གངས་སྐྱིད་དུ་ཧིན་སྒོར་འབུམ་བདུན་བརྒྱའི་ལས་ཁུངས་གསར་རྒྱག

ཡོང་ཁུངས། བོད་ཀྱི་དུས་བབ།

 
གངས་ཅན་སྐྱིད་གཤོངས་ལ་ལས་ཁུངས་ཆེན་པོ་ཞིག་རྒྱག་གི་ཡོད་པ་དང་། ལས་ཁུངས་དེའི་ཐོག་བརྩེགས་བཞི་པར་བོད་མིའི་སྒྲིག་འཛུགས་དང་བོད་དོན་ངོ་སྤྲོད་བྱེད་སའི་འགྲེམ་སྟོན་ཁང་། ལྔ་པར་མི་དྲུག་བརྒྱ་ལྷག་ཤོང་བའི་ཚོགས་ཁང་བཅས་འཆར་འགོད་བྱས་ཡོད་འདུག
ད་ལོའི་ཕྱི་ཟླ་ ༥ ཚེས་ ༡ ཉིན་ནས་བཟུང་དྷ་རམ་ས་ལའི་གངས་ཅན་སྐྱིད་གཤོངས་ལ། ལས་ཁུངས་གསར་རྒྱག་གི་ལས་གཞི་ཞིག་འགྲོ་བཞིན་ཡོད་པ་དང་། འདས་པའི་ཟླ་ངོ་དྲུག་ལ་ཉེ་བའི་རིང་འཛུགས་སྐྲུན་ལས་གཞི་དེ་གང་འཚམས་གྲུབ་ཡོད་སྟབས། འདི་གའི་གསར་འགོད་པས་ལས་གཞི་དེར་འགན་འཁུར་མཁན་ནང་སྲིད་དྲུང་འཕར་ཀརྨ་ཆོས་དབྱངས་ལགས་སུ་བཅར་འདྲི་ཞུས་པ་ལྟར་ན། འཛུགས་སྐྲུན་ལས་གཞི་དེའི་རྒྱ་ཁྱོན་ལ་ཧྥི་ཊི་གྲུ་བཞི་མ་ ༩༦༠༨ (9608 sq.ft.)ཡོད་པ་དང་། ཁང་པ་ཐོག་བརྩེགས་ ༥ རྒྱག་འཆར་ཡོད་འདུག ཁང་པའི་འོད་ཤོད་དུ་རླངས་འཁོར་འཇོག་ས་དང་། ཉིས་ཐོག་དང་སུམ་ཐོག་ལས་ཁུངས་བཀོད་སྒྲིག བཞི་ཐོག་གི་ཕྱེད་ཀར་འགྲེམ་སྟོན་ཁང་དང་། ལྔ་ཐོག་ཧྲིལ་བོ་ཚོགས་ཁང་བཅས་ཡིན་འདུག ལས་གཞི་འདིའི་འགྲོ་གྲོན་ཧིན་སྒོར་འབུམ་ ༧༠༠ ཡི་འཆར་གཞི་ཡིན་པ་དང་། ད་ལོའི་ཕྱི་ཟླ་ ༥ ཚེས་ ༡ ནས་མགོ་འཛུགས་གནང་སྟེ། ལས་གཞི་ལེགས་འགྲུབ་ཀྱི་དུས་ཡུན་ཟླ་བ་ ༡༨ ཡིན་འདུག

ནང་སྲིད་དྲུང་འཕར་ཀརྨ་ཆོས་དབྱངས་ལགས་ཀྱིས་ངོ་སྤྲོད་གནང་བ་ལྟར་ན། སྔོན་མ་བོད་མིའི་སྒྲིག་འཛུགས་ལ་ལས་ཁུངས་འདང་གི་མེད་པ་དང་། ལྷག་པར་དུ་ཚོགས་ཁང་ཚད་ལྡན་ཞིག་མེད་པའི་དཀའ་ངལ་ཡོད་སྟབས། བཀའ་ཤག་གིས་གོ་བསྡུར་གནང་སྟེ་སྲིད་སྐྱོང་མཆོག་གིས་སྣེ་ཁྲིད་དེ་ལས་ཁུངས་དང་ཚོགས་ཁང་གསར་རྒྱག་གི་ལས་གཞི་འདི་མགོ་འཛུགས་གནང་བ་ཡིན་འདུག

ཐོག་བརྩེགས་འོད་ཤོད་དུ་གངས་སྐྱིད་ལས་ཁུངས་ཁག་གི་རླངས་འཁོར་ ༣༠ ལྷག་ཤོང་བའི་འཆར་འགོད་བྱས་ཡོད་པ་དང་། ཐོག་བརྩེགས་གཉིས་པ་དང་གསུམ་པར་ཆོས་རིག་ལས་ཁུངས་དང་། རྩིས་ཞིབ་ལས་ཁུངས། སྲིད་བྱུས་ཉམས་ཞིབ་ཁང་། གངས་སྐྱིད་གློག་ཀླད་སྡེ་ཚན་(ཊི་སི་ཨར་སི།)བཅས་སྤོ་རྒྱུའི་འཆར་གཞི་ཡོད་འདུག་ལ། ཐོག་བརྩེགས་ལྔ་པར་མི་ ༦༠༠ ལྷག་ཤོང་བའི་ཚོགས་ཁང་རྒྱག་རྒྱུ་ཡིན་པ་དང་ས྄ ཁང་བརྩེགས་དཀྱིལ་མ་ནས་ཐོག་བརྩེགས་ལྔ་པའི་བར་གློག་སྐས་དང་རྐང་པ་རྒྱག་ས་བཅས་སྐས་འཛེག་རིམ་པ་གཉིས་བཟོ་རྒྱུ་ཡིན་འདུག

ཀརྨ་ཆོས་དབྱངས་ལགས་ཀྱིས་བརྗོད་དོན། “ཐོག་བརྩེགས་ལྔ་པའི་ཚོགས་ཁང་དེ་ཧ་ཅང་ཆེན་པོ་ཡོད་པ་རེད། ཧ་ལམ་མི་དྲུག་བརྒྱ་བདུན་བརྒྱ་ཤོང་རྒྱུར་རྩིས་བརྒྱབ་ཡོད་ས་རེད། ནམ་རྒྱུན་བོད་མིའི་སྒྲིག་འཛུགས་ཀྱི་ལས་བྱེད་རྣམས་ཚོགས་འདུ་འཚོགས་ས་དང་། མཚམས་རེར་རྒྱལ་ཡོངས་ཚོགས་ཆེན་དང་། དམིགས་བསལ་ཆོགས་ཆེན་དེ་འདྲ་ཚོགས་སྐབས། བེད་སྤྱོད་གཏོང་ཐུབ་པ་ཞིག་ལ་རྩིས་བརྒྱབ་ཡོད་པ་རེད། གང་ཡིན་ཟེར་ན། སྔོན་ཆད་རྟག་པར་དྷ་སྟེང་བོད་ཁྱིམ་དང་། དྷ་ཤོད་སློབ་གྲྭའི་ཚོགས་ཁང་གཡར་བསྡད་ཡོད་པ་རེད།” ཅེས་བརྗོད་སོང་།

ཡང་ཁོང་གིས་ཐོག་བརྩེགས་བཞི་བའི་འགྲེམས་སྟོན་ཁང་གི་སྐོར་བརྗོད་དོན། “ཐོག་བརྩེགས་བཞི་པར་འགྲེམས་སྟོན་ཁང་ཞིག་ཕྱེ་རྒྱུའི་འཆར་གཞི་ཡོད་པ་རེད། གངས་སྐྱིད་དུ་ཕྱི་ལོགས་ནས་ཡུལ་སྐོར་སྤྲོ་འཆམ་པ་མང་པོ་ཞིག་ཕེབས་ཀྱིན་ཡོད་པ་རེད། ད་ལྟའི་འཆར་དཔེ་མཛོད་མ་གཏོགས་གངས་སྐྱིད་དུ་ལྟ་ས་དེ་འདྲ་མེད་དུས། རྒྱ་གར་དང་ཕྱི་རྒྱལ་སོགས་ཡུལ་སྐོར་སྤྲོ་འཆམ་པ་དེ་འདྲ་ཕེབས་སྐབས། བོད་མིའི་སྒྲིག་འཛུགས་དང་བོད་དོན་སྐོར་ངོ་སྤྲོད་གནང་ས་དེ་འདྲ་ཞིག་གི་འཆར་གི་ཡོད་པ་རེད།” ཅེས་བརྗོད་བྱུང་།

ལས་གཞི་འདིར་སྤྱིའི་འཆར་འགོད་ཚོགས་ཆུང་ཡོད་མེད་དྲིས་པར། “ ཚོགས་ཆུང་དེ་འདྲ་ཡོད་པ་མ་རེད། འཆར་གཞི་མང་ཆེ་བ་ཞིག་སྐུ་ངོ་སྲིད་སྐྱོང་སྐུ་སྒེར་རང་གིས་ཐུགས་འགན་བཞེས་བསྡད་ཡོད་པ་རེད། ཁོང་ཐེངས་མང་པོར་དངོས་སུ་ཕེབས་ཏེ་འགྲིག་དང་མ་འགྲིག་ལམ་སྟོན་གནང་བ་དང་། ཁ་ཤས་ཏོག་ཙམ་འགྱུར་བ་གཏོང་དགོས་པ་དང་སྤུས་དག་པོ་ཡོང་དང་མ་ཡོང་གི་གནས་ཚུལ་ཡོད་ན་ལམ་སྟོན་གནང་གི་ཡོད་པ་རེད།” ཅེས་བརྗོད་སོང་།

ལས་གཞི་འདི་བཀའ་ཤག་གི་ཐག་གཅོད་དང་། ནང་སྲིད་ལས་ཁུངས་ཀྱིས་ལག་བསྟར་གནང་སྟེ། འཛུགས་སྐྲུན་འཆར་འགོད་བྱེད་མཁན་རྒྱ་གར་བ་ཨ་མར་ཌེཔི་(Amar Deep)ཞུ་བ་ཡིན་པ་དང་། ཁོང་ནི་དེ་སྔ་བཀའ་ཤག་ལས་ཁུངས་གསར་པའི་འཆར་འགོད་པའང་ཡིན་འདུག ལས་གཞི་འདི་བོགས་མར་གཏོང་ཡུལ་རྒྱ་གར་པུ་རམ་ཅན་ཌི་(Puram Chand)ཞུ་བ་ཡིན་པ་དང་། ཁོང་དེ་སྔ་གངས་སྐྱིད་སྤྱི་ཐབ་གཉའ་ཁྲི་ཚོགས་ཁང་དང་བོད་མིའི་སྒྲིག་འཛུགས་ཀྱི་ལས་ཤག་གཞན་ཡང་རྒྱག་མྱོང་ཡོད་འདུག འཛུགས་སྐྲུན་ལས་དོན་འདིར་ལྟ་རྟོག་བྱེད་མཁན་བོད་མིའི་སྒྲིག་འཛུགས་ས་ཁང་འགན་འཛིན་ཚེ་དབང་བཀྲ་ཤིས་ལགས་ཡིན་འདུག

མཇུག་ཏུ་ཀརྨ་ཆོས་དབྱངས་ལགས་སུ། ད་ལྟའི་ཆར་བོད་མིའི་སྒྲིག་འཛུགས་ཀྱི་ལས་བྱེད་བརྒྱ་ཆ་ག་ཚོད་ཅིག་ལ་ལས་ཤག་དང་བགྲེས་ཤག་གོ་སྒྲིག་གནང་ཐུབ་ཡོད་མེད་དྲིས་པར། ལས་བྱེད་བརྒྱ་ཆ་ག་ཚོད་ལ་ལས་ཤག་རེག་ཡོད་མེད་ཞུ་རྒྱུ་མེད། ད་ལྟ་སྤྱི་འཐུས་རྒྱུན་ལས་ལ་ལས་ཤག་གསར་རྒྱག་གནང་གི་ཡོད་པ་རེད། དེ་ཧིན་སྒོར་འབུམ་བཞི་བརྒྱ་ལྔ་བརྒྱ་ཞིག་གི་ལས་གཞི་རེད། བཀའ་ཤག་གི་དགོངས་པར་ད་དུང་ལས་ཤག་གསར་པ་རྒྱག་རྒྱུའི་འཆར་གཞི་བང་སྒྲིག་བསྡད་ཡོད་ས་རེད། ཤེས་རིག་དཔར་ཁང་གི་བར་དེར་ས་ཆ་ཞིག་ཡོད་པའི་སྐད་ཆ་འདུག ཅེས་བརྗོད་སོང་།

ས་ཁང་འགན་འཛིན་ཚེ་དབང་བཀྲ་ཤིས་ལགས་སུ་ལས་ཁོང་གསར་རྒྱག་དེའི་སྐོར་བཅར་འདྲི་ཞུས་པར། ད་ལྟ་ལས་གཞི་ཧ་ཅང་ཡག་པོ་འགྲོ་བཞིན་ཡོད་པ་དང་། འཆར་གཞིའི་ནང་ཟླ་བ་བཅོ་བརྒྱད་འཁོད་ཡོད་ཀྱང་ལོ་གཅིག་ནང་ཧ་ལམ་ཚར་རྒྱུ་ཡིན་པ། དེ་བཞིན། ལས་ཁུངས་ཀྱི་ཕྱི་དབྱིབས་བོད་པའི་བཟོ་བཀོད་བྱ་རྒྱུ་ཡིན་པ་དང་། ཁང་བརྩེགས་དཀྱིལ་གྱི་སྐས་འཛེག་གི་ཕྱི་དབྱིབས་ནི། དབྱིན་ཡིག་ནང་བོད་ Tibet ཅེས་པའི་ཊི་ T ཡི་བཟོ་ལྟ་གཏོད་རྒྱུ་ཡིན་སྐོར་སོགས་ངོ་སྤྲོད་གནང་སོང་།

ཡང་ཁོང་ལ་བོད་མིའི་སྒྲིག་འཛུགས་ཀྱི་ལས་ཤག་དང་བགྲེས་ཤག་སྐོར་དྲིས་པར། “ད་ལྟ་ལས་བྱེད་བརྒྱ་ཆ་ ༨༠ ཙམ་ལ་ལས་ཤག་གོ་སྒྲིག་གནང་ཐུབ་ཡོད་པ་རེད། བགྲེས་ཤག་དྷ་རམ་ས་ལའི་ལྷ་རྒྱལ་རིར་མི་བརྒྱད་དགུ་ཞིག་གི་བགྲེས་ཤག་ཡོད་པ་རེད། དེ་ནས་ལྷོ་ཕྱོགས་སུ་མི་བཅུ་གྲངས་ཤིག་ལ་བགྲེས་ཤག་བཟོ་བཞིན་ཡོད་པ་རེད། དེ་མ་གཏོགས་ད་ལྟའི་ཆར་བགྲེས་ཤག་མང་པོ་ཞིག་རྒྱག་ཐུབ་ཡོད་པ་མ་རེད། ཡིན་ནའང་གཞུང་ཞབས་ལས་བྱེད་ཚོ་རྒན་ཡོལ་འཐོན་ཁར། བགྲེས་ཤག་བཞེས་རྒྱུ་ཡིན་ནམ། བགྲེས་ཤག་གི་དོད་དུ་དངུལ་ལེན་རྒྱུ་ཡིན་སོ་སོའི་འདོད་པ་རེད། གལ་སྲིད་དངུལ་ལེན་རྒྱུ་ཡིན་ན་ཁོ་ལ་བགྲེས་ཕོགས་ག་ཚོད་འབབ་པ་ཡིན་ན་དེའི་ལོ་བཅུ་ལྡབ་དེ་རྡོག་གཅིག་ལ་སྤྲོད་ཀྱི་ཡོད་པ་རེད།” ཅེས་བརྗོད་བྱུང་།

གསར་འགོད་པ། དོན་འགྲུབ་བཀྲ་ཤིས།