཉིན་སྲིབ་ལ་ཁ་བ་བཞིན་བབས

དེ་ལས་མང་བ་། “མི་དང་སྐད་ཆའི་ཕུང་པོ” »

བསྟན་འཛིན་ཤེས་རབ།

རྒྱང་རིང་རྒྱང་རིང་ཞིག་ལ་མིག་ཟུང་ཅེར་བཞིན།།
དུ་སྨུག་བན་བུན་དེ་ཚོ་ཐོལ་གྱིས་བརྒལ་བཞིན།།
རེ་འདུན་སྤར་མོ་གང་བོ་ལག་པས་སྐྱོར་ཏེ།།
ལྷ་ཁྱོད་སྙིང་ལ་སྒོམ་བཞིན་སྒོམ་བཞིན་འོང་ཡོད།།

ན་ནིང་འོངས་ཀྱང་ཁྱོད་ཀྱི་ཞབས་རྗེས་མ་སྙོབ།།
གཅིག་བུ་རི་རྩེར་འགྲོ་བར་དངུལ་གྱིས་མི་འདང་།།
བར་མ་བར་ནས་ཉི་མ་ནམ་རྩ་འདས་ཏེ།།
ཁྱོད་ཀྱི་ཞལ་རས་མཇལ་བའི་སྐལ་བ་མ་བྱུང་།།

དེ་ལས་མང་བ་། “ཙྰ་མེན་ཊིའི་སྙན་ངག” »