དྲན་ནས་འཐོར་སོང༌།

ཤར་ཕྱོགས་ཁུག་རྟ།

དང་ག་འགག་པའི་བྲག་རོང་ཞེས།།
ངལ་བའི་དྲ་བ་བསྣོལ་མའི་གནས།།
ཉེར་ལེན་སྲིད་པ་སྐྱུགས་བྲོ་བར།།
སྨྲས་དེར་ཁོ་བོ་ཞེད་སྣང་གིས།།
མྱི་ཆེན་སེམས་ཀྱི་རང་བྱུང་རུས།།
བྱམས་པའི་མདངས་ལ་མ་བརླན་པ།།
བསམ་ཞིང་སྐྱོ་བས་མགོ་བོ་དུད།།
མི་བསླུ་སྐྱོབ་པ་རིན་ཆེན་ཞེས།།
སྣང་ཚོད་ནར་མོའི་སྤུད་དུ་སྤྲས།།
ཡིན་པར་མོས་པའི་འཇུག་སེམས་ཀྱིས།།
འཁོར་བའི་གྲོང་འདིའི་བདེན་པ་སྟེ།།
སྙིང་ཁར་འཁྱིལ་བའི་བུ་མོར་འབབ།།
ཁྲག་ཁྲིག་དཔག་ཚད་ཆོད་པ་རུ།།
གྱེས་བྲལ་སྲིན་མོས་གཞན་དབང་གིས།།
དྲན་གདུང་སྙིང་ཁ་གས་བའི་ཟས།།
ཟླ་ནས་ལོ་རུ་བསྟེན་དགོས་བྱུང༌།།
རིགས་ལ་འཐེན་པའི་བྱས་བསགས་དར།།
རླུང་གིས་གཡབ་ཀྱང་མ་ཆད་པའི།།
རུས་པའི་མདངས་ཀྱི་གོམ་པའི་འགྲོས།།
བྱམས་པའི་མཚོ་མོར་ཁྱར་འཁྱོར་སྤོ།།
ཐོ་རངས་སྲོད་ལ་འབྱེད་བཙུམ་མིག།
ཉན་བསམ་སྣོམས་རག་ཤེས་པའི་ངོར།།
རང་བྱུང་བྱམས་པ་འཁྱིལ་བའི་མདངས།།
སྨྲ་སྒོ་གཅོད་པའི་དྲན་གདུང་ཉིད།།
དྲན་པའི་ཡུལ་ལས་མི་མཐོང་ནད།
ཏ྄་ལའི་བླ་མས་གཅེན་མོར་བྲིས།།
ཚིག་གིས་མཚོན་པར་མ་ནུས་པ།།
གན་རྡེས་མཛའ་མོར་འཁྱུད་པའི་སེམས།།
དེ་ལྟའི་དགའ་དང་དུངས་བའི་གཟུགས།།
བྱམས་པ་དྲན་པར་སྦྱར་བྱས་ཀྱང༌།།
སྙིང་ཁམས་མཚོན་པ་རྒྱང་རིང་ངོ༌།།
འཕགས་པའི་རྒྱལ་སའི་འཛིན་མ་རུ།།
རིག་པའི་གནས་ལ་རྩེན་པའི་མ།།
མ་མའི་བྱམས་སེམས་དུད་པ་ཅན།།
ཏན་ཅང་གཙང་བོའི་རླབས་ཀྱི་ངོགས།།
དྲན་པའི་བསྒྱེལ་བ་ཟགས་མའི་ཕྲེང༌།།
ཤམ་ཤམ་ཁྱེད་ལ་བསྐུར་བཞིན་ན།།
གསན་རེ་ཡོད་དམ་སྙིང་སྡུག་མ།།
༢༠༡༠། ༥། ༢༤། ཉིན།