ཞི་བདེའི་ལང་ཚོ།
འགྱུར་མེད་ཀྱི་བརྩེ་སེམས། དྲན་གདུང་གི་མིག་ཆུ། ལྷད་མེད་ཀྱི་ལྷག་བསམ། དྲང་བདེན་གྱི་སྙིང་གཏམ། ཡིད་འཕྲོག་གི་ཟླ་མོ། ཡུལ་དུས་གང་དུ་སོང་ཡང་ནམ་ཡང་བརྗེད་ཐབས་མེད་པའི་བདག་གི་སྙིང་ནས་སྙིང་དུ་སྡུག་པའི་ཟླ་མོ་ལགས། བཅོ་ལྔའི་དུང་ཟླ་བཞིན་དུ་དཀར་ཞིང་མཛེས་པའི་ཁྱེད་ཀྱི་བཞིན་བཟང་དེ་ཉིད། གང་དུ་སོང་ཡང་ངའི་ཡིད་སེམས་ཀྱི་མེ་ལོང་ནང་དུ་ལྷང་ངེར་འཆར་བཞིན་ཁྱེད་ཉིད་དྲན་གདུང་གིས་ངའི་སེམས་ཁམས་ཡོངས་སུ་བཟི་སྟེ་མཆིས་ཉལ་པ་ནས་མཆིས་ཉལ་པ་ཞིག་ཏུ་འགྱུར་ནས། སེམས་རྣལ་མེད་ཀྱི་སྨྱོན་པ་ཞེས་ངའི་སྙིང་དམར་གྱི་དབུས་སུ། ཀུན་གྱིས་འཕྱ་སྨོད་ཀྱི་མཚོན་ཆ་ཇི་ཙམ་དུ་བསྣུན་ན་ཡང་། ངས་ཁྱེད་ལ་བཅངས་བའི་འགྱུར་མེད་ཀྱི་བརྩེ་དུང་ནི། ནམ་ཡང་མཚམས་འཇོག་མི་སྲིད་ལ། མ་ཟད་ངས་ཁྱེད་ལ་བཅངས་བའི་ལྷད་མེད་ལྷག་བསམ་གྱི་ནམ་མཁའ་ཡང་ཇི་སྲིད་སའི་གོ་ལ་དེ་ཉིད་མ་འཇིག་པའི་བར། ནམ་ཡང་གཡོ་བ་མེད་པར་ཕ་ལམ་བཞིན་དུ་བརྟན་པོ་ནས་བརྟན་པོར་གནས་བཞིན་ཡོད། དེ་ནི་ངས་ཁྱེད་ལ་བཅངས་བའི་བརྩེ་དུང་གི་དམ་བཅའ་ཐོག་མ་དེ་ཡིན།
སྙིང་སྡུག་མ་ལགས། ཁྱེད་ཀྱིས་ཤེས་སམ་ཅི། ང་གཉིས་མི་འདོད་བཞིན་དུ་ལས་དབང་གི་རླུང་གིས་ལོ་ངོ་གཅིག་གི་རིང་། འཕྲད་པའི་རང་དབང་དང་བྲལ་རྗེས། བཟོད་དུ་མེད་པའི་ཚ་ངར་གྱི་མེ་ལྕེ་ལྷམ་ལྷམ་དུ་འབར་ཞིང་། གྲང་བའི་རླུང་ཡང་ཚ་བའི་རང་བཞིན་དུ་གྱུར་བའི་རྒྱ་གར་འཕགས་ཡུལ་གྱི་རྒྱལ་ས་ལྡི་ལི་རུ། འགྱུར་མེད་ཀྱི་བརྩེ་དུང་གིས། སླར་ཡང་ང་གཉིས་འཕྲད་པའི་ཉིན་མོ་དེར། ཁྱེད་མཐོང་མ་ཐག་ཏུ་ངའི་སེམས་ནང་དུ་དགའ་བའི་སྤྲིན་པས་ཁེངས་ཏེ། སྐྱིད་པའི་ཆར་པ་སིམ་སིམ་བབས་བཞིན། དེ་མ་ཐག་ཏུ་ཁྱེདཉིད་དྲན་དུང་གི་ལོ་ཏོག་མ་ལུས་ཡོངས་སུ་སྨིན་པ་ནི། ས་གོ་ལ་དེའི་ནང་།ངའི་སེམས་ནད་ཀྱི་སྨན་ཁྱེད་ཁོ་ན་ལས་མེད་པར་མཚོན་གྱིན་ཡོད་པ་ནི་སྨྲོས་ཅི་དགོས། མ་ཟད་ཉིན་དེར་ཁྱེད་ཀྱི་ལག་པས་ངའི་ཕྲག་པ་ནས་བཟུང་སྟེ་གཉིད་བདེ་རོལ་བའི་སྐབས། སྐོམ་པ་ཆུ་དང་འཕྲད་པ་བཞིན་ངའི་སེམས་ནང་ལྷོད་བདེ་ཡིས་ཡོངས་སུ་ཁེངས་ཏེ། རྟག་ཏུ་ཁྱེད་དང་ལྷན་དུ་དེ་ལྟར་སྡོད་རྒྱུ་བྱུང་ན་ཅི་མ་རུང་སྙམ་པའི་སེམས་ཚོར་གྱི་མེ་ལྕེ་ལྷམ་ལྷམ་འབར་བྱུང་། འོན་ཀྱང་དུས་་་ཀྱིས་་་རྐྱེན་པས་ཡུད་ཙམ་གྱི་རྗེས་སུ་སླར་ཡང་མི་འདོད་བཞིན་དུ་ཁྱེད་དང་འབྲལ་དགོས་བྱུང་ཞིང་། མ་ཟད་སྐབས་དེར་ཁྱེད་ཀྱི་མི་སྙན་པའི་ཚིག་གི་སྤུ་གྲི་ཡིས། ངའི་སྙིང་དམར་མ་ལུས་ཡོངས་སུ་དུམ་བུར་གཤགས་ཏེ་ངའི་སེམས་ནང་སྐྱོ་བའི་ཁྲག་དམར་གྱི་རྒྱ་མཚོ་འཁྱིལ་ཞིང་། འདྲེན་འབྱེད་གཉིས་ནས་བརྩེ་དུང་གི་མིག་ཆུ་ཤར་ཤར་དུ་ལྷུང་བས། ཡངས་ཤིང་ཆེ་བའི་ས་གོ་ལ་དེའི་ནང་། ཁྱེད་ནི་ངའི་ཡོད་ཚད་ནས་ཡོད་ཚད་ཡིན་པའི་ནམ་ཡང་བསུབ་ཏུ་མེད་པའི་དཔག་རྟགས་རྐང་རྗེས་ཤིག་ཡིན།
ད་དུང་ཉིན་དེ་ནི་ང་ལ་མཚོན་ན་ནམ་ཡང་བརྗེད་ཐབས་མེད་པའི་དགའ་སྐྱོ་ཡི་རྨ་ཁ་ཞིག་ཡིན་ལ། རྨ་ཁ་དེ་ཡང་སྐྱོ་སྣང་གི་རྣག་ཁྲག་ཁེངས་པའི་བརྩེ་གདུང་གི་རྨ་ཁ་ཞིག་སྟེ། ཉིན་དེ་ནས་བཟུང་ཁྱེད། ང་དང་ལེ་བར་འབུམ་གྱི་ཐག་རིང་དུ་སྐྱོད་ལ་ཉེ་བས་ངའི་ཡིད་སེམས་ཀྱི་རྨ་ཁ་དེ་ཉིད། འགྱུར་མེད་བརྩེ་གདུང་གི་ཁྲག་དང་བཅོས་མིན་སྐྱོ་སྣང་གི་རྣག་གིས་ཡོངས་སུ་ཚོས་ཤིང་། མ་ཟད་སྐབས་འགར་ངའི་ཡིད་སེམས་ཀྱི་རྨ་ཁ་རུ། རིང་ཞིང་རྣོ་ངར་ཆེ་བའི་ཁྱེད་ཉིད་དྲན་གདུང་གི་ཚེར་མ་ཟུག་སྟེ་སྙིང་ཁམས་ཡོངས་སུ་བརྩེ་གདུང་གི་ཁྲག་གི་རྒྱ་མཚོ་འཁྱིལ། དེ་ཉིན་ནས་བཟུང་ཉིན་མཚན་དུས་དྲུག་ཏུ་ངའི་སེམས་ཁམས་ཀྱི་མཁའ་དབྱིངས་སུ་བརྩེ་གདུང་གི་སྤྲིན་པས་ཁེངས། ལྷག་བསམ་གྱི་གློག་དམར་འཁྱུག དྲང་བདེན་གྱི་འབྲུག་སྐད་ལྡིར། དྲན་གདུང་གི་དྲག་ཆར་བབས། ཡིད་ཆེས་ཀྱི་ལོ་ཏོག་རྒྱས། ད་དུང་དུས་དེ་དང་དེ་ནས་བཟུང་ངའི་ཡོད་ཚད་ནས་ཡོད་ཚད་ཀྱི་འདབ་ཆགས་དེ་ཉིད་ཁྱེད་ཀྱི་བརྩེ་དུང་གི་མཁའ་དབྱིངས་སུ་དབང་མེད་དུ་འཕུར་ཏེ་ངའི་ཡིད་སེམས་མ་ལུས་སྐད་ཅིག་ནས་སྐད་ཅིག་ཉིད་དུ་ཁྱེད་ལ་ཡོངས་སུ་དབང་སོང་ལ། མ་ཟད་ངས་ཀྱང་ཁྱེད་ལ་བཅངས་བའི་ལྷད་མེད་ཀྱི་བརྩེ་གདུང་དང་བཅོས་མིན་གྱི་ཡིད་ཆེས་ནི། ཇི་ལྟར་ནམ་མཁའི་དབྱིངས་སུ་མེ་ཤོར་ན་ཡང་། ནམ་ཡང་དོར་ཐབས་མེད་པར་ངའི་སྙིང་དམར་གྱི་དབུས་སུ་ཕ་ལམ་བཞིན་དུ་སྲ་པོར་གནས་ཡོད་ལ། འོན་ཀྱང་ང་གང་དུ་སོང་ཡང་། གང་ཞིག་བྱས་ཀྱང་ངའི་སེམས་ནང་དུ་ཁྱེད་ལ་སེམས་ཁྲལ་དང་དོགས་པ་ཡི་ཚེར་མ་དེ་ཉིད། ཉི་མ་ནུབ་ཀྱང་ཉི་འོད་མ་ཡར་བ་བཞིན་དུ་ཁེངས་བཞིན་ཡོད་པ་ནི། ངས་ཁྱེད་ལ་བཅངས་བའི་བརྩེ་གདུང་ལ་ནམ་ཡང་མཐའ་མེད་པར་མཚོན་གྱི་ཡོད་པ་ནི་སྨྲོས་ཅི་དགོས་ཨང་།