རེ་མདོ་སེངྒེ།
༄༅།། ཕྱི་ལོ་ ༢༠༡༡ ལོར་དཔར་བསྐྲུན་འགྲེམས་སྤེལ་ཞུས་པའི་ཁོ་བོའི་ཞིབ་འཇུག་ཆེད་རྩོམ། བོད་ཀྱི་ཤེས་ཡོན་ལམ་ལུགས་དང་སྲིད་བྱུས་ཞེས་པའི་དཔེ་དེབ་དེའི་མཇུག་སྐྱོང་ལྟ་བུར་དབུས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁང་ནས་ནན་ཆེས་ཐུགས་རེ་གནང་དོན་ལྟར། བར་ལམ་ལོ་ཤས་རིང་ལས་བྲེལ་ཆེན་པོ་ཡོད་མེད་ལ་མ་ལྟོས་པར་སྒེར་གྱི་ངལ་གསོ་དང་སློབ་སྦྱོང་གི་དུས་ཚོད་གང་ཡོད་བེད་སྤྱད་དེ། གཏམ་རྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་ཞེས་པའི་དེབ་ཕྲེང་བཅུའི་བདག་ཉིད་ཅན་གྱི་དཔེ་དེབ་འདི་དག་ལེགས་འགྲུབ་ཡོང་བར་འབད་བརྩོན་བྱས། དེ་རིང་སྟེ་ཕྱི་ལོ་ ༢༠༡༦ ལོའི་ཟླ་ ༩ ཚེས་ ༡༦ ཉིན་ཤེས་རིག་ལྷན་ཁང་གིས་གོ་སྒྲིག་གནང་དོན་ལྟར་ཤེས་རིག་བཀའ་བློན་སྐུ་ངོ་དངོས་གྲུབ་ཚེ་རིང་མཆོག་སྐུ་མགྲོན་གཙོ་བོར་ཕེབས་པའི་ཐོག་ནས་དབུ་འབྱེད་ཀྱི་མཛད་སྒོ་ཚུགས། དཔེ་དེབ་འདི་དག་དེ་རིང་དངོས་སུ་ཀློག་པ་པོའི་སྤྱན་སྔར་དངོས་སུ་འགྲེམས་སྤེལ་ཐུབ་པ་སྤྲོ་བ་བརྟས། གཤམ་དུ་རྩོམ་པ་པོས་དཔེ་དེབ་འདི་དག་གི་སྔོན་གླེང་གི་ཚུལ་དུ་བྲིས་པ་འགོད་སྤེལ་ཞུས་ཡོད།
ཐོག་མར་བཤད་འདོད་པའི་སྐད་ཆ་འགའ་ཤས།
༄༅།། སྲོལ་རྒྱུན་དང་དེང་རབས་ཀྱི་བར་མ་དོ་རུ་ལྷག་པ་ནི། ཀུན་སྤྱོད་ཉམས་རྒུད་དུ་འགྲོ་བའི་རྐྱེན་རྩ་གཙོ་བོ་ཞིག་ཡིན་པས། མི་གཤིས་དང་ཀུན་སྤྱོད་ཉམས་རྒུད་དུ་འགྲོ་བཞིན་པའི་སྤྱི་ཚོགས་ཤིག་ལ་མཚོན་ན། སྲོལ་རྒྱུན་གྱི་བཟང་པོའི་ཀུན་སྤྱོད་དང། བསམ་བློའི་དཔལ་ཡོན་ལ་བརྟེན་ནས། མི་གཤིས་དང་ཀུན་སྤྱོད་བསྐྱར་གསོ་བྱ་བ་ནི། མི་ངོ་མར་འགྱུར་བའི་བྱེད་ཐབས་གཏན་ཚིགས་ལྡན་པ་ཞིག་ཏུ་གྱུར་ཡོད།
དང་པོ། རྒྱབ་ལྗོངས།
ྋགོང་ས་ྋསྐྱབས་མགོན་ཆེན་པོ་མཆོག་གིས། བོད་རིགས་གཞོན་སྐྱེས་རྣམས་བོད་མིའི་ཤེས་ཡོན་དང༌། བསམ་བློ། ཀུན་སྤྱོད་བཅས་ཀྱི་གཞི་རྩ་ཡོད་པའི་ཐོག དེང་རབས་ཤེས་ཡོན་གྱི་གནས་ཚད་འདང་ངེས་ཀྱི། འདབ་གཤོག་གཉིས་ལྡན་ཞིག་ཏུ་བསྐྱེད་བསྲིང་བྱ་དགོས་པའི་ཐུགས་རེ་མཛད་པ་དང་མཉམ་དུ། ཡུལ་ལུང་དང༌། རིགས་རུས། ཤ་མདོག དབུལ་ཕྱུག ཤེས་ཡོན་ཡོད་མེད་བཅས་ཀྱི་ཁྱད་པར་ལ་མ་ལྟོས་པར། མི་ཡོངས་རྫོགས་བསམ་བློ་དང་ཀུན་སྤྱོད་གཞན་ཕན་ཚུལ་མཐུན་ཞིག་ཡོང་དགོས་པའི་གལ་གནད་ལ་དགོངས་ཏེ། འཛམ་གླིང་སྤྱིའི་ཤེས་ཡོན་ལམ་ལུགས་ཁྲོད་ལྷགས་པའི་བསམ་བློ་དང་ཀུན་སྤྱོད་ཀྱི་སྟོང་ཆ་མང་པོ་ཞིག བོད་ཀྱི་རིག་གཞུང་དང་སྤྱི་ཚོགས་ཀྱི་ཤེས་ཡོན་ལམ་ལུགས་ཀྱི་ཐོག་ནས། སྐོང་ཐུབ་པའི་ནུས་པ་དམིགས་བསལ་བ་ཞིག་ཡོད་པ་དེ་དག སྔོག་འདོན་བྱ་དགོས་པའི་བཀའ་སློབ་སྔ་ཕྱིར་ཕེབས་ཡོད།
དེ་བཞིན་ྋསྐྱབས་རྗེ་ཀིརྟི་རིན་པོ་ཆེ་མཆོག་གིས་ཀྱང༌། བོད་ཀྱི་མ་འོངས་པའི་ཆོས་སྲིད་ཀྱི་གནས་སྟངས་གང་འདྲ་ཞིག་ཏུ་འགྱུར་མིན། ད་ལྟའི་གཞོན་རབས་པ་རྣམས་ཀྱི་ཤེས་ཡོན་དང་ཀུན་སྤྱོད་ལ་རག་ལས་ཤིང༌། ཁོང་ཚོ་ཤེས་ཡོན་དང་གཞན་ཕན་བཟང་སྤྱོད་ལྡན་པ་ཞིག་ཡོང་ཐུབ་མིན་ཡང། མིག་ལྟོས་དང་གསོ་སྐྱོང་བྱེད་སྟངས་ལ་རག་ལས་པས། གཞོན་སྐྱེས་ཚོར་སློབ་དེབ་ངོས་ཀྱི་སློབ་སྦྱོང་སྤྲད་པ་ཙམ་མ་ཡིན་པར། ཆུང་དུས་ནས་གཞན་ཕན་བཟང་སྤྱོད་གཤིས་རྒྱུད་དང་འདྲེས་པ་ཞིག་ཡོང་ཐབས་བྱ་བ་དགོས་པ་ནི། ཤིན་ཏུ་གལ་གནད་ཆེ་བའི་ཚུལ་གསུང་གི་ཡོད་པར་བརྟེན། གསུང་ཚིག་འདི་ཕྲན་གྱི་དྲན་ངོས་ནས་ཡལ་ཐབས་མེད་པའི་རྡོ་རིང་ལྟ་བུ་ཞིག་ཏུ་གྱུར།
ལོ་ཤས་གོང་དུ་བོད་ཀྱི་ཤེས་ཡོན་ལམ་ལུགས་དང་སྲིད་བྱུས་ཞེས་པའི་ཆེད་རྩོམ་འབྲི་བའི་སྐབས། ཡིག་ཆ་ལྟ་ཀློག་བྱས་པ་ཙམ་མ་ཡིན་པར། སྤྱི་ཚོགས་ཕྱི་ནང་གི་མི་སྣ་མཐོ་དམའ་བར་གསུམ་མང་པོ་ཞིག་གི་སེམས་པའི་གཏིང་རིམ་བསྔོགས་ནས། ཅི་ནུས་ཀྱིས་ཞིབ་འཇུག་རྒྱུས་ལོན་བྱ་རྒྱུ་བྱུང། སྤྱི་ཚོགས་འདིའི་ཕྱོགས་ཡོངས་ཀྱི་གནས་ཚུལ་ངོ་མ་མཐོང་བའི་སྐབས། གོང་གསལ་བཀའ་སློབ་ཁག་གི་བསྟན་དོན་ལྟར། རང་རེར་ཀུན་སྤྱོད་ཀྱི་སློབ་གསོ་གལ་ཆེ་བ་ཙམ་དུ་མ་ཟད། ཁ་ཚ་དགོས་གཏུགས་སུ་གྱུར་འདུག་པའི་ངོས་འཛིན་གཏིང་ཟབ་ཐོབ།
གཉིས་པ། འཕྲལ་རྐྱེན།
ཕྱི་ལོ་ ༢༠༡༢ ལོའི་ལོ་མཇུག་ཡས་མས་སུ། དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ནས། འཛིན་གྲྭ་བདུན་པ་ཡན་གྱི་བོད་ཡིག་གི་ཀློག་དེབ་རེ་ཟུང་འབྲི་དགོས་པའི་བཀའ་མངགས་ཕེབས་ཀྱང། ངའི་སློབ་སྦྱོང་གི་ཁ་ཕྱོགས་དང་ལས་ཀའི་བྲེལ་བ་གང་འདྲ་ཡིན་པ་རང་ཉིད་ཀྱིས་གསལ་པོར་ཤེས་ཀྱི་ཡོད་སྟབས། ཐོག་མར་ལས་གཞི་འདི་ཁས་ལེན་བྱེད་པའི་སྤོབས་པ་མ་བྱུང་ཡང། ཞིབ་ཏུ་བསམ་པའི་སྐབས་དེང་སང་ཀློག་དེབ་མང་ཙམ་མཐོང་རྒྱུ་འདུག་མོད། བོད་རང་གི་འཚོ་བ་དང་མི་སྣ་རྩོམ་སྙིང་བྱས་ནས་བྲིས་པ་ཉུང་ཞིང། བསྒྱུར་རྩོམ་གྱི་རིགས་མང་ཆེ་བ། ཚིག་བརྗོད་ཀྱི་ཐོག་ནས་བོད་སྐད་ཀྱི་ཚིག་འགྲོས་ངོ་མར་གྱུར་ཐུབ་མེད་པའི་ཐོག བསམ་བློ་དང་གོམས་གཤིས་གཉིས་ཀ་བོད་ཀྱི་ཁྱད་ཆོས་ལྡན་པ་ཞིག རང་བཞིན་གྱིས་ཡོང་དཀའ་བས། མི་གཤིས་དང་ཀུན་སྤྱོད་ཉམས་གསོ་བྱེད་པའི་དམིགས་ཡུལ་གྱི་ཐད་ནས་བལྟས་ན། བོད་སྐད་དང་བོད་དྲི་ངོ་མ་ཚོར་ཐུབ་པ་དང༌། བོད་རང་གི་མི་སྣ་རྩོམ་སྙིང་བྱས་པའི་ཀློག་དེབ་རིགས་དགོས་པ་ཤིན་ཏུ་གལ་གནད་དུ་གྱུར་ཡོད་པས། བྱ་སྒྲུང་བྱེའུ་སྒྲུང་དང། གཞན་གྱི་མི་སྣ་རྩོམ་སྙིང་བྱས་པའི་སྒྱུར་རྩོམ་ཙམ་མ་ཡིན་པར། བོད་སྐད་ངོ་མའི་རྗོད་ཚིག་དང། བོད་མི་ངོ་མ་རྩོམ་སྙིང་བྱས་པའི་ཀུན་སྤྱོད་སློབ་གསོ་དང་འབྲེལ་བའི་ཀློག་དེབ་རིགས། ཤིན་ཏུ་དགོས་གལ་ཆེན་པོར་གྱུར་པའི་དངོས་ཡོད་གནས་ཚུལ་གྱི་ཐོག་ནས། ལས་བྲེལ་དང་དུས་ཚོད་ཀྱི་དཀའ་ངལ་ཡོད་མེད་ལ་མ་ལྟོས་པར། བོད་སྐད་དང་བོད་གཤིས་ངོ་མ་ལྡན་པའི་བོད་ཡིག་གི་ཀློག་དེབ་འགའ་ཤས་འབྲི་རྒྱུ་དང་ལེན་ཞུས།
གསུམ་པ། ནང་དོན་དང་རྩོམ་ཐབས།
ཀློག་དེབ་འདི་དག་སྒྱུ་རྩལ་དང་རྩོམ་ཐབས་ཀྱི་ཐད་ནས་གནས་ཚད་ལོངས་པ་ཞིག་བྱུང་ཡོད་པའི་སྤོབས་པ་མི་འདུག་ཀྱང། སྔ་མོ་ནས་སྐྱེས་བུ་དམ་པ་མང་པོའི་རྣམ་ཐར་ཁག་ལ་མཇལ་བའི་སྐབས། ཆོས་ལུགས་ཀྱི་ལྟ་ཚུལ་རྐྱང་པ་མ་ཡིན་པར། མི་གཞི་དང་བསམ་བློ། ཡ་རབས་བཟང་པོའི་ཀུན་སྤྱོད། ཤེས་ཡོན་སློབ་སྦྱོང་གི་ལྟ་བ་དང་ཧུར་བརྩོན་བཅས། གང་ཅིའི་ཐད་ནས་ཁོང་རྣམ་པའི་མཛད་སྤྱོད་ནི། ང་ཚོས་མིག་དཔེར་ལྟ་འོས་པ་ཤ་སྟག་ཡིན་པའི་ངོས་འཛིན་གཏིང་ཟབ་ཡོད། དེར་བརྟེན་ཀློག་དེབ་འདི་དག་འབྲི་འགོ་འཛུགས་པའི་སྐབས་སུ་ཡང། རྟོག་པ་འཆར་ཡན་གྱི་ཀློང་ནས་གང་བྱུང་བཏུས་སྒྲིག་བྱས་པ་ཙམ་མ་ཡིན་པར། ཁོང་རྣམ་པའི་ཡ་རབས་ཚུལ་མཐུན་གྱི་ཀུན་སྤྱོད་དང་མི་གཤིས། ཤེས་ཡོན་དོན་དུ་གཉེར་བའི་དམིགས་རྒྱང་། མདོར་ན། མིག་སྔའི་འགོག་རྐྱེན་ཡོངས་རྫོགས་ལ་གདོང་ལེན་བྱས་ཏེ། རང་ཉིད་ཤེས་ཡོན་ལྡན་པ་དང། ཀུན་སྤྱོད་ལྡན་པ། གཞན་ཕན་གྱི་ཁོག་རྒྱ་ཡོད་པ་བཅས་ཇི་ལྟར་བྱས་པའི་ཚུལ་རྣམ་ཐར་དང་ལོ་རྒྱུས་སོ་སོ་ལས་དྲངས་ཏེ། ཅི་ནུས་ཀྱིས་ཚིག་བརྗོད་སླ་བོར་བཅོས་ཤིང། གཏམ་རྒྱུད་ཀྱི་རྩོམ་ཐབས་སྤྱད་ནས་བྲིས་ཡོད་པས། དཔལ་མགོན་འཕགས་པ་ཀླུ་སྒྲུབ་ཀྱིས། བདེ་གཤེགས་སྐུ་གཟུགས་ཤིང་ལས་ཀྱང། །བགྱིས་པ་ཅི་འདྲའང་རུང་སྟེ་མཁས་པས་མཆོད། །དེ་བཞིན་བདག་གི་སྙན་ངག་འདི་ངན་ཡང། །དམ་ཆོས་བརྗོད་ལ་བརྟེན་སླད་སྨད་མི་བགྱི། །ཞེས་གསུངས་པ་ལྟར་ལགས་ན། ཀློག་དེབ་འདི་དག་བྱ་སྒྲུང་བྱེའུ་སྒྲུང་དག་དང་མི་འདྲ་བར། མི་གཞིའི་ཀུན་སྤྱོད་དང། ཤེས་ཡོན་ཡར་ལྡན་དུ་སྤེལ་བའི་དངོས་བྱུང་གི་ཐབས་ཚུལ་སྣ་ཚོགས་ཚིག་གསལ་གོ་བདེར་བཀོད་པས། གཞི་རིམ་སློབ་མ་ཙམ་དུ་མ་ཟད། དགེ་རྒན་དང། ཕ་མ་རྣམས་ཀྱིས་ཀྱང་ཀློག་དགོས་པའི་རིན་ཐང་ལྡན་ངེས་སྙམ་ཞིང། དགེ་རྒན་དང་ཕ་མའི་ངོས་ནས་བྱིས་པ་ཚོར་ཀུན་སྤྱོད་ཀྱི་བསླབ་བྱའི་ཚུལ་དུ་ངོ་སྤྲོད་བྱེད་ཐུབ་ན། སྐད་ཡིག་དང། ཀུན་སྤྱོད། བསམ་བློ་གང་ཅིར་ཤུགས་རྐྱེན་ངེས་ཅན་འབྱུང་བའི་ཁག་ཐེག་བྱེད་ཐུབ། ཀློག་དེབ་འདི་དག་གི་སྤྱི་ཁྱབ་ཀྱི་མིང་ལ། གཏམ་རྒྱུད་ཀྱི་ལམ་ནས་ཡབ་མེས་ཀྱི་ཞབས་རྗེས་འཚོལ་བ་ཞེས་བཏགས་པ་ཡང། ཀློག་དེབ་འདི་དག་བརྒྱུད་ནས་དམ་པ་གོང་མ་མང་པོའི་ཞབས་རྗེས་མཐོང་ཐུབ་པའི་རྒྱུ་མཚན་གྱིས་ཡིན།
ཀློག་དེབ་འདི་དག་འབྲི་སྟངས་ཀྱི་རྣམ་པ་ནི། རྩ་བའི་བྱུང་བ་རྣམས་མི་སྣ་སུ་ཡིན་པ་དེའི་རྣམ་ཐར་དང་ལོ་རྒྱུས་གཞི་ལ་བཞག་ནས་བྲིས་ཡོད་ཀྱང༌། གཏམ་བརྗོད་དང་རྣམ་འགྱུར་སོགས་མི་སྣའི་ཕྱིའི་ཉམས་འགྱུར་དང། ཁོར་ཡུག་གི་གནས་སྟངས་མང་དག་ཅིག་རྩོམ་པ་པོས་བཅོས་སྒྲིག་བྱས་ཏེ། གཏམ་བརྗོད་ཟློས་གར་དང་འཁྲབ་གཞུང་གི་རྣམ་པ་ཐོན་ཐབས་ཞུས་ཤིང། མི་སྣའི་གཏམ་བརྗོད་ཀྱང་གོ་བདེ་བོ་ཡོང་ཐབས་གཙོ་འདོན་བྱས་ཡོད།
འདིར་གསལ་བཤད་ཞུ་དགོས་པ་ཞིག་ལ། ཀློག་པ་པོར་གོ་བརྡ་འཕྲོད་བདེ་བའི་ཆེད་དུ། གཏམ་རྒྱུད་སོ་སོའི་རྩོམ་སྙིང་གི་མི་སྣ་སུ་ཡིན་པ་དེ་མི་རང་བཞིན་པའི་ངང་ཚུལ་ཐོག་ནས་འབྲི་བ་གཙོ་འདོན་བྱས་པ་ལས། རྒྱལ་བ་དང་བྱང་ཆུབ་སེམས་དཔའི་སྤྲུལ་བ་ཡིན་པའི་ཐུན་མོང་མ་ཡིན་པའི་གནས་ཚུལ་ཁག་བསྲེས་མེད། དེར་བརྟེན་རིགས་ཤིག་ལ་དམ་པ་གོང་མ་ཚོ་སྐྱེས་བུ་རང་བཞིན་པའི་སར་བཞག་ནས་མ་གུས་པ་ཞུས་འདུག་སྙམ་པའི་རྣམ་རྟོག་འབྱུང་སྲིད་ཀྱང། ཕྲན་ལ་མཚོན་ན་མཛད་རྗེས་ཅན་གྱི་སྐྱེས་བུ་ཁོང་རྣམ་པའི་མཛད་སྤྱོད་བཟང་པོ་རྣམས། གཞོན་སྐྱེས་ཀྱི་མི་རབས་ཚོར་མིག་དཔེར་སྟོན་འདོད་པ་ལས། མ་གུས་པ་ཞུ་འདོད་པ་གཏན་ནས་མེད་པས་གོ་བ་ལོག་ཕྱོགས་སུ་མི་འཁྱེར་བའི་རེ་བ་ཞུ་ཞིང་། ངལ་གསོའི་བར་གསེང་དང་སྒེར་ལ་དབང་བའི་དུས་ཚོད་སིལ་མ་རྣམས་སུ་འབད་བརྩོན་བགྱིས་པ་འདི་དག་བོད་ཀྱི་གཞོན་སྐྱེས་རྣམས་ཆོས་སྤྱོད་ཞི་བའི་ས་བོན་ཞིག་ཏུ་འཚར་ལོངས་ཡོང་བའི་རྒྱུར་འགྱུར་བའི་རེ་སྨོན་དང་བཅས།
རྩོམ་པ་པོ་རེ་མདོ་སེངྒེས་ཕྱི་ལོ་ ༢༠༡༦ ལོའི་ཟླ་ ༢ ཚེས་ ༣ ཉིན་བྲིས།
རྗེས་སུ་ཡི་རངས་ཞུ་འོ་་་གང་མགྱོགས་བཀླག་སྐལ་ལྡན་པར་སྨོན།
༄༅།། རྩོམ་པ་པོར་བཀྲ་ཤིས་བདེ་ལེགས་ཞུ། ཁྱེད་ཀྱིས་ད་བར་བོད་ཀྱི་སྐད་ཡིག་དང་རིག་གཞུང་ཐོག་མཛད་རྗེས་ཆེན་པོ་བཞག་གནང་ཡོད་པས་ཐུགས་རྗེ་ཆེ་ཞུ། འགན་ཁུར་གཏན་ནས་མེད་པའི་སྟོང་སྐད་སྒྲོག་མཁན་དང་ཁྱེད་ཚོའི་བར་ལ་མི་འདྲ་བའི་ཁྱད་པར་ནི་རྣམ་དཔྱོད་དང་གྲུབ་འབྲས་ཡིན། ཁྱེད་ཀྱི་མཛད་རྗེས་ཡི་རང་བསྔགས་བརྗོད་ཞུ་བཞིན་ཡོད།
རྗེ་སུ་ཡི་རངས་ཞུ་ཡོད། རྩོམ་པ་པོ་ཚད་ལྡན་ཡིན་རྐྱེན་ཨ་རིའི་ཀློག་དེབ་ལྟ་བུའི་ཡ་མ་བརླ་དེ་འདྲ་མིན་པའི་ཡིད་ཆེས་གཙང་མ་ཡོད། སྔོན་མ་གཞི་རིམ་གྱི་ཀློག་དེབ་དེ་ཚོ་མགོ་ན་བྱེད་རང་ཡོད། ཀློག་ན་ཚིག་སྦྱོར་མི་བདེ་བ། ནང་དོན་ཆོས་ལུགས་ཀྱིས་ཤན་ཞུགས་ཏེ་ལྷ་སྒྲུང་ཀླུ་སྒྲུང་འདྲ་རྐྱང་བཤད་དེ་ཡོད་པས་བྱིས་པ་ཚོ་ཉོབ་སྣང་སྐྱེས་ཀྱི་ཡོད། ལོ་རྒྱུས་ཡིན་ན་ལོ་རྒྱུས་ཁམས་གཙང་། ཆོས་གཞུང་ཡིན་ན་ཆོས་གཞུང་ཁམས་གཙང་བྱས་ཏེ་རང་རང་གི་ཁྱད་ཆོས་དེ་རང་རང་གི་སྟེང་ནས་མངོན་ཐུབ་པ་ཡིན་ན་རིག་གནས་འཕེལ་རྒྱས་དང་ངོ་བོ་སྲུང་སྐྱོབ་ལ་ཕན་འབྲས་བླ་ན་མེད་པ་ཐོན་ཐུབ། དེ་མིན་ཉ་ཉོག་མང་པོ་ཞིག་བསྲེས་ཏེ་རྩ་ཆེ་རབ་རྩལ་ཡོད་མདོག་བསྟན་ནས་རང་མགོ་རང་གིས་གཡོག་ན་ཅི་ཕན།
རྗེས་སུ་ཡི་རངས་ཡོད།མགྱོགས་ནས་མྱུར་དུ་དེབ་དེ་དག་ཀློག་ཐུབ་རེ་བ་ཡོད།
མང་པོ་ཞིག་གིས་བཙན་བྱོལ་ནང་དུ་བོད་ཕྲུག་ཚོའི་བོད་པའི་སྐད་ཡིག་ཡར་རྒྱས་མི་འགྲོ་བའི་རྒྱུ་རྐྱེན་གཙོ་ཆེ་ཤོས་ཤིག་ནི། བོད་སྐད་ནང་དུ་བཀླག་རྒྱུའི་དཔེ་དེབ་ཉུང་བས་ཡིན་པར་འདོད་མཁན་ཡོད་སྲིད་ཀྱང་། དོན་དངོས་ཀྱི་རྒྱུ་རྐྱེན་ནི་དེ་མིན་པར། སློབ་ཕྲུག་ཚོར་སློབ་དེབ་ཤོག་གྲངས་ཁ་ཤས་ཤིག་ལས་སྤྲོས་པའི་དཔེ་དེབ་གཞན་གང་ཡང་ཀློག་འདོད་ཀྱི་འདུན་པ་མེད་པས་རེད། དེ་ནི་དཔེ་དེབ་ཀློག་པའི་གོམས་གཤིས་དང་དཔེ་དེབ་ཟེར་བ་དེ་བཀླག་རྒྱུ་ཞིག་ཡིན་པའི་འདུ་ཤེས་སོགས་མེད་པས་རེད། དེ་ཡང་ཡིན་ཏེ། ཁོ་ཚོ་ཕལ་ཆེ་བའི་ཨིན་ཧིན་སོགས་ཀྱི་འབྲི་ཀློག་ཆུ་ཚད་ལ་བལྟས་ནའང་། ལས་སླ་པོས་ཤེས་ནུས་པ་ཞིག་རེད།