གསེར་འཕྱང་ཞེས་པའི་མེ་མོ་བྱ་ཡི་ལོར།

དགེ་འདུན་རབ་གསལ།

 
མེ་མོ་བྱ་ལ་རྭ་སྒྲེང་དགོན་པ་བཏབ།།
མེ་མོ་བྱ་ལ་ཙོང་ཁ་པ་དེ་འཁྲུངས།།
ཨ་མྱེས་ཞབས་སོགས་ལོ་རྒྱུས་མི་སྣ་འགའ།།
ཕེབས་དང་བཞུད་པའི་རི་མོ་ཆ་ཙམ་གསལ།།

 
རབ་བྱུང་དང་པོའི་མེ་མོ་བྱ་ཡི་ལོ།།
ཕྱི་ལོ་ཆིག་སྟོང་བརྒྱ་མེད་ང་དྲུག་ཡིན།།
འབྲོམ་གྱིས་རྭ་སྒྲེང་དགོན་པ་བཏབ་པར་གསུངས།།
ཞང་ཀ་མ་བ་ཤེས་རབ་འོད་འཁྲུངས་བཤད།།

 
རབ་བྱུང་གཉིས་པའི་མེ་བྱ་ལོ་དེ་ལ།།
ཕ་དམ་སངས་རྒྱས་འདས་ཞེས་བཤད་པ་དང་།།
ཚེ་སྤོང་ཆོས་ཀྱི་བླ་མས་བསྟན་རྩིས་མཛད།།
འཆུས་པ་དར་བརྩོན་འཁྲུངས་ཞེས་ཚེ་ཏན་གསུངས།།

 
ཕྱི་ལོ་ཆིག་སྟོང་བརྒྱ་དང་དོན་བདུན་ལོར།།
ཞང་ལོ་གྲུབ་པ་དཔལ་བ་གྲོངས་ཞེས་གསལ།།
འབྲི་གུང་སྐྱོབ་པ་ཕག་གྲུའི་གདན་སར་ཕེབས།།
འབྲུག་དབོན་རས་པ་དྷརྨ་སེང་གེ་འཁྲུངས།།

 
རབ་བྱུང་བཞི་པའི་མེ་མོ་བྱ་ཡི་ལོར།།
རས་པ་དྷརྨ་སེང་གེ་འདས་ཞེས་འཁོད།།
གཞོན་ནུ་སེང་གེ་འབྲུག་པའི་གདན་སར་འཁོད།།
སྒ་ལེ་ཤཱཀ་རིན་འཁྲུངས་ཞེས་དུང་དཀར་གསུངས།

 
ཕྱི་ལོ་ཆིག་སྟོང་ཉིས་བརྒྱ་གོ་བདུན་ལོར།།
སྟག་ལུང་ཆོས་རྗེ་མངྒལ་གུ་རུ་གཤེགས།།
ཚབ་ཏུ་ཆོས་རྗེ་དཔལ་བཟང་གདན་སར་ཕེབས།།
ཚལ་པའི་ཁྲི་དཔོན་རིན་སེང་བསྐོས་སོ་ལོ།།

 
རབ་བྱུང་དྲུག་པའི་མེ་མོ་བྱ་ཡི་ལོ།།
བླ་མ་ཙོང་ཁ་པ་ཉིད་འཁྲུངས་ལོ་ཡིན།
ཤཱཀ་བསོད་དང་ནི་གྲུབ་པ་ཤེས་རབ་དང་།།
སྤྱན་སྔ་བསོད་ནམས་གྲགས་པ་འཁྲུངས་ཞེས་བཤད།།
རོལ་པའི་རྡོ་རྗེ་བསྙེན་པར་རྫོགས་ཞེས་གསུངས།།

 
ཕྱི་ལོ་ཆིག་སྟོང་བཞི་བརྒྱ་བཅུ་བདུན་ལོར།།
ཕག་གྲུའི་གདན་སར་བསོད་ནམས་རྒྱལ་མཚན་ཕེབས།།
ཁྱུང་པོ་བྱ་བྲལ་དགེ་བཟང་འཁྲུངས་པ་དང་།།
ཀཾ་ཀཾ་དོན་གྲུབ་དཔལ་བས་ཆོས་འབྱུང་བརྩམས།།

 
རབ་བྱུང་བརྒྱད་པའི་མེ་བྱའི་ལོ་དེ་ལ།།
སྒོ་རུམ་ཀུན་དགའ་ལེགས་བློ་འཁྲུངས་ཞེས་གསལ།།
ས་ལོ་འཇམ་དཔལ་རྡོ་རྗེ་འཁྲུངས་པ་དང་།།
པཎ་ཆེན་བཟང་བཀྲ་འདས་ཞེས་དུང་དཀར་གསུངས།།

 
ཕྱི་ལོ་ཆིག་སྟོང་ལྔ་བརྒྱ་སོ་བདུན་ལོར།།
རྗེ་བཙུན་ཆོས་རྒྱན་སེ་རའི་མཁན་པོར་ཕེབས།།
འབྲི་གུང་དམག་གིས་སྡེ་གཟར་བསླངས་ཀྱང་ཟེར།།
རྟ་ཚག་རྗེ་དྲུང་ལྷ་དབང་ཆོས་རྒྱན་འཁྲུངས།།

 
རབ་བྱུང་བཅུ་པའི་མེ་མོ་བྱ་ཡི་ལོར།།
ས་སྐྱའི་གདུང་རབས་རྩོམ་པོ་ཨ་མྱེས་ཞབས།
ངག་དབང་ཀུན་དགའ་བསོད་ནམས་འཁྲུངས་པ་དང་།།
ལྷ་བཙུན་ནམ་མཁའ་འཇིགས་མེད་འཁྲུངས་ཞེས་གསལ།།

 
ཕྱི་ལོ་ཆིག་སྟོང་དྲུག་བརྒྱ་ལྔ་བདུན་ལོར།།
སྡེ་སྲིད་བསོད་ནམས་རབ་བརྟན་འདས་པ་དང་།།
ཟུར་ཆེན་ཆོས་དབྱིངས་རང་གྲོལ་འདས་ཞེས་གསལ།།
བོད་འབྲུག་བར་ལ་དམག་འཁྲུག་བྱུང་ཞེས་བཤད།།

 
རབ་བྱུང་བཅུ་གཉིས་མེ་མོ་བྱ་ལོ་ལ།།
ལྕང་སྐྱ་རོལ་པའི་རྡོ་རྗེ་འཁྲུངས་པ་དང་།།
ཇུན་གར་དམག་མི་རྒྱལ་ས་ལྷ་སར་འབྱོར།།
རྒྱལ་པོ་ལྷ་བཟང་བསད་པའང་འདི་ལ་འཁེལ།།

 
ཕྱི་ལོ་ཆིག་སྟོང་བདུན་བརྒྱ་དོན་བདུན་ལོར།།
རྒྱལ་ཚབ་དེ་མོ་སྤྲུལ་སྐུ་འདས་པ་དང་།།
ཚབ་ཏུ་ཚེ་སྨོན་གླིང་པ་ཁྲི་ལ་འཛེགས།།
ཨ་མི་རི་ཀར་རྒྱལ་ཁབ་བཙུགས་སོ་ལོ།།

 
རབ་བྱུང་བཅུ་བཞི་མེ་མོ་བྱ་ཡི་ལོར།།
རྒྱལ་བ་བཅུ་པ་ཚུལ་ཁྲིམས་རྒྱ་མཚོ་དང་།།
རྒྱལ་མཁན་གྲགས་རྒྱན་གཤེགས་ཞེས་དུང་དཀར་གསུངས།།
ཚེ་སྨོན་འཇམ་ཚུལ་དགའ་ལྡན་ཁྲི་ལ་ཕེབས།།

 
ཕྱི་ལོ་ཆིག་སྟོང་བརྒྱད་བརྒྱ་གོ་བདུན་ལོར།།
གྲུབ་དབང་འཇིགས་བསམ་ཤིང་བཟའ་བསྟན་དབང་དང་།
ཨ་ཁུ་ཐབས་མཁས་འདས་ཞེས་ཚེ་ཏན་གསུངས།།
ཀོང་པོའི་ཡུལ་དུ་ས་ཡོམ་བྱུང་ཞེས་འཁོད།།

 
རབ་བྱུང་བཅུ་དྲུག་མེ་མོ་བྱ་ཡི་ལོར།།
པཎ་ཆེན་གོང་མ་འཕགས་ཡུལ་བསྐོར་ནས་འཁོར།།
ཆུ་བཞི་སྒང་དྲུག་བཙུགས་ཞེས་དུང་དཀར་གསུངས།།
བཀའ་བསྟན་བརྙན་པར་བཟོས་ཞེས་ཚེ་ཏན་བཞེད།།

 
རབ་བྱུང་ལོ་ཡི་འཁོར་ལོ་འཁོར་བའི་ཡུན།།
མི་ལོ་སྟོང་གི་ལོ་རྒྱུས་རི་མོ་ལས།།
མེ་མོ་བྱ་ལ་འདི་དང་དེ་ཞེས་པའི།།
ཚིག་ཕྲེང་འགའ་ཞིག་བྲིས་ན་དེ་ལྟར་རོ།།

 
མེ་མོ་བྱ་ལོའི་ལོ་རྒྱུས་སྙིང་བསྡུས་འདི་ནི། དེ་སྔར་འདི་ག་སློབ་གྲྭ་ཆེན་མོའི་དགེ་རྒན་ཆེན་མོ་མཁས་དབང་ཁཱ་ར་ཡིས་སོག་པོའི་ལོ་སར་སྐབས་སོག་པོའི་རྒྱལ་རབས་དང་ལོ་རྒྱུས་ལས་ལོ་དེའི་གལ་ཆེའི་མཛད་པ་རྣམས་དྲངས་ཏེ་ལོ་སར་ལ་བསུ་བ་བྱེད་པ་དེ་ཉིད་ལ་དཔེར་ལེན་གྱིས་ དགེ་རྒན་ཆེན་མོ་སྤེར་ལིང་གིས་ཀྱང་སློབ་གྲྭ་ཆེན་མོའི་བོད་ལུགས་ལོ་སར་སྐབས་སུ་ རབ་བྱུང་དང་པོ་ནས་ད་བར་གྱི་ལོ་རེའི་མཛད་པ་འཆད་པའི་སྲོལ་ཞིག་བྱུང་ཞིང་། དེ་དག་ལ་རྗེས་སུ་ཡི་རངས་པ་དང་བཅས་ཕྲན་གྱིས་སྔ་ལོར་འདི་ལྟ་བུ་ཞིག་བསྡེབས་པ་ཇི་བཞིན། འདི་ལོར་ཡང་བསྟན་རྩིས་ཀུན་བཏུས་དང་ལོ་ཚིགས་དྭངས་ཤེལ་མེ་ལོང་གཉིས་ལས་བཏུས་ཏེ་བཀོད་པ་དགེའོ།། ལོ་སར་ལ་བཀྲ་ཤིས་བདེ་ལེགས་ཞུ།།