དཔལ་དགྱེས་པ་རྡོ་རྗེ།
ན་མོ་མ་ཧྰ་གུ་རུ་པདྨ་ཀ་ར་ཡེ།
བདེ་ཆེན་ལྷན་སྐྱེས་དགྱེས་པ་རྟག་རོལ་བ། །
ཉིན་མཚན་ཁོར་ཡུག་འོད་གསལ་ངང་གནས་པའི། །
འཕགས་བོད་མཁས་གྲུབ་བླ་མ་བརྒྱུད་པར་བཅས། །
མི་ཕྱེད་དད་པའི་ཕྱག་གིས་ཡང་ཡང་འདུད། །
རྩ་ཁམས་ལས་རླུང་གཡོས་པའི་ཀུན་རྟོག་རྩལ། །
བག་ཆགས་རང་སྣང་ཞེན་པའི་འཁྲུལ་རྟོག་ཆེ། །
སྟོང་གཟུགས་རྨི་ལམ་སྒྱུ་མའི་གྲོང་ཁྱེར་དུ། །
སྐྱེ་བོ་ཕལ་ཆེར་རང་དབང་མེད་པར་འཁྲུལ། །
མ་བརྟགས་བདེ་སྡུག་ཚོར་བ་བསླུ་མེད་ཅིང་། །
བརྟགས་ན་རྡུལ་ཙམ་རང་བཞིན་མ་གྲུབ་པས། །
རྨི་ལམ་དང་ནི་ད་ལྟའི་སྣང་བ་ལ། །
བདེན་རྫུན་ཁྱད་པར་གང་གིས་འབྱེད་པར་ནུས། །
རྣམ་རྟོག་བློ་ལས་འགོངས་པའི་ལྐོག་གྱུར་ཅིག །
རྣམ་དཔྱོད་རྩལ་ལས་མིན་པའི་འཁྲུལ་སྣང་ཉིད། །
དུས་གསུམ་བརྟག་པའི་ལུང་བསྟན་འཁྲུལ་མེད་དེ། །
རྨི་ལམ་བར་དོའི་སྒྱུ་འཕྲུལ་ཨེ་མ་ཧོ། །
བརྒྱ་ཕྲག་དཀའ་བའི་ཚེགས་ལ་མ་ལྟོས་པར། །
ཐུན་གསུམ་མནལ་དུ་ཡུར་བའི་གཉིད་ཁུང་ནས། །
མི་ཚེའི་གསང་གནད་འཚོལ་བའི་མན་ངག་དེ། །
རྨི་ལམ་རྣལ་འབྱོར་ལས་གཞན་མེད་ཅེས་གསུངས། །
ལྕགས་ལ་གསེར་འགྱུར་རྩི་ཡིས་བཏབ་པ་བཞིན། །
རྨི་ལམ་སྤྲུལ་བསྒྱུར་འོད་གསལ་འབྱོངས་པ་ཡིས། །
སྣང་སྲིད་དག་པའི་ཞིང་དུ་བསྒྱུར་བའི་ཚེ། །
ཡ་མཚན་ལྟད་མོ་སེམས་ཀྱི་གསང་ནས་མཐོང་། །
གྲངས་མེད་འཇིག་རྟེན་མང་པོས་ཆོད་པ་ཡི། །
དག་པའི་ཞིང་ཁམས་མིག་འཕྲུལ་ལྟར་བགྲོད་ནས། །
རྒྱལ་དང་རྒྱལ་བའི་སྲས་ལས་ཟབ་རྒྱས་ཀྱི། །
ངོ་མཚར་གདམས་ངག་ནོད་པར་ཨེ་མ་ཧོ། །
སྔོན་དུས་སྟོན་མཆོག་ལྷ་ལས་བབས་པ་གཅིག །
པདྨ་འབྱུང་གནས་བོད་དུ་ཕེབས་པ་གཉིས། །
དམ་པ་མང་པོའི་གཟིམ་ལམ་ལུང་བསྟན་གསུམ། །
མཇལ་བས་རྨི་ལམ་གདམས་པ་ཤིན་ཏུ་ཟབ། །
བདག་ལ་བཟང་པོ་ཡོན་ཏན་ཆེར་མེད་ཀྱང་། །
ཆུང་ནས་རྨི་ལམ་བཟང་ངན་ཐིག་མོ་ཞིག །
ཡིད་ཆེས་ང་ཡི་མི་ཚེ་འདི་ལ་བརྟེན། །
དེས་ན་བདེ་སྡུག་འཁྲུལ་མེད་བདག་གིས་མཐོང་། །
སྔོན་ཡང་བདག་གི་ཨ་ཕ་འདས་ཚུལ་དང་། །
དྲིན་ཆེན་ཨ་མ་ནད་ཀྱིས་ཟིན་ཚུལ་དང་། །
ང་རང་རྒྱལ་ཁམས་གང་དུ་འགྲོ་འདུག་ཀུན། །
རྨི་ལམ་ལུང་བསྟན་འདི་ལ་བསྟེན་ནས་སྒྲུབ། །
རང་ཡུལ་མ་དབང་རྒྱ་ཡི་བྲན་དུ་བཀོལ། །
རང་བླ་དམ་པ་ཕྱི་གླིང་ཡུལ་དུ་བཞུགས། །
རང་ཆོས་གཙང་མ་འཛིན་པའི་བན་འཁྱམ་ངས། །
རང་ཆོས་བསྟན་སྲིད་ཕྱོགས་ལ་དྲན་པ་བརྟས། །
རང་གི་རྨི་ལམ་ལུང་བསྟན་མ་མཐུན་ན། །
ཀརྨ་གྲགས་ཆེན་ཡིན་ནས་དད་རྒྱུ་དང་། །
གྲོགས་པོ་རྒྱུ་ཆེན་རིགས་ནས་བརྩེ་གདུང་ཞིག །
མ་བྱུང་ད་བར་ལ་རྒྱའི་དཔལ་ལ་ཆགས། །
ཨ་རིའི་ཕོ་བྲང་གནམ་གྲུས་གཏོར་བ་དང་། །
བལ་ཡུལ་རྒྱལ་འབངས་རང་མྱིས་བསད་པ་དང་། །
རང་ཡུལ་སྐྱེ་དགུར་ས་ཡོམ་གནོད་པ་དག །
བདག་ལ་སྔོན་ནས་རྨིས་ཀྱང་བཅོས་ཐབས་བྲལ། །
གཅིག་ན་བདག་ནི་གྲོགས་མེད་གཅིག་པུར་དགའ། །
གཉིས་སུ་སྙིགས་དུས་སྐྱེ་བོ་མགུ་ཐབས་དཀའ། །
གསུམ་ན་དམ་པ་རྣམས་ནི་སྨྲ་བ་ཉུང་། །
དེས་ན་ཡིད་ཆེས་རྨི་ལམ་བྱེད་པར་དཀོན། །
བོད་རིགས་འདྲ་བའི་དྲང་བདེན་བྱམས་བརྩེ་ཅན། །
བདག་གིས་སྙིང་གྲོགས་དག་ལ་བཤད་པ་ལགས། །
སྐྱེས་བའི་སྒྱུ་ལུས་དངོས་སུ་མ་འཕྲད་ཀྱང་། །
བརྩེ་བའི་གདུང་བ་དྭངས་མ་བོད་ལ་ཕྱོགས། །
ཀུ་རེ་རྩེད་མོ་མིན་པར་སེམས་ནས་དྲན། །
དྲེད་མོ་གཏམ་འཆལ་མིན་པར་དགོས་པར་ལྡན། །
རྨི་ལམ་འཁྲུལ་བ་ཡིན་ཡང་ཐ་སྙད་ཙམ། །
སད་རྨི་བར་དོ་ཚང་མ་འདྲ་མཉམ་ལགས། །
མཆོག་གསུམ་སྐྱབས་སུ་འཛིན་པའི་གངས་ཅན་པས། །
རྒྱལ་འགོང་དམ་སྲིར་བརྟེན་ན་མི་ལེགས་པས། །
བསླུ་མེད་སྐྱབས་གནས་དམ་པ་བཞུགས་པའི་དུས། །
ཐབས་མཆོག་རྟེན་འབྲེལ་མ་རལ་ས་མ་ཡ། །
བླ་མ་ལྷག་པའི་ལྷ་ལ་སྐྱབས་འགྲོ་བར། །
འདི་ཕྱི་བར་དོའི་འཇིགས་པ་བསལ་ཕྱིར་དང་། །
རྣམ་མཁྱེན་རྒྱལ་བའི་གོ་འཕང་ཐོབ་པའི་ཕྱིར། །
ཚེ་རབས་གཏན་གྱི་སྐྱབས་གནས་བསྟེན་པ་ལགས། །
ངོ་དགའ་ཁོག་ནག་རང་དོན་ཁ་རྒྱབ་ཙམ། །
དཀོར་རྫས་ཚོང་ལས་ཞིག་ལ་མི་རེ་བར། །
ལས་འབྲས་བདེན་པའི་མཐའ་ལ་ལེགས་བསམ་ནས། །
དད་གསུམ་མི་ཕྱེད་འདུན་པས་སྐྱབས་འགྲོར་འབོད། །
ཤ་རུས་ཁྲག་རྒྱུན་བོད་ལས་མཆེད་པའི་དོན། །
བློ་སྙིང་བྲང་གསུམ་དཀར་པོ་བོད་ལ་མཛོད། །
ལུས་ངག་ཡིད་གསུམ་མཐུན་ན་བོད་རིགས་ཀུན། །
འདོད་གཟུགས་སྲིད་པའི་ཁམས་འདིར་འགྲན་ཟླ་བྲལ། །
ཆོས་ལུགས་ཟེར་ནས་ཕྱོགས་རིས་མཁན་ཞིག་དང་། །
འཚོགས་འདུ་ཟེར་ནས་རང་དོན་ཉི་ཚེ་བ། །
མདོ་སྔགས་རིག་པའི་གཞུང་དང་མི་མཐུན་པའི། །
ལ་རྒྱ་དེ་འདྲ་སྲིད་ན་དབེན་གྱུར་ཅིག །
བཀའ་བསྟན་མན་ངག་རྒྱ་མཚོ་མ་མཐོང་བར། །
སྔ་དུས་སྲོལ་རྒྱུན་དོན་མེད་ཟུར་ཟའི་ཚིག། །
དེང་དུས་ཨ་གསར་ངོ་གཉིས་གྲགས་རྒྱུག་ལས། །
གནའ་དུས་བོན་བན་དེ་ཚོ་ཁྱད་དུ་འཕགས། །
རང་གཤིས་བདེན་པའི་རང་བཞིན་མ་དོར་ནས། །
རང་ལུགས་བྱམས་བརྩེ་ལྷག་བསམ་རྣམ་དག་གིས། །
རང་ཡུལ་གངས་རིའི་འདུག་ཆོས་བསམ་པ་ཚོ། །
རང་གཞན་མི་འདུག་མི་མཆོག་རྒྱལ་བའི་སྲས། །
སྙིང་བརྩེའི་བོད་ཡུལ་ཁ་བ་གངས་ཅན་པས། །
སྙིང་གཏམ་གཙང་མ་ཐུགས་ལས་མི་འདོར་མཁྱེན། །
སྙིང་དང་སྲོག་ལས་གཅེས་པའི་ཆོས་སྲིད་ལ། །
སྙིང་ནས་དམ་ཚིག་དོན་དང་ལྡན་པར་མཛོད། །
རིག་འཛིན་བླ་མའི་བྱིན་རླབས་སྙིང་ལ་ཞུགས། །
རིག་པ་དམ་པའི་ཡིད་དམ་དངོས་གྲུབ་ཐོབ། །
རིག་མ་དགྱེས་པའི་སྙིང་བརྩེས་རྗེས་སུ་བཟུང་། །
གང་བསམ་ལྷུན་གྱིས་འགྲུབ་པའི་བཀྲ་ཤིས་ཤོག །
ཅེས་པ་རབ་རྒྱན་ལྕགས་སྟག་སྤྲེལ་ཟླ་བའི་དབང་ཕྱོགས་དགའ་བ་དང་པོར་རང་གི་རང་ཡུལ་དྲན་པའི་གདུང་དབྱངས་དང་རྨི་ལམ་ཐིག་པའི་ངོ་སྤྲོད་མདོར་བསྡུས་ཤིག་ཡིད་ངོ་ལ་ཅི་་དྲན་དུ་མྱུར་བྲིས་སུ་དཔལ་དགྱེས་པ་རྡོ་རྗེས་བྲིས་པ་དགེའོ། ། ཤྲྰི་སརྦ་བི་ཛ་ཡནྟུ་ཨ་ལ་ལ་ཧོ། །
རྨི་ལམ་ཐིག་པོ་ཡོད་ན་བོད་རང་བཙན་ནམ་ཙམ་ཐོབ་པ་འདུག ལུང་བསྟན་ཡོད་པ་ཞུ།
ཨ་རིའི་ཕོ་བྲང་གནམ་གྲུས་གཏོར་བ་དང་། །
བལ་ཡུལ་རྒྱལ་འབངས་རང་མྱིས་བསད་པ་དང་། །
རང་ཡུལ་སྐྱེ་དགུར་ས་ཡོམ་གནོད་པ་དག །
བདག་ལ་སྔོན་ནས་རྨིས་ཀྱང་བཅོས་ཐབས་བྲལ། །
འདི་དངོས་གནས་ཡིན་ན། མ་བྱུང་སྔོན་ནས་ཚགས་པར་ནང་ལ་བཏོན་མ་ཐུབ་པ་དེ། ཁྱོད་མི་ཆོས་བླ་མའི་རྫུན་ཤོད་མཁན་བོང་ཕྲུག་ཞིག་ལས་མ་འདས་པ་ཐག་ཆོད་པ་རེད་དོ།། མཆན་འདི་བཀླགས་ནས། དེ་རིང་གི་རྨི་ལམ་ལ་བརྟགས་པ་གྱིས་དང་། རང་ངོ་རང་ལ་འཕྲོད་འོངས།། །།
ཀརྡོ་ལགས། རྨི་ལམ་ནང་མི་མཐོང་རྒུ་མཐོང་རྩ་དང་རླུང་དང་། གདོན་གྱི་ཆོ་འཕྲུལ་སོགས་མང་པོ་ཡོད། ང་ཚོར་རྨི་ལམ་ཐིག་པ་ཁོ་ནས་ཆོག བལ་ཡུལ་རྒྱལ་པོ་འཁོར་བཅས་ཉིན་གཅིག་ལ་རྩ་མེད་གཏོང་མཁན་རྒྱལ་པོ་རང་གི་སྲས་རྒན་པ་ར་བཟི་ནས་བྱས་ལུགས་གཞུང་འབྲེལ་ཁྱབ་བསྒྲགས་བྱས་པ་དང་། གཞན་དག་གིས་རྒྱལ་པོ་རང་གི་སྤུན་ཆུང་བས་འཆར་གཞི་ལྡན་པའི་སྒོ་ནས་རྩ་མེད་བཏང་བ་རེད་ཟེར་བ་གཉིས་གང་དེ་བདེན་པ་ཡིན་རྨི་ལམ་མཁན་པོར་འདྲི་དགོས་པ་རེད། ད་དུང་ཨ་རིའི་ཕོ་བྲང་གནམ་གྲུས་གཏོར་ཟེར་བ་ཡང་དགུ་བཅུ་གཅིག་གི་དོན་རྐྱེན་དེར་ཟེར་བ་ཡིན་ནམ། དེ་ཉིན་ཕོ་བྲང་དཀར་པོར་གཏོར་སྐྱོར་བཏང་ཨེ་ཡོད། རྨི་ལམ་མཁན་པོས་གསུང་འབྱོར་པར་ཞུ།
༼༼ཚ་བ་དགའ་རོ་འཕར་ཡོད་ས་རེད་འདུག།༽༽
ཟློག་ཐབས་མི་བྱེད་རྨི་ལྟས་གསང་བ་དེ།།
ཁྱོད་རང་དམྱལ་བར་སྐྱོལ་བའི་རྒྱུ་རུ་འདོད།།
ཤེས་ཤེས་མེད་པར་མིག་བཙུམས་བྱས་བ་དེ།།
སྙིང་རྗེ་བྱང་བསམ་རྟུལ་ཙམ་མ་འབྱོར་རྟགས།།
ཁུག་སོ་གཅིག་ལ་གཅིག་པུར་བསྡད་པ་དེ།།
ཨ་མའི་བུ་ཡིས་རང་སྡུག་མྱང་བ་ཙམ།།
ཧ་ཧ་ཧ།
#3 ཨ་ཁུ་འབྲོག་པ། ་ལགས། ལགས་ཁྱེད་རང་བདེན། རྒྱབ་སྐྱོར་ཡོད། ངས་ཀྱང་ཡང་བསྐྱར་ཨེ་མ་ཧོ་དྲིས་པའོ། ལན་ཐོབ་ཤིག དཔལ་དགྱེས་པ་རྡོ་རྗེ། ཡང་དེ་རིང་ཁོང་བོན་རྒན་ཡིན་ཞེས་གསུངས་འདུག བན་བོན་གཉིས་ཀ་ཡི་མཁན་མུ་དེ། ཁོང་ཡིན་པ་འདྲ། ཧཧཧ།། །།