ཨ་རིའི་འོས་འདེམས་ལ་ཞུགས་པ།

བློ་བཟང་ལེགས་བཤད།

འདི་ལོའི་ཨ་རིའི་འོས་འདེམས་ནི་ཕྱི་ཟླ་ ༡༡ ཚེས་ ༦ ཉིན་ཡིན་མོད། འོས་འདེམས་སྔོན་ཚུད་བྱེད་པའི་གོ་སྐབས་ཡོད་པ་ལ་བརྟེན་ནས་འོས་འདེམས་ཀྱི་ཆ་ཤས་བླངས་པ་ཡིན། འོས་འདེམས་བྱ་ཡུལ་དུ་སླེབས་སྐབས་མི་མང་པོ་མི་འདུག  རེ་ཟུང་ཡོད་པ་རྣམས་བང་སྒྲིག་ཏེ་བསྐྱོད་བཞིན་འདུག  ཐོག་མར་སྒོ་ནས་འཛུལ་མ་ཐག་ཏུ་དེབ་སྐྱེལ་བྱེད་ས་ཞིག་འདུག དེའི་སྟེགས་བུའི་རྒྱབ་ན་ཡོད་པ་ནི་རྨོ་མོ་ཞིག་རེད། ངས་རྨོ་མོ་ལགས་ལ་བཀྲ་ཤིས་བདེ་ལེགས་ཞུས་པ་ཡིན། དེ་ནས་ཕར་བལྟས་སྐབས་འོས་འདེམས་ཀྱི་ལས་བྱ་བ་ཞིག་སྐོར་མཐོང་བ་དང་།  ཁོང་ཅག་གི་དགུང་ནའི་བབ་ལ་གཞིགས་ཚེ། ཕལ་ཆེར་འདི་དག་ཚང་མ་བགྲེས་ཡོལ་དུ་ཕེབས་ཟིན་ནས་དང་བླང་ཞབས་ཞུར་ཕེབས་པ་ཤ་སྟག་ཡིན་ཚོད་འདུག

ང་ལ་ ཁྱེད་ཀྱི་འདྲ་པར་ཅན་གྱི་ལག་འཁྱེར་ཞིག་སྟེར་རོགས་ཟེར། དེར་ངས་རང་གི་ཁ་ལོ་པའི་ལག་འཁྱེར་སྤྲད་པ་ཡིན། རྨོ་ལགས་ཀྱིས་ལག་འཁྱེར་དེ་འཕྲུལ་ཆས་ཤིག་གིས་བཤུ་འབེབས་བྱས་སོང་།  དེ་མ་ཐག་ཏུ་ངའི་སྡོད་གནས་ཀྱི་ཁ་བྱང་དང་བཅས་ལ་མོའི་མདུན་གྱི་གློག་ཀླད་དུ་སླེབས་སོང་།  དེ་ནས་ཁྱེད་ཀྱི་མིང་ལ་ཅི་ཟེར་བ་དང་། སྐྱེས་ལོ་ནམ་ཡིན་གྱི་དྲི་བ་གནང་བ་ལ་ངས་གུས་ཚིག་དང་བཅས་ཚུལ་མཐུན་གྱིས་ལན་འབུལ་བྱས་པ་ཡིན། དེ་ནས་མོའི་མདུན་གྱི་གློག་ཀླད་ཀྱི་ཤེལ་སྒོའི་ངོས་སུ་ངས་གནས་ཚུལ་ཤར་འདུག་པ་རྣམས་ཏག་ཏག་རེད་དམ་ཞེས་དྲིས་བྱུང་།  དེ་དག་ལ་བསྐྱར་ཞིབ་ཅིག་བྱས་པ་ཡིན། དེའི་རྗེས་སུ་ངས་མིང་རྟགས་འགོད་རོགས་ཟེར། མིང་རྟགས་བརྒྱབ་པ་ཡིན། མིང་རྟགས་བརྒྱབ་མ་ཐག་ཏུ་དེ་སྔོན་ནས་ཡོད་པའི་མིང་རྟགས་དེ་དང་གསར་པ་གཉིས་གཤིབ་ཏེ་ཤར་བྱུང་།  དེའི་རྗེས་ནས་མོས་ང་ལ་ཡིག་ཤུབས་གཅིག་ལ་ངའི་གནས་ཚུལ་འཁོད་པའི་སྦྱང་བྱང་ཞིག་སྦྱར་ཏེ་ང་ལ་མིང་རྟགས་དང་ཟླ་ཚེས་འགོད་རོགས་ཟེར།  དེ་དག་གྲུབ་པ་དང་། མོའི་གཡོན་གྱི་རྨོ་ལགས་དེས་ངའི་ཤུབས་དེ་ལ་མིང་རྟགས་བཀོད་པ་དང་། མོ་རང་གིས་ཀྱང་མིང་རྟགས་བཀོད་ནས་ཡིག་ཤུབས་དེ་ང་ལ་སྤྲོད་བཞིན། ཕར་ངོས་ཀྱི་ཅོག་ཙེ་ལ་ཕེབས་དང་དེ་ནས་ཁྱེད་ཀྱི་འོས་ཤོག་པར་འདེབས་བྱེད་ཀྱི་རེད་ཟེར།

འདི་ནའང་མི་གཉིས་འདུག རེ་རེ་བཞིན་གྱིས་ངེད་ཀྱི་ལག་ཏུ་ཡོད་པའི་ཡིག་ཤུབས་ལ་བརྟག་དཔྱད་ནན་མོ་ཞིག་བྱེད། དེ་ནས་ཁོང་ཚོས་འོས་ཤོག་ཅིག་པར་འདེབས་བྱས་རྗེས་ཁོང་ཚོའི་གཡོན་ན་ཡོད་པའི་ལས་བྱ་བ་གཉིས་ལ་སྤྲད།  ལས་བྱ་བ་དེ་གཉིས་ཀྱིས་ཞིབ་ཏུ་བརྟག་དཔྱད་ཅིག་བྱེད་ཅིང་། དེ་ནས་འོས་ཤོག་དེ་ཇི་ལྟར་འཕེན་དགོས་པའི་འགྲེལ་བརྗོད་འདི་ལྟར། ཁྱེད་རང་འོས་འདེམས་སྤྱིལ་བུ་གང་རུང་ཞིག་ལ་འགྲོ་དགོས། དེ་ནས་འོས་རྟགས་རྣམས་ཚུལ་བཞིན་དུ་རྒྱག་དགོས། དེ་ནས་འོས་ཤོག་དེ་དཀྱིལ་ནས་ལྟེབ་རྩེག་ཅིག་བརྒྱབ་སྟེ་ཡིག་ཤུབས་ནང་དུ་བླུག་རོགས། ཡིན་ན་ཡང་ཁ་སྦྱར་ན་འགྲིག་གི་མ་རེད། ཁ་མ་སྦྱར་བར་ཕར་ངོས་ཀྱི་ལས་བྱ་བ་ཚོའི་མདུན་དུ་འཁྱེར་རོགས་ཞེས་བརྗོད་བྱུང་།

འོས་འདེམས་སྤྱིལ་བུ་དེ་ནི་མཐའ་ཚང་མ་ཡོལ་གོར་གྱིས་གཡོགས་པའི་ཅོག་ཙེ་ཞིག་རེད། ཁྱེད་རང་ནང་དུ་འཛུལ་རྗེས་གཞན་སུས་ཀྱང་མི་མཐོང་བ་ཞིག་རེད། ཅོག་ཙེའི་ངོས་ལ་ཡི་གེ་དང་རི་མོ་གཉིས་ཀ་བཀོལ་འདུག དེ་དག་གིས་འོས་ཤོག་ལ་རྟགས་ཇི་ལྟར་འདེབས་པའི་ཚུལ་བསྟན་འདུག རྟགས་གང་ཞིག་ནི་རུང་བ་དང་རྟགས་གང་ཞིག་ནི་མི་རུང་བ། འོས་འདེམས་སྟངས་ཇི་ལྟར་ཡིན་པ་སོགས་ཁ་གསལ་དུ་བཀོད་འདུག ངས་ལམ་སྟོན་རྣམས་རེ་རེ་བཞིན་བཀླགས་གྲུབ་རྗེས་གཞི་ནས་འོས་ཤོག་ལ་རྟགས་བརྒྱབ་པ་ཡིན། དེ་ནས་རང་གི་འོས་ཤོག་དེ་ལྟེབ་རྩེག་གིས་ཡིག་ཤུབས་ནང་དུ་བླུག དེ་ནས་ཡིག་ཤུབས་འཁྱེར་ཏེ་ཕྱི་རོལ་གྱི་ལས་བྱ་བའི་མདུན་ལ་ཕྱིན་པ་ཡིན།

ཕྱི་རོལ་པའི་ལས་བྱ་བས་ང་ཚོས་ཁྱེད་ཀྱི་ཡིག་ཤུབས་འདི་ལ་ལག་པ་འཆང་ཆོག་གི་མེད། ཡིག་ཤུབས་ནང་ལ་འོས་ཤོག་ཡོད་དམ་ཞེས་དྲིས་བྱུང་། དེ་ལ་ཡོད་ཅེས་ལན་བཏབ་པ་ཡིན། དེས་ན་འབྱར་རྩི་འདིས་ཡིག་ཤུབས་ཀྱི་ཁ་སྦྱར་རོགས་གནང་ཟེར། ངས་དེ་ལྟར་སྦྱར་བ་ཡིན། དེ་ནས་ངའི་མདུན་གྱི་རྨོ་ལགས་དེས་ཡིག་ཤུབས་ཀྱི་སྟེང་དུ་མིང་རྟགས་དང་ཟླ་ཚེས་བཏབ། མོའི་ལས་རོགས་ཀྱིས་ཀྱང་དེ་ལྟར་མིང་རྟགས་བཏབ། དེ་ནས་འོས་ཤོག་ཅན་གྱི་ཡིག་ཤུབས་དེ་ངའི་ལག་ཏུ་བཞག་བྱུང་།  ངས་དེ་འཁྱེར་ནས་འོས་སྒམ་ཡོད་ས་ལ་ཕྱིན་པ་ཡིན། དེར་ཡང་རྨོ་ལགས་ཤིག་འགྲེངས་ནས་འདུག  མོས་འོས་ཤོག་དེ་འོས་སྒམ་དུ་ཇི་ལྟར་འཕེན་དགོས་པའི་ལམ་སྟོན་གནང་བྱུང་། དེ་ལ་གུས་ལུགས་བཅས་འོས་ཤོག་དེ་འོས་སྒམ་དུ་འཕངས་པ་ཡིན།  དེ་ནས་མོས་ “ངས་འོས་འདེམས་བྱས་པ་ཡིན། ཁྱེད་ཀྱིས་འོས་འདེམས་ཨེ་བྱས།” ཞེས་པའི་ཡིག་འབྲུ་འཁོད་པའི་བྲང་འདོགས་སྦྱར་བྱང་ཞིག་ང་ལ་སྤྲད་བྱུང་།

འོས་ཤོག་ནི་རིན་ཐང་ཆེ། འོས་འདེམས་ནི་རིན་ཐང་ཆེ། དེ་ལས་ཀྱང་བརྒྱུད་རིམ་འདི་རིན་ཐང་ཆེ་བ་ལ།