ཀླུ་སྨྱོན།
སྲིད་པ་ས་ལ་ཆགས་ནས་བཟུང་།
བོད་ཁམས་འབྲོང་རྒོད་ཀྱིས་བཟུང་ཟིན།
དེ་དུས།
འབྲོང་རྭ་སྨུག་པོའི་འོད་སྣང་གིས་ནམ་མཁའ་དྭངས་ཤིང་གཙང་།
འབྲོང་གཡག་དར་མའི་ངར་སྐད་ཀྱིས་རི་ཀླུང་ཟིལ་གྱིས་མནན།
བོད་མིའི་ཤེས་རབ་དང་སྤོབས་པ་ཁོ་ནས།
འབྲོང་རྒོད་རེ་རེ་བཞིན་གཡུང་ལ་ཕབ་སྟེ།
བོད་མགོ་ནག་གི་འཚོ་རྟེན་ཉག་གཅིག་ཏུ་གྱུར།
དེ་ནི་ཆེས་དཀར་ཞིང་གཙང་བའི་ཁ་བ་ཞུ་སྟངས་ཤིག་ཀྱང་ཡིན་པ་སྟེ།
མཐའ་ཀླས་པའི་ནམ་མཁའ་ནས་ས་ཆེན་པོའི་དཀྱིལ་འཁོར་དུ་བབས་ཤིང་།
མཛེས་སྡུག་དང་ཞི་དུལ་ངང་དྭངས་གཙང་གི་མཚེའུ་དང་གཙང་པོར་གྱུར།
དུས་ཚོད་གང་མང་ཞིག་བརྒྱུད་རྗེས།
འབྲོང་རྒོད་ཚོའི་མིང་ལ་ལྷ་གཡག་ཅེས་བཏགས་ཤིང་།
བོད་མགོ་ནག་གི་ཆེས་སྙིང་ཉེ་བའི་གྲོགས་པོར་གྱུར།
མགོ་སྦྲ་སྨུག་པོ་དང་རྐང་མགོའི་ཀོ་ལྷམ།
སྒྲོ་བ་སྣ་ཚོགས་དང་མཚན་མོའི་མེ་ལྕེ།
ཐབ་ཀའི་ལྕི་བ་དང་འགྲུལ་བཞུད་ཀྱི་ཟིན་ཐོ་རིང་མོ།
ཡོད་ཚད་ལྷ་གཡག་ཚོའི་འཚོ་གནས་དང་བློས་གཏོང་ཁོ་ནས་གནངས་པ་ལགས།
ཁ་བ་བབས་བྱུང་།
ཐོག་མར་མཛེས་སྡུག་གིས་བབས།
བར་དུ་ཞི་འཇགས་ཀྱིས་བབས།
མཐའ་མར་གདུག་རྩུབ་ཀྱིས་བབས།
སོར་གང་ནས་སོར་ལྔ། སོར་ལྔ་ནས་སོར་བཅོ་ལྔ།
གནམ་ས་བར་སྣང་མེད་པར་བབས་བྱུང་།
ཉིན་མཚན་ཁོར་ཡུག་མེད་པར་བབས་བྱུང་།
ཐོག་མར་གཡག་རྒོད་ཚོའི་རྨིག་པ་གངས་ནང་དུ་ནུབ།
བར་དུ་དབོ་རྩིད་གངས་ནང་དུ་ནུབ།
མཐའ་མར་རྭ་རྩེ ཡང་གངས་ནང་དུ་ནུབ་མགོ་བརྩམས།
དཀོན་མཆོག་ཅེས་པ་ཞིག་མི་མངོན་དབྱིངས་ན་བཞུགས་མེད།
འབྲོག་པ་ཚོའི་དཀོན་མཆོག་ནི་གཡག་རྒོད་འདི་ཚོ་མིན་ནམ།
དཀོན་མཆོག་སྐུ་ངལ་དང་འཕྲད་བྱུང་།
དཀོན་མཆོག་གངས་ཁྲོད་དུ་འདར་བྱུང་།
དཀོན་མཆོག་གྲང་ངར་དང་བཀྲེས་ལྟོགས་ཀྱིས་གཟིར་བྱུང་།
ད་གཟོད། གཡག་རྒོད་འཆི་བ་དང་བོད་ཀྱི་དཀོན་མཆོག་འཆི་བ་ལ་ཁྱད་པར་མེད་པའི་ངེས་ཤེས་རྙེད་བྱུང་།
འབྲོག་པ་ཚོ།
རྩྭ་སྐྱ་རྐང་ཐུར་གཅིག་ཀྱང་ཁ་ནང་ལ་ཡོང་གི་མེད་པའི།
གཡག་རྒོད་འདི་ཚོ་འཆི་གི་མ་འཇུག
གངས་རླུང་དྲག་ཏུ་གཡུགས་པའི་དགུན་ས་འདི་ནས།
ཁྱོད་ཚོས་སྲོག་འབེན་ལ་བཙུགས་ནས་ལྷ་གཡག་འདི་ཚོ་འཆི་གི་མ་འཇུག་ཡ།
ཕ་ས་ཕ་ཡུལ་ཟེར་བའི་རྩ་ཆེན་འདི་ན།
ང་ཚོར་ཁ་མི་གྲགས་པའི་གཡུང་དྲུང་གི་དཀོན་མཆོག་སྟེ།
གཡག་རྒོད་འདི་ཚོ་ལས་གཞན་པའི་རྩ་ཆེན་གོང་ཆེན་ཞིག་གང་ན་ཡོད།
ཕྱི་ལོ་༡༩༢༧ ལོར་སྟོད་མངའ་རིས་ས་ཁུལ་དུ་མེ་ཡོས་གངས་རག་རྒྱབ་ནས་མི་ཟོག་གཉིས་ལ་གནོད་སྐྱོན་ཆེན་པོ་བཟོས་ཡོད་པ་ནས་ད་ལྟའི་ས་ཕག་གངས་རག་འདིའི་མི་ཟོག་གཉིས་ལ་གནོད་སྐྱོན་ཚབ་ཆེན་བཟོས་པ་ལ་ང་ཚོ་བོད་རིགས་ཚང་མས་གདུང་སེམས་མཉམ་སྐྱེད་ཞུ་དགོས།
ཨོམ་མ་ཎི་པདྨེ་ཧུང་་་་་་་་་་་་་་་་་་་་་་ཧུང་་་་་་་་་་་་་་་་་་་་་་་་་་་་་་་་་་་་་ཧྲི།
འབྲོང་པའི་མིང་ཅན་གྱི་བོད་ཡུལ་ན་ལུང་པ་མང་པོ་འདུག ཡུལ་ཤུལ་རྫ་སྟོད་ཁུལ་དུ་འབྲོང་པ་སྟོད་སྨད་བར་གསུམ་དང་། འབའ་ཐང་ཁུལ་དུ་འབྲོང་པ་ཟེར་བ་ཞིག་ཡོད་སྐད། མངའ་རིས་གངས་ཏི་སེ་ཉེ་འགྲམ་འབྲོང་པ་ཚོ་གསུམ་དང་། མངའ་རིས་ཤར་ཁུལ་དུ་འབྲོང་པ་ཚོ་དགུ། ༼ ད་ལྟ་རྒྱ་མིའི་མང་ཆེ་བ་གཞིས་རྩེ་ཁུལ་དུ་བཅུག་ནས་འབྲོང་པ་རྫོང་ཟེར་འདུག༽ དེ་ལ་སོགས་པ་འབྲོང་་གི་བརྒྱུད་ལ་དང་འབྲོང་གི་རིགས་སོགས་ངག་རྒྱུན་སྒྲུང་མང་པོ་བཤད་རྒྱུ་འདུག
འབུ་ཆུང་ཕལ་མོ་ཆེ་ཞིག་གིས་རང་ཉིད་འཚོ་བའི་ཆེད་དུ་ཟ་མ་བསོག་འཇོག་བྱེད་ཤེས་ཀྱི་ཡོད་པ་རེད། འོན་ཀྱང་དུད་འགྲོ་ཆེན་པོ་འདི་ཚོས་མ་འོང་པའི་ཆེད་དུ་གྲལ་སྒྲིག་གང་ཡང་བྱེད་ཤེས་ཀྱི་མེད་པ་འདི་ཅི་ཡིན་ནམ། ད་ལོ་ཧ་ཅང་གནམ་གཤིས་གྲང་ངར་ཆེ་བའི་སྐྱོན་གྱི་ཨ་རིར་ལྟ་བུ་ནས་ཀྱང་མི་༢༢་ཤི་ཤར་ཚར་འདུག ད་དུང་དེ་ལས་མང་སྲིད་པ་རེད། གྲང་བ་ལ་བརྟེན་ནས་ཤི་བའི་གྲངས་འབོར་རྒྱལ་ཁབ་བཅུ་གསུམ་ནས་༡༩༨༥་ནས་༢༠༡༢་བར་དུ་ས་ཡ་༧༤ རེད་ཟེར། ཚ་བས་ཤི་བ་ལྡབ་ཉི་ཤུ་ལས་ཉུང་བ་འདུག་ཟེར། །
འབྱུང་བཞིའི་འོག་ཏུ་འཚོ་བའི་སྲོག་ཆགས་རྣམས །
ཉེན་ཁའི་འོག་ཏུ་
ཨ་ཁུ་རང་སེམས་ཕྲལ་མེད་སར་སེམས་ཕྲལ་རེད། དེང་སང་བོད་གཡག་ལ་བརྟེན་ནས་འཚོ་བ་བསྐྱེལ་མཁན་ཉུང་ཉུང་རེད། དེས་ན་གཡག་རྒོད་འཆི་བ་ནི་བོད་པ་འཆི་བ་ག་ལ་ཡིན། དེ་ལྟར་ན་ཕག་ལ་བརྟེན་ནས་འཚོ་བ་བསྐྱལ་མཁན་ཀཡང་མི་ཉུང་བ་ཡོད་པས། ཕག་རྒོད་འཆི་བ་ཡང་བོད་པ་འཆི་བ་ཡིན་པར་ཐལ། རྣམ་པ་ཀུན་ནས་མཚུངས་པའི་ཕྱིར།
འབྲོག་རྒྱན།
གཡག་རྒོད་འབྲོང་སོགས་རི་ཡི་རྒྱན། །
འབྲི་གཡག་ར་ལུག་འབྲོག་པའི་རྒྱན། །
ཤ་མར་ཐུད་གསུམ་འབྲོག་ཟས་རྒྱན། །
གཡུ་བྱུར་གཟི་འཕྱོར་ཀླད་རྙིང་རྒྱན། །
འཆི་རྐྱེན།
ཁ་བས་འཆི་བ་གནམ་གཤིས་ལན། །
སྐྱང་ཀིས་བསད་པ་ཁོར་ཡུག་ལན། །
ལྟོག་ཤིས་ཐེབས་པ་ལས་ཀྱིས་ལན། །
ཤེན་པས་བསད་པ་རྨ་འདོད་རྔམས་ལན། །
ཡོང་རྐྱེན།
ཧན་རིགས་འོངས་པས་ནོར་ཕྱུགས་རྫོགས། །
དེང་གསར་དར་བས་ནོར་སྙིང་རྫོགས། །
དམར་རྫུན་སྤེལ་བས་དད་དམ་རྫོགས། །
རྒྱ་སྤྲང་མང་བས་བོད་རིགས་རྫོགས། །
ཡོད་རྐྱེན།
ནང་ཆོས་དར་བས་བོད་རིགས་དར། །
གུང་བྲན་དར་བས་བོད་མི་རྒུད། །
རྒྱ་ཧན་མང་བས་བོད་ས་ཉུང་། །
༸སྐུ་འདུན་ཡོད་པས་བོད་སྤོབས་ལྡན། །
འབྱུང་རྐྱེན།
ཆོལ་གསུམ་མཐུན་སྒྲིལ་རྒྱ་དམར་དྲིན། །
ནང་ཆོས་སླར་དར་དམར་ལུགས་དྲིན། །
གཞིས་བྱེད་ཡོངས་དར་དྲང་བདེན་དྲིན། །
བོད་རིགས་ཡོངས་དར་༸སྐུ་འདུན་དྲིན། །
ཀརྡོས།
ཁ་བརྡ་མཆོག་ལགས།
ངའི་བཀོད་འོས་ཀྱི་མཆན་རྣམས་ཡར་འཛུད་ཐབས་མཛོད་རོགས་གནོངས།