—-ཡེ་ཤེས་ཕུན་ཚོགས།
༄༅།།རྗེ་བཙུན་མ་མུ་མེད་ཡེ་ཤེས་མཚོ་མོའི་རྟོགས་པ་བརྗོད་པ་གསང་གསུམ་རྒྱ་མཚོའི་ཟེགས་མ་ཞེས་བྱ་བ།
རབ་འབྱམས་རྒྱལ་བའི་སོར་རྟོག་ཡེ་ཤེས་ཉིད།།
སིནྡྷུའི་རྒྱ་མཚོར་འདབ་སྟོང་རྩེར་སྨིན་པ།།
རང་བྱུང་མཚན་དཔེའི་དཔལ་འབར་མཚོ་སྐྱེས་རྗེ།།
འཇིགས་བྲལ་པདྨ་ཀ་རས་དུས་ཀུན་སྐྱོངས།།
ཆིལ་ཆིལ་རླབས་ཕྲེང་གཡོ་བའི་རྒྱ་མཚོ་ཆེར།།
མཛེས་མཛེས་འདབ་སྟོང་བཞད་པའི་གེ་སར་དབུས།།
ལྡེམ་ལྡེམ་གར་གྱིས་རོལ་བའི་ཡིད་འཕྲོག་ལྷ།།
སྙན་སྙན་དབྱངས་ཀྱི་རྒྱལ་མོས་ཤིས་པ་སྩོལ།།
རྒྱལ་ཀུན་གསུང་གི་དབང་ཕྱུག་དབྱངས་ཅན་མས།།
མཛེས་སྡུག་རལ་ཁུར་རིན་ཆེན་རྒྱན་སྤངས་ནས།།
ཚངས་སྤྱོད་ངུར་སྨྲིག་གསར་པའི་ཟློས་གར་དུ།།
བྱོན་པ་མུ་མེད་ཌཱཀྐིའི་གཙོ་མོར་འདུད།།
གང་གི་གསང་གསུམ་ཡོན་ཏན་རྒྱ་མཚོའི་ཀླུང་།།
ཀུ་ཤའི་ཐིགས་པ་གཏོར་བས་རྫོགས་མིན་ཡང་།།
དད་གསུམ་རྩྭ་ཡི་མཆོག་མར་ཆགས་པའི་རྡུལ།།
བླངས་ཏེ་གང་ཐུགས་དགྱེས་པའི་ཡོན་དུ་སྦྲེངས།།
ཞི་བ་བློ་འདས་ཆོས་སྐུའི་ཡུམ་ཆེན་མོ།།
འགག་མེད་ལོངས་སྐུའི་རོལ་རྩལ་ཝ་ར་ཧི།།
སྣ་ཚོགས་སྤྲུལ་པའི་གར་མཁན་མཚོ་རྒྱལ་མ།།
དབྱེར་མེད་ཡེ་ཤེས་མཁའ་འགྲོ་ཁྱེད་ལ་བསྟོད།།
དཔལ་ཆེན་གྲུབ་པའི་དབང་ཕྱུག་ཌོམ་བྷི་པའི།།
གསང་གསུམ་སྒྱུ་མའི་རྣམ་རོལ་སྒྲ་སྒྱུར་རྗེ།།
གང་ཐུགས་དགྱེས་པ་བསྐྱེད་པའི་མཛའ་ན་མོ།།
སྒྱུ་འཕྲུལ་གཉིས་པ་བདག་མེད་རྟོགས་པའི་ཡུམ།།
གཡེའི་ལབ་ཅེས་བྱ་ནོར་བུ་འཛིན་མའི་གཞིར།།
ལུགས་གཉིས་དཔལ་གྱིས་མཐོ་བའི་གདུང་རིགས་ལ།།
མཚན་དཔེའི་མེ་ཏོག་གཡོ་བའི་སྡུག་གུ་མ།།
ཞི་བྱེད་བསྟན་པའི་རྒྱལ་མཚན་ཁྱོད་དུ་ངེས།།
སེ་ར་གཡའ་ལུང་དབེན་པའི་རི་སུལ་དུ།།
ཐེག་གསུམ་རྒྱང་གླུ་ལེན་མཁས་ཤཱཀྱའི་སྲས།།
སྒྲུབ་བརྒྱུད་བསྟན་པའི་རྒྱལ་མཚན་གང་དེའི་དྲུང་།།
རིགས་བཟང་མཁའ་འགྲོ་སྣང་ས་འོད་འབུམ་གྲགས།།
གསང་ཆེན་ཆོས་ཀྱི་ཉི་མ་གཏེར་བདག་གླིང་།།
རིག་འཛིན་རིགས་ཀྱི་སྲས་མོ་དཔལ་གྱི་སྒྲོན།།
སྨིན་གླིང་བསྟན་པའི་ཤིང་རྟ་ཁྱོད་ཉིད་ཅེས།།
སྙན་པ་གངས་ཀྱི་རི་བོའི་ཁོངས་ན་ལྡིར།།
པདྨའི་གདུང་འཚོབ་ལས་རབ་གླིང་པ་ཡི།།
ལས་ཀྱི་ཕྱག་རྒྱ་ལས་ལྡན་ཌཱཀྐིའི་གཙོ།།
ཕན་བདེའི་ཕྲིན་ལས་སྒོ་མོ་འབྱེད་པའི་གཉེན།།
ཆོས་ཀྱི་སྒྲོན་མའི་རྣམ་ཐར་ཨེ་མ་ཧོ།།
ཡང་གཅིག་བསིལ་ལྡན་ཞིང་གི་ལྷ་སྐལ་དང་།།
གྲུབ་བརྒྱའི་གཙུག་རྒྱན་པདྨ་ནོར་བུ་སོགས།།
ཚད་ཐུབ་དམ་པའི་ཚད་མའི་བཀའ་ལུང་གིས།།
བསྔགས་བཞིན་བསྔགས་པ་དོན་ལྡན་འཕཊ་མ་ཁྱེད།།
གྲུ་འཛིན་བདག་པོས་བདག་ཏུ་བཟུང་བའི་ཡུལ།།
མདོ་ཁམས་གསེར་ལྗོངས་ཕྱུག་མོའི་ལྟེ་བ་རུ།།
སྐྱབས་རྗེ་གདོད་མའི་མགོན་པོའི་དབོན་རིགས་སུ།།
སྤྲུལ་པའི་མྱུ་གུ་སྒྱུ་མའི་ལྟད་མོ་ངོམ།།
མུ་མེད་ཀུན་གསལ་མཐའ་དང་སྙོམས་འཇུག་པའི།།
ཀུན་ཕན་མཛད་པ་རྒྱ་མཚོའི་སྤྲིན་སྤྲོ་བའི།།
རྒྱལ་བ་ཀུན་ཡུམ་རྒྱལ་སྲས་དཔའ་མོ་ཁྱོད།།
ས་འདིར་བྱོན་པ་འཇིག་རྟེན་མགོན་དང་བཅས།།
གང་ཁྱོད་ལང་ཚོའི་ཟླ་ཚེས་ན་ཕྲ་ཡང་།།
དད་དང་སྙིང་རྗེ་སྤྱན་དང་མངོན་ཤེས་སོགས།།
ལྷན་སྐྱེས་གཤིས་སུ་སྣང་བའི་འོད་དཀར་ལ།།
ངོ་མཚར་བསྔཊ་བརྗོད་ཀུན་དཱའི་འདབ་སྟོང་གྲོལ།།
ཡིད་འོང་མེ་ཏོག་བཞད་པའི་དགའ་ཚལ་དུ།།
ལང་ཚོའི་མེ་ཏོག་གསར་པའི་གཞོན་ནུ་མར།།
མཚན་དཔེའི་མེ་ཏོག་དགོད་པའི་རྒྱལ་བ་ཡིས།།
བྱིན་རླབས་མེ་ཏོག་དོག་པ་སྤྱི་བོར་བཅིངས།།
ཡང་ཅིག་ན་མཉམ་བྱིས་པའི་གྲོགས་དང་བཅས།།
རྒྱལ་ཡུམ་ཕག་མོའི་སྤྱན་སྔར་ཕྱིན་པའི་ཚེ།།
གཉིས་མེད་གཉིས་སུ་སྣང་བའི་སྒྱུ་འཕྲུལ་གྱིས།།
རྗེས་འཛིན་བྱིན་རླབས་སྣང་བ་ཁྱོད་ལ་བསྩལ།།
སྐྱེ་དང་སྐྱེ་བར་དམ་པའི་རྣམ་ཐར་ལ།།
ཡང་དང་ཡང་དུ་གོམས་པའི་དན་རྟགས་སུ།།
ཐུན་མོང་ཐུན་མོང་མིན་པའི་ཡོན་ཏན་ནི།།
བརྗོད་ཀྱང་བརྗོད་བྱའི་ཡུལ་ལས་འདས་པ་མང་།།
དེ་ནས་རབ་འབྱམས་རྒྱལ་བ་ཐམས་ཅད་ཀྱི།།
གསང་གསུམ་འདུས་ཞལ་བྱེ་བའི་ཟ་མ་ཏོག།
སྐྱབས་རྗེ་ཐམས་ཅད་མཁྱེན་པ་གཙུག་གི་ནོར།།
གང་གིས་བྱིན་རླབས་ཆོས་ཀྱི་བགོ་བཤའ་བསྟབས།།
སྐྱེ་དང་སྐྱེ་བར་ཆོས་རྗེ་བླ་མ་ཟུང་།།
མི་འབྲལ་མཐུན་པར་འགྲོཊ་པའི་མཉེས་གཤིན་གྱིས།།
མི་ཕྱེད་ཐུགས་ཀྱི་ཀློང་དུ་རྒྱས་བཏབ་པ།།
ད་དུང་བྱང་ཆུབ་བར་དུ་ཕྱི་ཕྱིར་བརྟན།།
དེ་ལྟར་བརྩེ་བ་ཆེན་པོའི་རྗེས་འཛིན་གྱིས།།
ལེཊ་པར་བསྐྱངས་པའི་རྒྱལ་སྲས་དཔའ་མོ་ཁྱོད།།
ཕུན་ཚོགས་ཡོན་ཏན་རྒྱ་མཚོའི་གཏེར་བརྡོལ་ཏེ།།
ཆེ་དགུའི་རལ་པའི་ཁྲི་ལ་ངལ་གསོ་ཐོབ།།
ཐུན་མོང་ཐུན་མིན་ཐེག་པ་རྒྱ་མཚོའི་གཞུང་།།
མ་ལུས་འཆད་རྩོད་རྩོམ་པའི་ངག་ལ་དབང་།།
ཕྱི་དང་ནང་དང་གསང་བ་དེ་ཁོ་ནའི།།
ལྷག་པའི་དམ་སྡོམ་སྲོག་ལྟར་བསྲུང་ཞིང་བརྩོན།།
མཆོག་དང་དམན་དང་བར་མའི་འགྲོ་བ་རྣམས།།
རྟག་ཏུ་ཉེ་རིང་མེད་པའི་ཐུགས་ཀྱིས་སྐྱོང་།།
ཨེ་མ་རྒྱལ་སྲས་དཔའ་མོའི་རྣམ་ཐར་ལ།།
ཞིབ་ཏུ་བསམ་ན་ཤིན་ཏུ་དད་པ་འཕེལ།།
ཆར་ལྡན་དུས་སྟོན་དར་བའི་ཆུ་གཏེར་བཞིན།།
ཉིན་བཞིན་འཕེལ་བ་ཁྲིམས་ལྡན་འདུས་པའི་སྡེ།།
རེ་བའི་འདུན་མ་གཅིག་ཏུ་བསྒྲིལ་བྱས་ཏེ།།
ངེས་གསང་ཆོས་ཀྱི་ཆར་པ་འབེབས་པར་གསོལ།།
དེ་ཚེ་རྒྱལ་སྲས་རིག་པའི་དཔའ་མོ་དེས།།
ཡང་དག་རིགས་ཚུལ་གློག་གི་རྩེ་དགའ་དང་།།
འགྲོགས་པའི་ལེཊ་བཤད་དབྱར་སྐྱེས་གསར་པའི་རྔ།།
ཉིན་བཞིན་བརྡུང་ལ་ངོམས་པ་མེད་པར་བྲེལ།།
ཁྱད་པར་ཐེག་རྩེ་ཨ་ཏི་རྫོགས་པ་ཆེ།།
མི་མིན་དབྱིངས་ཀྱི་མཁའ་འགྲོའི་ཐུཊ་མཛོད་ཆོས།།
མོས་ལྡན་དག་པའི་འཁོར་ཚོགས་ཁྲི་ཕྲག་ལ།།
གསུངས་པའི་བཀའ་དྲིན་ནམ་མཁའི་མཐའ་ལས་འགོངས།།
རིག་སྟོང་མི་ཤིགས་གཉུག་མ་རྡོ་རྗེའི་ཞལ།།
མངོན་སུམ་རྗེན་གཅེར་ཉིད་དུ་སྟོན་མཛད་པས།།
གསང་འཛིན་གསང་བའི་མཁའ་འགྲོ་དཔལ་འཛིན་མའི།།
ཕྲིན་ལས་དུས་སུ་བབས་པའི་བདེན་རྟགས་ངོམ།།
གཞན་ཡང་མཆོག་དམན་བར་མའི་འགྲོ་ཚོགས་ལ།།
ཐུན་མོང་ལམ་གྱི་རིམ་པས་རྒྱུད་སྦྱངས་ནས།།
རྣམ་དག་བདེ་ལྡན་ཞིང་གི་གྲོང་ཁྱེར་དུ།།
འཇུག་པའི་ཕྲིན་ལས་ཆོས་ཀྱི་སྒོ་བརྒྱ་ཕྱེས།།
ཁྱད་པར་སྦྱིན་པའི་ཕྱག་ཡངས་གྲོལ་བ་ལས།།
དངོས་འབྱོར་ཟང་ཟིང་བདོག་པའི་ཡོན་སྦྱར་ཏེ།།
སྒྱུ་འཕྲུལ་རྡོ་རྗེའི་ཕོ་བྲང་མིག་གི་དཔྱིད།།
ལྷར་བཅས་འགྲོ་བའི་བསོད་ནམས་ཞིང་དུ་བསྐྲུན།།
དེ་ལྟར་མཁས་བཙུན་བཟང་པོའི་རྣམ་ཐར་གྱིས།།
རིས་མེད་བསྟན་འགྲོར་སྨན་པའི་མཛད་རྗེས་ཀུན།།
ཀུན་བཟང་འཇམ་དཔལ་དབྱངས་ཀྱི་རྗེས་འགྲོ་ན།།
ན་གཞོན་བདག་འདྲས་སྨྲ་བར་ག་ལ་སྤོབས།།
དེ་སྐད་བརྩམས་པའི་དགེ་ཚོཊ་རལ་བའི་ཀླུང་།།
བྱང་ཆེན་རྒྱ་མཚོར་འཇུག་པའི་ཡུར་ལམ་ནས།།
མཐའ་ཡས་འགྲོ་བའི་ཁམས་ལ་རྗེས་སོང་སྟེ།།
འཕྲལ་ཡུན་ཕན་བདེས་འཚོ་བའི་རྒྱུར་གྱུར་ཅིག།
རབ་འབྱམས་སྲས་བཅས་རྒྱལ་བའི་གསང་གསུམ་དངོས།།
བཤེས་གཉེན་ཟོལ་གྱིས་རྒྱུ་བའི་བཀའ་དྲིན་ཅན།།
མཚུངས་མེད་ཆོས་རྗེ་ཟུང་གི་ཞབས་པདྨོ།།
མི་ཤིགས་རྡོ་རྗེའི་གཤིས་སུ་བརྟན་པར་ཤོག།
བདག་ཀྱང་སྐྱེ་བའི་ཕྲེང་བ་ཉལ་འགྲོ་མ།།
མྱང་འདས་རྟ་གདོང་མེ་ཡིས་འགོག་གི་བར།།
ཡང་དག་བླ་མ་མཆོག་དང་མི་འབྲལ་བར།།
བསླབ་གསུམ་ཡོན་ཏན་རྒྱ་མཚོས་ཕྱུག་གྱུར་ཅིག།
ཅེས་པ་འདི་གསེར་ལྗོངས་བླ་མ་རུང་དུ་ཡེ༵་ཤེ༵ས་ཕུ༵ན་ཚོ༵གས་ཀྱིས་སྦྱར་བ་དགེའོ།། །།