རྩེཿམུན་སེལ།
ཨེ་ཙི། ནུབ་གླིང་བའི་ཚིམ་མེད་ཀྱི་འཁྲིག་སྤྱོད་དང་། འཛེམ་པ་དོགས་བྲལ་གྱི་ཉེས་གསེབ་ནས་སྐྱེས་ཤིང་། སྐྱེ་འགྲོའི་ཚེ་སྲོག་དུམ་བུར་གཅོད་པ་ལ་ཐབས་ཀྱིས་འཇབ་ཅིང་། རྔམ་པས་མཆོང་བའི་དགྲ་བོ་ངོ་མ་ཞིག
ཨེ་ཙི། རྣམ་པ་ཉམ་ཐག་པས་སྤོབས་སེམས་འཕར་རུང་། གནའ་རབས་ཀྱི་བོད་བརྡ་ལ་མ་གྲཊ་པས་དོ་སྣང་མི་འབྱུང་བ་བདེན་ཡང་། ངེས་པ་བྲལ་བའི་ཁ་ཁུག་དུ་མ་ནས་ཁུ་སིམ་མེར་རྒོལ་ལ། གཏོར་བརླགས་ཀྱི་མཇུག་འབྲས་དེ་དང་དེས། འཛམ་གླིང་ལྷ་རྗེ་ཡོངས་རྫོགས་ཐབས་ཟད་དུ་བཏང་བ་མཐོང་ཐོས་ཀྱི་ཡུལ་དུ་གྱུར་ཚེ། འཇིགས་དངངས་མི་སྐྱེ་བའི་སེམས་ལྡན་སུ་ཞིག་མཆིས།
ཁྱབ་བྱུང་། འཇབ་རྒོལ་བ་དེའི་གཡོ་འཕྲུལ་གྱིས་སྐྱེ་འགྲོའི་ཚེ་སྲོག་དྲོན་མོ་ཁད་ཀྱིས་རྒུམ་གྱིན་ཤར་ནུབ་ཀྱི་ཡུལ་གྲུ་གང་སར་ཁྱབ་སོང་། མཆེད་བྱུང་།
འཇབ་རྒོལ་བ་དེ། ནགས་ལ་མེ་ལྕེ་ཇི་བཞིན། འོད་ལ་གྲིབ་ནག་ཇི་བཞིན། རི་བོ་ཧཱི་མ་ལ་ཡི་འདབས་ལྗོངས་དང་། གངས་རི་དཀར་པོའི་གསེང་ལམ་བརྒྱུད་ནས་ཀྱང་མཆེད་བྱུང་།
གལ་ཏེ། ང་ཚོ་འདི་ལྟར་ཡེངས་པའི་ངང་ནས་བསྡད་ཚེ། གལ་ཏེ། ང་ཚོས་འདི་ལྟར་ཅི་མི་སྙམ་པར་བཞག་ཚེ། རྒྱང་རིང་ནས་ལྷགས་པའི་དགྲ་བོ་འདིས། གྲངས་ཉུང་བའི་མི་རིགས་དེ་མིང་གི་ལྷག་མར་གཏོང་ངེས་ལ། ཕུགས་འདུན་ཡོད་ཚད་ནུས་མེད་དུ་གཏོར་བར་ངེས། དགྲ་བོ་འདི་དུང་བའི་གཉེན་ལ་སྒྱུར་བའི་རིགས་སྔགས་འདྲ་མེད་པར་ངེས་ཀྱང་། ནད་ངན་འདི་ཡེ་ནས་རྩལ་སྤྲུག་ལ་གཏོང་བྱེད་ཀྱི་སྨན་རྫས་འདྲ་མེད་མོད། ང་ཚོས། ལྷག་བསམ་ཡུ་བར་བསླངས་ཏེ། ཡོད་པ་ནས་མང་བར་མི་འགྱུར་བ་དང་། ཉུང་བ་ནས་མེད་པར་བསྒྱུར་བའི་ཆེད་དུ་དཔུང་ཤུགས་མཉམ་སྦྲེལ་བྱ་དགོས།
གང་ལྟར་བགྲོས་ཀྱང་། ཅི་ཙམ་བསྒྲིམས་རུང་།
ང་ཚོས་དགྲ་བོ་འདི་མུ་མཐུད་ནས་རྒྱུ་བར་མི་ནུས་པར་བྱ་བ་ལ། ཆེས་ལེགས་ཤོས་སུ་གྲུབ་པའི་ཐབས་ཇུས་ཤིག་ཡོད་པ་ནི། དགྲ་བོ་འདིའི་ལམ་བཞི་ཡི་ཕྱོགས་དང་། རྐྱེན་ལྔ་ཡི་འབྱུང་ཚུལ་རྣམས་གསལ་བོར་ངོས་ཟིན་པའི་སྒོ་ནས། མི་འགོ་བའི་ཐབས་བཅུ་བོའི་མན་ངག་རྣམས་བོད་མི་རེ་རེར་འཆི་མེད་ཚེ་ལ་དབང་བའི་དངོས་གྲུབ་སྩོལ་བར་ངེས་པའི་ལེགས་སྐྱེས་བཟང་བོ་ཞིག་གི་ཚབ་ཏུ་ཉེ་བ་ཉེ་བའི་ངང་ནས་སྤེལ་རྒྱུ་དེ་རེད་ཨང་།
ཕྱི་ལོ་༢༠༡༧་ཕྱི་ཟླ༣ཚེས་༢༠ཉིན་ལྕགས་པོ་རིའི་སློབ་གླིང་དུ་བྲིས།