ས་ཕོ་ཁྱི་ཡི་ལོ་ལ།

རྣམ་འཕྱང་ཞེས་པ་ས་ཕོ་ཁྱི་ཡི་ལོའི།།
ལོ་རེའི་བྱུང་བ་རབ་བྱུང་ལ་བསྟུན་ཏེ།།
བསྟན་རྩིས་རེའུ་མིག་དག་ཏུ་གསལ་བ་ལས།།
ཐོར་རེ་བཏུས་ནས་འདས་པའི་ལོ་རྒྱུས་འཚོལ།།

རབ་བྱུང་དང་པོའི་ས་ཕོ་ཁྱི་ཡི་ལོ།།
ཕྱི་ལོ་ཆིག་སྟོང་བརྒྱ་མེད་ང་བརྒྱད་ཡིན།།
ཇོ་བོའི་སློབ་མ་ཆག་ཁྲི་གཤེགས་པ་དང་།།
འདི་ཡི་ཕྱི་ལོར་རྔོག་ལོ་འཁྲུངས་ཞེས་གསལ།།

རབ་བྱུང་གཉིས་པའི་ས་ཕོ་ཁྱི་ཡི་ལོར།།
ཁྲོ་ཕུ་རྒྱལ་ཚ་རིན་ཆེན་མགོན་ཉིད་འཁྲུངས།།
མཉམ་མེད་དྭགས་པོ་འོ་དེ་གུང་རྒྱལ་བྱོན།།
སྣེའུ་ཟུར་བ་འདས་ཞེས་ཚེ་ཏན་གསུངས།།

ཕྱི་ལོ་ཆིག་སྟོང་བརྒྱ་དང་དོན་བརྒྱད་ལོའི།།
སྔ་ཕྱི་འདི་ལ་སྐྱོབ་པ་འཇིག་རྟེན་གསུམ་མགོན་གྱིས།།
གདན་ས་ཐེལ་བཏབ་ཕག་གྲུའི་གདན་སར་ཕེབས།།
ཞང་ལོ་གྲུབ་དཔལ་གྲོལ་སྒོམ་ཆོས་གཡུང་འདས།།

རབ་བྱུང་བཞི་པའི་ས་ཕོ་ཁྱི་ཡི་ལོར།།
ཟངས་ཚ་རིན་ཆེན་རྒྱལ་མཚན་འཁྲུངས་ཞེས་བཤད།།
སངས་རྒྱས་གཞོན་ནུ་ཞང་གི་གདན་སར་ཕེབས།།
ཟངས་ཚ་བསོད་རྒྱན་འདས་པའི་སྔ་ལོ་རེད།།

ཕྱི་ལོ་ཆིག་སྟོང་ཉིས་བརྒྱ་གོ་བརྒྱད་ལོར།།
རྒྱལ་བ་གཡུང་སྟོན་རྒྱ་ལ་སྤྱན་དྲངས་ཟེར།།
བདག་ཆེན་བཟང་པོ་དཔལ་བ་བོད་དུ་ཕེབས།།
གཡའ་བཟང་ཆོས་རྗེ་ཆོས་བསམ་འདས་ཞེས་འཁོད།།

རབ་བྱུང་དྲུག་པའི་ས་ཕོ་ཁྱི་ཡི་ལོར།།
རོལ་པའི་རྡོ་རྗེ་དབུས་ནས་ཁམས་སུ་ཕེབས།།
ས་སྐྱའི་ཏའི་ཤྲཱི་ཀུན་རྒྱན་འདས་ཞེས་གསལ།།
སི་ཏུ་བྱང་རྒྱན་གོང་མའི་ཐོབ་ལ་དབང་།།

ཕྱི་ལོ་ཆིག་སྟོང་བཞི་བརྒྱ་བཅོ་བརྒྱད་ལོར།།
རྗེ་ཡིས་འཇུག་པའི་རྣམ་བཤད་བརྩམས་པ་དང་།།
འགྲེལ་བ་བཞི་སྦྲགས་པར་ལ་བརྐོས་པར་བཤད།།
སྣར་ཐང་ཁྲི་ལ་བསོད་ནམས་མཆོག་གྲུབ་ཕེབས།།

རབ་བྱུང་བརྒྱད་པའི་ས་ཕོ་ཁྱི་ཡི་ལོ།།
པཎ་ཆེན་བསོད་ནམས་གྲགས་པའི་འཁྲུངས་ལོ་ཡིན།།
མཁས་གྲུབ་ནོར་བཟང་རྒྱ་མཚོས་དུས་འགྲེལ་བརྩམས།།
འགོས་ལོའི་དེབ་སྔོན་གྲུབ་ཅེས་དུང་དཀར་གསུངས།།

ཕྱི་ལོ་ཆིག་སྟོང་ལྔ་བརྒྱ་སོ་བརྒྱད་ལོར།།
དཔལ་ཁང་ལོ་ཙས་དག་ཡིག་ངག་སྒྲོན་བརྩམས།།
ཀརྨ་མི་བསྐྱོད་རྡོ་རྗེས་ཕར་ཕྱིན་འགྲེལ།།
སེར་འབྲས་གཉིས་ལ་བསྐུར་བ་འབྱོར་ཅེས་འཁོད།།

རབ་བྱུང་བཅུ་པའི་ས་ཕོ་ཁྱི་ཡི་ལོར།།
པཎ་ཆེན་བློ་བཟང་ཆོས་ཀྱི་རྒྱལ་མཚན་དེ།།
གངས་ཅན་ཆོས་འཕེལ་གླིང་གི་ཁྲི་ལ་ཕེབས།།
ས་སྐྱ་ཨ་མྱེས་འཁྲུངས་ནས་ལོ་གཅིག་འཁོར།།

ཕྱི་ལོ་ཆིག་སྟོང་དྲུག་བརྒྱ་ང་བརྒྱད་ལོར།།
༧གོང་ས་ལྔ་པས་འཇམ་དཔལ་ཞལ་ལུང་བརྩམས།།
སྡེ་སྲིད་བསོད་ནམས་ཆོས་འཕེལ་འདས་པ་དང་།
འདར་ལོས་སྒྲ་མདོ་བསྒྱུར་ཞེས་དུང་དཀར་གསུངས།།

རབ་བྱུང་བཅུ་གཉིས་ས་ཕོ་ཁྱི་ཡི་ལོར།།
ཅུང་གར་དམག་གིས་དབུས་སུ་བཅོམ་གཏོར་བྱས།།
ལོ་ཆེན་དྷརྨ་ཤྲཱི་སོགས་བགྲོངས་པའང་འདི་དུས་ཡིན།
གཞོན་ནུ་ཟླ་མེད་གཏམ་རྒྱུད་འདི་ལོར་བརྩམས།།

ཕྱི་ལོ་ཆིག་སྟོང་བདུན་བརྒྱ་དོན་བརྒྱད་ལོར།།
ཚེ་སྨོན་ངག་ཚུལ་དགའ་ལྡན་ཁྲི་ལ་ཕེབས།།
རྡོ་རིང་གུང་གིས་ས་ངན་དཔུང་འཇུག་བྱས།།
གུང་ཐང་སྤྲུལ་སྐུ་དབུས་ལ་ཕེབས་སོ་ལོ།།

རབ་བྱུང་བཅུ་བཞིའི་ས་ཕོ་ཁྱི་ཡི་ལོར།།
རྒྱལ་བ་མཁས་གྲུབ་རྒྱ་མཚོ་འཁྲུངས་པ་དང་།།
བཙན་པོ་འཇམ་ཆོས་བསྟན་འཕྲིན་ཁྲི་ཆེན་ངག་ཆོས་དང་།།
ཁྲི་ཆེན་བྱང་ཆུབ་ཆོས་འཕེལ་འདས་ཞེས་བཤད།།

ཕྱི་ལོ་ཆིག་སྟོང་བརྒྱད་བརྒྱ་གོ་བརྒྱད་ལོར།།
འཇིགས་མེད་དམ་ཆོས་རྒྱ་མཚོ་འཁྲུངས་པ་དང་།།
ཐུའུ་བཀྭན་སྐལ་བཟང་དམ་ཆོས་ཉི་མ་དང་།།
ཤིང་བཟའ་སྤྲུལ་སྐུ་ལ་སོགས་འཁྲུངས་ཞེས་གསལ།།

རབ་བྱུང་བཅུ་དྲུག་ས་ཕོ་ཁྱི་ལོ།།
ཕྱི་ལོ་ཆིག་སྟོང་དགུ་བརྒྱ་ང་བརྒྱད་ཡིན།།
བསྟན་པར་ཉམས་འགྲིབ་ཆེ་ཞེས་ཚེ་ཏན་གསུངས།།
རྒྱལ་བས་ལྷ་སར་ལྷ་རམས་དམ་འཇོག་མཛད།།

རྫོགས་སོ།།

ས་ཕོ་ཁྱི་ཡི་ལོ་རྒྱུས་སྙིང་བསྡུས་འདི་ནི། དེ་སྔར་འདི་ག་སློབ་གྲྭ་ཆེན་མོའི་དགེ་རྒན་ཆེན་མོ་མཁས་དབང་ཁཱ་ར་(György Kara)ཡིས་སོག་པོའི་ལོ་སར་སྐབས་སོག་པོའི་རྒྱལ་རབས་དང་ལོ་རྒྱུས་ལས་ལོ་དེའི་གལ་ཆེའི་མཛད་པ་རྣམས་དྲངས་ཏེ་ལོ་སར་ལ་བསུ་བ་བྱེད་པ་དེ་ཉིད་ལ་དཔེར་ལེན་གྱིས་ དགེ་རྒན་ཆེན་མོ་སྤེར་ལིང་(Elliot Sperling)གིས་ཀྱང་སློབ་གྲྭ་ཆེན་མོའི་བོད་ལུགས་ལོ་སར་སྐབས་སུ་ རབ་བྱུང་དང་པོ་ནས་ད་བར་གྱི་ལོ་རེའི་མཛད་པ་འཆད་པའི་སྲོལ་ཞིག་བྱུང་ཞིང་། དེ་དག་ལ་རྗེས་སུ་ཡི་རངས་པ་དང་བཅས་ཕྲན་གྱིས་ལོ་ཤས་རིང་འདི་ལྟ་བུ་ཞིག་བསྡེབས་པ་ཇི་བཞིན། འདི་ལོར་ཡང་བསྟན་རྩིས་ཀུན་བཏུས་དང་ལོ་ཚིགས་དྭངས་ཤེལ་མེ་ལོང་གཉིས་ལས་བཏུས་ཏེ་བཀོད་པ་དགེའོ།། ས་ཁྱི་ལོའི་ལོ་སར་ལ་བཀྲ་ཤིས་བདེ་ལེགས་ཞུ།