ཕ་ཡུལ་གྱི་ཆོ་འཕྲུལ།

ལྷ་རྩེའི་ཁུ་བྱུག
 

༼གཅིག༽     

ཁོ་པ་ཚོའི་ཀླད་པའི་ནང་ལ་མིའི་བདེ་སྡུག་དང་། འབྱུང་བའི་དར་གུད། ཐ་ན་རྩི་ཤིང་སྐྱེ་མིན་ཚང་མ་ཡུལ་ལྷ་གཞི་བདག་དང་། ལྷ་ཀླུ་མཐུ་བོ་ཆེའི་སྤྲུལ་པ་དང་། སྡེ་བརྒྱད་འབྱུང་པོས་ཡག་བཙོག་སྟངས་འཛིན་བྱས་པར་འདོད། མི་གཉིས་མཉམ་དུ་འདུས་ན། གཏམ་གྱི་འགོ་མར་ད་ལོ་ཡུལ་ལྷ་གཞི་བདག་ཚང་གིས་བཀའ་བགྲོས་ཅི་འདྲ་བྱས་པ་ཨེ་གོ་ཟེར་བ་ནས། རིམ་གྱིས་ལྷ་འདྲེའི་དབང་བསྒྱུར་གྱི་ས་གནས་ག་ཤེད་དུ་ཁ་བ་འབེབ་ལུགས། ས་གནས་ག་ཤེད་དུ་འབུ་བཏབ་རབས། ཡུལ་ལུང་ག་ཤེད་དུ་ནད་རླངས་བཏང་ལུགས་སོགས་གླེང་ཞིང་། ད་ལྟའི་ལྷ་འདྲེ་ནང་དུ་འདྲེ་ཁ་པར་ཅན། ལྷ་རླངས་འཁོར་ཅན་ཡང་མི་ག་གེ་མོས་མཐོང་ཚུལ་བཤད། ལྷ་འདྲེའི་གཏམ་རྒྱུད་མང་པོ་སྨྲ་བར་མཁས། བདེན་དོན་ཡང་རྡོ་སྒྲིག་སྒྲིག་བྱེད་ལ་ཧ་ཅང་བྱང་བས་སུས་ཀྱང་མི་དོན་རིང་ལུགས་པའི་སྐད་ཆས་ཁོ་པ་ཚོར་དགག་པ་རྒྱག་མི་ཐུབ།
དཔེར་ན་འུ་ཚོས་གཅིན་རྫ་འཕོ་ས་ནོར་བ་དང་། སྐད་མགོ་མཐོ་བ་ཚུན་གྱིས་ཡུལ་ལྷས་འཁུ་དོགས་དང་། མི་འདོད་པའི་ཆག་སྒོ་ཡོང་བའི་ལོ་རྒྱུས་དང་གཏན་ཚིགས་རྣོ། ཡང་དེང་སང་རིའི་སྐེ་བྲེགས། ནང་བྲུས། ཐང་བཅད། ཆུ་རྙོག་མཁན་འདི་ཚོ་ལ་གནོད་སྐྱེལ་མི་ཐུབ་པའི་རྒྱུ་མཚན་ཡང་ཡོད་དེ། འདི་པ་ཚོའི་ཡུལ་ལྷ་དང་། འུ་ཚོའི་ཡུལ་ལྷ་འཐབ་དུས་འུ་ཚོའི་ཡུལ་ལྷ་གཞི་བདག་ཕམ་མྱངས་པའི་ལྷ་འདྲེའི་དམག་འཁྲུགས་བཤད་ཤེས།

བཤད་སྟངས་ལ་བལྟས་ན། འདི་པ་ཚང་གི་ཡུལ་ལྷའི་ཆབ་འབངས་སུ་འུ་ཚོའི་ཡུལ་ལྷ་བསྡུས་ཤིང་། བོད་ཀྱི་རི་ཆུའི་ཡུལ་ལྷས་མགོ་ནག་བོད་པ་ཚང་དབང་དུ་བསྡུས་པ་འདྲ་བོ་དང་། འུ་ཚོ་ནི་ལྷ་འདྲེའི་ཡང་བྲན་དང་། ཡང་འབངས་ལྟ་བུ་ཞིག་གི་བསམ་ཚུལ་ཡོད། ཁྱད་མཚར་བ་ལ། ལྷ་འདྲེའི་ནང་དུ་མཆོད་བསྟོད་དང་། གུས་བཀུར་ཞུ་ས་བཟང་ངན་དོན་དུ་ཕུ་ནུ་བར་དུ་དགྲ་གྱོད་དང་། མ་སྲུ་བར་དུ་ཁ་མི་བསྲེ་མཁན་ཡང་མང་པོ་ཡོད་པས། ལྷ་འདྲེའི་བཟང་ངན་འདུ་ཤེས་ཀྱི་ལྟ་བ་ནི་ཧ་ཅང་རྫོབ་ལ་རྙོག་སྒྲས་ཁེངས། མདོར་ན་འུ་ཚོའི་བཟང་ངན་གྱི་སྣ་ཐག་ལྷ་འདྲེའི་ལག་ཏུ་ཡོད་པར་བསྙད་པས་འུ་ཚོའི་ཁོར་ཡུག་གི་ལས་དབང་ངམ་བདག་པོའམ་བྱེད་པ་པོ་ནི་ལྷ་འདྲེ་ཚོ་རེད།

༼གཉིས།༽

ནམ་རྒྱུན་ཉི་མ་སྲོ་བཞིན་ཡར་མར་ཁ་བརྡའི་ནང་དུ། ས་ཆ་ག་གེ་མོ་ན་མ་སངས་ཀྱི་རྫུ་བུ་ཡོད་ལུགས། ས་ཆ་ག་གེ་མོ་ན། ཡུལ་ལྷ་གཞི་བདག་གི་འཕྲུལ་སྲས་ཡོད་ལུགས། ས་ཆ་ག་གེ་མོ་ན། ལྷ་མོའི་རྣམ་འཕྲུལ་བཞུགས་ལུགས་སོགས་ཆུ་བཞུར་བཞུར་བྱེད་ཐུབ། ད་དུང་མདོ་དབུས་ཁམས་གསུམ་གྱི་ས་གནས་དེར་ནད་བརྒྱ་སྨན་གཅིག་ཅན་གྱི་སྨན་པ་བཟང་རབས། ནད་སྟོང་སྟབས་གཅིག་གིས་འཇིབ་པའི་མཁའ་འགྲོ་མ་མཆོག་རབས། གདོན་བརྒྱ་སྔགས་གཅིག་གིས་བསྐྲད་པའི་གྲུབ་ཆེན་ཡག་རབས། ཞལ་ཕུ་གཅིག་གིས་རེག་དུག་བཙན་པོ་འཇོམས་པའི་ནུས་ལྡན་ལེགས་རབས། མི་ཚེ་གཅིག་གི་དར་གུད་དང་། ལེགས་ཉེས་རྨི་ལམ་ལུང་སྟོན་པའི་དམ་པ་སོགས་ཀྱང་གང་ན་ཡོད་པ་བཤད་ཤེས་ལ། དངོས་གནས་ཀྱང་གར་ཡོད་བརྩད་ཀྱང་ཆོད་འདུག་སྟེ། ཕ་ཡུལ་གྱི་ནད་པ་མང་པོ་ཞིག་སྨན་ཁང་ལས་བུད་དེ་ནད་གཞིབ་ས་དང་། སྔགས་བསྔགས་ས། སྔགས་ཆུ་བཏུང་ས། ལྕགས་གཏུགས་ས། ལུང་བསྟན་ས། ཚྭ་བལྡག་ས་ལ་འགྲོ་བར་དགའ།

ལྷ་ལྷ་མོ་མི་རུ་བརྫུས་པའི་ལྷ་ཕོ་དང་ལྷ་མོའི་མདུན་ནས་གཅིན་དང་སྐྲ་ཆུ་འཐུང་བ་སོགས་ཀྱི་དད་གུས་ཡོད། ནོར་བཟང་པོ་སྣ་དགུ་ཕུལ་ལ་སེར་སྣ་མེད། སྨན་བཅོས་དང་། བཤའ་བཅོས་འཐུས་ཤོར་སོང་བའི་ནད་པ་མང་པོ་ཞིག་མི་ཤི་རྒྱུ་ཟད་ལ་ཐུག་ཀྱང་། ད་དུང་ལྷ་འདྲེས་ལུང་བསྟན་པའི་གྲུབ་ཆེན་དང་མཁའ་འགྲོ་མ་སོགས་ལ་དོགས་པ་ཙམ་བྱ་མི་སྲིད། འུ་ཚང་ནད་པ་ཚེ་ཟད་པའམ། ཡང་ན་ལས་སོགས་ཀྱིས་རྐྱེན་པའི་སྒྲུབ་བྱེད་ཁུར་ནས་བསྒྲུབ་བྱ་དཀར་པོ་སྐྱོན་མེད་ཀྱིས་བསྒབས་པར་བྱེད། ཐ་ན་ཅ་ལག་བརྐུ་ལ་ཤོར་ནའང་། རྗེས་དང་ར་མདའ་མི་གཉུལ་ཞིང་། རྐུན་མ་བརྩད་གཅོད་ཀྱི་ཁྲིམས་དོན་ལ་ཡེ་ནས་ཁ་ཡ་མི་བྱ་བར་ལྷ་འདྲེའི་ལུང་བསྟན་ཞུ་ལ་ཉིན་ལམ་མང་དུ་འགྲོ་སྲོལ་ཡོད།

འུ་ཚོའི་སེམས་ལ། བསམ་གྱིས་མི་ཁྱབ་པའི་ལྷ་འདྲེའི་ཆོ་འཕྲུལ་གྱི་བག་ཆགས་ཡོད་པས། རེ་བ་ཡང་དེ་ལ་བཅོལ་བ་ལས། དངོས་ཡོད་མི་ཆོས་རིག་གནས་དང་། ཚན་རིག་གི་གྲུབ་དོན་ལ་ཡིད་ཆེས་བྱ་མི་སྲིད། ནང་པའི་ལྟ་གྲུབ་ནས་སྐྱབས་འགྲོའི་ཡན་དུ་གོ་བ་དང་ཉམས་ལེན་ནི་དེ་ལས་ཀྱང་མེད་པས། འུ་ཚོ་ནི་དོན་གྱི་ལྷ་འདྲེ་དང་ཟོག་པོའི་བྲན་གཡོག་རེད་ཨང་།

འཇང་ནས་བྲིས།