དགེ་སློང་བསམ་གཏན་ལ་གདམས་ངག་ཡེ་ཤེས་མེ་ལོང་།

ཨེ་མ་ཧོ།
 
ན་མོ་གུ་རུ་བུདྡྷ་ཛྙཱ་ན་ཡེ།
སྐྱབས་གནས་རྒྱ་མཚོའི་སྤྱི་གཟུགས་བླ་མ་རྗེ།།
འདི་ཕྱི་བར་དོར་མི་ཕྱེད་དད་གུས་བཅས།།
སྙིང་ནས་རྩེ་གཅིག་ཡིད་ཀྱིས་གསོལ་བ་འདེབས།།
གདམས་པའི་གཏམ་འདི་གཞན་ལ་སྨིན་གྱུར་ཅིག།

དལ་འབྱོར་མི་ལུས་རིན་ཆེན་ཐོབ་པའི་ཚེ།།
འཇིག་རྟེན་འཁོར་བ་མི་རྟག་ལེགས་ཤེས་ནས།།
དམ་ཆོས་རྣལ་མ་སྒྲུབ་པའི་བློ་བརྩོན་གྱིས།།
རང་མགོ་ཉི་མ་ཆོས་ཀྱིས་འཚོ་བར་མཛོད།།

དམུ་རྒོད་སེམས་འདི་ཤིན་ཏུ་འདུལ་དཀའ་བས།།
ཟབ་ལམ་སྙིང་པོའི་གདམས་ངག་མ་བརྗེད་པར།།
ཐབས་ཤེས་རྒྱ་མཚོའི་དྲན་ཤེས་བག་ཡོད་ཀྱིས།།
གཏན་གྱི་མདུན་མ་སྒྲུབ་པའི་དུས་ལ་བབ།།

ངོས་ལ་དད་པ་ཡོད་ན་དག་སྣང་རེད།།
མཆེད་ལ་བརྩེ་དུང་མཆིས་ན་དམ་ཚིག་ལགས།།
མི་ཚེའི་སྙིང་པོ་དམ་ཆོས་ལེགས་འབོད་དང་།།
ང་དང་སངས་རྒྱས་མ་འདས་གམ་ན་ཡོད།།

ཚིག་རྩོད་ཚད་མ་སྨྲ་ན་རྟོག་གེ་ཡིན།།
ལྷག་བསམ་ཁ་ལ་ཁྱེར་ན་གཡོ་སྒྱུ་ཡིན།།
དད་གུས་སྙིང་ན་མེད་པར་ལྟ་ལོག་ཡིན།།
རང་མགོ་རང་གིས་མ་བསྐོར་ཕ་བཟང་བུ།།

གཞན་གྱིས་བསྟོད་བཀུར་བསྔགས་པ་གཞན་གྱིས་དཔལ།།
དཔལ་དང་འབྱོར་བས་ཕྱུག་ན་སྔོན་གྱི་ལས།།
ཉམས་རྟོགས་ཡོན་ཏན་མཆིས་ན་རང་གི་དཔལ།།
རང་གཞན་ཡོན་ཏན་གོ་མ་ནོར་བ་མཛོད།།

བླ་མ་མི་རུ་མཐོང་ན་དད་གུས་དབེན།།
གདམས་རྒྱུད་ལ་མ་འབྱོར་དམ་ཚིག་དབེན།།
བྱམས་དང་སྙིང་རྗེ་རུལ་ན་རྩ་བ་དབེན།།
དབེན་གསུམ་རྣལ་འབྱོར་བསྙེགས་ན་འཁྲུལ་བར་ངེས།།

འཁོར་བའི་གནས་འདིར་ངེས་འབྱུང་སྐྱེ་བ་དང་།།
བསགས་པའི་དགེ་བ་བྱང་སེམས་ཟིན་པ་ན།།
སྣང་སྲིད་དག་པ་རབ་འབྱམས་ལོག་ན་མེད།།
ལྷུན་གྱིས་གྲུབ་པར་གདོད་མའི་གཏན་སྲིད་ཟིན།།

བླ་མ་ཨོ་རྒྱན་རྗེ་ལ་རྣལ་འབྱོར་གྱིས།།
ཡི་དམ་རྫོགས་ཆེན་དུས་འཁོར་ཐུགས་དམ་ངང་།།
མཁའ་འགྲོ་སྒྲོལ་མ་ཆོས་སྐྱོང་གེ་སར་འབོད།།
ཚེ་དང་སྒྲུབ་པ་མཐའ་རུ་ཕྱིན་པར་མཛོད།།

རབ་གནས་ས་ཁྱིའི་སྤྲེལ་ཟླའི་གནམ་གང་ལ་ཕྲན་གྱི་དངོས་སློབ་རིན་ཆེན་དཔལ་རིའི་མཁན་པོ་དགེ་སློང་བསམ་གཏན་ལ་ཀུན་བཟང་ཆོས་གླིང་ནས་ཤྲཱིཿཨེ་མ་ཧོས་གདམས་ངག་གླུ་རུ་བླངས་པར་དགེའོ།།