མང་གཙོའི་སྐོར།

སེང་ཕྲུག་བརྟན་པ།

 
གངས་ལྗོངས་བོད་ཀྱི་བསྟན་སྲིད་ཆེས་སྲུང་སླད།
ཡང་དག་མང་གཙོའི་ལུགས་བཟང་སྲོལ་གཏོད་མཛད།
རྟག་ཏུ་གཞན་ཕན་ཁོ་ནར་ཆེད་གཞོལ་བའི།
སྙིང་རྗེའི་རང་གཟུགས་ཕྱག་ན་པདྨོར་བསྟོད

སྥྱིར་མང་གཙོ་ཞེས་པ་དེ་རྒྱལ་པོ་དང་། སྐུ་དྲག འབྱོར་ལྡན་ས་བདག་སོགས་རིང་ལུགས་ལ་མི་འདོད་མཁན་ཚོས་འཐབ་རྩོད་ངལ་བ་དུ་མས་གཏན་ཕབས་པའི་ལམ་ལུགས་ཡང་དག་ཅིག་ཡིན། རྩོལ་མེད་རང་བཞིན་གྱི་བྱུང་བ་ཞིག་མིན་པར་དེའི་ཕྱོགས་སུ་འཛིན་པའི་དཔའ་བོ་དཔའ་མོ་མང་པོས་སྙིང་སྟོབས་ཞུམ་མེད་ངང་རང་སྲོག་བློས་བཏང་གིས་བསྐྲན་པའི་ལྟ་བ་ཞིག་ཡིན།

མང་གཙོ༑ ཁྲག་གི་རྒྱ་མཚོའི་ནང་བཞད་པའི་པདྨ་དང་འདྲ། དེའི་རང་བཞིན་གྱི་རོ་ཡོངས་སུ་མངའ་འདོད་པའི་བློ་གསར་བུང་བ་ཚོས་ཐབས་ཤེས་ཟུང་འབྲེལ་གྲེལ་བཞིན་གྱི་རོ་ཡོངས་སུ་མངའ་འདོད་པའི་བློ་གསར་བུང་བ་ཚོས་ཐབས་ཤེས་ཟུང་འབྲེལ་གྱི་གཤོག་རྩལ་རྒྱས་པ་མ་བྱས་ན་ཁྲག་གི་རྒྱ་མཚོའི་ནང་ལྷུང་བས་ཕན་པ་ལས་གནོད་པ་མང་བ་སྨོས་ཅི་དགོས། མི་མང་ཚོས་རྒྱུན་དུ་མང་གཙོའི་ལམ་ལུགས་དང་ཐོབ་ཐང་ཤེས་ཐོག་སྥྱི་ཚོགས་ལ་ཕན་སེམས་རྒྱུད་ལྡན་གྱི་འོས་མི་ཚད་ལྡན་ཞིག་ལ་འོས་འཕེན་དགོས་པ་ནི་མི་སྒེར་སོ་སོའི་ལན་འགན་ཆེ་ཤོས་དེ་ཡིན། དཔེར་ན་རི་མོ་མཛེས་མ་མཛེས་འབྲི་མཁན་གྱི་ལག་རྩལ་ཡག་མ་ཡག་རག་ལས་པ་ལྟར་འགོ་ཁྲིད་བཟང་མབཟང་དམངས་ཀྱི་ཤེས་ཡོན་དང་ལག་བསྟར་བཟང་ངན་ལ་རག་ལས་སོ།

མང་གཙོའི་བྱུང་བ་བརྗོད་པ།

སྤྱིར་ཚང་མས་མཁྱེན་གསལ་རེད། ཡིན་ནའང་མཁྱེན་ལྡན་རྣམས་ལ་དྲན་སྐུལ་དང་མ་ཐོས་མ་མཁྱེན་པ་རྣམས་ལ་མཁྱེན་རྟོགས་ཀྱི་པདྨ་བློ་གསར་གྱི་མཚོ་མོའི་རང་བཞིན་དཔལ་དུ་བཞད་སླད་སྔར་དྲ་རྒྱའི་ཐོག་ཡི་གེའི་གཟུགས་སུ་བཀོད་འདོད་ཆེ་ཡང་ཁྱེད་རྣམས་ཀྱི་བློ་གྲོས་ཀྱི་དྲི་མ་གཅོད་པའི་བློ་སྟོབས་དང་བྲལ། ད་ལན་མི་བཟོད་ཉམས་རྟོགས་ཆུང་ངུ་ལས་བྱུང་བའི་ལྷག་བསམ་དང་སེམས་ཤུགས་ཀྱིས་རྒྱབ་ཕྱོགས་ནས་མ་འོངས་སོན་རྩ་བོད་ཀྱི་གཞོན་ནུ་ཡོངས་ལ་ཕན་སྨོན་སྔོན་བཏང་གིས་སྤྱིར་མང་གཙོ་དང་། ཁྱད་པར་དུ་༸གོང་ས་༸་སྐྱབས་མགོན་མཆོག་གིས་བོད་ཀྱི་ལམ་ལུགས་དེ་བཞིན་མང་གཙོ་ཙམ་མིན་པར་ཡང་དག་མང་གཙོའི་ལམ་སྲོལ་དུ་བསྒྱུར་རྒྱུའི་བླ་ན་མེད་པའི་ཐུགས་དགོངས་ལྟར་འཕོ་བསྒྱུར་གྱིས་གཏན་ལ་འབེབས་གནང་བའི་བོད་ཀྱི་ཡང་དག་པའི་མང་གཙོའི་ལམ་ལུགས་ཀྱི་སྐོར་སོགས་བརྗོད་ཀློག་གོ་བདེ་གསུམ་གྱིས་མཛེས་པའི་འགྱུར་རྩོམ་ཞིག་བློ་གསར་དོན་གཉེར་ཚོའི་སྤྱན་གྱི་དབང་པོའི་རྒྱན་དུ་འབྲི་བར་འཚལ།

མང་གཙོ་ཞེས་པ་དེ་གཞུང་གི་ཆབ་སྲིད་ཀྱི་རྣམ་པ་ཞིག་རེད། དེ་ལ་དབྱེ་ན། དབང་ཆ་མི་མང་གིས་ཐད་ཀར་ལག་བསྟར་བྱས་པས་ཐད་ཀའི་མང་གཙོ་དང་། དབང་ཆ་ཐོག་དངོས་མིན་པར་སྐུ་ཚབ་འཐུས་མི་བསྐོས་བརྒྱུད་ལག་བསྟར་བྱས་པས་སྐུ་ཚབ་འཐུས་མི་ཅན་གྱི་མང་གཙོ་སྐུ་ཚབ་འཐུས་མི་ཅན་གྱི་མང་གཙོ་དང་གཉིས། དེང་སང་རྒྱལ་ཁབ་ཕལ་ཆེ་བའི་ནང་ལག་བསྟར་བྱེད་བཞིན་པའི་མང་གཙོ་དེ་རེད། འདིར་ཐོག་མར་མང་གཙོ་ཞེས་པའི་ཐ་སྙད་སྐོར་ཅུང་གླེང་ན། དེ་ཡང་མང་གཙོ་ཞེས་པའི་ཐ་སྙད་དེ་གྷྲིཀ་ (Greek) ཡི་ཡུལ་སྐད་ལས་བྱུང་བ་ཞིག་ཡིན། (Demos) ཟེར་ན་མི་མང་དག (Kratos) ཟེར་ན་དབང་སྒྱུར་ཞེས་མདོར་ན་ཚིག་འདིའི་གཞི་རྩའི་གོ་དོན་ནི་མི་མང་གི་དབང་སྒྱུར་ཞེས་པ་དེ་ཡིན་པ་དང་། དེས་དུས་རབས་བཞི་པ་དང་ལྔ་པའི་གྷྲིཀ་ནང་མང་གཙོ་ཞེས་པའི་ལམ་ལུགས་ཤིག་ཡོད་པ་གསལ་པོ་མཚོན་ཐུབ། དབྱིན་སྐད་དུ་( Democracy) ཞེས་ཡོངས་གྲགས་ལྟར་རོ།

མང་གཙོ་ལ་འཛམ་གླིང་ཡོངས་ཀྱིས་མགྲིན་གཅིག་ཏུ་འདོན་པའི་དམིགས་བཀར་གྱི་མང་གཙོའི་མཆན་ཉིད།མེད། འོན་ཀྱང་དེ་ལ་འདྲ་མཉམ་དང་རང་དབང་བཅས་རྩ་དོན་གཉིས་ཀྱིས་མང་གཙོ་ཞེས་པའི་ཚིག་གི་མཆན་ཉིད་འཇོག་ཐུབ་ཅེས་སྲིད་དོན་མཁས་དབང་ཁག་གི་བཞེད་པ་འདྲ་མིན་སྣ་ཚོགས་ཥིག་མཆིས། མི་མང་ཁྲིམས་ཀྱི་མདུན་སར་འདྲ་མཉམ་དང་དབང་འཛིན་གྱི་ཐོབ་ཐང་འདྲ་མཉམ་སོགས་ཀྱིས་གོང་གི་རྕ་དོན་དེ་དག་མངོན་ཐུབ། མི་མང་གི་རང་དབང་དེ་ཁྲིམས་མཐུན་གྱི་རང་དབང་དང་ཐོབ་ཐང་གིས་བརྟན་བཟོ་བྱས། ཁྲིམས་མཐུན་གྱི་ཐོབ་ཐང་དང་རང་དབང་དེ་དག་རྩ་ཁྲིམས་ཀྱིས་སྲུང་སྐྱོབ་བྱེད་པའི་རྒྱུན་སྲོལ་བཟང་པོ་དེ་ད་ལྟའང་མཐོས་ཆོས་སུ་ཡོད། མང་གཙོ་ལ་འདྲ་མིན་སྣ་ཚོགས་ཡོད། མི་མང་ལ་རང་དབང་ཆེ་བ་དང་། བརྒྱུད་ལམ་བཟང་བ། ཡང་དག་པའི་མང་གཙོ། གཞན་ལས་ཁྱད་དུ་འཕགས་པ། ལེགས་པའི་ཡོན་ཏན་དུ་མ་དང་ལྡན་པའི་མང་གཙོ་མང་མང་དག་ཅིག་ཡོད་ཀྱང་། གལ་སྲིད་མང་གཙོའི་ལམ་ལུགས་དེ་ཞིབ་ཙ་རྟོགས་དཔྱོད་དང་ལྗིད་སྙོམ་སྲིད་བྱུས་ཀྱིས་ཆ་མི་སྙོམ་པའི་ཆབ་སྲིད་ཀྱི་དབང་ཚད་བགོ་གྲེམས་བྱེད་ཕྱོགས་ཐད་ལ་གཟིགས་སྐྱོང་མ་གནང་ན་དབང་ཚད་དུུམ་བུར་གྱུར་ནས་་ཡན་ལག་འཛིན་སྐྱོང་ངམ་ཚོགས་སྡེ་ཁག་གིས་དབང་དུ་བསྡུས་ནས་མང་གཙོ་མིང་ཙམ་དུ་ཟད་པར་འགྱུར་བའི་གནོད་སྐྱོན་མང་དུ་ཡོད་མཐོང་དང་མཐོང་བཞིན་པ་ལྟ་བུ་རེད།

མུ་འགོད་་་་་་་་