དགེ་རྒན་ཉིན་མོར་བསམ་ཚུལ་འགའ།

སྐལ་བཟང་དོན་གྲུབ།

 
སྤྱིར་དགེ་རྒན་ནི་ཇི་ལྟར་གལ་ཆེན་པོ་ཡིན་པ་ཚང་མས་ཤེས་གསལ་ཡིན་པས། ངས་དེའི་སྐོར་ལ་བྲིས་ནས་རང་ཉིད་དང་གཞན་གྱི་དུས་ཚོད་འཕྲོག་བརླག་གཏོང་འདོད་མེད། ངས་བཤད་འདོད་པ་ནི་བཙན་བྱོལ་སྤྱི་ཚོགས་ནང་གི་དགེ་རྒན་གྱི་གནས་བབ་དང་དེས་སློབ་ཕྲུག་ཚོའི་སྟེང་ལ་ཤུགས་རྐྱེན་ཐེབས་ཚུལ་སྐོར་ལ་ཡིན། དེང་སང་བོད་པའི་གཞོན་སྐྱེས་མཐོ་སློབ་ཀྱི་ལག་ཁྱེར་ཆེ་མཐོན་པོ་རེ་འཁྱེར་ནས་ཡོང་མཁན་ནི་མཚན་མོའི་སྐར་མ་ལྟར་མང་པོ་ཆགས་ཡོད་ཀྱང། དེ་དག་ཁྲོད་དུ་མང་པོ་ཞིག་རྒྱ་གར་གྱི་སྤྱི་ཚོགས་ལ་ལས་ཀ་མི་རག་པ་མ་ཟད། ང་རང་ཚོའི་བོད་མིའི་སྒྲིག་འཛུགས་ཀྱི་ཡིག་ཚད་དེ་ཡང་མི་འཕྲོད་པར། ལས་མེད་ལུས་མཁན་ཡང་མང་དག་ཅིག་ཡོད་པ་ནི། དྷ་སའི་ཇ་ཁང་ནང་གི་སྐད་ཆ་ཞིག་མིན་པར་དངོས་ཡོད་ཀྱི་གནས་ཚུལ་ཞིག་ཆགས་བསྡད་ཡོད།

བྱས་ན་དེ་ལྟར་ཡོང་དགོས་དོན་གང་ལ་ཐུག་ཡོད་དམ། སློབ་ཕྲུག་རང་ཉིད་ཀྱིས་སྤྱི་ཡོངས་ཀྱི་ཤེས་ཡོན་ལ་ཤུགས་མ་བརྒྱབ་པར་ཡིག་ཚད་ཁོ་ནའི་ཐོག་ལ་དོ་སྣང་སྤྲད་པ་ཡིན་སྲིད་པ་དང། ཡང་ན་སློབ་གྲྭའི་དུས་སུ་དགེ་རྒན་དང་སློབ་སྤྱི། ཕ་མ་སོགས་ཀྱིས་ཕྲུ་གུའི་ཡིག་ཚད་ཀྱི་གྲུབ་འབྲས་ཁོ་ན་ལས་སྤྱི་ཡོངས་ཀྱི་ཤེས་ཡོན་གནས་ཚད་ཡར་རྒྱས་ཡོང་ཐབས་ལ་འཐུས་ཤོར་ཕྱིན་པ་ཡང་ཡིན་སྲིད།
གང་ལྟར་ཡང་རང་ཉིད་ཀྱི་ལག་ཁྱེར་དང་མི་མཉམ་པའི་ལས་ཀ་ལ་འཇུག་བཞིན་པའི་གཞོན་སྐྱེས་མང་དག་ཞིག་ཡོད་པ་སྨོས་ཅི་དགོས། དཔེར་ན། སྨན་རྩིས་ཁང་གི་གང་བསྐོས་ལས་བྱེད་ཁོངས་སུ་ཡིག་ཚད་གཏོང་བར་འཛིན་རིམ་བཅིུས་ཀྱི་ལག་ཁྱེར་ཡོད་ན་འགྲིག་གི་ཡོད་པ་དང། ལས་ཀ་དེར་ཐོག་མར་ཟླ་ཤས་རིང་ཤུགས་ལས་དང་སྨན་བཟོ་རྒྱུ་སོགས་ཡིན་པ་དང། རྗེས་སུ་སྨན་སྤྲོད་མཁན་སོགས་ཆགས་ཀྱི་ཡོད་པ་རེད། དེ་ལ་འཚང་ཁ་རྒྱག་མཁན་མང་དག་ཅིག་ནི་གཙུག་ལག་རབ་འབྱམས་པ་ཐོན་མཁན་ཡིན་པ་ནི་ཡ་ང་བ་དང་སེམས་ཕམ་དགོས་པ་ཞིག་ཡིན།

ཅིག་བྱས་ན་དེ་དག་གིས་རང་ཉིད་ཀྱི་ཤེས་ཡོན་གནས་ཚད་གདིང་མ་དེ་ངོ་འཕྲོད་ཀྱིས་ལས་ཀ་དེ་ལ་འཇུག་པ་ཡིན་སྲིད། སྨན་རྩིས་ཁང་གི་ལས་ཀ་དེར་ཕྲན་ལ་བསམ་ཚུལ་གང་ཡང་མེད་པ་མ་ཟད། བཙན་བྱོལ་སྤྱི་ཚོགས་ནང་དུ་ལས་ཀ་མང་པོ་བསྐྲུན་པ་དེར་དགའ་བསུ་ཡང་ཡོད། ཡིན་ཡང་དོན་དག་ངོ་མ་ནི་ཡིག་ཚད་དེ་དག་ལ་ཨང་ཀི་དང་པོ་ལེན་མཁན་མང་པོ་ཞིག་ནི་འཛིན་རིམ་བཅིུས་ཀྱི་ལག་ཁྱེར་ཡོད་མཁན་ཡིན་པ་ལས། མཐོ་སློབ་ཐོན་མཁན་མིན་པ་དེ་རེད། མང་པོ་ཞིག་གིས་མཐོ་སློབ་སློབ་ཕྲུག་རྣམས་ལོ་མང་རིང་བོད་ཡིག་ལ་སྦྱང་བ་བྱེད་རྒྱུ་མ་བྱུང་བ་སོང་ཙང་རེད་ཅེས་བརྗོད་མཁན་ཡང་འདུག་སྟེ། ཡིག་རྒྱུག་ནང་བོད་ཡིག་གཅིག་པུ་མ་ཡིན་པར། དབྱིན་ཡིག་དང་ཨང་རྩིས་ཡང་ཡོད་པ་ཡིན་པས། རྒྱུ་མཚན་དེ་ནི་ཡང་དག་པ་ཞིག་མ་མཐོང།

སློབ་ཕྲུག་དེ་དག་ལ་དགེ་རྒན་ཚད་ལྡན་གྱི་སློབ་གསོ་མ་རག་པ་ཡིན་སྲིད་པ་དང། ཡང་ན་དེ་དག་འགྲོ་སའི་སློབ་གྲྭའི་ནང་དུ་དགེ་རྒན་ཚད་ལྡན་ཞིག་ལྷག་མེད་པ་ཡང་ཡིན་སྲིད་པ་རེད། དེང་གི་ཆར་དགེ་རྒན་རྙིང་པ་མང་པོ་ཞིག་ཕྱི་རྒྱལ་ལ་འགྲོ་བཞིན་ཡོད་པ་དེས། སློབ་ཕྲུག་གི་སློབ་སྦྱོང་ཐད་ལ་ཤུགས་རྐྱེན་ཐེབས་ཀྱི་ཡོད་ཡང་སྲིད། གལ་ཏེ་དགེ་རྒན་གྱི་ལས་གནས་བསྐྱུར་ནས་ཕྱི་རྒྱལ་ལ་ཕོར་པ་བཀྲུ་བར་འགྲོ་མཁན་དེ་དག་ལ། སློབ་ཕྲུག་གི་མི་ཚེ་ལ་ཕན་ཐོགས་པའི་ལམ་སྟོན་བྱེད་པའི་ཡོན་ཏན་ཡོད་ན་ཕངས་པོ་ཡིན་པ་དང། གལ་ཏེ་དེ་འདྲ་ཞིག་མེད་ན་བཀྲ་ཤིས་བདེ་ལེགས་ཞུས་ན་ཡག་ཤོས་རེད།

མ་གཞི་དགེ་རྒན་གྱི་གླ་ཆ་ཉུང་སོང་བས་ལས་ཀ་དེ་བསྐྱུར་མཁན་ཡང་མང་དག་ཡོད་པ་ནི་གསལ་པོ་རེད། དེ་ནི་བོད་མིའི་སྒྲིག་འཛུགས་ཀྱིས་སྲི་ཞུ་བ་དང་དགེ་རྒན་གཉིས་ཀྱི་གླ་ཆ་ལ་མཐོ་དམན་ཆེན་པོ་ཡོད་པ་དེར། དགེ་རྒན་གྱི་ལས་གནད་དེ་ལ་གདེངས་འཇོག་དང་གལ་ཆེན་ག་འདྲ་བརྩི་ཡི་ཡོད་མེད་གསལ་པོ་རེད། ཁ་ཤས་ཀྱིས་དགེ་རྒན་དེ་ཚོ་ལ་སེམས་ཤུགས་མེད་རྐྱེན་ཡིན་པར་བརྗོད་སྲིད་ཀྱང། དགེ་རྒན་ཡང་མི་ཞིག་ཡིན་པས། ཁོ་ཚོ་ལ་ཡང་འཚོ་བ་སྐྱེལ་ཆེད་དུ་གླ་ཆ་འགྲིག་ཙམ་ཞིག་དགོས་ཀྱི་རེད། དགེ་རྒན་ནི་སྲིད་ཞུ་བ་ལས་འོས་འགན་དང་སྤྱི་ཚོགས་ལ་དགོས་མཁོ་ཆེ་བ་ལས་ཆུང་བ་མིན་པར་སེམས། བོད་པའི་སློབ་གྲྭ་ཁག་གི་ནང་སློབ་ཕྲུག་ཉུང་དུ་འགྲོ་བཞིན་ཡོད་ཁར། དགེ་རྒན་ཡང་ཉུང་དུ་འགྲོ་བཞིན་ཡོད་པ་རེད།

དེ་བཞིན་ངས་མཐོང་ཚུལ་ལ་དགེ་རྒན་གསར་པ་མང་པོ་ཞིག་ལས་གནས་དེར་འཇུག་ཚུལ་ཡང་མི་འདྲ་བ་མང་པོ་འདུག ཁ་ཤས་རང་ཉིད་དགེ་རྒན་གྱི་ལས་ལ་དབྱིངས་དང་དེའི་སྟེང་ཡོད་པའི་འགན་ཁྲི་དང་། སྤྱི་ཚོགས་ལ་ཕན་ཐོགས་པའི་ནུས་པ་ཡོད་པ་སོགས་ལ་ཡིད་སྨོན་སྐྱེས་ནས་ལས་གནས་དེ་ལ་འཇུག་མཁན་ཡང་ཡོད། ཡིན་ཡང་མང་དག་ཅིག་ནི་རང་ཉིད་ལ་དགོས་པའི་ལས་ཀ་དག་ལ་ཡིག་ཚད་མ་འཕྲོད་པར། ཕ་མ་དང་སྤྱི་ཚོགས་ཀྱི་གནོན་ཤུགས་ལ་བརྟེན་ནས། བཙན་བྱོལ་སྤྱི་ཚོགས་ནང་མཐོ་སློབ་ཀྱི་ལག་ཁྱེར་ཡོད་ཚེ། ལས་ཀ་རག་ལས་སླ་ཤོས་དགེ་རྒན་གྱི་ལས་ལ་འཇུག་མཁན་ཡང་ཡོད་པ་ཡིན། དེ་དག་གི་དགེ་རྒན་ཚད་ལྡན་ཞིག་བྱེད་ཐུབ་ཀྱི་ཡོད་མེད་དེ། མ་འོངས་པར་སློབ་གྲྭ་ཐོན་ཡོང་མཁན་དག་གི་ཤེས་ཡོན་གནས་ཚད་ལ་བལྟ་ན་ཤེས་ཐུབ།

གང་ལྟར་ད་བར་སློབ་གྲྭ་ཐོན་པ་བོད་མི་མང་པོ་ཞིག་ལ་དངོས་ཡོད་ཀྱི་ཤེས་ཡོན་རང་རྐྱ་འཕེལ་བ་མང་པོ་ཞིག་ཡོད་པ་དང། མང་པོ་ཞིག་ལ་ལག་ཁྱེར་གྱི་ཤོག་བུ་ཞིག་ལས་ཀླད་པ་སྟོང་པ་ཡིན་པ་དེར། ཕྱོགས་མང་པོ་ཞིག་གིས་འཐུས་ཤོར་ཕྱིན་ཡོད་པ་ལས། དགེ་རྒན་གཅིག་པུས་འཐུས་ཤོར་ཡིན་མི་སྲིད་པས། དེ་ལ་དབུས་བོད་མིའི་སྒྲིག་འཛུགས་དང། སློབ་གྲྭ་ཁག་གི་འགན་འཛིན། དགེ་རྒན་རྣམ་པ། ཕ་མ་ཚོ། དེ་བཞིན་སྤྱི་ཚོགས་ཐོག་འགན་བཞེས་མཁན་ཚོས་བསམ་བློ་རྒྱ་ཆེ་གཏོང་རོགས་ཞུ་རྒྱུ་ཡིན།