ཁྲོ་གཏུམ་གྱིས་མཁོ་སྤྲོད་བྱས།
དེབ་ཀྱི་དབུ་འབྱེད་མཛད་སྒོར་ཆེད་ཕེབས་གནང་བའི་དཔལ་ལྡན་བོད་མི་མིང་སྤྱི་འཐུས་ཚོགས་གཞོན་ཨ་ཅ་རྱ་ཡེ་ཤེས་ཕུན་ཚོགས་མཆོག་དང་རྒྱལ་སྤྱིའི་བོད་ཀྱི་ཆ་འཕྲིན་གསར་ཁང་གི་སྤྱི་ཁྱབ་རྩོམ་སྒྲིག་པ་རྒན་ཡེ་ཤེས་ཆོས་བཟང་ལགས། དེབ་ཀྱི་རྩོམ་སྒྲིག་པ་ཆོས་ཉིད་བཟང་པོ། དེ་མིན་གསར་འགོད་པ་དང་དོ་སྣང་ཅན། ཕྱག་སྦྲེལ་ལས་རོགས་རྣམས་བཅས་ཀྱིས་ཉིན་བཟང་སྐར་བཟང་༧རྒྱལ་བའི་བླ་བཟའ་ལྷག་སྐར་ཉིན་མོ་དང་། ཕྱི་ཟླ་ ༢ པའི་ཚེས་ ༡༤ འཛམ་གླིང་གི་དགའ་རོགས་དུས་ཆེན་ཉིན་མོ། བོད་ཀྱི་གནམ་ལོ་གསར་བའི་དགུ་ཟློགས་དང་དགུ་ཐུག་གི་ཉིན་མོ་སུམ་འཛོམས་ཐོག བཙན་བྱོལ་བོད་ཀྱི་བུད་མེད་བོད་ཡིག་ཐོག་རྩོམ་འབྲི་གནང་མཁན་དང་ཀློག་པ་པོ་རྣམས་སུ་ཁྱབ་མཉམ་འཅར་འདྲི་ཞུས་པའི་དེབ་གསར་གྱི་མཛད་སྒོ་སྟབས་བདེ་ཞིག་བཞུགས་སྒར་ངྷ་སར་འཚོགས་པ།
<<སྨྱུག་ཐོགས་བོད་མོ།>> ཞེས་པའི་དེབ་ཀྱི་སྐོར་རག་ཙམ་བརྗོད་ན།
དེབ་ནང་དུ་བོད་ཡིག་ཐོག་རྩོམ་འབྲི་མཁན་དང་ཀློག་པ་པོ་ ༣༣ ལྷག་ཅིག་ལ་བཅར་འདྲི་ཞུ་བའི་གོ་སྐབས་བྱུང་ཞིང་། གཞན་ཡང་ལྷག་སོང་བ་དང་སོ་སོའི་ལས་ཀའི་བྲེལ་འཚུབ་འོག་ནས་ལན་འདེབས་གནང་མ་ཐུབ་པ་ཡང་བྱུང་ཡོད། སོ་སོའི་སྒེར་ངོས་ནས་བོད་ཡིག་གི་དེབ་བཏོན་ཡོད་པ་ ༡༥ ཡོད་ཅིང་། དེབ་འདིའི་ནང་གི་དྲིས་ལན་དག་ཕྱོགས་གསུམ་ལ་བགར་ནས་བཤད་ཆོག་པར་བསམ། བོད་ཀྱི་སྲོལ་རྒྱུན་རྩོམ་རིག བོད་ཀྱི་དེང་རབ་རྩོམ་རིག བོད་གཞི་བྱེས་གཉིས་ཀྱི་རྩོམ་རིག
ལན་འདེབས་གནང་མཁན་གྱི་བུད་མེད་དག་ནི་རྒྱ་གར་དང་ཨ་རི། ཨོ་སི་ཁྲོ་ལི་ཡ། ཁ་ན་ཊ། སིལ་སི། བྷེལ་འཇམ་སོགས་རྒྱལ་ཁབ་འདྲ་མིན་ན་ཡོད་པའི་ལྟ་ཚུལ་དང་མཐོང་ཚུལ། གོ་རྟོགས། ནུས་སྟོབས། ཁོར་ཡུག་མ་འདྲ་བ། ཡུལ་སྲོལ་མ་འདྲ་བ། སྐད་ཡིག་མ་འདྲ་བ། རིག་གཞུང་མ་འདྲ་བ། དད་མོས་མ་འདྲ་
བའི་རྒྱལ་ཁབ་རེ་ན་བཞུགས་མཁན་གྱི་མཐོང་ཐོས་མྱོང་གསུམ་དང་གོ་རྟོགས་ཀྱི་ནུས་པ་བཏོན་ཞིག་རེད།
རྩོམ་དེབ་ནང་གི་རྩོམ་པ་པོ་དང་ཀློག་པ་པོ་རྣམས་ཀྱི་ལས་རིགས་ཀྱི་ཕྱོགས་ནས་ཡིན་ནའང་། དགེ་རྒན་གྱི་ལས་རིགས། རྩོམ་རིག་དང་ཞིབ་འཇུག་གི་ཕྱག་ལས། གསར་འགོད་པའི་ཕྱག་ལས། བསྒྱུར་རྩོམ་གྱི་ཕྱག་ལས། བོད་མི་མང་སྤྱི་འཐུས་ཀྱི་ཕྱག་ལས། གཞུང་འབྲེལ་ཁྲིམས་ལུགས་ཀྱི་ཕྱག་ལས། དེ་མིན་མཐོ་སློབ་འགྲིམས་བཞིན་དུ་སྤྱི་ཚོགས་བརྒྱུད་ལམ་ཁག་དུ་རྩོམ་འབྲི་བཞིན་པ་དང་གསར་འགྱུར་འབྲི་བཞིན་པ། རྒྱལ་སྤྱིའི་པེན་བོད་ཀྱི་རྩོམ་པ་པོ་མཐུན་ཚོགས་ཀྱི་རྒྱུན་ལས་ཡིན་པ། ཚོགས་མི་ཡིན་པ་སོགས་ཀྱི་བུད་མེད་མང་པོ་ཞིག་གི་དྲིས་ལན་སྣ་འདུས་ཤིག་ལས་གྲུབ་པ་ཞིག།
དྲི་བའི་ཁ་ཕྱོགས་ནི་རྩོམ་རིག་གི་སྐོར་ཡིན་ཀྱང་། རྩོམ་རིག་གི་ནང་གསེས་ནས་ཆབ་སྲིད་དང་འབྲེལ་བའི་སྐོར། རྩོམ་གཞུང་དང་འབྲེལ་བའི་སྐོར། ཆོས་ལུགས་དང་འབྲེལ་བའི་སྐོར། དེང་རབས་སྙན་ངག་དང་འབྲེལ་བའི་སྐོར། སྤྱི་ཚོགས་དཔྱད་བརྗོད་དང་འབྲེལ་བའི་སྐོར། གསར་འགྱུར་དང་འབྲེལ་བའི་སྐོར་སོགས་བརྗོད་བྱ་འདྲ་མིན་ཞིག་ཏུ་གྱུར་བའི་དེབ་ཞིག་ཆགས་ཡོད་པར་འདུག
སྐུ་མགྲོན་གཙོ་བོ་ མཆོག་གིས་ ༼སྨྱུག་ཐོགས་བོད་མོ།༽ ཞེས་པའི་དཔེ་དེབ་དབུ་འབྱེད་དང་སྦྲགས་གསུང་བཤད་གནང་དོན། བཙན་བྱོལ་ནང་བོད་ཡིག་ཐོག་སྤྱི་ཚོགས་དང་འབྲེལ་བའི་དཔེ་དེབ་དཔར་བསྐྲུན་བྱེད་མཁན་དེ་ཙམ་མེད་པའི་སྐབས་འདིར། རྒྱལ་སྤྱིའི་བོད་ཀྱི་ཆ་འཕྲིན་གསར་ཁང་ནས་དཔེ་དེབ་དེ་འདྲ་ཞིག་དཔར་བསྐྲུན་ཐུབ་པར་བོད་མི་མང་སྤྱི་འཐུས་ལྷན་ཚོགས་དང་ང་རང་སྒེར་ངོས་ནས་ལེགས་སོའི་བསྔགས་བརྗོད་ཞུ་རྒྱུ་དང་། ང་ཚོས་དཔེ་དེབ་དཔར་བསྐྲུན་བྱེད་ཐུབ་པ་ཙམ་མིན་པར་དཔེ་དེབ་དེ་དག་སྤྱི་ཚོགས་སྟེང་ཡོད་པའི་དཔེ་མཛོད་ཁང་དང་། ཤེས་ཡོན་བསྟི་གནས་ཁང་སོགས་ཀྱི་ནང་བགོ་བགྲེམས་ཀྱིས་དཔེ་དེབ་དཔར་བསྐྲུན་ཞུས་པའི་དམིགས་ཡུལ་སྒྲུབ་ཐུབ་པ་ཞིག་དགོས་གལ་ཆེན་པོ་མཐོང། རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་སྐུ་ཞབས་ཤཱན་ཏ་ཀུ་མར་ (Shri Shanta Kumar) མཆོག་གིས་ལྗགས་རྩོམ་མཛད་པའི་ཧི་མཱ་ལ་ཡའི་སྟེང་གི་གྲིབ་གཟུགས་དམར་པོ། (Red Shadow over the Himalayas) ཞེས་པའི་དཔེ་དེབ་དེ་ཕྱི་ལོ་ ༡༩༦༥ ལོར་དཔར་བསྐྲུན་དང་པོ་ཞུས་པ་དང་། དེ་ནས་ ༸གོང་ས་མཆོག་གིས་ཕྱི་ལོ་ ༢༠༡༦ ལོར་སླར་ཡང་དཔེ་དེབ་དེ་དབུ་འབྱེད་ཀྱིས་དཔར་བསྐྲུན་གནང་ཡོད་པ་སོགས་ལུང་འདྲེན་གྱིས་དཔེ་དེབ་གང་འདྲ་ཞིག་དཔར་བསྐྲུན་ཞུས་ཀྱང་དེས་དུས་ཚོད་ག་དུས་ཡིན་ཡང་རན་པོ་ཡོད་པའི་ཐོག་ནས་བསྐྱར་དུ་དཔར་བསྐྲུན་ཞུས་ཐུབ་པ་བྱས་ནས་སྤྱི་ཚོགས་ ལ་ཕན་ཐོགས་ཐུབ་ན་ཡག་པོ་ཡོད་ཅེས་དང་།
ཕྱོགས་མཚུངས་དཔལ་ལྡན་ཚོགས་གཞོན་མཆོག་གིས་ཕྱི་ནང་གི་མཛད་སྒོ་ཆེ་ཁག་དང་། དཔེ་དེབ་དབུ་འབྱེད་སོགས་སུ་བཅར་བའི་ཉམས་མྱོང་འགྲེལ་བརྗོད་གནང་ཡོད་པ་མ་ཟད། ཕྱིའི་དཔེ་དེབ་དབུ་འབྱེད་གནང་སྐབས་མཁས་དབང་དང་། དཔེ་དེབ་ཀྱི་བརྗོད་གཞི་དང་འབྲེལ་བའི་ཞིབ་འཇུག་པ་སོགས་གདན་ཞུས་ཀྱིས་བགྲོ་གླེང་ལྷུགས་པོ་གནང་སྟེ་དཔེ་དེབ་ཀྱི་ནང་དོན་གང་ཙམ་དབུ་འབྱེད་མཛད་སྒོའི་སྐབས་རྟོགས་ཐུབ་པའི་དགེ་མཚན་ལེགས་ཆ་རྣམས་ང་ཚོས་མ་འོངས་པར་དཔེ་ལེན་དགོས་པ་སོགས་ཀྱི་གསུང་བཤད་གནང་གྲུབ་མཚམས་དཔེ་དེབ་དབུ་འབྱེད་ཀྱི་མཛད་སྒོ་ལེགས་པར་གྲུབ་གནང་ཡོད།
བཅར་འདྲིའི་དམིགས་ཡུལ་ནི།
༡༽སྒེར་དེབ་ཅན་དང་སྒེར་དེབ་མེད་ཀྱང་རྩོམ་འབྲི་བཞིན་པ།བུད་མེད་ཀློག་པ་པོ་བཅས་ཀྱི་མྱོང་རོལ་ཚུད་ཐབས་བྱས་ཡོད།
༢༽བཙན་བྱོལ་བའི་གནས་བབ་ནས་གཞིས་བྱེས་གཉིས་ཀྱི་བུད་མེད་བརྩམས་ཆོས་ལ་གུ་ཡངས་པའི་ལྟ་ཚུལ་འདོན་པར་རེ་བ་བརྒྱབ་ཡོད།
༣༽ཀློག་མཁན་ཚོས་རྩོམ་པ་པོ་སོ་སོའི་རྩོམ་གཤིས་ཐད་ཀར་མཇལ་ཐུབ་པ་ཡོང་ཆེད་དྲིས་ལན་དག་ཡི་གེའི་ལམ་ནས་ལན་འདེབས་གནང་དུ་བཅུག་ཡོད།
ཛམ་གླིང་གི་དགའ་གྲོགས་རྟག་ཏུ་གནས་པར་གྱུར་ཅིག