གནས་མཁར་གསར་བའི་བོད་མི་ཚོའི་བྱ་འགུལ།

ཁྲོ་གཏུམ།

ཕྱི་ལོ་ ༢༠༡༨ ཟླ་ ༡༠ ཚེས་ ༡༡ ཉིན་རྒྱབ། ཨོ་སི་ཁྲོ་ལི་ཡའི་(Australia)སེ་ཊི་ནེའི་(Sydney)གྲོང་ཁྱེར་གྱི་ནུབ་ཕྱོགས་སུ་ཡོད་པའི་མཱལ་ཁྲི་ལན་ཊི་(Mailtland)ཡུལ་ཚོའི་ཁྲོམ་ཆེན་དཀྱིལ་དུ། ལོ་རེར་ཚོགས་སྲོལ་ཡོད་པའི་རིག་གཞུང་སྣ་ཚོགས་ཀྱི་དུས་སྟོན་ཐེངས་བདུན་པ་སྐོང་ཤིང་། སྐབས་འདིར་རིག་གཞུང་འདྲ་མིན་ ༢༨ ལྷག་ངོ་སྤྲོད་དང་། རྒྱལ་ཁབ་འདྲ་མིན་གྱིས་སོ་སོའི་ཁྱད་ཆོས་ལྡན་པའི་ཟས་མཆོག་ལ་བྲོ་བ་མྱངས་པ། ཁྲབ་གཞས་སྣ་ཚོགས། སྐད་རིགས་སྣ་ཚོགས་སྦྱོང་བརྡར། མི་རིགས་འདྲ་མིན་ལ་ཐུག་ཕྲད་ཀྱིས་ངོ་ཤེས་དང་བསམ་བློ་བརྗེ་རེས་བྱེད་པ་བཅས་ཀྱི་ཁྱད་ཆོས་ལྡན་པའི་དུས་སྟོན་ཞིག་རེད།

ཐེངས་འདིའི་དུས་སྟོན་དུ། གནས་མཁར་གསར་བར་(Newcastle) གནས་སྡོད་བྱེད་པའི་བོད་རིགས་མཐུན་ཚོགས་ཀྱིས་ཀྱང་། བོད་ཀྱི་ཁྱད་ཆོས་ལྡན་པའི་བཅུད་ལྡན་ཤ་ཡོད་ཤ་མེད་ཀྱི་མོག་མོག་ཁ་ལག་གི་རོ་མཆོག་ལ་བྲོ་བ་མྱངས་ས་དང་བོད་ཁུག དར་ལྕོག་སོགས་བོད་ཀྱི་ཁྱད་ཆོས་ལྡན་པའི་དངོས་པོ་འདྲ་མིན་གྱི་འགྲེམས་སྟོན་བྱས་སོང་།

དེ་མིན་བོད་ཀྱི་གཞོན་སྐྱེས་བྱིས་པ་རྣམས་ཀྱིས་བོད་ཀྱི་ཞབས་བྲོ་འཁྲབ་ཤིང་། སྐད་ཡིག་སྦྱོང་བརྡར་བྱེད་སར་བོད་ཀྱི་སྐད་ཡིག་བསླབ་པ་སོགས་ཀྱི་ལས་འགུལ་འདྲ་མིན་དུས་སྟོན་འདིའི་སྡིངས་ཆ་རུ་རྒྱལ་ཁབ་གཞན་དག་དང་མཉམ་དུ་གོམ་པ་མཉམ་སྤོས་ཀྱིས་སྤེལ་སོང་།

དུས་སྟོན་འདིར་རྒྱལ་ཁབ་སོ་སོའི་ཁྱད་ཆོས་ལྡན་པའི་ཅ་དངོས་དང་བཟའ་བཏུང་གི་རྣམ་པ་མངོན་ཞིང་། གཞས་དང་ཞབ་བྲོའི་སྒྱུ་རྩལ་གྱི་ཁྱད་ཆོས་ལས་མིག་གི་མཐོང་རྒྱ་དང་བསམ་བློའི་བློ་སྒོ་དལ་གྱིས་ཕྱེ་ཡོང་ལ། མི་རིགས་འདྲ་མིན་གྱི་འཕྱོར་གོས་གྱོན་ཞོར་འཚང་ཁ་ཆེ་བའི་ཁྲོམ་ཚོགས་སུ་འདུས་ཤིང་། ཁྲོམ་འགྲམ་གྱི་རྒྱུགས་ཆུ་ཆེན་པོ་དེའི་དལ་འགྲོས་ཀྱིས་རྨ་ཀློང་སྒེག་མོར་འགྲན་སློང་བ། རྒྱུགས་ཆུ་དང་མཉམ་དུ་འགྲོགས་པའི་རླུང་བསིལ་མོ་དེའི་རྟ་ཕོ་ཧ་ཅང་གིས་མགྱོགས་ནའང་། མི་ཚང་མས་སོ་སོའི་སྐྲ་ལོ་ཤད་དུ་འཇུག་ཅིང་། བསིལ་རླུང་གདོང་པར་ཕོག་པའི་ཚོར་བ་དེ་དགོད་སྒྲ་དང་ཀུ་རེ་ཡི་ཀློངས་སུ་སིམ་པར་གྱུར།

གནས་མཁར་གསར་བོད་རིགས་མཐུན་ཚོགས་ཀྱི་ཁ་འགོ་བ་དག་གིས་རང་རང་གི་ལས་འགན་ཕྲག་ཏུ་ཧུར་བརྩོན་གྱིས་འཁུར་ཞོར། བྲེལ་འཚུབ་ཀྱི་གོམ་ཁས་སྲང་ལམ་འདིའི་མགོ་རྔ་རུ་རྐང་རྗེས་ག་ཚོད་ཅིག་དཔར་ཡོད་པ་སུས་ཀྱང་ཚོད་དཔག་བྱེད་དཀའ་ནའང་། ཁོ་ཚོའི་བྲེལ་འཚུབ་ཀྱི་གོམ་འདྲིས་བར་ན་ང་ཚོའི་མི་རིགས་ཀྱི་ལས་དབང་འཕྱོ་ཞིང་རླབས་རིས་བྲལ་བའི་རྒྱུགས་ཆུ་ཆེན་པོ་དེ་ཡིས་མི་ཚོགས་ཀྱི་རླབས་རྒྱུན་ལ་ལྟད་མོར་ལྟ་བཞིན་མདུན་དུ་བསྐྱོད་པ་དང་། བོད་རིགས་ཧ་ཅང་ཉུང་བའི་ས་མཐའི་གནས་མཁར་གསར་གྱི་མཚོ་མཐའ་འདི་ནས་བོད་མི་རིགས་ཀྱི་ཁྱད་ཆོས་མངའ་བའི་རིག་གཞུང་ཞིག་མི་རིགས་འདྲ་མིན་གྱི་དུས་སྟོན་ཐོག་ཏུ་ངོམས་ཐུབ་པ་ནི་གཟི་བརྗིད་ཅིག་དང་ཧ་ཅང་གིས་དགའ་འོས་པའི་བྱ་འགུལ་རླབས་ཆེན་ཞིག་ཅི་ལ་མིན་ནམ། འདི་ལྟར་ཁ་འགོ་བ་ཚོའི་དཀའ་ཚེག་གི་གོམ་འགྲོས་སུ་ཡིད་སྨོན་འཆོར་ཞིང་། གནས་མཁར་གསར་འདིའི་བོད་མི་ཚོའི་སེམས་ཤུགས་ལ་རྗེས་སུ་ཡི་རངས་ཅིའི་ཕྱིར་མི་བྱེད་དམ།

ཕྱི་ལོ་ ༢༠༡༨ ཟླ་ ༡༠ ཚེས་ ༡༡ ཉིན།