རྫ་ཚེ་རིང་བཀྲ་ཤིས།
༡༽
དེ་རིང་ཉིན་གུང།
ཁྲོམ་རའི་ལྕོག་ལོགས་ཀྱི་ཚིག་ཇ་འཐུང་ས་ནས།
ཟ་མ་ཟ་ཞོར།
ཤེལ་གྱང་གི་ཕྱི་ཕྱོགས་སུ་བལྟས།
མདུན་ངོས་དེར།
ཁོ་རེ་ཡའི་མེ་ཏོག་ཚོང་ཁང་ཞིག་འདུག
སྒོ་འགྲམ་གཡས་གཡོན་ན།
མེ་ཏོག་དག་བསྟར་དུ་བསྒྲིགས།
༢༽
སྐབས་དེར།
དེ་རིང་ས་ག་ཟླ་བའི་ཚེས་གཅིག་ཡིན་པ་སེམས་ལ་འཁོར་བྱུང་།
ང་ལམ་སང་།
མེ་ཏོག་ཚོང་ཁང་དེའི་ནང་དུ་ཕྱིན།
ཨོ་སྒོར་བདུན་གྱི་རིན་གྱི་མེ་ཏོག་ཅིག་བདམས།
༣༽
“ང་བོད་པ་ཡིན།
དེ་རིང་བོད་ལུགས་ས་ག་ཟླ་བའི་ཚེས་གཅིག་རེད།
སངས་རྒྱས་ཀྱི་དུས་ཆེན་རེད།”
མེ་ཏོག་འཚོང་མཁན་ལ་བལྟས་ནས།
རིན་པ་སྤྲོད་ཞོར།
དེ་ལྟར་ལབ།
༤༽
མོས།
གུས་ཞབས་ཀྱི་བརྡ་ལན་བསྟན་ཏེ།
“ཁྱོད་ཀྱིས་བདེ་སྐྱིད་ཉིན་མོ་ལ་རོལ་ཤིག་”ཟེར།
༥༽
ག་ལེར་ཕྱི་ལ་ཐོན་ཏེ་ནང་དུ་ལོག
མེ་ཏོག་དེ།
སངས་རྒྱས་ཀྱི་སྐུ་འདྲའི་མདུན་དུ་བསྒྲིགས།
ངས་རང་ཉིད་སངས་རྒྱས་ཀྱི་རྗེས་འཇུག་ཤིག་ཡིན་པའི་ཞེན་ཁོག་དེ།
གཏིང་ཟབ་ཅིག་ཚོར་བྱུང་།
མགོ་བོ་བཏེགས་ནས་སངས་རྒྱས་ཀྱི་ཞལ་ལ་ལྟ་བཞིན།
“དེ་རིང་ནས།
བོད་པ་མང་པོ་ཞིག་གིས།
ཁྱེད་ཀྱི་འཁྲུངས་སྐར་ལ་དམིགས་ནས།
ས་ག་ཟླ་བ།
ཤ་མེད་ཟླ་བར་སྒྱུར་བཞིན་འདུག་”ཅེས་ཞུས།
༦༽
སངས་རྒྱས།
ནམ་རྒྱུན་བཞིན།
ཅང་མི་གསུང་བར་བཞུགས་གནང་སོང་།
ཀུན་དགའ་བོའི་གོ་བ་ལེན་སྟངས་ལྟར་བྱས་ན།
དེ་ནི་ཞལ་བཞེས་གནང་སྟངས་ཤིག་རེད།
དེ་ལྟར་ཡིད་ཆེས་བྱས།
༧༽
ཡར་ཞུ་དེར།
སངས་རྒྱས་ཀྱིས་མཉེས་ཚོར་གནང་གི་རེད་དྲན།
ས་ག་ཟླ་བ་འདིར།
ང་ཚོར།
སངས་རྒྱས་ཞལ་འཛུམ་པ་མཇལ་འདོད་འདུག
དེ་ནི་ས་ག་ཟླ་བ་ཤ་མེད་ཟླ་བར་སྒྱུར་རྒྱུ་དེ་རེད།
མ་རེད་དམ།
རྫ་ཚེ་རིང་བཀྲ་ཤིས་ཀྱིས་ས་ག་ཟླ་བའི་ཚེས་གཅིག་ཕྱི་དྲོ་ལམ་བར་ཞིག་ནས་འཕྲལ་བྲིས།
མེ་ཏོག་ཚོང་མཁན་ལ་དེ་ལྟར་ལབ་པ་ནི་མེ་ཏོག་རིན་མེད་ལ་རག་ཐབས་ཤིག་རེད། དེའི་ཐད་ལ་མཁན་པོ་བྱང་ཆུབ་པ་རེད།