ཏོག་དབྱིབས་ནད་ཡམས་དང་ཨ་རི་གཞུང་དམངས་གཉིས་ཀྱི་ཐེམ་སྤང་ལས་འགུལ།

སྨན་རམས་པ་གཡང་འབུམ་རྒྱལ།

ཏོག་དབྱིབས་ནད་ཡམས་ཆེས་ཆེར་བདོ་བའི་དུས་འདིར། འཛམ་གླིང་ཡུལ་གྲུ་ཀུན་གྱི་གཞུང་དམངས་གཉིས་ཀྱིས་ཐེམ་སྤང་ Stay at home  དང་སྤྱི་ཚོགས་རྒྱང་བཀྱེད་ Social distancing ལག་བསྟར་བྱས་ཏེ་ནད་ཡམས་ཀྱི་འཇིགས་པ་ལས་ཐར་ཐུབ་ཀྱི་འབད་བརྩོན་བྱེད་བཞིན་ཡོད། ཨ་རི་དབུས་གཞུང་དང་མངའ་སྡེ་སྲིད་གཞུང་ཁག་གིས་ནད་ཡམས་སྔོན་འགོག་དང་ཁྱབ་བརྡལ་ཇེ་ཆེར་མི་འགྲོ་བའི་ཆེད་དུ་ནང་ཁྱིམ་དུ་བདེ་འཇགས་ཆེ་བ་ Safer at home དང་། ནང་ཁྱིམ་དུ་སྡོད་ཅིག་ stay at home ། རང་གནས་སུ་སྐྱབས་འཚོལ་ shelter in place ཞེས་པའི་བཀའ་རྒྱ་མི་འདྲ་བ་གསུམ་ཕེབས་དང་ཕེབས་མུས་ཡིན། སྔ་མའི་བཀའ་རྒྱ་གཉིས་འདྲ་མཚུངས་ཡིན་ནའང་ལག་ལེན་བྱེད་སྟངས་དེ་ས་གནས་ཀྱི་ཁྱད་པར་ལ་རག་ལས་ཡོད།  ནང་ཁྱིམ་དུ་བདེ་འཇགས་ཆེ་བ་ Safer at home ཟེར་བ་མི་དམངས་ཀྱིས་ནང་ཁྱིམ་དུ་སྡོད་རྒྱུར་འབད་བརྩོན་བྱས་ནས་ཏོག་དབྱིབས་ནད་འབུ་འགོས་ཁྱབ་མི་འགྲོ་བར་ཐབས་ཤེས་རྩལ་སྤྲུགས་བྱེད་པར་གོ་དགོས། ཡིན་ནའང་གལ་འགངས་ཆེན་པོ་མ་ཡིན་པའི་ཚོང་ལས་ཁག་གིས་རང་ངོས་ནས་སོ་སོའི་ས་ཁང་དུ་མི་དང་མིའི་བར་དུ་བར་ཐག་འཇོག་ཐུབ་པ་བྱས་ནས་སྤྱི་ཚོགས་རྒྱང་བཀྱེད་ཉམས་ལེན་བྱེད་ཐུབ་ཚེ་སྒོ་ཕྱེ་རུ་འཇུག་གི་ཡོད། ནང་ཁྱིམ་དུ་སྡོད་ཅིག་  Stay at home ཅེས་པ་ནི་གོང་གི་དེ་ལས་དམ་བསྒྲགས་ཅུང་ཆེ་བ་ཡོད། ས་གནས་རེ་རེར་བྱེད་ཐབས་མི་འདྲ་བ་རེ་ཡོད་ནའང་གཙོ་བོ་གལ་འགངས་ཆེ་བའི་ལས་དོན་དེ་སྨན་པར་བསྟེན་གཏུག་དང་། བཟའ་ཆས་ཉོ་ཆ། མེད་དུ་མི་རུང་བའི་ལས་བྱེད་རྣམས་ལས་ཀར་འགྲོ་བ་བཅས་བསྒྲུབ་ཆོག་གི་ཡོད། དེ་མ་ཟད་མངའ་སྡེ་མང་ཆེ་བས་མི་དང་རྒྱང་བཀྱེད་བྱེད་ཚེ་ཕྱི་རོལ་དུ་ལུས་རྩེད་རྩེ་བར་འགྲོ་རུ་འཇུག་གི་ཡོད།

ནང་ཁྱིམ་དུ་བདེ་འཇགས་ཆེ་བ་ Safer at home དང་ནང་ཁྱིམ་དུ་སྡོད་ཅིག་ stay at home ཅེས་པའི་བཀའ་རྒྱ་གཉིས་ལ་འདྲ་བའི་ཆ་ཡོད་ནའང་། རང་གནས་སུ་སྐྱབས་འཚོལ་ shelter in place ཞེས་པའི་བཀའ་རྒྱ་འདི་སྔ་མ་དེ་གཉིས་ལས་དམ་བསྒྲགས་ཆེ་བ་ཡོད། ཨ་རི་ནད་རིགས་འགོག་སྲུང་ལྟེ་གནས་ CDC ཀྱི་ལམ་སྟོན་ལྟར་ན། རང་གནས་སུ་སྐྱབས་འཚོལ་ཞེས་པའི་བཀའ་རྒྱའི་ནང་དོན་ནི་ཁང་པ་དང་། ཁང་མིག སྣུམ་འཁོར་ནང་དུ་ཡོད་སྐབས་བཀོད་ཁྱབ་མ་སླེབས་བར་དུ་ཕྱི་ལ་མི་ཐོན་པར་སྡོད་དགོས་པ་མཚོན་གྱི་ཡོད།

ཨ་རིའི་ཡུལ་གྲུ་གང་སར་རང་རིགས་བོད་མི་གནས་སྡོད་བྱེད་ཀྱི་ཡོད་པར་བརྟེན། ནད་ཡམས་ཀྱི་གཙེས་པའི་གཉན་འཕྲང་ཆེ་བའི་དུས་སྐབས་འདིར་རང་གཞན་གཉིས་ཀ་ནད་ཀྱི་འཇིགས་པ་ནས་སྲུང་སྐྱོབ་བྱ་ཆེད། འདི་རུ་ཐེམ་སྤང་དང་སྤྱི་ཚོགས་རྒྱང་བཀྱེད་ཀྱི་ནང་དོན་དང་ཉམས་ལེན་བྱེད་སྟངས་གོ་བདེར་བཏང་སྟེ་གསལ་བཤད་རེ་ཞུ་རྒྱུ་ཡིན།

ཐེམ་སྤང་ Stay at home  གི་ནང་དོན་ནི།

༡། ཁྱེད་རང་ངེས་པར་དུ་ནང་ཁྱིམ་དུ་སྡོད་དགོས།

༢། སོ་སོའི་སྡོད་ཁང་ནས་ཕྱི་ལ་མི་འགྲོ་བ། (ཁྱེད་རང་གཏན་སྡོད་བྱེད་ས་ནས)

༣། ཁྱེད་ཀྱིས་ངེས་པར་དུ་སྤྱི་ཚོགས་རྒྱང་བཀྱེད་ཉམས་ལེན་བྱེད་དགོས།

ཐེམ་སྤང་སྐབས་སུ་ཁྱེད་རང་སོ་སོའི་ནང་ཁྱིམ་ནས་གཤམ་འཁོད་གལ་འགངས་ཆེ་བའི་ལས་དོན་ཆེད་ཕྱི་ལ་འགྲོ་ཆོག 

༡། བཟའ་ཆས་ཚོང་ཁང་།

༢། གསོལ་སྨན་ཚོང་ཁང་།

༣། བརྟག་དཔྱད་སྨན་ཁང་ clinic (ནད་སྟོན་དུས་ཚོད་བཟོ་བའམ་མྱུར་སྟོན་ལྟ་རྟོག་སྨན་ཁང་ urgent care དུ་འགྲོ་དགོས་ཚེ། ཐོག་མར་བརྟག་དཔྱད་སྨན་ཁང་ལ་ཁ་པར་གཏོང་རྒྱུ)

༤། ནད་གསོ་སྨན་ཁང་ hospital (ནད་སྟོན་དུས་ཚོད་བཟོ་བའམ་ཛ་དྲག་མྱུར་སྐྱོབ་སྡེ་ཚན་ emergency room དུ་འགྲོ་དགོས་ཚེ། ཐོག་མར་ཁ་པར་གཏོང་རྒྱུ)

༥། ཟ་ཁང་ (སྣུམ་འཁོར་བསྐོར་ནས་ཟ་མ་ལེན་པའམ་ཕྱི་ལ་འཁྱེར་བ་ཁོ་ན)

༦། སྣུམ་འཁོར་བསྐོར་ནས་དངུལ་ཁང་ལས་དོན་བསྒྲུབ་པ།

༧། སློབ་གྲྭ (རིན་མེད་ཟ་མའམ་སློབ་སྦྱོང་མཁོ་ཆས་ཆེད་དུ་འགྲོ་བ)

༨། ཡོ་བྱད་ལྕགས་ཆས་ཚོང་ཁང་།

༩། མོ་ཊེལ་འགྲུལ་ཁང་ motel ། མགྲོན་ཁང་། སྐྱབས་བཅོལ་སྡོད་གནས་ shelter (གལ་ཏེ་ཁྱེད་ཀྱི་ནང་ཁྱིམ་དུ་ཉེན་ཁ་ཡོད་ཚེ)

༡༠། ཕྱི་ནས་ལུས་རྩལ་རྩེ་བ་སྟེ་གོམ་བགྲོད། རྒྱུག་པ། རྐང་འཁོར་ཞོན་པ། ཐག་རིང་གོམ་བགྲོད།(སྤྱི་ཚོགས་རྒྱང་བཀྱེད་ཉམས་ལེན་བྱ་རྒྱུ)

༡༡། རོགས་སྐྱོར་དགོས་པའི་ནང་མིའམ་གྲོགས་པོར་ལྟ་སྐྱོང་བྱ་རྒྱུ།

༡༢། རོགས་སྐྱོར་དགོས་པའི་ནང་མིའམ་གྲོགས་པོར་ཟ་མའམ་མཁོ་ཆས་སྐྱེལ་བ།

༡༣། ཁྱེད་ཀྱི་ཕྲུ་གུའི་ཆེད་དུ་ཁྲིམས་ཁང་མོས་མཐུན་ལྟར་གསོ་སྐྱོང་བདག་ཉར་དང་ཡར་ལེན་མར་ལེན་དུས་ཚོད་བཟོ་དགོས་པ།

༡༤། གལ་ཏེ་ཁྱེད་རང་གལ་འགངས་ཆེ་བའི་ལས་ཁུངས་ཤིག་གི་ལས་བྱེད་ཅིག་ཡིན་ཚེ། ཁྱེད་རང་ལས་ཀ་དང་ཕྲུ་གུ་ལྟ་སྐྱོང་བྱེད་དུ་འགྲོ་ཆོག

ཐེམ་སྤང་སྐབས་སུ་ཁྱེད་རང་སོ་སོའི་ནང་ཁྱིམ་ནས་ཕྱི་ལ་འགྲོ་བར་དམིགས་བསལ་ཆོག་མཆན་ནམ་ཡིག་ཆ་དགོས་སམ།

མི་དགོས། སོ་སོའི་ནང་ཁྱིམ་ནས་གོང་གསལ་གལ་འགངས་ཆེ་བའི་ལས་དོན་ཁག་གི་ཆེད་དུ་ཕྱི་ལ་འགྲོ་བར་དམིགས་བསལ་ཆོག་མཆན་ནམ་ཡིག་ཆ་མི་དགོས།

གལ་འགངས་ཆེ་བའི་ལས་དོན་མ་ཡིན་པ་གང་དག་ཡིན་པ་དང་། ཁྱེད་ཀྱི་བྱེད་མི་ཆོག་པ་དང་འགྲོ་མི་ཆོག་པ་ནི།

༡། རྩེད་ཐང་།

༢། བྱིས་པ་གཞན་པའི་མཉམ་དུ་རྩེད་མོའི་དུས་ཚོད་བཟོ་བ།

༣། ཁྱེད་དང་མཉམ་སྡོད་བྱེད་ཀྱི་མེད་པའི་གྲོགས་པོ་གྲོགས་མོའམ་ནང་མིར་ཐུག་འཕྲད།

༤། མི་མང་མཉམ་ཞུགས་འགྲན་རྩོད་རྩེད་རིགས།(ལག་རྩེད་སྤོ་ལོ། འཕུར་རྦིས་ Frisbee རྐང་རྩེད་སྤོ་ལོ། ཨ་རིའི་རྐང་སྤོལ་སོགས)

༥། གསོལ་སྟོན་སྤྲོ་ཚོགས། (མི་མང་ཉུང་ཇི་འདྲ་ཞིག་ཡིན་རུང་)

༦། སྤྲོ་གསེང་བྱེད་སྒོ (སྤྱན་གཟིགས་ཁང་། ཆུ་རྐྱལ་ཁང་། གློག་བརྙན་ཁང་སོགས)

༧། རྩལ་སྦྱང་ཁང་ gyms ངམ་ལུས་སེམས་གསོ་སྦྱོང་ཁང་ Fitness centers

༨། ས་ལོན་མཛེས་བཟོ་ཁང་ salons (སྐྲ་དང་། སེན་མོ། སྤུ་བཀོག ཤ་མདོག་སྨུག་བཟོ)

༩། སྐྲ་བཞར་ཁང་།

༡༠། ཤ་པགས་ཁབ་གཙག་ཁང་།

ཐེམ་སྤང་སྐབས་སུ་ཁྱེད་ལ་ནང་ཁྱིམ་མེད་ཚེ་ཅི་ཞིག་བྱེད་དགོས་སམ།

༡། སྡོད་སའི་ནང་ཁྱིམ་མེད་ཚེ་རྙོག་དྲར་འཕྲད་མི་སྲིད།

༢། ཁྱེད་རང་རྒྱུན་འདུག་བྱེད་སའི་སྐྱབས་བཅོལ་སྡོད་གནས་ཤིག་འཚོལ་དགོས།

ཐེམ་སྤང་སྐབས་སུ་ཁྱེད་ཀྱི་ནང་ཁྱིམ་དུ་བདེ་འཇགས་མེད་ཚེ་ཅི་ཞིག་བྱེད་དགོས་སམ།

༡། ནང་ཁྱིམ་དུ་བདེ་འཇགས་མེད་ཚེ། ཕྱི་ལ་འགྲོ་རྒྱུ།

༢། བདེ་འཇགས་ཅན་གྱི་ས་ཆར་འདུག་རྒྱུ (མགྲོན་ཁང་། མོ་ཊེལ་འགྲུལ་ཁང་ motel །  སྐྱབས་བཅོལ་སྡོད་གནས་ shelter ། གྲོགས་པོའམ་ཁྱིམ་ཚང་གཞན་གྱི་ཁང་པ)

སྤྱི་ཚོགས་རྒྱང་བཀྱེད་ Social distancing ཀྱི་ནང་དོན་ནི།

ཁྱེད་དང་མཉམ་འདུག་མཉམ་སྡོད་བྱེད་ཀྱི་མེད་པའི་མིའི་བར་དུ་གཤམ་གསལ་གནས་ཡུལ་གང་རུང་དུ་ངེས་པར་དུ་ཁྲུ་ ༦ གིས་རྒྱང་བཀྱེད་ནས་སྡོད་དགོས།

༡། ཁང་པའི་ཕྱི་རོལ་དུ།

༢། འགྲུལ་སྐྱེལ་སྦ་སི་ནང་དུ།

༣། ཁང་པ་གང་རུང་གི་ནང་དུ (བཟའ་ཆས་ཚོང་ཁང་། བརྟག་དཔྱད་སྨན་ཁང་ clinic ། གསོལ་སྨན་ཚོང་ཁང་)

༤། ཁྱིམ་མཚེས་སམ་གླ་གཏོང་སྡོད་ཁང་ནང་དུ་བྱིས་པ་ཕན་ཚུན་བར་ངེས་པར་དུ་ཁྲུ་ ༦ གིས་རྒྱང་བཀྱེད་ནས་སྡོད་དགོས།

༥། ཁྱེད་དང་མཉམ་འདུག་མཉམ་སྡོད་བྱེད་ཀྱི་མེད་པའི་མི་ཚོ་དང་ལག་འཇུའམ་འཐམ་འཁྱུད་མི་བྱེད་པ།

 ཐེམ་སྤང་སྐབས་སུ་ཁྱེད་རང་སྒེར་གྱི་ཁེ་གཉེར་ཚོང་ལས་ལ་ཅི་ཞིག་བྱེད་དམ།

གལ་ཆེན་མ་ཡིན་པའི་གཤམ་འཁོད་ཚོང་ལས་རྣམས་སྒོ་རྒྱག་དགོས་ཀྱི་ཡོད། དཔེར་ན།

༡། ཡུལ་ལྗོངས་མཛེས་བཟོ། landscaping

༢།  མི་སྒེར་ལྟ་རྟོག (སྐྲ་དང་། སེན་མོ། སྤུ་བཀོག ཤ་མདོག་སྨུག་བཟོ)

༣། སྤྲོ་གསེང་བྱེད་སྒོའམ་གསོལ་སྟོན་སྤྲོ་ཚོགས།

༤། རྩལ་སྦྱང་ཁང་ gyms 

༥། ལུས་སེམས་བདེ་གསོ་ཁང་ fitness classes

༦། མིའི་གཅེས་ཉར་སྲོག་ཆགས་ལྟ་སྐྱོང་། pet grooming

༧། ཟ་ཁང་རང་དུ་ཟ་མ་བཟའ་བ (སྣུམ་འཁོར་བསྐོར་ནས་ལེན་པའམ་ཕྱི་ལ་འཁྱེར་བ་ཁོ་ན)

༨། འདུག་གནས་སྡོད་ཁང་གཙང་བཟོའི་ཞབས་ཞུ།

ཁྱེད་ཀྱིས་བཀའ་རྒྱ་འདི་དག་བརྩི་སྲུང་མ་བྱས་ཚེ་ཅི་ཞིག་འབྱུང་ངམ།

༡། ཆད་པ་སྒོར་ ༢༥༠ བར་སྤྲོད་དགོས།

༢། བཙོན་ཁང་དུ་ཉིན་ ༣༠ བར་སྡོད་དགོས།