ཞོགས་རླུང་། འཇམ་དབྱངས་དབང་འདུས།
སྤྱིར་འཛམ་བུ་གླིང་གི་སྐད་དང་ཡི་གེ་གང་འདྲ་ཞིག་ཡིན་རུང་གང་གི་རིན་ཐང་མཐོང་དགོས་པ་ནི་གནད་ཅིག་ཏུ་མཐོང་། གང་གི་རིན་ཐང་དང་ཕན་གནོད་གྱི་རང་བཞིན་རྟོགས་ཚེ། ད་གཟོད་གཞི་ནས་སྦྱོང་འདོོད་ཀྱི་སེམས་ཁམས་ཆེ་རུ་འགྲོ་ངེས་རེད། དེ་བས། གང་ལ་སྦྱོང་འདོོད་ཀྱི་སེམས་ཁམས་ཆེ་བོ་ཞིག་ཡོད་ཚེ། ད་གཟོད་ཡར་རྒྱས་ཀྱི་རྟ་ཕོ་རླུང་ལྟར་ཁྱོད་ཀྱི་མིག་མདུན་དུ་རྒྱུགས་ཡོང་བ་ནི་སུས་ཀྱང་འགོོག་ཐབས་བྲལ་བ་ཞིག་རེད། དེ་བཞིན་དུ། འུ་ཚང་གི་སྐད་དང་ཡི་གེའི་རིན་ཐང་འུ་ཚོས་མཐོང་དགོས་ཤིང་། བོད་སྐད་དང་ཡི་གེའི་རིན་ཐང་མཐོང་དགོས་པ་ནི་འུ་ཚོའི་ཕྲག་ཏུ་ལྷུང་བའི་བཅོས་མིན་གྱི་འགན་འཁྲི་ཞིག་ཅི་ལ་མིན།
འོན་ཏེ། གཞིས་སུ་སྐྱེས་པའི་འུ་ཚང་གི་གཞོན་པ་དང་གཞོན་མ་མང་དག་ཅིག་གི་སེམས་ཁམས་སུ་བོད་ཡིག་ནི་ཆེས་ཉོབ་སྣང་ཅན་གྱི་སློབ་ཚན་ཞིག་ཏུ་མཐོང་དང་མཐོང་བཞིན་མཆིས་པ་ནི་བོད་ཡིག་གི་རིན་ཐང་རྟོགས་མ་ཐུབ་པའི་རྐྱེན་གྱིས་རེད། ཕྱོགས་གཞན་ཞིག་ནས་གླེང་ན་ཁོང་ཚོ་མ་དག་ཅིག་གི་སེམས་ཁམས་སུ་བོད་ཡིག་ལ་བརྩེ་དུང་མེད་འདུག་ལ་བོད་ཡིག་སྦྱོང་འདོད་ཀྱི་སེམས་ཁམས་ཀྱང་དེ་བས་མི་འདུག དེས་གཞིས་སུ་ཡོད་པའི་དགེ་རྒན་དང་ཕ་མ་དག་གི་བློ་གསོ་ཡི་ཕམ་ཁ་ཞིག་སྟོན་གྱིན་ཡོད་མོད། འོན་ཀྱང་། གཞི་རུ་གནས་པའི་ན་གཞོན་མང་དག་ཅིག་ད་དུང་ཕམ་ཁའི་བློ་གསོ་ལས་རྣམ་པར་རྒྱལ་འཐུབ་གྱིན་མེད་པ་ནི་དོན་དམ་པ་གནད་དོན་ཅི་འདྲ་ཞིག་ལ་ཐོགས་པ་རེད་དམ།
ང་ཚོས་རྒྱ་ཆེན་པོ་ཞིག་འཆད་མི་དགོས་ཏེ། དེ་དག་ནི་དོན་དམ་གྱི་བློ་གསོ་དང་བཅོས་མིན་གྱི་བརྩེ་དུང་དེ་བཞིན་ཞེན་ཁོག་གི་སྙིང་སྟོབས་མེད་སོང་ནི་རེད། གོང་དུ་གསལ་བར་ལྟར། འུ་ཚང་གི་སྤྱི་ཚོགས་སུ་དོན་དམ་གྱི་སློབ་གསོ་དང་བཅོས་མིན་གྱི་བརྩེ་དུང་དེ་བཞིན་ཞེན་ཁོག་གི་སྙིང་སྟོབས་དེ་དག་གི་ཐད་ལ་ཅུང་ཡག་པོ་མེད་པའི་ཚུལ་དུ་གནས་ཡོད་པས། དུས་དེང་སང་གི་བོད་པའི་ན་གཞོན་ང་དང་ཁྱོད་འདྲ་བའི་སེམས་ཁམས་སུ་བོད་ཡིག་གི་རིན་ཐང་རྟོགས་྄ཐབས་ཀྱི་ཐབས་ལམ་ཅི་འདྲ་ཞིག་ དགོས་ཀྱི་རེད་དམ། དེ་བས་ཐབས་ལམ་གསར་པ་ཞིག་ཇི་ལྟར་བསྐྲུན་དགོས་ཀྱི་རེད་དམ། འདྲི་ཚིག་དེ་དག་ནི་ན་གཞོན་དག་ལ་མཚོན་ན་གལ་གནད་ཅན་གྱི་འདྲི་ཚིག་ཞིག་མ་ཡིན་དམ།
རང་མི་རིགས་ཀྱི་སྐད་དང་ཡི་གེ་ལ་རིན་ཐང་ལྟ་ཚུལ་གྱི་ཐད་ལ་འུ་ཚང་གི་སྤྱི་ཚོགས་སུ་རྒན་གཞོན་བར་གསུམ་མང་དག་ཅིག་གི་སེམས་པའི་གཏིང་རུམ་དུ་ཡིད་སྐྱོ་དགོས་པའི་ལྟ་ཚུལ་ཞིག་འཛིན་བཞིན་མཆིས་པ་ནི་”བོད་ཡིག་འབྲི་ཀློག་ཤེས་ཙམ་འབྱུང་ན་འགྲིག” ཅེས་པའི་ལྟ་ཚུལ་དེ་རེད། འུ་ཚང་གི་སྤྱི་ཚོགས་སུ་དེ་ལྟ་བུར་ལྟ་ཚུལ་ཞིག་བྱུང་དང་འབྱུང་བཞིན་ཡོད་པའི་རྒྱུ་མཚན་གཙོ་བོ་གཅིག་ནི་འུ་ཚང་གི་སྤྱི་ཚོགས་སུ་བོད་སྐད་ཡིག་ཡར་རྒྱས་གཏོང་ཕྱོགས་ཀྱི་སློབ་གསོ་ཞན་པའི་རྐྱེན་གྱིས་རེད། དེ་མ་ཟད་འུ་ཚང་གི་སྤྱི་ཚོགས་སུ་རང་མི་རིགས་ཀྱི་སྐད་དང་ཡིག་ལ་བརྩེ་དུང་དང་ལ་རྒྱ་ཟབ་བའི་པཎ་ཆེན་རིན་པོ་ཆེན་མཆོག་ལྟ་བུར་མི་བུ་ཉུང་བའི་དབང་གིས་རེད། དུས་དེང་སང་ང་ཚོ་ལ་ཆེས་དགོས་མཁོ་ཆེ་བ་ནི་ཁོང་ལྟ་བུའི་མི་བུ་དག་གིས་རང་མི་རིགས་ཀྱི་སྲོག་དང་འདྲ་བའི་སྐད་དང་ཡི་གེར་བཅངས་པའི་བརྩེ་དུང་ཟབ་མོ་འདི་མ་ཡིན་ནམ། འཆི་གསོན་གྱི་བར་ལ་གནས་པའི་རང་མི་རིགས་ཀྱི་སྐད་ཡིག་ལ་བཅོས་མིན་གྱི་བརྩེ་དུང་ཟབ་མོ་ཞིག་དང་སྲུང་སྐྱོབ་ཀྱི་སྙིང་སྟོབས་མཁྲེགས་པོ་ཞིག་མངའ་ཚེ། ད་གཟོད་ང་ཚོས་བསམ་བློ་གསར་བ། སྙིང་སྟོབས་གསར་བ། ཕུགས་མདུན་གསར་བ་ཞིག་དང་མདུན་བསྐྱོད་ཀྱི་སྤོབས་པ་གསར་བ་ཞིག་འུ་ཚང་གི་སྤྱི་ཚོགས་སུ་འཇོག་མི་ཐུབ་པ་ག་ལ་སྲིད།
བཤད་སྲོལ་ཞིག་ལ་”སྐད་ཡིག་ནི་མི་རིགས་ཤིག་གི་བླ་སྲོག” རེད་ཅེས་འུ་ཚོས་མང་པོ་མང་པོ་ཞིག་བཤད་དང་འཆད་བཞིན་ཡོད་མོད། འོན་ཀྱང་། དོན་དངོས་ཐོག་རང་མི་རིགས་ཀྱི་སྐད་དང་ཡི་གེ་ཉིན་རེའི་འཚོ་བའི་བརྒྱུད་རིམ་ཁྲོད་དུ་བཀོད་སྤྱོད་བྱེད་མཁན་དང་རང་ཉིད་ཀྱི་སྲོག་ལྟར་གཅེས་འཛིན་བྱེད་མཁན་གྱི་མི་བུ་ག་ཚོད་ཅིག་ཡོད་དམ། ད་དུང་རང་མི་རིགས་ཀྱི་སྐད་ཡིག་གི་སླད་དུ་རང་ཉིད་ཀྱི་སྲོག་ཀྱང་འབེན་དུ་འཇོག་ཕོད་པའི་དཔའ་བོ་དང་དཔའ་མོ་ག་ཚོད་ཡོད་དམ། དབྱིན་ཡིག་ལས་ལྷག་པའི་རང་ཉིད་ཀྱི་ཤ་དང་རུས་པའི་གསེང་དུ་འཐིམ་པའི་བོད་སྐད་ཡིག་སྦྱོང་མཁན་གྱི་སློབ་གཉེར་བ་ག་ཚོད་ཡོད་དམ། འདྲི་ཚིག་དེ་དག་འུ་ཚང་གི་རྒས་གཞོན་བར་གསུམ་གྱི་སེམས་ཀྱི་གཏིམ་རུམ་དུ་བཅུག་སྟེ་རད་ཉིད་ལ་དབང་བའི་སྐད་ཡིག་ལ་དོ་སྣང་ཇེ་ཆེ་ནས་ཇེ་ཆེ་གཏོང་དགོས་པ་ནི་གནད་དུ་མཆིས་པའི་ལས་ཀ་ཞིག་ཅི་ལ་མིན།
2016 9 13
(རྒྱང་མིག་གིས་བརྒྱུད་སྤྲོད་བྱས།)