བོད་ལ་གཉེན་འཕྲད་དུ་བསྐྱོད་ན་་་་་་།

བསྟན་འཛིན།

 
ཁྱེད་རང་རྒྱ་མིའི་གཞུང་ཚབ་ཁང་གིས་སྤྲད་པའི་སྤ་སེ་འཁྱེར་ནས་བོད་ལ་གཉེན་འཕྲད་དུ་འགྲོ་མཁན་ཡིན་པ་དང་། དེ་ཡང་ཁྱོད་ཀྱི་སྤ་སེ་དེ་བལ་ཡུལ་རྒྱལ་སའི་རྒྱ་མིའི་གཞུང་ཚབ་ནས་རག་པ་ཡིན་ན། ངེས་པར་དུ་ས་ཐོག་ནས་འགྲོ་དགོས་པ་ལས། གནམ་གྲུར་བསྡད་ནས་འགྲོ་མི་ཐུབ། དེ་སྔ་འགྲམ་འགག་སྒོ་ཡིན་ན་ཏོག་ཙམ་གུ་ཡངས་ཡིན་མོད། ད་ལྟ་འགྲམ་འགག་སྒོ་བཀག་ཟིན་པས། ཁྱེད་རང་ངེས་པར་དུ་སྐྱིད་གྲོང་གི་ར་སོག་ཟམ་པ་བརྒྱུད་ནས་འགྲོ་དགོས་ལ། དེ་ནི་ཧ་ཅང་དམ་པོ་ཡིན།

རྒྱ་མིའི་གཞུང་ཚབ་ཁང་གིས་སྤྲད་པའི་སྤ་སེ་དེ་རྒྱ་མི་ལ་རྙོག་དྲ་མེད་ཀྱང་། རྒྱ་གར་ནས་རག་པའི་སྤ་སེ་དེ་རྒྱ་གར་ཉེན་རྟོག་པར་སྟོན་མི་ཆོག་པ་ནང་བཞིན། བལ་ཡུལ་ནས་རག་པའི་སྤ་སེ་དེ་ཡང་བལ་པོའི་དམག་གིས་མཐོང་ན་རྙོག་དྲ་ལྷགས་རྐྱང་རེད།

དེ་སྔའི་འགྲམ་གྱི་གནས་སྟངས་དང་མི་འདྲ་བར། ར་སོག་ཟམ་པ་བརྒྱུད་ནས་ཕར་འགྲོ་མཁན་གྱི་བལ་པོའི་མི་རྣམས་ནི། ར་སོག་རྫོང་གི་མི་ཡིན་དགོས་པ་དང་། དེ་ཡང་ཚོང་པ་དང་དེའི་ལས་རོགས་ཤ་སྟག་ཡིན་པ་ལས་སྤྱིར་བཏང་གི་མི་ཕར་ཕྱོགས་ལ་འགྲོ་རུ་འཇུག་གི་མེད་པ་རེད།

དེས་ན། ཁྱེད་རང་བལ་པོའི་མི་ལ་བརྫུས་ནས་འགྲོ་བའི་ཐབས་ཤེས་མེད། ཐབས་ཤེས་གཅིག་རང་གཅིག་ཡོད་པ་ནི་དངུལ་བརྫངས་ནས་འགྲོ་རྒྱུ་དེ་རེད། ཐབས་ལམ་འདི་མ་བརྒྱུད་པར་ཐད་ཀར་ས་མཚམས་བར་དུ་ཕྱིན་ནས་ཨུ་ཚུགས་བྱེད་མཁན་མང་པོ་འཇུས་ནས་ཕྱིར་སློག་བྱས་ཡོད་པ་རེད།

ང་ཚོ་བོད་ལ་འགྲོ་སྐབས། མི་རེས་བལ་སྒོར་ཉིས་ཁྲི་ལྔ་སྟོང་རེ་སྤྲད་ནས་ཕྱིན་པ་ཡིན། ཟམ་པ་བརྒལ་རྗེས། དམག་མིས་འདྲི་རྩད་རོབ་ཙམ་བྱས་ཤིང་། དེ་ནས་སྐྱིད་གྲོང་གྲོང་བརྡལ་གྱི་ཉེན་རྟོག་མི་སྣར་ཁ་པར་བཏང་། ཉེན་རྟོག་པ་སླེབས་རག་བར་དུ་ཆུ་ཚོད་འགའ་ཤས་འགོར། སྐྱིད་གྲོང་གྲོང་བརྡལ་གྱི་ཉེན་རྟོག་ཁང་དུ་སླར་ཡང་འདྲི་རྩད་བྱས། ད་གིན་ཟམ་ཁར་གང་ལབ་པ་དེ་རང་འཇགས་ལབ་ཐུབ་ན་རྙོག་དྲ་མེད།

ལྷ་ས་རུ་འབྱོར་རྗེས། <<ཕྱི་སྡོད་བོད་རིགས་སྤུན་ཟླ་རྒྱལ་ནང་དུ་ཚུར་ལོག་ཐོ་འགོད་ཨུ་ཡོན་ལྷན་ཁང་།>> ཟེར་བའི་ལས་ཁུངས་ལ་ཕྱིན་ནས། ལག་དེབ་དམར་པོ་ཞིག་ལེན་དགོས། ལག་དེབ་དེ་མེད་ན། རྒྱ་མིའི་གཞུང་ཚབ་ཁང་གིས་སྤྲད་པའི་སྤ་སེ་དེས་གནམ་གྲུ་དང་མེ་འཁོར་གྱི་སྤ་སེ་ཉོ་མི་ཐུབ་པས་ཁྱེད་ལ་དཀའ་ངལ་འཕྲད་ངེས་རེད། ལས་ཁུངས་དེ་སྔོན་ཆད་ལྕགས་པོ་རིའི་རྒྱབ་ལོགས་བདེ་སྐྱིད་ལམ་ཟེར་བའི་ས་ཆ་རུ་ཡོད་མོད། ད་ལྟ་གནས་སྤོ་བྱས་ནས་སེ་ར་ལྷོ་ལམ་ན་ཡོད།

བར་སྐོར་གཡས་གཡོན་ནས་ཁྲོམ་གཟིགས་སྒང་འབབ་ཚུགས་སུ་སྤྱི་སྤྱོད་རླངས་འཁོར་ཨང་༢༨ པར་བསྡད་ནས་འབབ་ཚུགས་བརྒྱད་འདས་པའི་དགུ་པ་དེ་ལ་གསེར་ཟམ་མགྲོན་ཁང་་(ཅིན་ཆོའོ་ཧྥན་ཏེན།) འབབ་ཚུགས་ཟེར་ཞིང་། དེར་སྤྱི་ཚོགས་རིང་ལུགས་སློབ་གླིང་ཞེས་སྒོ་བྱང་སྦྱར་བའི་ཁང་བརྩེགས་ཤིག་ཡོད། དེའི་སྒོ་ཆེན་ནང་དུ་མ་འཛུལ་བར་གཡས་ཕྱོགས་ཀྱི་གློ་སྒོའི་ནང་འཛུལ་ནས་ཐོག་བརྩེགས་བཞི་བར་ཕྱིན་ན། དེ་ནི་ཕྱིར་སྡོད་བོད་རིགས་སྤུན་ཟླར་སྣེ་ལེན་བྱེད་ས་ཡིན། ཐོག་མར་ལྷ་སར་འབྱོར་རྗེས་ལས་ཁུངས་དེར་ཕྱིན་ནས་ལག་དེབ་དམར་པོ་དེ་ལེན་དགོས་པ་དང་། ལག་དེབ་དེ་(ཞིང་ཆེན་གཞན་གྱི་མི་ཡིན་ན།) རང་རང་སོ་སོའི་ཕ་ཡུལ་གྱི་གོང་གསལ་ལས་ཁུངས་ལ་ཐོ་འགོད་བྱ་དགོས། ཕྱིར་ལྷ་སར་འབྱོར་ཚེ་ཡང་གོང་གསལ་ལས་ཁུངས་ལ་བསྐྱར་དུ་ཐོ་འགོད་བྱ་དགོས་ཤིང་། སྤྱིར་བཏང་ལྷ་སར་ཉིན་གསུམ་ལས་བསྡད་མི་ཆོག་ཟེར་ཡང་། རྒྱུ་མཚན་ཡོད་ན་ཉིན་གསུམ་བསྐྱར་ལེན་བྱ་འོས། ལྷ་ས་གྲོང་ཁྱེར་དང་ཉེ་འཁོར་སེར་འབྲས་དགའ་གསུམ་སོགས་སུ་འགྲོ་སྡོད་བྱེད་པར་ལག་དེབ་དེས་ཕན་མི་ཐོགས་པ་མེད། འོན་ཀྱང་། བསམ་ཡས་སོགས་སུ་འགྲོ་བར་ལག་དེབ་དེས་གོ་མི་ཆོད།

ལྷ་སར་ཉེ་འབྲེལ་དང་ངོ་ཤེས་སོགས་ཡོད་ན་དེའི་ཁྱིམ་དུ་བསྡད་ཆོག་ཅིང་། དེ་ལ་དོ་བདག་དེས་ལས་ཁུངས་གསུམ་ཙམ་ལ་སོང་ནས་མིང་རྟགས་བཀོད་ནས་འགན་ལེན་སོགས་བྱེད་དགོས་པས་དཀའ་རྙོག་ཆེ། ཕྱིར་སྡོད་བོད་རིགས་བསྡད་ཆོག་པའི་མགྲོན་ཁང་ལྷ་ས་གླིང་ན་བཞི་ལྔ་ཞིག་ལས་མེད་པར་བཤད་ཅིང་། སྦྲ་ནག་ཞོལ་མགྲོན་ཁང་ནི་གོང་ཁེ་ཤོས་དེ་ཡིན་ཏེ། ཁང་མིག་དཀྱུས་མ་མི་གཅིག་ཅན་ལ་སྒོར་༨༠ དང་མི་གཉིས་ཅན་ལ་༡༥༠ རེད། གསང་སྤྱོད་ཁྲུས་ཁང་ཅན་(མི་གཉིས་ཅན།) ལ་སྒོར་༢༢༠ རེད། འདི་ནི་སྤྱི་ཟླ་བཅུ་པའི་ནང་གི་གོང་ཚད་ཡིན་པས་དབྱར་དུས་སུ་འདི་ལས་ལྡབ་གཅིག་གིས་ཆེ་བ་ཡོད་ངེས།

ལྷ་ས་དང་ཁ་འབྲལ་སྐབས། ལག་དེབ་དེ་གོང་གསལ་ལས་ཁུངས་ལ་ཕྱིར་སྤྲོད་བྱེད་དགོས་ཤིང་། དེ་སྤྲད་རྗེས་ས་མཚམས་བར་དུ་སྐྱོད་ཆོག་པའི་ངོ་སྦྱོར་ཡི་གེ་ཞིག་སྤྲད་པར་འགྱུར། ཡི་གེ་དེ་མེད་པར་ལག་དེབ་སྔོ་རིལ་གཅིག་པོ་འཁྱེར་ནས་འོངས་ན། ལམ་དུ་ཞིབ་བཤེར་བས་ཁྱེད་ལ་དཀའ་ངལ་བཟོ་སྲིད། དེ་གཉིས་ལྷན་དུ་ཡོད་ན་དཀའ་རྙོག་མེད། ར་སོག་ཟམ་ཁའི་ཞིབ་བཤེར་ས་ཚིགས་སུ་ངོ་སྦྱོར་ཡི་གེ་དེ་ཞིབ་བཤེར་བས་ཉར་ཚགས་བྱེད། དེ་ནས་ཁྱེད་རང་ཟམ་པ་བརྒལ་ནས་ཤོག་དང་། བལ་བོའི་ཉེན་རྟོག་པ་སྐོར་ཞིག་གིས་ཁྱེད་ལ་སྒུག་བསྡད་ཡོད། ཁྱོད་ཀྱིས་ནེ་པ་ལི་དང་ཧིན་རྡིའི་སྐད་གང་རུང་ཤེས་ན། ཁོ་ཚོས་ཁྱེད་རང་ཕྱིར་སློག་བྱེད་པའམ། བཙོན་འཇུག་བྱེད་པ་སོགས་མི་བྱེད་མོད། ཁྱོད་ཀྱིས་བལ་སྒོར་སྟོང་ལོར་འགའ་ངེས་པར་དུ་གྲ་སྒྲིག་བྱེད་དགོས།