ཟམ་གདོང་རིན་པོ་ཆེ།
“སྤྱིར་བཏང་སྟབས་བདེའི་རྩོམ་ཡིག་ཁག་ཡིན་ནའང་རེད། ཉམས་ཞིབ་རང་བཞིན་ཅན་གྱི་རྩོམ་ཡིག་ཁག་ཡིན་ནའང་རེད། དེ་ཚོ་ཕྱོགས་བསྡུས་ཀྱིས་དུས་ཚོད་ངེས་ཅན་ནམ་དུས་ཚོད་ངེས་མེད་ཐོག་དུས་དེབ་དང་བརྙན་དེབ་འགྲེམས་སྤེལ་བྱེད་རྒྱུ་དེ་ནུབ་ཕྱོགས་པ་དང་དེང་རབས་ཀྱི་ལུགས་སྲོལ་ཞིག་ཡིན་པར་ཆ་བཞག་ཆོག དེ་སྔ་སྲོལ་རྒྱུན་ནང་གཞུང་ཆེན་མོའི་བསྟན་བཅོས་བརྩམས་པ་མ་གཏོགས། རྩོམ་ཡིག་ཐུང་ངུ་ཕྱོགས་བསྒྲིགས་ཀྱིས་དུས་དེབ་ཀྱི་ངོ་བོར་པར་བརྒྱབ་རྒྱུ་དེ་རྒྱ་གར་དང་རྒྱ་གར་གྱི་རིག་གཞུང་གི་ཁྱབ་ཁོངས་ཀྱི་རྒྱལ་ཁབ་ནང་ལམ་སྲོལ་དེ་བྱུང་ཨེ་ཡོད། འོན་ཀྱང་བརྗོད་གཞི་བྱེ་བྲག་ཐོག་ཉམས་ཞིབ་ཀྱི་གནས་ཚད་ལྡན་པའི་རྩོམ་ཡིག་ཐུང་ངུ་དེ་འདྲ་འབྲི་བའི་ལུགས་སྲོལ་དེ་རྒྱ་གར་དུ་དེ་སྔ་ཡོད་མུས་རེད། གཅིག་བྱས་ན་ནུབ་ཕྱོགས་པ་ཚོས་རྒྱ་གར་ནས་དཔེ་བླངས་པ་ཡིན་སྲིད། བརྗོད་བྱའི་དོན་གནད་ཆ་ལག་ཚང་བའི་བསྟན་བཅོས་ཡོངས་སུ་རྫོགས་པ་བརྩམ་ཆོས་དང་། དེ་དང་ཕྱོགས་མཚུངས་དཔྱད་གཞིའི་དོན་ཚན་རེ་རེའི་ཆེད་དུ་ཆེད་རྩོམ་གནང་རྒྱུ་གཉིས་ཀའི་ལམ་སྲོལ་དེ་རྒྱ་གར་གྱི་མཁས་པ་ཚོས་བཏོད་གནང་བ་རེད།
དེས་ན་བརྗོད་གཞི་རེའི་སྟེང་དུ་བརྩམས་པའི་རྩོམ་ཡིག་ཐུང་ངུ་རྣམས་ལ་རབ་ཏུ་བྱེད་པ་ (པྲཀརཎ) ཞེས་པའི་མིང་བཏགས་པ་རེད། དཔེར་ན་སློབ་དཔོན་དབྱིག་གཉེན་གྱིས་མཛོད་དང་མཛོད་རང་འགྲེལ་སོགས་གཞུང་ཆེན་མོ་ཆ་ལག་ཚང་བ་མང་པོ་བརྩམས་ཡོད་ལ། དེ་བཞིན་རབ་ཏུ་བྱེད་པ་སོགས་ཆུང་ངུ་མང་པོའང་བརྩམས་པ་རེད། ཁ་ཤས་ནི་དཔེ་ཆ་ཧ་ཅང་ཆུང་ངུ་ཤོ་ལོ་ཀའི་གྲངས་ཚད་ཀྱི་སྒོ་ནས་མཚན་བཏགས་པ། དཔེར་ན་ཉི་ཤུ་པ་དང་སུམ་ཅུ་པ་སོགས་རེད། དེ་དག་རྩོམ་ཡིག་གི་རང་བཞིན་ནང་དབྱེ་བ་ཕྱེ་སྐབས་རབ་ཏུ་བྱེད་པའམ་ཉེ་བར་བཅིངས་པ་ (པྲཀརཎ་ དང་ ནིབནྡྷ་) ཞེས་རྒྱ་གར་ནང་མིང་འདོགས་སྟངས་མི་འདྲ་བ་གཉིས་རེད། རབ་ཏུ་བྱེད་པ་མང་ཆེ་བ་ཚིགས་བཅད་ནང་རེད། ཉེ་བར་བཅིངས་པ་མང་ཆེ་བ་ཚིག་ལྷུག་གི་ངོ་བོར་ཡོད། ནིབནྡྷ་ཆེན་པོ་ཆགས་འགྲོ་དུས་པྲབནྡྷ་ཞེས་བསྟན་བཅོས་རང་གི་ངོ་བོར་སོང་བ་དེ་འདྲའང་ཡོད། ད་ལྟ་དུས་དེབ་འདིའི་ནང་བཀོད་པའི་རྩོམ་ཡིག་རིང་ཐུང་གང་ཡིན་རུང་། ང་ཚོས་སྲོལ་རྒྱུན་རིག་པའི་ཐོག་ནས་བལྟས་སྐབས་རབ་ཏུ་བྱེད་པའི་ངོ་བོར་བཞག་ན་འགྲིག་སྙམ།
སྤྱིར་བཏང་རབ་ཏུ་བྱེད་པ་ཞེས་པ་དེ་འཇུག་ཡུལ་མི་འདྲ་བ་གཉིས་རེད། རབ་ཏུ་བྱེད་པ་སྡེ་བརྒྱད་ལ་སོགས་པ་རྩོམ་ཡིག་ཐུང་ངུ་ལ་བརྗོད་པའི་སྐབས་ཤིག་དང་། ཡང་གཞུང་ཆེན་མོའི་ནང་ལེའུའི་ཚབ་ཏུ་རབ་ཏུ་བྱེད་པ་ཞེས་སྐབས་དང་། རབ་ཏུ་བྱེད་པ། ལེའུ་ཞེས་མཚན་བརྗོད་སྟངས་མི་འདྲ་བ་མང་པོ་རེད། དཔེར་ན། མཛོད་ནང་གནས་དང་། མངོན་རྟོགས་རྒྱན་ནང་སྐབས། དབུ་མ་འཇུག་པའི་ནང་སེམས་བསྐྱེད་ཞེས་བརྗོད། དེ་བཞིན་གཞུང་ཆེན་མོ་ཁ་ཤས་ནང་རབ་ཏུ་བྱེད་པ་དང་པོ་དང་། རབ་ཏུ་བྱེད་པ་གཉིས་པ་ཞེས་ལེའུའི་ཚབ་ཏུ་རབ་ཏུ་བྱེད་པ་ཞེས་བརྗོད་ཀྱི་རེད། ཡིན་ནའང་དེ་གཉིས་དོན་དག་གོ་བ་ལེན་སྟངས་གཅིག་པ་མིན། ལེའུ་ལ་རབ་ཏུ་བྱེད་པ་ཞེས་གཞུང་ཆེན་མོའི་བརྗོད་བྱའི་དོན་ཚན་རེ་དམིགས་བསལ་གྱིས་བཅད་པ་ཞིག་ལ་བརྗོད། རྩོམ་ཡིག་ཐུང་ངུར་རབ་ཏུ་བྱེད་པ་ཞེས་དམིགས་བསལ་བརྗོད་གཞི་གཅིག་གི་ཐོག་དམིགས་བསལ་གྱིས་བྲིས་པའི་ཆེད་རྩོམ་ཞིག་ལ་བརྗོད།
གནས་སྟངས་ག་འདྲ་ཐོག་ནས་ཡིན་ནའང་ང་ཚོས་དེང་རབས་དང་ནུབ་ཕྱོགས་པ་ལ་ལམ་སྟོན་དང་བསླབ་རྒྱུ་ཞིག་མ་གཏོགས། དེང་རབས་དང་ནུབ་ཕྱོགས་ནས་ཚུར་ལེགས་ཆ་བླང་རྒྱུ་དེ་མི་སྲིད་ཅེས་སྲིད་མཐའ་བཀག་ན་མི་འགྲིགས་རུང་། གང་ལྟར་མང་པོ་ཞིག་མེད། དཔེར་ན་ཇ་བཟོ་སྟངས་དང་། ཁ་ལག་ཟ་སྟངས། གཙང་སྦྲ་བྱེད་སྟངས་སོགས་རེ་གཉིས་རེད། དེ་ཚོའི་རྒྱབ་ལྗོངས་ཀྱི་བསམ་བློའི་ནང་རང་དོན་ཡིད་བྱེད་དང་། རང་རྒྱལ་གཞན་ཕམ་གྱི་བསམ་བློ་མེད་པ་ཧ་ལམ་མེད། འོ་ན། ནུབ་ཕྱོགས་པའི་ནང་སངས་རྒྱས་བྱང་ཆུང་སེམས་དཔའི་སྤྲུལ་པ་མེད་དམ་ཞེས་རྟགས་བསལ་གཏང་ན། དེ་གནས་ཚུལ་ལོགས་ཀ་རེད། ད་ལྟ་ང་ཚོས་སྤྱིར་བཏང་ཐུན་མོང་གི་སྣང་ངོར་འགྲོ་སྟངས་ཐོག་བཤད་དགོས་ཀྱི་ཡོད། དེང་སང་ང་ཚོས་ལད་ཟློས་གང་ཡང་མིན་རུང་། གནས་ཚུལ་ཁ་ཤས་ཐོག་ནུབ་ཕྱོགས་པའི་བྱེད་སྟངས་བཞིན་བྱས་ན། ཁོང་ཚོ་དང་ཁོང་ཚོའི་རྗེས་འཇུག་ལ་ཏན་ཏན་ཕན་ཐོགས་ཡོང་གི་རེད།”
(ཕྱི་ལོ་ ༢༠༡༣ ཕྱི་ཟླ་ ༨ ཚེས་ ༢༥ ཉིན་སློབ་དཔོན་ཟམ་གདོང་རིན་པོ་ཆེས་ཞིབ་འཇུག་དུས་དེབ་ཐོག་མ་དབུ་འབྱེད་ཐོག་ “སྤྱིར་ཞིབ་འཇུག་བྱེད་རྒྱུའི་གལ་ཆེའི་རང་བཞིན་དང་། བོད་རང་གི་སྔ་སྲོལ་ཞིབ་འཇུག་གི་ཐབས་ལམ། དེང་རབས་ཀྱི་ཞིབ་འཇུག་གི་ཐབས་ལམ་བཅས་ཀྱི་སྐོར་” གནང་བའི་གསུང་བཤད་ལས་དྲངས།)
༼ཡོང་ཁུངས། སློབ་དཔོན་ཟམ་གདོང་རིན་པོ་ཆེའི་ངོ་དེབ།༽
:མཁས་དབང་རང་རེད་སྐྱབས་སུ་ཆེ་།
རབ་ཏུ་བྱེད་པ་ཞེས་པ་དང་། ལེའུ་ཞེས་པར་བོད་སྐད་ཐོག་ཚིག་འགྲེལ་ལམ་སྒྲ་བཤད་གང་འདྲ་རྒྱག་དགོས་སམ།
སྐྱབས་སུ་ཆེ་། འདི། སྐྱབས་སུ་མཆིས། ཞེས་དགོས།
རབ་ཏུ་དང་ཤིནད་ཏུ་ཕལ་ཆེར་དོན་གཅིག བསྟན་བཅོས་གཅིག་གི་ནང་ལ་ཡང་། དོན་ཚན་ཁ་ཁག་གམ། སོ་སོར་བྱེད་པ་ལ་རབ་ཏུ་བྱེད་པ་དང་།
དཔེ་དེབ་གཅིག་གི་ནང་ལ་ཚན་པའམ། ལེ་ཚན་ཆུང་ཆུང་མང་པོ་བཟོས་པ་ལ་ལེའུ་ཞེས་བརྗོད། ལེའུ་འདི། མང་ཆེ་བ་གཏམ་བརྗོད་ཁྲབ་དུས་བེད་སྤྱོད་མང་པོ་བྱེད།
ཀརྡོ་་་་འཐུངས་ཚར་པེ། རབ་ཏུ་དང་ཤིན་ཏུ་དོན་གཅིག་རེད་ཨེ། བོད་སྐད་ཡག་པོ་ཤེས་ཀྱི་མེད་པེ། རབ་ཏུ་ཟེར་དུས་བྱ་བ་དང་དངོས་པོ་ལེགས་པོ་ལ་སྦྱར་གྱི་རེད། བྱ་བ་དང་དངོས་པོ་མི་ལེགས་པ་དག་ལ་རབ་ཏུ་སྦྱར་སྲོལ་མེད། དཔེར་རབ་ཏུ་མཛེས་ཟེར་བ་ལྟ་བུ་རེད། ཤིན་ཏུ་ཐབས་སྡུག་རེད་ཟེར་བ་ལས་རབ་ཏུ་ཐབས་སྡུག་རེད་ཟེར་མཁན་སུ་ཡང་མེད།
རབ་ཅེས་པ་འདིས་ལེགས་པ་དང་མཆོག་ཡིན་པར་བསྟན་གྱི་རེད། དེའི་ཕྱིར་་་རབ་ཏུ་ཐབས་སྡུག་རེད་ཟེར་ནས་ཚིག་བེད་སྤྱོད་བཏོང་ཐབས་མེད་་་་་་ཤེས་པར་བྱོས་ཨ། སློབ་ཁྲིད་བྱས་པའི་གླ་ཆ་ཡུང་སྒོར་༡༠༠་ཡིན་ད
ཅོ་རི།
ཕལ་ཆེར་ཟེར་དགོས་དོན་ཅིག་ཡོད་རེད།
ཟམ་མདོ་བླ་མར་སྡིངས་ཆ་རྫོགས་པ་རེད་དམ།