ཉེ་ཆར་དྲ་ལམ་དག་ན་གུས་པས་བསྒྱུར་པའི་དེབ་ཐེར་ནག་པོའི་སྐོར་གླེང་སློང་བསྐྱར་མ་ཞིག་ཡོང་བཞིན་འདུག་ཅིང་། དེ་ལ་བརྟེན་ནས་འབར་ཞུན་ལགས་ཀྱིས་༢༠༡༨ ལོར་འཕྲུལ་དེབ་ཏུ་བཟོས་པའི་མ་ཡིག་དེ་ཕབ་ལེན་བྱེད་སའི་སྦྲེལ་ཐག་ཁ་བརྡ་དྲ་བར་འཇོག་འདོད་བྱུང་། འཕྲུལ་དེབ་འདི་བཞིན་སེར་བྱེས་རིག་མཛོད་ཆེན་མོའི་དྲ་ཐོག་ན་ཡོད་པའི་འབྲེལ་ཐག་འདི་ཡིན།
སེར་བྱེས་རིག་མཛོད་ཆེན་མོར་བཀོད་པའི་འཕྲུལ་དེབ། འདི་ལ་བསྣུན་ནས་བཞེས་རོགས་གནང་།
ཕྲན་གྱིས་ PDF ཐོག་བཟོས་པའི་འབྲེལ་ཐག་གཤམ་གསལ་ལྟར་ཡིན། འདིར་འདྲ་པར་རིགས་ཀྱང་ལྷན་སྦྱར་གྱིས་བཀོད་ཡོད།
BLACK ANNALS- Goldstein & The Negation Of Tibetan History(all)
གུས་པས་ཅིའི་ཕྱིར་འགྱུར་བཅོས་བྱས་པའི་གནས་ལུགས་སྐོར་གཤམ་གྱི་འགྱུར་བྱང་འདི་ན་གསལ་ཡོད།
______________________________________
ན་གཞོན་མཁྱེན་སྤྱན་ཡངས་པ་འབར་ཞུན་ལགས་ཀྱིས་སྔ་ཕྱིར་ཕྲན་གྱི་འགྱུར་རྩོམ་དང་རང་རྩོམ་འགའ་འཕྲུལ་དེབ་ཏུ་བཟོས་པ་ནི་བཀའ་དྲིན་བླ་ལྷག་ཏུ་ཆེ་ཞུ་བ་ཡིན་ལ། ཐེངས་འདིར་ཡང་དེབ་ཐེར་ནག་པོའི་འགྱུར་བཅོས་འདི་ཉིད་སླར་ཡང་འཕྲུལ་དེབ་ཏུ་བཟོ་སྐུལ་ཞུས་པར་འཕྲལ་དུ་ཞལ་བཞེས་གནང་བྱུང་ལ་ཐུགས་རྗེ་ཆེ་ཞུ་རྒྱུ་ཡིན།
འདས་པའི་མི་ལོ་བཅུ་ཕྲག་གཅིག་ཙམ་རིང་ལ་གུས་པས་འགྱུར་གྱི་ལས་ཀ་འགའ་ཞོར་ལས་སུ་བྱས་ཤིང་། དེ་དག་ཀྱང་མ་ཡིག་དབྱིན་སྐད་དུ་ཡོད་པའི་བསྟན་བཅོས་རྣམས་ལ་གང་ཐུབ་ཅི་ཐུབ་ཀྱི་རྣམ་པ་ཞིག་གིས་བོད་འགྱུར་གྱི་ལས་ལ་ཞུགས་པ་ཞིག་ཡིན། འོན་ཀྱང་ནོར་འཁྲུལ་ཞིག་ཡོད་པ་ནི་གཟབ་ནན་མ་བྱས་པ་དེ་ཡིན་ཞིང་། དེ་ཡང་འཕྲལ་དུ་བསྒྱུར་ཅིང་འཕྲལ་དུ་སྤེལ་བའམ་ཡང་ན་ཀློག་ཐེངས་གཅིག་གིས་བསྒྱུར་ཅིང་། བསྒྱུར་ཐེངས་གཅིག་གིས་སྤེལ་བ་དེ་རེད། འོ་ན་མ་བཅོལ་བའི་ལས་ཀ་འདི་ཅིའི་ཕྱིར་བྱེད་དགོས་བྱུང་སོང་ཟེར་ན། དེ་ནི་བདག་བོད་ཀྱི་སྐད་ཡིག་ལ་དུངས་ཤིང་ཞེན་པའི་ལྷག་བསམ་ཟོལ་མེད་ཅིག་ཡོད་པ་དེས་རྐྱེན་བྱས་པ་ལས་གཞན་འདི་དག་ལས་རང་ཉིད་ལ་ཐོབ་རྒྱུ་ནི་གང་ཡང་མ་མཆིས་སོ༎
སྔ་ལོའི་ལོ་མཇུག་ཏུ་བོད་ནང་གི་དགེ་རྒན་ཞིག་གིས་དེབ་ཐེར་ནག་པོར་འགྱུར་བཅོས་ཤིག་དགོས་སྐོར་བཤད་རྗེས་གཞི་ནས་སླར་ཡང་སྔ་འགྱུར་ལ་འགྱུར་བཅོས་ཀྱི་ལས་འདི་དང་དུ་བླངས་པ་ཡིན། དཀའ་བ་དང་དུ་ལེན་པ་དེའི་རྒྱུ་མཚན་གཞན་ཞིག་ནི་སྐབས་འདི་ཙམ་ལ་རྒན་པད་མ་འབུམ་གྱིས་ “ཀློག་མཁན་གྱིས་གོ་ཐུབ་པ་ཞིག་བསྒྱུར་རྒྱུ་ནི་ལོ་ཙ་བ་རྣམས་ཀྱི་ལས་འགན་རེད། འགྱུར་གང་ཞིག་ཀློག་མཁན་རྣམས་ཀྱིས་གོ་མི་ཐུབ་ཚེ་གོ་ཐུབ་ཀྱི་མི་འདུག་ཅེས་བརྗོད་རྒྱུ་ནི་ཀློག་མཁན་གྱི་ཐོབ་ཐང་རེད།”ཅེས་པའི་སྐད་ཆ་ཞིག་ཀྱང་བྱུང་བ་ལ་བརྟེན་ནས་སྔ་ལོའི་དགུན་ཁའི་གུང་གསེང་དེ་སྤྱད་ནས་འདི་ལ་འགྱུར་བཅོས་བྱེད་པའི་དཀའ་བ་དེ་བཟོད་པར་བྱས་པ་ཡིན།
འགྱུར་བཅོས་སྐབས་སུ་ཐོག་མར་སླར་ཡང་མ་ཡིག་དང་འགྱུར་གཉིས་གཤིབས་བསྡུར་བྱེད་བཞིན་ལན་གཅིག་ཞུས་དག་གྲུབ་པ་བྱས་ཤིང་། དེ་ནས་བུ་མོ་ཚེ་རིང་དཔལ་འཛོམས་དང་ལྷན་དུ་གོ་དཀའ་བའི་ཚིག་ཕྲེང་རིགས་ལ་འདྲི་བརྩད་བྱེད་བཞིན་ལན་གཅིག་ཞུས་དག་བྱས། དེ་རྗེས་ཤོག་གུའི་སྟེང་དུ་པར་འདེབས་ཀྱིས་དབྱིན་ཡིག་གཅིག་པུ་བཀླགས་ཏེ་འགྱུར་ལ་བསྐྱར་བཅོས་བྱས། དེ་ལྟར་རིམ་པ་གསུམ་ཕྱིན་པའི་སྐབས་སུའང་། སྐབས་རེ་རེ་ལ་འགྱུར་ནོར་བ་དང་ཆད་པ་ཅི་རིགས་རྙེད་པར་གྱུར་ཅིང་། དེ་ནས་རང་གི་ཤའི་མིག་གིས་རང་གི་ནོར་འཁྲུལ་མི་མཐོང་བའི་ཚད་ལ་སླེབས་འདུག་སྟབས། རྒན་པད་མ་ཚེ་དབང་ཤཱསྟྲི་ལགས་དང་རྒན་ཚེ་དཔག་རིག་འཛིན་ལགས་གཉིས་སོ་སོར་འགྱུར་ཡིག་བསྐུར་ཏེ་གཟིགས་ཞིབ་གནང་སྐུལ་ཞུས་ཤིང་། རྒན་ཚེ་དཔག་རིག་འཛིན་ལགས་ནས་འགྱུར་ལ་ནོར་འཁྲུལ་གྱི་དགོངས་འཆར་མ་བྱུང་མོད་རྒན་པད་མ་ཚེ་དབང་ལགས་ནས་དགོངས་འཆར་འགའ་ཞིག་གནང་བ་དེ་སྐབས་བསྟུན་གྱིས་བཅོས་པ་ཡིན། གྲོགས་པོ་བསོད་ཚེས་ཀྱང་རྗོད་པའི་གནད་ལས་དྲངས་ཏེ་དགོངས་འཆར་ཞིག་གནང་བྱུང་། དེ་དག་གྲུབ་པའི་རྗེས་སུ་ཁེ་ན་ཌར་གནས་བཞུགས་རྡོ་རྗེ་དབང་ཕྱུག་ལགས་ནས་བོད་ཡིག་ཏུ་ཀློག་བདེ་མིན་གྱི་ཞུ་དག་ལན་གཅིག་གྲུབ་པར་མཛད་དོ།། མཐའ་མ་དེར་རྩོམ་པ་པོ་ལགས་ལ་སླར་ཡང་འབྲེལ་གཏུགས་ཀྱིས་དོགས་གནད་འགའ་ལ་བསྐྱར་བཅོས་དང་བཅས་འགྱུར་བཅོས་འདི་ཉིད་གྲུབ་པར་བྱས་པ་ལགས། དེས་ན་འདིར་འགྱུར་བཅོས་སྐབས་སུ་གཟིགས་རྟོག་མཛད་མཁན་རྣམས་དོན་གྱི་སླད་དུ་མཚན་ནས་སྨོས་ཏེ་ཐུགས་རྗེ་ཆེ་ཞུས་པ་ཡིན་ལགས།
འགྱུར་བཅོས་ཀྱི་སྐབས་སུ་གང་ཞིག་བཅོས་པ་དང་ཇི་ལྟར་བཅོས་པའི་ལུགས་ཇི་བཞིན་འབྲི་རྒྱུ་ནི་ཚེགས་ཀྱིས་མི་ལྕོགས་པ་ཞིག་རེད། གཙོ་བོར་ཚིག་གི་སྡེབ་སྦྱོར་དང་། འགྱུར་ནོར་བ་འགའ་ཞིག་བཅོས་ཡོད་ཅིང་། ལོ་རྒྱུས་ཀྱི་ཚིག་གནད་རྣམས་བོད་སྐད་དུ་འབྱོར་དང་མི་འབྱོར་ཅི་རིགས་པར་འདུག་པ་རྣམས་ལ་སྐད་གཉིས་ཤན་སྦྱར་གྱི་ཚུལ་དུ་བྲིས་ཤིང་། སྐབས་རེར་གནད་ཚིག་འགའ་ལ་གཤམ་མཆན་བཏབ་ཡོད། ས་མིང་འགའ་ཞིག་ད་ཡོད་ཀྱི་ལོ་རྒྱུས་ཡིག་ཚགས་ལ་བསྟུན་ཡོད་ཅིང་། འགའ་ཞིག་ནི་དཔྱད་མཐའ་ལ་བསྐྱལ་མ་ཐུབ་པར་ལུས་ཡོད། གཞན་འགའ་ཞིག་ལ་དྲི་རྟགས་བཀོད་ཡོད་དོ།།
དེས་ན་འགྱུར་བཅོས་འདིས་བོད་ཀྱི་ལོ་རྒྱུས་ལ་གསལ་ཁ་དང་ཁ་སྐོང་ཐེབས་པའི་སྨོན་འདུན་ཞུ་བ་ཡིན། འོན་ཀྱང་ཤེས་ཡོན་གྱི་ལས་ཀ་ཞིག་ཡིན་སྟབས་འདིར་ཡིག་སྒྱུར་བྱེད་པོའི་རང་ཕྱོགས་གཞན་ཕྱོགས་ལྟ་བུའི་བསམ་བློ་གཏན་ནས་སླེབས་མེད་ཅིང་། གང་ལ་ཅི་ཡོད་དེ་དེ་བཞིན་དུ་སླེབས་པའི་འབད་པ་བྱས་ཡོད་པའང་དགོངས་པར་འཇགས་འཚལ། མཐར་འབར་ཞུན་ལགས་ཀྱིས་པར་གཞི་གསར་པ་འདི་ཉིད་འཕྲུལ་དེབ་ཏུ་བཟོས་གནང་བ་ལ་ཐུགས་རྗེ་ཆེ་ཞུ།
དགེ་འདུན་རབ་གསལ་གྱིས་ ༢༠༡༨ ལོའི་ ཟླ་དང་པོའི་ཚེས་ ༢༡ ཉིན་བྲིས།