སྐྱེས་སར་ཀླུ་སྒྲུབ་ཀྱིས་རང་གི་སློབ་སྦྱོང་ཆེད་བོད་སྒྱུར་བྱས།
ལྔ་པ། ཇུས་འགོད་ནས་བྱུང་བའི་རྩོད་སྒྲུབ།
བརྒྱུད་རིམ་འདིའི་གོ་རིམ་རྗེས་མའི་ནང་ང་ཚོས་ཇུས་འགོད་ནས་བྱུངབའི་རྩོད་སྒྲུབ་གླེང་རྒྱུ་དང་། ཁྱེད་ཚོ་ཚང་མས་ཇུས་འགོད་ནས་བྱུང་བའི་རྩོད་སྒྲུབ་ཤེས་ངེས་རེད། འཛམ་གླིང་ཐོག་གི་བྱ་དངོས་ཐམས་ཅད་ནི། ང་ཚོས་འཇིག་རྟེན་འདིའི་ཐོག་འཚོ་བ་སྐྱེལ་ཐུབ་པའི་ཆེད་དུ་ཇུས་འགོད་བྱས་པ་ཡིན་ཞིང་། གལ་ཏེ་འཇིག་རྟེན་འདི་སྔ་མོ་ནས་ཕྲན་བུའི་མི་འདྲ་བ་ཞིག་ཡོད་ན། ང་ཚོས་འཇིག་རྟེན་འདིའི་ཐོག་འཚོ་བ་སྐྱེལ་ཐབས་མེད། འདི་ནི་ཇུས་འགོད་ཀྱི་སྒྲུབ་བྱེད་རེད།
དེས་མཚམས་རེར་མཚར་སྣང་གི་རྣམ་པ་ཞིག་ཀྱང་མངོན། དཔེར་ན། མི་ལ་ལས་རི་བོང་གི་རྔ་མར་དཀར་ཐིག་ཅིག་ཡོད་པ་ནི་མདའ་རྒྱག་བདེ་བའི་ཆེད་དུ་ཡིན་པར་འདོད། འོན་ཀྱང་ངས་ནི། རི་བོང་གིས་ལྟ་སྟངས་དེར་ངོས་འཛིན་གང་འདྲ་ཞིག་བྱེད་མིན་མི་ཤེས། འདི་ནི་ལས་སླ་བའི་ལད་ཟློས་རང་བཞིན་གྱི་སྒྲུབ་བྱེད་ཅིག་རེད། ཁྱེད་ཚོ་ཚང་མས་ཤེས་གསལ་ལྟར། བོལ་ཏེག་(Voltaire) གིས། སྣ་ནི་མིག་ཤེལ་ལ་འཚམ་པར་ཇུས་འགོད་བྱས་པ་རེད་ཅེས་བཤད་ཡོད།
ད་ཆ་དགོད་བྲོ་བའི་ལད་ཟློས་དེ་རིགས་དེ་སྔ་དུས་རབས་བཅོ་བརྒྱད་པ་དང་འདྲ་བར་ཚུལ་མིན་ཞིག་མིན། གངས་ལགས་ཤེ་ན། རྒྱུ་མཚན་ནི་ཏར་ཝུན་(Darwin)གྱི་དུས་རབས་ནས་བཟུང་། ང་ཚོ་སྐྱེ་དངོས་ཁོར་ཡུག་དང་འོས་འཚམ་ངང་གནས་ཐུབ་པའི་རྒྱུ་མཚན་གང་ཡིན་ཐད་གོ་རྟོགས་ལེགས་པོ་བྱུང་བས་རེད། དེའི་རྒྱུ་མཚན་ནི། ཁོར་ཡུག་ནི་སྔ་མོ་ནས་མི་ཚོར་འོས་འཚམ་ཞིག་མིན་རུང་། མི་རྣམས་ཀྱི་འཚར་ལོངས་བརྒྱུད་རིམ་གྱིས་ཕར་ཁོར་ཡུག་དེར་འཕྲོད་པ་ཞིག་ཏུ་གྱུར་པའི་རྐྱེན་གྱིས་རེད། དེ་ནི་ཁོར་ཡུག་དང་འཕྲོད་པའི་རྨང་གཞི་དེ་རེད། དེར་ཇུས་འགོད་ཀྱི་དཔང་རྟགས་ཅི་ཡང་མེད།
ཁྱོད་ཀྱིས་ཇུས་འགོད་ནས་བྱུང་བའི་རྩོད་སྒྲུབ་ཀྱི་ལྟ་བར་ཞིབ་འཇུག་བྱེད་སྐབས། མི་རྣམས་ཧང་སངས་དགོས་པ་ཞིག་ལ་མི་རྣམས་ཀྱིས་འཇིག་རྟེན་འདི་ལ་ཡིད་ཆེས་བྱེད་ཀྱི་ཡོད།
འཇིག་རྟེན་འདིའི་ནང་གི་དངོས་པོ་ཡོད་ཚད་དང་། དེ་བཞིན་དེའི་སྐྱོན་ཆ་ཡོད་ཚད་ནི། མཐུ་སྟོབས་ཡོངས་སུ་རྫོགས་ཤིང་ཐམས་ཅད་མཁྱེན་པ་ཞིག་གིས་ལོ་ངོ་ས་ཡ་མང་པོའི་རིང་བསྐྲུན་པའི་བྱ་དངོས་ཆེས་ཡག་ཤོས་དེ་ཡིན་དགོས་ངེས་ལྟ་བུ་རེད།
ངས་དངོས་གནས་དེར་ཡིད་ཆེས་བྱེད་མི་ཐུབ། ཁྱེད་ཀྱིས་བལྟས་ན་གང་འདྲ་འདུག གལ་ཏེ། ཁོང་ལ་བླ་ན་མེད་པའི་འཇིག་རྟེན་ཞིག་སྐྲུན་ཆེད། མཐུ་སྟོབས་ཡོངས་སུ་རྫོགས་ཤིང་ཀུན་མཁྱེན་གྱི་ནུས་པ་ཞིག་ཡོད་ན། ཅིའི་ཕྱིར་ཁོང་གིས་ལོ་ངོ་ས་ཡ་འགའི་ནང་ཨ་རིའི་མི་དཀར་མཆོག་འཛིན་བྱེད་པའི་ཕྱོགས་ཞེན་ཚོགས་པ་(KKK or the Klan) དང་། ཡུ་རོབ་ཀྱི་ཧྥ་ཤི་སི་(Fascists)ཚོགས་པ་ལས་ལེགས་པ་ཞིག་སྐྲུན་མ་ཐུབ་པ་རེད། ད་དུང་། ཁྱེད་ཀྱིས་སྤྱིར་བཏང་གི་ཚན་རིག་གི་ཆོས་ཉིད་ཁས་ལེན་བྱས་ཚེ། ངེས་པར་དུ་མིའི་རིགས་ཀྱི་ཚེ་སྲོག་དང་། གཞན་ཡང་རྒྱུ་སྐར་འདིའི་སྟེང་གི་སྤྱིར་བཏང་གི་ཚེ་སྲོག་རྣམས་དུས་ཚོད་ངེས་ཅན་ཞིག་གི་མཚམས་སུ་འཇིག་འགྲོ་བར་ངོས་ལེན་བྱེད་དགོས། དེ་ནི་ཉི་མའི་ཁྱིམ་རྒྱུད་ཉམས་རྒུད་དུ་འགྲོ་བའི་དུས་རིམ་ཞིག་ཡིན། དུས་ཀྱི་རིམ་པ་འདིའི་ནང་། ཁྱོད་ལ་གདོད་མའི་སྐྱེ་རྒྱུ་དང་འོས་འཚམ་གྱི་དྲོད་ཚད་སོགས་ཀྱི་ཆ་རྐྱེན་འཐོབ་ཐུབ།
ཉི་མའི་ཁྱིམ་རྒྱུད་ཡོངས་ཀྱི་ཚེ་སྲོག་གི་ཁྲོད་དུ་ཆེས་དུས་ཡུན་ཐུང་བའི་ཚེ་སྲོག་ཀྱང་ཡོད། ཁྱོད་ཀྱིས་ཟླ་བའི་གོ་ལའི་སྟེང་ནས་མཐོང་བ་ནི། སའི་གོ་ལའི་འཁོར་ཕྱོགས་ཀྱི་དངོས་པོ་དེ་རིགས་ཡིན་ཞིང་། དེ་ནི། ཤི་བ་དང་། གྲང་བ། ཚེ་སྲོག་དང་བྲལ་བ་ལྟ་བུ་རེད། མི་ཞིག་གིས་ང་ལ་བཤད་རྒྱུར། ལྟ་ཚུལ་འདི་རིགས་ནི་ཡིད་ཆད་དུ་འཇུག་པ་ཞིག་རེད། མི་རྣམས་ཀྱིས་སྐབས་འགར་ཁྱོད་ལ་བཤད་ངེས་ཡིན། གལ་ཏེ་ཁོ་ཚོས་ཚན་རིག་གི་ཆོས་ཉིད་ལ་ཡིད་ཆེས་བྱས་ན། ཁོ་ཚོས་མུ་མཐུད་དུ་འཚོ་བ་རོལ་མི་ཐུབ་པས་དེར་ཡིད་ཆེས་བྱེད་མི་རུང་ཟེར་བ་དེ་ནི་བླུན་གཏམ་རང་རེད། ལོ་ངོ་ས་ཡ་ཁ་ཤས་ཀྱི་རྗེས་ནས་ཅི་ཞིག་འབྱུང་བར་སེམས་ཁུར་བྱེད་མཁན་སུ་གཅིག་ཀྱང་མེད།
གལ་ཏེ་ཁོ་ཚོའི་བསམ་པར་ཁོ་ཚོས་དོན་དེར་སེམས་ཁྲལ་ཆེན་པོ་བྱེད་ཀྱི་ཡོད་སྙམ་ན། དོན་དངོས་ཐོག་དེ་ནི་ཁོ་ཚོས་རང་གིས་རང་ལ་མགོ་སྐོར་བཏང་བ་ཙམ་རེད། དོན་དངོས་སུ་ཁོ་ཚོས་སེམས་ཁྲལ་བྱེད་ས་ནི་དེ་བས་ཀྱང་སྤྱིར་བཏང་གི་བྱ་བ་ཞིག་གམ། ཡང་ན་ཟས་འཇུ་དཀའ་བ་ཁོ་ན་ཙམ་ཡིན་སྲིད། འོན་ཀྱང་ལོ་ངོ་ས་ཡ་ཁ་ཤས་ཀྱི་རྗེས་ནས་འཛམ་གླིང་ཐོག་འབྱུང་སྲིད་པའི་བྱ་བ་དེ་དྲན་ནས་དངོས་གནས་སེམས་ངལ་བྱེད་མཁན་ནི་གཅིག་ཀྱང་མེད། དེར་བརྟེན། ཚེ་སྲོག་འཇིག་རྒྱུ་ནི་མུན་ནག་གི་ལྟ་སྟངས་ཤིག་ཡིན་པའི་དབང་དུ་བཏང་ནའང་། མ་མཐར་ཡང་ང་ཚོས་འདི་ལྟར་བཤད་ཆོག་སྙམ། སྐབས་འགར་ངས་བསམ་གཞིགས་བྱེད་སྐབས། ངའི་བསམ་བློར། མི་རྣམས་ཀྱིས་འཚོ་བའི་ཁྲོད་དུ་བསྒྲུབས་པའི་བྱ་བ་ཕལ་མོ་ཆེ་ནི་སེམས་གསོ་ཙམ་ཞིག་ཡིན་པར་འདོད། དེས་རང་གི་འཚོ་བ་ཐབས་སྡུག་པོ་ཞིག་ཏུ་མི་མཐོང་བར། དེས་ཁྱོད་ཀྱི་དོ་སྣང་བྱེད་སའི་ཁ་ཕྱོགས་བྱ་དངོས་གཞན་ཐོག་བསྒྱུར་འཇུག་གི་རེད།
མཆན།
François-Marie Arouet / Voltaire: ཕྱི་ལོ་ ༡༦༩༤ ཟླ་ ༡༡ ཚེས་ ༢༡ ཉིན་སྐྱེས་ཤིང་། ཕྱི་ལོ་ ༡༧༧༨ ཟླ་ ༥ ཚེས་ ༣༠ ཉིན་པེ་རི་སི་ནས་དགུང་ལོ་ ༨༣ ཐོག་གྲོངས། ཁོང་ནི་ཧྥ་རན་སིའི་མཚན་ཉིད་རིག་པ་བ་དང་། བློ་འབྱེད་ཀྱི་རྩོམ་པ་པོ། ལོ་རྒྱུས་སྨྲ་བ། རང་དབང་གི་གཏམ་བརྗོད་པ། དམིགས་བསལ་གྱིས་ཡེ་ཤུ་ཆོས་ལུགས་ཀྱི་སྒེར་གཅོད་དབང་འཛིན་ལ་རྒོལ་གཏམ་སྤེལ་མཁན་དང་། ཆོས་ལུགས་དང་སྲིད་གཞུང་ཐ་དད་དུ་དབྱེ་དགོས་པའི་ལས་འགུལ་སྤེལ་མཁན་བཅས་ཡིན།
Darwin: ཕྱི་ལོ་ ༡༨༠༩ ཟླ་ ༢ ༡༢ ཉིན་དབྱིན་ཡུལ་དུ་སྐྱེས་ཤིང་། ཕྱི་ལོ་ ༡༨༨༣ ལོའི་ ཟླ་ ༤ ཚེས་ ༡༩ ཉིན་དགུང་ལོ་ ༧༣ ཐོག་གྲོངས། ཁོང་ནི་འཛམ་གླིང་ནང་སྙན་གྲགས་ཆེ་བའི་སྐྱེ་ཁམས་རིག་པའི་རིག་སྒོ་གསར་བཏོད་བྱེད་མཁན་སྙན་གྲགས་ཅན་ཞིག་ཡིན།
KKK or the Klan ཨ་རིའི་མི་རིགས་དཀར་པོ་མཆོག་འཛིན་བྱེད་པའི་རྙིང་ཞེན་ཚོགས་པ་ཞིག་སྟེ། ཨ་རིའི་མི་རིགས་ནག་པོ་ཚོར་སྡང་ཟུག་བྱེད་མཁན་ཞིག་ཡིན། དེ་ལ་ཚོགས་ཁག་དང་པོ་དེ་ཕྱི་ལོ་ ༡༨༦༥ ནས་ ༡༨༧༡ དང་། ཚོགས་ཁག་གཉིས་པ་ཕྱི་ལོ་ ༡༩༡༥ ནས་ ༡༩༤༤ བར། ཚོགས་ཁག་གསུམ་པ་ཕྱི་ལོ་ ༡༩༤༦ ནས་ད་བར་གནས་ཡོད་པ་ཞིག་ཡིན་ལ། སྐབས་འགར་ཁོང་ཚོའི་ཚོགས་པ་དེ་སྔ་ཕྱི་ཐེངས་གསུམ་ལ་བྱུང་བའི་དོན་སྟོན་ཐབས་དང་བསྡུས་མིང་ལྟ་བུར་ KKK འབྲི་མཁན་ཡང་ཡོད།
Fascists. ཡུ་རོབ་ཀྱི་རྒྱལ་ཁབ་ཨི་ཊ་ལི་དང་། འཇར་མན་གཉིས་ནས་དར་བའི་སྒེར་གཅོད་རིང་ལུགས་དང་། མི་རིགས་རིང་ལུགས་ཀྱི་ཐལ་ཆ་ཆེ་བའི་ལྟ་གྲུབ་ཞིག་སྟེ། རང་དབང་ལ་རྒོལ་ཞིང་། མང་ཚོགས་ལ་མནར་གཅོད་ཚད་མེད་གཏོང་བའི་སྲིད་ཇུས་ཤིག་སྟེ། དེའི་དཔེ་མཚོན་གྱི་མི་སྣ་གཙོ་བོ་དེ་ནི་ཨ་ཌོལ་ཧྥི–ཧི་ཊི་ལེར་(Adolf Hitler) ཡིན།