བློ་བཟང་སེང་གེས་༧གོང་ས་མཆོག་དང་བོད་མི་མང་ལ་དགོངས་དག་ཞུ་དགོས་ཡོད།

ཉག་རོང་དོན་གྲུབ།

 
ཕྱི་ལོ་༢༠༡༧ལོའི་གསུམ་བཅུའི་དུས་དྲན་གྱི་གལ་ཆེའི་དུས་ཚིག་ཐོག སྲིད་སྐྱོང་བློ་བཟང་སེང་གེས་བརྗེད་དཀའ་བའི་གསུམ་བཅུའི་ལོ་རྒྱུས་སོགས་སྒྲོགས་སྦྱང་ཚད་ལྡན་མེད་ཁར། གང་ཟག་སྒེར་བའི་གནད་དོན་སོགས་འབྲེལ་མེད་ཀྱི་གླེང་གཞིའི་རྙོག་ཟིང་བསླངས་པ་དང་། བུད་མེད་སྒེར་ལངས་ཀྱི་དུས་དྲན་ཉིན་དེར་བུད་མེད་ཀྱི་ཉིན་མོ་ཞེས་མིང་བཏགས་ནས་གལ་ཆེའི་སྐད་འབོད་སོགས་ཉམས་དམུས་སུ་བཏང་བ་དང་། སྤྱི་འཐུས་གྲོས་ཚོགས་ནང་བོད་མིའི་གདུང་སེམས་མཉམ་བསྐྱེད་ཀྱི་བགྲོ་གླེང་སྐབས་སུ། སྐྱེས་བུ་སྒེར་གྱི་ཚེ་སྲོག་ལ་གནོད་སྐྱོན་ཐེབས་བྱད་ཀྱི་བརྟག་ཞིབ་མེད་པའི་ཧམ་གཏམ་བཤད་པ་དང་། སྲིད་སྐྱོང་དང་སྤྱི་འཐུས་ཁ་ཤས་ཤིག་གིས་སྒེར་འཁོན་སྙིང་བཅིང་བྱས་ནས་སྤྱི་དོན་རྩ་ལྟར་དོར་ཏེ། གདུང་སེམས་མཉམ་བསྐྱེད་སྐབས་ཀྱི་བརྗོད་ཚིག་གཙོ་བོ་༧སྐྱབས་མགོན་རིན་པོ་ཆེའི་མཚན་ཐེངས་༡༦༩ ཙམ་བརྗོད་པ་དང་ཀླུ་མཁར་བྱམས་ཞེས་ཐེངས་༥༢ཙམ་དང་། མཚན་སྨད་ཐེངས་༤༡དང་ལོ་༡༡༣ ཞེས་ཐེངས་༣༥དང་། མང་གཙོ་ཐེངས་༣༥དང་རྩོམ་ཡིག་ཐེངས་༣༠དང་བཀའ་དྲིན་ཐེངས་༢༩དང་ངོ་རྒོལ་ཐེངས་༢༥དང་ཟུར་ཟ་ཐེངས་༢༣དང་རང་བཙན་ཐེངས་༢༠དང་སྨྲ་བརྗོད་རང་དབང་ཐེངས་༡༩དང་བློ་ཕམ་ཐེངས་༡༨དང་སེམས་འཚབ་དང་བློ་འཚབ་ཐེངས་༡༤དང་དགག་པ་ཐེངས་༡༡དང་དད་པ་ཐེངས་༠༨དང་སྐྱོན་བརྗོད་ཐེངས་༠༨དང་དོ་ཕོག་ཐེངས་༠༦དང་རྒྱལ་ཚོང་བ་ཐེངས་༠༤དང་ཕོག་ཐུག་ཐེངས་༠༢བཅས།༼གྲངས་ཐོ་བང་ཆེན་ནས་དྲངས༽ གྲོས་ཚོགས་ཚོགས་དུས་དང་པོའི་ཐོག་ཆེད་འཛུགས་གནང་བའི་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་གི་ཚོགས་གཙོ་ཀརྨ་ཡེ་ཤེས་མཆོག་ནས་ཚོགས་ཆུང་གི་ལས་བསྡོམས་དང་། གྲུབ་དོན་སྙན་ཐོ། འོས་བསྡུའི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་ཁག་ཅིག་བཅས་སྙན་སྒྲོན་ཞུས་རྗེས།
སྲིད་སྐྱོང་གིས་འཛིན་སྐྱོང་བཀའ་ཤག་དང་འོས་བསྡུ་ལས་ཁང་གཉིས་གོ་བསྡུར་གྱིས་འཛམ་གླིང་སྤྱི་ཡོངས་ཀྱི་འགྲོ་སྟངས་ལྟར། འོས་བསྡུ་ཐེངས་གཅིག་གིས་འགྲིག་པའི་ཁྲིམས་འཆར་ཕུལ་ནས། ཚོགས་ཆུང་གི་འཆར་ཟིན་ནང་འོས་ཐེངས་གཉིས་བླུགས་རྒྱུ་བཟོས་ཡོད་པ་དེར་དགག་པ་བརྒྱབ་སོང་བ་དང་། འཆར་ཟིན་ཚོགས་ཆུང་གི་ཚོགས་དྲུང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་ཚོགས་ཆུང་ནང་མང་མོས་ཀྱི་ཐོག་ནས་དགོངས་འཆར་དེ་འཁུར་ཡོང་བ་ཡིན་སྐོར་གསལ་བཤད་གནང་རྗེས། སྲིད་སྐྱོང་ནས་བསྐྱར་དུ་དགོངས་ཚུལ་གསུང་བའི་གོ་སྐབས་མེད་པར་བརྟེན། ང་ཚོས་གྲོས་ཚོགས་ནང་ཆ་ཤས་ལེན་གྱི་མིན་ཞེས་གསུངས་ཏེ་འཆར་ཟིན་ཚོགས་ཆུང་གི་ཚོགས་གཙོ་དཔལ་འབྱོར་བཀའ་བློན་ཀརྨ་ཡེ་ཤེས་སོགས་བཀའ་བློན་ཚང་མ་ཁྲིད་ཏེ་གྲོས་ཚོགས་ནས་ཕྱིར་ལ་ཐོན་སོང་བ་སོགས་ལ་རྒྱུ་མཚན་ཡོད་མེད་དང་། གྲོས་ཚོགས་ལ་གནོད་ཤུགས་སྤྲོད་ཀྱི་ཡོད་མེད་དང་། བྱམས་དང་སྙིང་རྗེ་ཅན་གྱི་བོད་མིའི་ཡ་རབ་སྤྱོད་བཟང་དང་འགལ་མིན་སོགས་བཤད་འདོད་མེད།

འོ་ན་ངས་ཅི་ཞིག་བཤད་འདོད་ཡོད་ཟེར་ན། བློ་བཟང་སེང་གེས་དབུ་ཁྲིད་ནས་ཁོ་རང་སྐྱེས་བུ་སྒེར་གྱི་འདོད་བློ་མ་ཁེངས་པའི་གནད་དོན་ལ་གཞི་བཅོལ་ཏེ། འགྲོ་བཞིན་པའི་གྲོས་ཚོགས་ཀྱི་ཚོགས་འདུ་ནས་ཕྱི་ལ་ཐོན་འགྲོ་སྐབས། བོད་མི་མང་གི་འཐུས་མི་ལྷན་འཛོམས་ལས་གྲུབ་པའི་སྤྱི་འཐུས་ཐུན་མོང་གི་ཚོགས་གཙོ་དང་། ཚོགས་གཙོའི་རྒྱབ་ཀྱི་བཞུགས་ཁྲི་རིན་པོ་ཆེ་དང་༧གོང་ས་ཏཱ་ལའི་བླ་མའི་སྐུ་པར་མཐོང་གྲོལ་རིན་པོ་ཆེ་དང་། སློབ་དཔོན་རིན་པོ་ཆེ་དང་ཆོས་རྒྱལ་སྲོང་བཙན་སྒམ་པོའི་སྐུ་འདྲ་རིན་པོ་ཆེ་སོགས་ལ། བཀའ་སྤྱི་གཉིས་ཀྱི་སྐྱེ་བོ་སུ་ཞིག་ཡིན་རུང་གུས་ཞབས་ཐོན་ཕྱག་ཞུ་བཞིན་ཕེབས་ཀྱི་ཡོད་པའི་འགྲོ་སྟངས་སྤྱི་མཚུངས་ལྟར། བཀའ་བློན་ཀརྨ་ཡེ་ཤེས་སོགས་བཀའ་བློན་ཁ་ཤས་ཀྱིས་གུས་ཞབས་ཐོན་ཕྱག་འཚལ་ནས་ཕེབས་ཡོད་ནའང་། སྲིད་སྐྱོང་བློ་བཟང་སེང་གེས་གུས་ཞབས་རྩ་བ་ནས་མ་ཞུས་པའི་ཐོག་ནས་ཤར་ཐོན་གནང་སོང་བ་ཡིན་ན། དེ་ནི་ནམ་རྒྱུན་བློ་སེང་སོགས་ཀྱིས་བྱེའུའི་ཁ་ནང་གི་འབུ་རོ་བཞིན་ཐ་ན་གྲོས་ཚོགས་ནང་ནས་ཀྱང་༧སྐྱབས་མགོན་རིན་པོ་ཆེ་ཞེས་མཚན་ཐེངས་༡༦༩༧ བརྗོད་པའི་༧གོང་ས་ཏཱ་ལའི་བླ་མ་ལ་གུས་ཞབས་མ་ཞུས་པ་དང་། བོད་ཀྱི་ཡབ་མེས་བཙད་པོ་རྣམས་དང་བོད་ཀྱི་རྒྱལ་རབས་ལོ་རྒྱུས་ལ་གུས་ཞབས་མ་ཞུས་པ་དང་། ཕྱི་ནང་གཉིས་སུ་གྱེས་པའི་བོད་མི་རིགས་ལ་གུས་ཞབས་མ་ཞུས་པ་དང་། བོད་མི་མང་གི་ཚབ་མཚོན་སྤྱི་འཐུས་གྲོས་ཚོགས་ལ་གུས་ཞབས་མ་ཞུས་པ་དང་། བོད་མི་མང་འཐུས་མི་ཞེ་བཞི་ལས་གྲུབ་པའི་སྤྱི་འཐུས་ཚོགས་གཙོ་མཆོག་ལ་གུས་ཞབས་མ་ཞུས་དང་། བོད་མི་མང་གིས་ཕུལ་གནང་བའི་སྲིད་སྐྱོང་གི་མཚན་མཐོང་ལ་གུས་ཞབས་མ་ཞུས་པ་དང་། ཆེས་མཐོའི་བཅའ་ཁྲིམས་རིན་པོ་ཆེ་ལའང་གུས་ཞབས་མ་ཞུས་པ་ཞིག་མཚོན་ཐུབ་ཀྱི་ཡོད་པས། ད་ཐེངས་ངེས་པར་དུ་སྲིད་སྐྱོང་བློ་བཟང་སེང་གེས་༧གོང་ས་མཆོག་དང་བཀའ་སྤྱི་གཉིས་ཀྱི་གཙོས། བོད་ཕྱི་ནང་གི་གཞིས་བྱེས་བོད་མི་ཡོངས་རྫོགས་ལ་དགོངས་དག་ཐུགས་དྭངས་ཞུ་དགོས་ཀྱི་ཡོད།

གལ་ཏེ་དགོངས་དག་ཞུས་མ་ཐུབ་པ་ཡིན་ན། ཡ་རབ་བཟང་སྤྱོད་ཀྱི་ཐོག་ནས་སྲིད་སྐྱོང་གི་ཞབས་སྟེགས་ནས་རྩ་དགོངས་ཞུ་དགོས་ཡོད། སྲིད་སྐྱོང་གི་ཞབས་སྟེགས་དེ་བོད་མི་མང་ལ་ཕྱིར་རྩིས་འབུལ་ཞུ་དགོས་ཡོད། དེ་ནས་བཟུང་༧གོང་ས་ཏཱ་ལའི་བླ་མའི་མཚན་མཆོག་རིན་པོ་ཆེ་དེ་རྡོ་དང་དབྱུག་པ་བཞིན་སྒེར་སྤྱོད་མི་བྱེད་རོགས། སྤྱི་དོན་གླེང་ས་ནས་སྒེར་འཁོན་མི་རྩོད་རོགས་ཞེས་ཞུ་བ་ལེགས་སོ།

–ཉག་རོང་དོན་གྲུབ་ནས། ༠༣/༡༩/༢༠༡༧