དོལ་སྨྱོན།
སང་གནངས་གང་རུང་ཞིག་ལ།
ངའི་མགོ་ན་སྲིད། ཚ་བ་འཕར་སྲིད།
ད་དུང་། གློ་རྒྱག་སྲིད་ལ་དབུགས་གཏོང་ལེན་ལའང་དཀའ་ངལ་འཕྲད་སྲིད།
དེ་དུས། ངས་མྱུར་སྐྱོབས་ཁང་ལ་ཁ་པར་གཏོང་སྲིད།
ཁོ་ཚོས་ང་རང་ཛ་དྲག་གི་རླངས་འཁོར་ནང་བསྙལ་ནས།
ཧ་ཅང་མགྱོགས་མྱུར་གྱིས་སྨན་ཁང་ཕྱོགས་ལ་ཁྱེར་སྲིད།
སྨན་ཁང་ནང་འབྱོར་རྗེས།
སྨན་པ་དག བྲེལ་ཚུབས་ཆེན་པོས། ཡང་ན། དངང་སྐྲག་ཆེན་པོས།
ང་ལ་གནམ་ཆུ་རྒྱག་སྲིད། འཚོ་རླུང་སྣོན་སྲིད།
ད་དུང་། མགྱོགས་མྱུར་གྱིས། ངའི་དཔུང་རྩ་ནས།
ཁྲག་ཤེལ་དམ་ཆུང་ཆུང་ཁ་ཤས་འདོན་སྲིད།
ཁྲག་ཐིགས་རེ་རེའི་ནང་དུ། ནད་འབུ་དག་ཧ་ཅང་ཟབ་ནན་གྱིས།
སང་ཉིན་ཁྱིམ་མཚེས་དབང་རྒྱལ་ཚང་ལ་འཇབ་རྒོལ་དུ་འགྲོ་དགོས་ཚུལ་དང་།
བུ་བཀྲ་ཤིས་ལ་བུ་མོ་གཡུ་སྒྲོན་མནའ་མར་བསུ་དགོས་ཚུལ་གྱི་འཆར་གཞི་འཐེན་གྱིན་ཡོད་སྲིད།
འཆི་བ་དང་ཐག་ཉེར་བཅར་བའི་སྐབས་དེར།
ངས་ཅི་ཞིག་དྲན་གྱིན་ཡོད་དམ།
ཕ་ཡུལ་གྱི་གངས་རི། ཕ་ཡུལ་གྱི་ནམ་མཁའ།
ཕྱིར་འོང་མེད་པའི་དགོད་སྒྲ་དང་འཛུམ་མདངས་དེ་དག
ཡང་ན། མཐོ་སློབ་ག་གེ་མོར། “རྒྱུད་གསུམ’’ བློ་ནས་སྐྱོར་ཚུལ་དེ་དག
འཛིན་ཁང་ནར་མོ་ནས། སུ་ཞིག་ལ་སྙན་ངག་བྲིས་ཚུལ་དེ་དག
ད་དུང་། “མེ་འཁོར་ཀ་པའི’’ ནང་། སུ་ཞིག་གི་ཕྲག་པར་མགོ་བོ་བརྙེས་ཚུལ་དེ་དག
“དམང་གཙོ་ཐང་ཆེན’’ སྟེང་། སུ་ཞིག་དང་ལྷན་དུ་གོམ་ཟུང་སྤོས་ཚུལ་དེ་དག
མཐའ་མཇུག་དེར། སྨན་པས་བརྟག་དཔྱད་གྲུབ་འབྲས་སྒྲོག་ངེས།
གཅིག་ནི། རྨ་བྱས་དབྱར་རྔ་ཐོས་འདྲའི་གཏམ་བཟང་དང་།
གཞན་དེ། གོ་བ་ཙམ་གྱིས་སྙིང་རྩ་བེར་བའི་གཏམ་ངན་རེད།
གལ་སྲིད། གཏམ་བཟང་ཡིན་ན།
ང་། སླར་ཡང་ནང་ལ་ལོག་ནས། གླུ་ལེན་དགོས། བྲོ་འཁྲབ་དགོས།
འབྲི་འཕྲོར་ལུས་པའི་སྙན་ངག་དེའི་མཇུག་སྐྱོང་དགོས།
ད་དུང་། རང་ཉིད་འཆི་མའི་ལམ་ཆེན་ནས།
སླར་ཡང་འཇིག་རྟེན་འདིར་མགྲོན་དུ་ཕེབས་པར་རྟེན་འབྲེལ་ཞུ་དགོས།
04-09-2020