དཔལ༧ས་སྐྱའི་གདུང་སྲས་རིན་པོ་ཆེས་ཐའེ་ཝན་དུ་བཀའ་ཆོས་གནང་བ། 

གནས་ཚུལ་མཁོ་སྤྲོད་པ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་ཚོགས།

དེ་ཡང་ཉེ་ཆར་ཐའེ་ཝན་དང་ཧོང་ཀོང་སོགས་སུ་ཡོངས་གྲགས་མཛད་རིམ་ཐོག་མར་བསྐྱངས་གནང་བའི་དཔལ་ས་སྐྱ་ཕུན་ཚོགས་ཕོ་བྲང་གི་གདུང་སྲས་༧སྐྱབས་རྗེ་ཨ་བི་ཀྲྀ་ཏ་བཛྲ རིན་པོ་ཆེ་མཆོག་ཐའེ་ཝན་ཐའོ་ཡན་གནམ་ཐང་དུ་ཞབས་སོར་མཁོད་པ་དང་། ཞིབ་འཇུག་ཚོགས་པའི་ཚོགས་གཙོ་བླ་མ་ཡེ་ཤེས་རབ་རྒྱས་དང་ཀཿཐོག་རིག་འཛིན་ཆེན་པོ། དེ་བཞིན་ཐའེ་ཝན་རྫོང་སར་བཤད་གྲྭའི་ཆོས་ཚོགས་ཁག་གི་མཁན་པོ་རྣམ་པའི་དབུས་དགེ་འདུན་པ་དང་དད་སློབ་དག་གིས་ཕེབས་གསུ་ཟབ་རྒྱས་དང་འབྲེལ། རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་དང་ཀཿཐོག་རིག་འཛིན་ཆེན་པོའི་ཆོས་ཚོགས་ཀྱིས་ཇི་ལྟར་གསོལ་བ་བཏབ་པ་ལྟར། སྤྱི་ལོ་༢༠༡༨ ཟླ་༡ ཚེས་ ༡༦ ཉིན་རྒྱལ་ས་ཐའེ་པེ་རུ་ཆོན་ཏུའི་ཚོགས་ཁང་དུ་མི་མང་ལ་བཀའ་ཆོས་གནང་ཡོད་ཅིང་། དེ་ཡང་ཞིབ་འཇུག་ཚོགས་པའི་ཚོགས་གཙོ་དང་རྒྱུན་ལས་རྣམ་པས་རྟེན་གསུམ་འདེགས་འབུལ་སོགས་གྲུབ་མཚམས། དེར་འདུས་མི་མང་བརྒྱ་ཕྲག་དུ་མར་དཔལ་ལྡན་ས་སྐྱའི་ཐུན་མིན་བློ་སྦྱོང་གི་ཁྲིད་ཡིག་ཞེན་པ་བཞི་བྲལ་གྱི་ཐོག་ནས་བཀའ་ཆོས་རྒྱས་པར་བསྩལ།

༧སྐྱབས་རྗེ་གདུང་སྲས་རིན་པོ་ཆེ་མཆོག་ནི་དེང་གི་གཞོན་སྐྱེས་བླ་ཆེན་དག་གི་ནང་ནས་ཚང་མས་གུས་ཞབས་དང་རེ་བ་ཆེན་པོ་བཅོལ་ཡུལ་ཞིག་ཆགས་བཞིན་ཡོད་པ་དང་། ཁོང་ལ་གུས་ཞབས་དང་དོ་སྣང་ཞུ་མཁན་ཕྱི་རྒྱལ་དང་ཐའེ་ཝན། ཧོང་ཀོང་། རྒྱ་ནག་སྐམ་ས་བཅས་སུའང་མང་པོ་ཡོང་བཞིན་ཡོད་པར་མ་ཟད། ཁོང་གིས་ལོ་སྔ་མར་སྐུ་སྒེར་གྱི་ངོ་དེབ་ཐོག་བཀོད་པའི་དེང་རབས་འཁྲབ་སྟོན་གྱི་རྣམ་པ་དང་བསླབ་བྱ་ཟུང་དུ་འབྲེལ་བའི་བོད་སྐད་ཀྱིས་བོད་ཀྱི་སྐད་ཡིག་དར་སྤེལ་དང་སྦྲགས་སྐད་ལ་འཛེམས་དགོས་པའི་སྐོར་གྱི་བཀའ་སློབ་ཀྱི་བརྙན་ཐུང་དང་། དབྱིན་སྐད་ཀྱིས་གསུངས་པའི་ནང་ཆོས་ངོ་སྤྲོད་ཀྱི་བརྙན་ཐུང་སོགས་ལ་མི་ཧ་ཅང་མང་པོས་དམིགས་བསལ་དོ་སྣང་ཆེན་པོ་བྱས་ཡོད་པ་རེད།

ཐེངས་འདིར་ཡང་། ཁོང་གི་བཀའ་སློབ་གནང་སྟངས་ལ་ཆོས་ཀྱི་དགོངས་དོན་གྱི་ཆེ་བ་དང་དོན་སྙིང་མ་བརླགས་པའི་ཐོག་ནས་དེང་དུས་ཀྱི་མིའི་སེམས་ཁམས་དང་མཐུན་པའི་བཀའ་སློབ་གནང་སྟངས་ལ་མང་པོ་ཞིག་གིས་བསྔགས་བརྗོད་དང་གདེངས་འཇོག་ཆེན་པོ་ཞུ་བཞིན་ཡོད་པ་རེད་འདུག