《མཆོད་མེ་སྙན་ངག་ཚགས་པར་》

ཤིས་ཚང་ལྗང་མྱུག

ཕྱི་ཟླ་༤ ཚེས་༡༤ ཉིན་ཁམས་ཡུལ་ཤུལ་ཁུལ་དུ་ས་ཡོམ་གོད་ཆག་བྱུང་བ་ནས་བཟུང་བྱེས་ཀྱི་གདན་ས་ཁག་ཏུ་བདུན་ཚིགས་རེ་རེར་མཆོད་འབུལ་སྨོན་ལམ་ཆེད་ཚོགས་གནང་གིན་ཡོད་པ་བཞིན། འདི་ག་དཔལ་ལྡན་འབྲས་དཀར་སྤུངས་པའི་བཀྲ་ཤིས་སྒོ་མང་གྲྭ་ཚང་དང་མཁས་མང་བློ་གསལ་གླིང་གྲྭ་ཚང་གཉིས་ཀྱིས་ཀྱང་བདུན་ཚིགས་རེ་རེར་གྲྭ་ཚང་སོ་སོས་མཆོད་འབུལ་བསྔོ་སྨོན་རྒྱ་ཆེར་གནང་བར་མ་ཟད། བདུན་ཚིགས་རེ་རེའི་དགོང་དྲོར་གྲྭ་ཚང་ཤར་ནུབ་གཉིས་མཉམ་དུ་ཚོགས་ཏེ་བསྔོ་བ་སྨོན་ལམ་ཆེད་ཚོགས་གནང་ཡོད། ཕྱི་ཟླ་༦ཚེས་༡ཉིན་ཏེ་དགོང་ཞག་ཞེ་དགུ་འཁོར་བའི་ཉིན་མོར་དཔལ་ལྡན་འབྲས་དཀར་སྤུངས་པའི་གླིང་དུ་འདོན་སྤེལ་བྱེད་བཞིན་པའི་《མཆོད་མེ་སྙན་ངག་ཚགས་པར་》གྱིས་ཐེངས་འདིའི་ས་ཡོམ་གོད་ཆག་ཁྲོད་རྐྱེན་འདས་སུ་ཕྱིན་པ་དང་ཤུལ་ལུས་གདུང་ལྡན་སྒ་སྐྱེ་དགུའི་མི་མང་ཚོར་དམིགས་ཏེ། དཔལ་ལྡན་འབྲས་སྤུངས་གླིང་གི་དགེ་འདུན་པ་ཚོས་ཕུལ་བའི་མྱ་ངན་ཞུ་ཚིག་གམ་རྗེས་དྲན་སྙན་ངག་སུམ་ཅུ་ལྷག་ཆེད་སྒྲིག་བྱས་ཏེ། མཆོད་མེ་སྙན་ངག་ཚགས་པར་དམིགས་བསལ་འདོན་ཐེངས་ཤིག་ཏུ་ཉིན་དེའི་དགོང་དྲོ་དངོས་སུ་འགྲེམ་སྤེལ་བྱས་ཡོད། འདི་ནི་གདན་སའི་དགེ་འདུན་པ་ཚོའི་མྱ་ངན་རྩོམ་ཡིག་ཆེད་བསྡུས་ཀྱི་ཚགས་པར་ཐོག་མ་ཡིན་ལ། ཐག་རིང་ཐག་རིང་གི་བོད་མིའི་བརྩེ་བ་དང་དམ་ཚིག་མཚོན་པའི་མྱ་ངན་གྱི་གླུ་སྐད་གསར་བ་ཞིག་ཀྱང་ཡིན། མཆོད་མེ་སྙན་ངག་ཚགས་པར་ནི་གྲྭ་རྐྱང་ཞིག་གིས་སློབ་གཉེར་གྱི་ལས་ཞོར་དུ་གཉེར་གྱིན་པའི་སྙན་ངག་རྐྱང་བའི་ཚགས་པར་ཞིག་ཡིན། ཚགས་པར་དེ་སྔ་ལོའི་ཕྱི་ཟླ་༡༢ཚེས་༡༠ཉིན་གསར་དུ་འགོ་འཛུགས་ཀྱིས་དུས་ཚིགས་ངེས་མེད་ལ་འདོན་སྤེལ་བྱེད་ཀྱིན་ཡོད་ལ། རྩོམ་སྒྲིག་པ་ཤིས་ཚང་ལྗང་མྱུག་ཅེས་པ་ཡིན།
chol-may