—སྦྲ་དཔལ་ལྡན། ༼ཧྥ་རན་སི༽
Université de Franche-comté
ཚེ་སྐྱིད་ དོ་དགོང་
ངའི་སེམས་འགྱུ་བློ་བུར་བ་ཞིག་མ་ཡིན་པས
ངའི་ཧུབ་ཀྱིས་ཆང་འཐུང་ན་འདོད་པས་
ཆང་ཕོར་ རེ་རེར་
སྙིང་གཏམ་དམར་དམར་ཞིག་དང་ལྷན་དུ་
ཁྱོད་ཀྱི་བྲང་གཞུང་ནས་ཧུབ་ཀྱིས་འཐུང་ན་འདོད
འོན་ཀྱང་ ལས་འབྲས་ལ་གོ་ལྡོག་དབེན་པའི་གྲུ་ཁ་ཞིག་ནས
ཁྱོད་རང་ཁུ་སུམ་མེར་རྨི་ལམ་དུ་ཡལ་ཡོད་པས་
ང་ལ་ཆང་རོགས་གཏན་ནས་ཐོབ་མ་སོང་
ཚེ་སྐྱིད་ དོ་དགོང་
ངའི་སེམས་པའི་ན་ཟུག་ཡོད་ཚད་དང་
སེམས་གཏམ་ལྷག་མ་ཞིག་གིས་སྐད་ཆ་གློད་ཕྱིར་
ངའི་སེམས་པའི་གོམ་ཁ་Super U་ལ་བསྒྱུར
བསྒྱུར་ཟིན་པའི་སྟོང་བསམ་ལྷག་མ་ཞིག་གི་རྨི་ལམ་ལ་སྒུག་ནས་
ཁ་པར་དང་སྙིང་དམར་བོ་ལག་ཏུ་བཟུང་ནས་
ཁྱོད་ཀྱི་ཁ་སང་གི་སྐད་ཆ་རེ་རེར་
ངའི་བཟི་ཁ་བཙན་པས་ཆང་ཁུ་དང་ལྷན་དུ་བཙན་གྱིས་མིད་མོད་
ངའི་བརྩེ་དུངས་ཀྱི་བཟི་ཁ་བཙན་པས་
ང་ནམ་ཡང་བཟི་ཐུབ་མ་སོང་
ཚེ་སྐྱིད་ དོ་དགོང་
ངའི་ཁོར་ཡུག་ན་རྒྱུ་བའི་རླུང་བུ་དལ་བུ་ཞིག་གིས་
ངས་ཁྱོད་དྲན་པའི་སྡོང་ལོ་ཡོད་ཚད་རླུང་གིས་བསྐྱོད་རུང་
ད་ལྟ་ང་སྡོད་སའི་ཁོར་ཡུག་ན་ཧ་ཅང་ཁུ་སུམ་པས་
ངས་ཁྱོད་དྲན་པའི་ན་ཟུག་དང་
ཁྱོད་ལ་འཁྲེང་བའི་སེམས་པ་ཡོད་ཚད་
ཡོད་ཚད་ནས་ཡོད་ཚད་དལ་ཅག་གེར་ངང་
ངས་ཁྱོད་ཀྱི་མཛེས་སྡུག་གི་ལང་ཚོ་ལ་སྒོམ་ཞོར་
མིག་ཟུང་བཙུམ་ནས་ ཅི་ལྟར་འཐུང་ཡང་
མིག་ཟུང་གིས་བཟི་ཁ་ནམ་ཡང་བཙན་མ་མྱོང་།
2017/09/23 ཉིན་གྱི་མཚན་མོར་བྲིས།
* མཆན་ Super U ཟེར་བ་དེ་ཧྥ་རན་སུའི་སྣ་འཛོམས་ཚོང་ཁང་ཆེན་མོ་ཞིག་གི་མིང་ཡིན།
༄༅། ཚེ་སྐྱིད་་དོ་་དགོང་ལགས།
ཁྱོད་ཀྱི་རྩོམ་དེ་སུ་ལ་བྲིས་པ་ཡིན། ནང་དོན་གཙོ་བོ་གང་བརྗོད་དམ།
ལོག་སྐད་རང་ད་མ་ཡིན་ནམ།
ཁྱོད་རང་བྲིས་པའི་རྩོམ་ཡིག་། ཁྱོད་ནས་ཤེས་ན་མ་གཏོགས།
གཞན་གྱི་གོ་དོན་མ་ཤེས། བྲག་ལ་བཤད་དང་མཚུངས་སོང།
གོ་དོན་མ་ཤེས་བཤད་པ་དེ།
སྙན་ངག་མཁས་ཀྱང་ས་རྡོ་བཞིན།
དེས་ན་གཞན་མང་རྟོགས་པའི་སླད།
བཤད་དགོས་སྙན་ངག་མཁས་པ་ཚོ།
ཨ་འབར་འཇིག་དབང་།
གོ་དགོས་མཁན་དེ་ཁྱེད་ཉིད་མིན་པས་ཁྱེད་ལ་གོ་རྒྱུ་མེད་པའི་སྙན་ངག་ཅིག་ཏུ་འགྱུར་སྲིད་མོད་རྩོམ་པ་བོས་སྙན་ཚིག་གི་མངལ་དུ་སྦྲུམ་པའི་གཞོན་ནུ་མ་དེས་གོ་སོང་ན་ཁོང་གི་མངོན་འདོད་དེ་ཡིན་རྒྱུ་རེད་སྙམ་།
མ་གཞི་ནས་སྙན་འདི་ཆང་གཏམ་ཡིན་པས་ཁྱེད་ཀྱིས་མི་གོ་བར་ཁག་ལར་ནས་མེད། ཀུ་རེའི་ཚུལ་དུ།
ཨ་འབར་འཇིགས་ལགས་ཀྱི་སྒེར་གྱིས་བསམ་ཚུལ་གསུངས་བར་དགའ་བསུ་ཞུ སྙན་ངག་ཅིག་གི་བལྟ་ཚུལ་བཤད་དུས་. སྙན་ངག་དེས་བྲོ་བ་ཁྱོད་ཀྱིས་མ་གོ་ན་. ངས་སྙན་ངག་ལ་རིན་ཐང་མ་ཡོད་པས་ཡིན་ན་ཐང་།. འོན་ཀྱང་།. སྣན་ངག་འབྲི་བ་བོར་གོ་བརྡ་འཕྲོད་ཡོན་ན་སྙན་ངག་པས་ཟེ་འདོད་དེ་ལས་མ་འདས་སོ།