ང་ལྐུགས་པ་ཞིག་ཡིན་ནམ།

དགེ་འདུན་གྱིས།
རང་ཉིད་ནི་ཆབ་སྲིད་ཀྱི་གོ་རྟོགས་མེད་མཁན་ཞིག་ཡིན་པའི་ཆ་ནས། “ང་ལྐུགས་པ་ཞིག་ཡིན་ནམ་” ཞེས་པའི་དྲི་བ་འདི་རང་ཉིད་ལ་དུས་རྒྱུན་ནས་བཏང་མྱོང་ལ། ཐེངས་འདིའི་ཚོགས་ཆེན་རྗེས་སུའང་དྲི་བ་འདི་གཏོང་བཞིན་ཡོད། ཚོགས་ཆེན་འདི་མ་འཚོགས་གོང་། བོད་རྒྱའི་བར་གྱི་གནས་སྟངས་འདི་ “ཨ་ཆད་འུ་ཐུག་ཏུ་གྱུར་འདུག ད་ཅི་བྱེད་”ཅེས་མི་མང་ལ་སྐད་ཆ་དྲིས་པ་རེད། མི་མང་གིས་ “མུ་མཐུད་ནས་དབུ་མའི་ལམ་ཡིན། ༧རྒྱལ་བ་རིན་པོ་ཆེའི་དགོངས་བཞེད་ལྟར་བྱེད་ཀྱི་ཡིན། དུས་བཀག་ནང་ཚུན་འབྲས་བུ་མ་བྱུང་ཚེ་རང་བཙན་གྱི་སྒོ་ཕྱེ་ཡོད།”ཅེས་ལན་བཏབ་པ་རེད། ངས་འདི་ལ་སྟབས་བདེའི་དཔེར་བརྗོད་ཅིག་འཇོག ཁྱིམ་ཚང་གཅིག་གི་པ་ཕས། “ད་ང་ཚོ་ལ་ཟ་ཆས་རྫོགས་འདུག ད་ཅི་བྱེད།”ཅེས་ཁྱིམ་མི་རྣམས་ལ་གོ་བསྡུར་བྱས་པ་རེད། ཁྱིམ་མི་ཚོ་ཛ་དྲག་གིས་འཚོགས་ནས། “ང་ཚོས་ མོག་མོག་ཟ་གི་ཡིན། གལ་སྲིད་མོག་མོག་དུས་ལྟར་མ་བྱུང་ན། ང་ཚོས་ཐུག་པ་འཐུང་གི་ཡིན།”ཞེས་ལན་བཏབ་པ་རེད། འདི་ “གྲུབ་འབྲས་ལྡན་པའི་”ཚོགས་འདུ་ཞིག་རེད་དམ། ངེད་ཀྱི་བསམ་ཚུལ་ལྟར་ན། ང་ཚོ་ལ་ཟ་ཆས་འཚོལ་བའི་ཐབས་ལམ་དགོས་ཀྱི་ཡོད་པ་རེད། “ངེད་ཀྱིས་གསེར་གྱི་མཛུབ་དཀྲིས་བཙོང་ནས་གྲོ་ཕྱེ་ཉོ་གི་ཡིན། ཁྱེད་ཀྱིས་ལས་ཀ་ཞིག་བྱས་ཏེ་ཤ་ཉོ་ཐབས་གྱིས། དེ་ནས་ང་ཚོས་ཐུག་པ་དང་ཡང་ན་མོག་མོག་གང་ཡིན་ཡང་བཟོ་ཆོག་གི་རེད།” འདི་འདྲའི་ཐབས་ལམ་ཞིག་གི་སྐོར་ལ་ཚོགས་ཆེན་གྱིས་གྲོས་མོལ་བྱེད་དགོས་པ་རེད། མ་རེད་དམ།

དབུ་མའི་ལམ་འདམ་རྒྱུ་ལ་ཚོགས་ཆེན་འཚོགས་དགོས་པ་ཨེ་ཡོད། དབུ་མའི་ལམ་གྱི་ཐབས་ལམ་ད་ཡོད་དེ་ཚོས་གྲུབ་འབྲས་འབྱིན་མ་ཐུབ་སྟབས། ཐབས་ལམ་གསར་པ་གང་ཡོད་དང་ཇི་ལྟར་ལག་ལེན་ལ་འདེབས་མིན་གྱི་སྐོར་ལ་ཚོགས་ཆེན་གྱིས་བསམ་ཚུལ་འདོན་དགོས་པ་རེད། རང་བཙན་འདམ་རྒྱུ་ལ་ཚོགས་ཆེན་འཚོགས་དགོས་པ་ཡོད་མ་རེད། རང་བཙན་སྒྲུབ་པའི་ལམ་ཁ་འདི་དང་དེ་ཞེས་ཚོགས་ཆེན་གྱིས་བགྲོ་གླེང་བྱེད་དགོས་པ་རེད། ངས་ཚོགས་ཆེན་གྱི་ཐོག་ནས་འདི་འདྲའི་སྐད་ཆ་བཤད་རབས་གོ་མ་བྱུང་།
ཡིན་ན་ཡང་ཚོགས་ཆེན་མཇུག་སྡོམ་གྱི་གསུང་བཤད་དུ་༧རྒྱལ་བ་རིན་པོ་ཆེས་བཀའ་སློབ་གནང་འདུག  ༧སྐྱབས་མགོན་རིན་པོ་ཆེས་གཞིས་ཆགས་མུ་མཐུད་ནས་གནས་ཐབས་དང་།སློབ་གྲྭ་ཁག་གི་ཤེས་ཡོན་གོང་འཕེལ་དུ་གཏོང་ཐབས།ཆབ་སྲིད་ཀྱི་ཐོག་ནས་རྒྱ་རིགས་མི་མང་ལ་འབྲེལ་བ་བྱེད་དགོས་སྐོར་སོགས་བཀའ་སློབ་བསྩལ་འདུག  འདི་དག་ནི་ང་ཚོས་རང་གི་དམིགས་ཡུལ་ཅིག་བཞག་པ་དེ་ཇི་ལྟར་སྒྲུབ་པའི་ཐབས་ལམ་གྱི་ཁོངས་གཏོགས་རེད།  

ཐབས་ལམ་འདིའི་སྐོར་གྱི་དྲི་བ་མང་པོ་ལ་ད་དུང་ལན་འདེབས་བྱས་མེད་པ་རེད།དྲི་བ་དེ་དག་ལ་ང་ཚོས་མི་རིང་བར་བགྲོ་གླེང་བྱེད་དགོས་པ་ནི་གོར་མ་ཆག  དཔེར་ན་རྒྱ་རིགས་ལ་འབྲེལ་བ་བྱེད་པ་ཞེས་པ་འདི་གཅིག་པུའི་ཐོག་ལའང་གཞུང་གིས་གང་ཞིག་བྱེད་རྒྱུ་ཡིན་པ་དང་མི་མང་གིས་གང་ཞིག་བྱེད་རྒྱུ་ཡིན་པ།བོད་ནང་ནས་གང་ཞིག་བྱེད་ཐུབ་པ་དང་བོད་ཕྱི་ནས་གང་ཞིག་བྱེད་ཐུབ་པ་འདི་ཚོའི་སྐོར་རེད།  གོ་ཐོས་ལ་བོད་མི་གཅིག་གིས་གྲོན་དངུལ་བཏང་ནས་བོད་མི་ཚོས་རྒྱ་རིགས་དང་ལྷན་དུ་དྲ་རྒྱའི་ཐོག་གླེང་མོལ་བྱེད་བཅུག་ཡོད་པ་རེད་ཟེར།འདི་ལྟ་བུའི་བྱེད་ཐབས་ཡོད་དགོས་པ་རེད།གསར་འབྱོར་བ་སྟོང་ཕྲག་འགའ་རེ་འབྱོར་བཞིན་པ་ཚོའི་ནུས་པ་བེད་སྤྱོད་གཏོང་ཐུབ་བམ།  ད་ལྟའི་འབྲེལ་མོལ་བྱེད་མཁན་གྱི་ལས་བྱ་ལ་འགྱུར་བ་གཏོང་དགོས་སམ།རྡ་རམ་ས་ལའི་ལས་ཁུངས་ནང་རྒྱ་ནག་ལ་འབྲེལ་བ་བྱེད་པའི་ལྷན་ཁང་རྒྱ་བསྐྱེད་གཏོང་དགོས་སམ།ཆབ་སྲིད་ཀྱི་ཐོག་ནས་རིང་མིན་གྲུབ་འབྲས་མ་ཐོབ་ན་ཡང་རིག་གཞུང་གི་ཐོག་ནས་བོད་ནང་དུ་ས་ཆ་འཛིན་ཐུབ་པ་ཞིག་ཡོང་ངམ།བོད་ཕྱི་ནང་གི་བོད་མིའི་བར་གྱི་འབྲེལ་བ་ཇེ་ཆེ་དང་ཇེ་བརྟན་དུ་གཏོང་བའི་ལམ་ཁ་འཚོལ་དགོས་སམ།བོད་ནང་གི་བོད་མི་ཚོར་ཤེས་ཡོན་གོ་རྟོགས་སྤེལ་བ་དང་འབྲེལ་བ་ནར་མར་བྱེད་པའི་ལྷན་ཁང་ཞིག་ལོགས་སུ་འཛུགས་དགོས་སམ།  དེང་རབས་ཀྱི་བརྒྱུད་ལམ་གསར་པ་རིགས་བེད་སྤྱོད་གཏོང་བའི་ཐོག་ནས་འབྲེལ་བ་བྱེད་དགོས་པ་གང་དང་གང་ཡོད་སོགས་འདི་འདྲའི་དྲི་བ་མང་པོ་ཞིག་འདུག 

བོད་རང་བཙན་ཤོར་ནས་མི་ལོ་༥༠ཕྱིན་པའི་རིང་དེར་ང་ཚོའི་དམིགས་ཡུལ་ཐོག་གོམ་པ་རྒྱག་པའི་ཐབས་ཤེས་ལ་འབྲས་བུ་མ་བྱུང་བ་འདི་ལ་བསྐྱར་ཞིབ་ཀྱིས་ཐབས་ལམ་གསར་པ་དང་།  དུས་དང་མཐུན་པའི་ཐབས་ལམ་ཞིག་བསྟེན་རྒྱུ་ནི་གནད་དུ་ཆེ་འདུག་སྙམ།  ཡིན་ན་ཡང་།མཚམས་འདིར་ “ང་ནི་ལྐུགས་པ་ཞིག་ཡིན་ནམ་”ཞེས་པའི་དྲི་བ་ལ་ང་སླར་ཡང་འཐམས་དགོས་བྱུང་།