སྲིད་སྐྱོང་འདེམས་པ།

གཡུ་སྒང་གངས་དཀར་རྒྱལ་སྲས།

སྲིད་སྐྱོང་མི་མང་ནས་འདེམས་པ་ནི་སྤྱི་ཚོགས་ཡར་རྒྱས་དང་དམངས་གཙོའི་གལ་ཆེན་རང་བཞིན་གྱི་ངོ་བོ་ཞིག་ཡིན། དེ་བཞིན་སྲིད་སྐྱོང་འགྲན་རྩོད་འདིའང་རང་དབང་མཚོན་བྱེད་དང་དམངས་གཙོ་མཚོན་བྱེད་ཅིག་ཡིན། ང་ཚོ་ལ་རང་དབང་གི་སྲིད་སྐྱོང་འོས་འདེམས་ཀྱི་ཐོབ་ཐང་ཡོད་ལ་ཁོ་བོ་དག་ལ་སྲིད་སྐྱོང་འགྲན་རྩོད་ཀྱི་ཐོབ་ཐང་ཡོད་པ་སོགས་ནི་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་གཅིག་ཡིན་ལ། ང་ཚོའི་དམངས་གཙོ་རང་དབང་གི་ཆེས་མཐོའི་ཁེ་དབང་ཉག་གཅིག་ཀྱང་ཡིན།

ཡིན་ནའང་སྲིད་སྐྱོང་གི་འོས་མི་གཉིས་ཡོད་པ་དང་དེ་བཞིན་དེ་གཉིས་ལ་ཕྱོགས་གཏོགས་ཀྱང་གཉིས་ཡོད་པ་ནི་མངོན་སུམ་མཐོང་ཆོས་སུ་གྲུབ་ཡོད། འདི་ནི་དོན་དག་ངན་པ་ཞིག་རྩ་བ་ནས་མིན། སྤྱིའི་ཆ་ནས་བཤད་ན་སྤྱི་ཚོགས་འདི་ཕྱོགས་ཞེན་གྱི་དབང་ལ་དེ་ཙམ་འགྲོ་གི་མེད་པའི་ཟོལ་ཞིག་ཀྱང་འདུག རྒྱུ་མཚན་ནི་དབུས་གཙང་གི་སྲིད་སྐྱོང་འོས་མི་དེ་མཐའ་མའི་སྲིད་སྐྱོང་འགྲན་རྩོད་དུ་མ་སླེབས་པ་ནི་ཕྱོགས་རིས་ཀྱི་དབང་ལ་ཤུགས་ཆེར་འགྲོ་གི་མེད་པའི་རྟགས་རེད་མ་གཏོགས། བོད་ལ་ཆོལ་ཁ་གསུམ་ཡོད་པའི་ནང་ནས་སྤྱི་ཚོགས་འདིར་དབུས་གཙང་གི་མི་མང་ཤོས་ཡིན་པས་གལ་ཏེ་ཕྱོགས་ཞེན་གྱི་དབང་ལ་འགྲོ་ན་སྲིད་སྐྱོང་ལ་བཞེངས་མཁན་དེར་ཤེས་འཇོན་གང་ཡོད་ལ་མ་བལྟས་པར་འོས་འཕེན་སྲིད་མོད་ཁོ་ནི་མཐའ་མའི་འགྲན་རྩོད་ལ་སླེབས་ཐུབ་མེད་པ་རེད།

ཡང་གཅིག་བཤད་ན་ཕྱོགས་རིས་ཀྱི་དབང་ལ་འགྲོ་གི་མེད་ཟེར་ནའང་ཧ་ཅང་ཁག་ཏེ་ད་ལྟའི་སྲིད་སྐྱོང་འོས་མི་གཉིས་ཀྱི་རང་རང་གི་ཕྱོགས་གཏོགས་དག་གི་བྱ་བྱེད་སྣ་ཚོགས་ལས་ཤེས་འོང་བ་དེ་རེད། ཚད་ལྡན་ལུགས་མཐུན་གྱི་བྱ་སྤྱོད་སྤེལ་སྟངས་ཧ་ཅང་ཉུང་ལ་གཞི་མེད་སྐྱོན་འཛུགས་ཀྱི་པར་དང་བརྙན་ཡིག་འཁྱམས་སོགས་ཧ་ཅང་མང་བ་ནི་ཕྱོགས་རིས་ཀྱི་དབང་ལ་འགྲོ་གི་ཡོད་པའི་རྟགས་ཤིག་ཀྱང་རེད། ལྷག་པར་དུ་༸རྒྱལ་བ་རིན་པོ་ཆེའི་བཀའ་སློབ་བརྙན་རིས་སྦྲགས་མ་དག་བེད་སྤྱོད་ལོག་པར་བཏང་ནས་རང་རང་གི་ཞེ་འདོད་ལག་བསྟར་བྱེད་པ་དག་ནི་དོན་ངོ་མས་ཞེན་ཁོག་གི་དབང་ལ་འགྲོ་བ་ཙམ་ལས་བོད་སྤྱི་བའི་ལས་དོན་ལ་འདང་རྒྱག་གི་མེད་པའི་རྟགས་རེད། དེ་དག་ནི་དགོས་མེད་ངོ་མ་དེ་ཡིན། ངས་རྒྱུ་མཚན་ངོ་མ་ཞིག་བཤད། གལ་ཏེ་ཁྱོད་ཀྱིས་སྲིད་སྐྱོང་གང་ཞིག་ལ་འོས་ཐོབ་པའི་ཆེད་དུ་དངོས་ཡོད་གནས་ཚུལ་ལ་མི་བལྟ་བར། འདས་སོང་གི་ལོ་རྒྱུས་ལ་མི་བལྟ་བར། ཆོལ་ཁ་དང་ཆོས་ལུགས་དང་བཟང་ས་དང་ངོ་ཤེས་ཀྱི་དབང་ལ་སོང་བ་ཡིན་ན་ཁྱོད་རང་བསམ་བློར་ཁོ་ལག་མ་རྒྱས་པའི་སྐྱོན་ཁོ་ན་ཡིན།

གལ་ཏེ་ཁྱོད་ཀྱིས་མངོན་ལྐོག་གཉིས་ནས་སྲིད་སྐྱོང་གང་ཞིག་ལ་ངན་བཤད་དང་གང་ཞིག་གི་བཟང་ཕྱོགས་བཤད་ནས་རང་ཉིད་དགའ་བའི་སྲིད་སྐྱོང་དེར་འོས་ཐོབ་པ་ཡིན་ནའང་དེས་ཁྱོད་ལ་ཕན་ཅུང་ཙམ་མི་ཐོག་པ་མ་ཟད་ཁྱོད་ཀྱི་ཆོལ་ཁ་དེལའང་ཕན་དམིགས་བསལ་བ་གང་ཡང་ཐོག་གི་མ་རེད། དེ་ནི་དངོས་ཡོད་གནས་ཚུལ་ལས་གསལ་འོང་ཏེ། ༸གོང་ས་༸སྐྱབས་མགོན་རིན་པོ་ཆེ་ཨ་མདོའི་ཡིན་མོད་ཨ་མདོ་ལ་དམིགས་བསལ་གྱིས་ཕན་གང་ཡང་ཐོག་མེད་པ་རེད་ལ། གལ་ཏེ་ཨ་མདོ་ལ་དམིགས་བསལ་གྱིས་ཕན་ཞིག་བཏགས་ཡོད་ན་དེ་ནི་ནོར་འཁྲུལ་ཡིན་པ་ལས་མཛད་རྗེས་ཤིག་ཏུ་བགྲངས་ཐབས་མེད། དེ་བཞིན་ད་ལྟའི་སྲིད་སྐྱོང་གཉིས་ལ་རང་རང་གི་ཕྱོགས་གཏོགས་དག་གིས་ད་ལྟའི་དངོས་ཡོད་གནས་ཚུལ་དང་འདས་སོང་གི་མཛད་རྗེས་ལ་དཔག་ནས་སྤྱི་དོན་ལ་བསམ་ནས་འོས་འཕེན་རོགས་ཞུ་གི་ཡོད།

འོས་ཤོག་འདི་ནི་བོད་མིའི་བདེ་སྡུག་ལ་ཐུག་པའི་འོས་ཤོག་ཅིག་ཡིན། འོས་ཤོག་འདི་ནི་ལྷག་པར་དུ་བྱེས་འབྱོར་སྤྱི་ཚོགས་འདིའི་དཀའ་ངལ་སྣ་ཚོགས་ལ་ཐུག་པའི་འོས་ཤོག་ཅིག་ཡིན་པ་ལས། རང་རང་གི་ཁེ་ཕན་འགྲུབ་བྱེད་ཅིག་མིན་པ་ནི་སྔ་ས་ནས་ཤེས་ན་ཡག སྲིད་སྐྱོང་གང་ཞིག་ལ་འོས་ཐོབ་པའི་ཆེད་དུ་སུ་ཞིག་ལ་འཇིགས་སྐུལ་བྱེད་དགོས་དོན་མེད། སུ་ཞིག་གསོད་གི་ཡིན་དང་སུ་ཞིག་གཏུབ་གི་ཡིན་ཞེས་བ་སོགས་ལ་ཁེ་ཕན་གང་ཡང་མེད། གལ་ཏེ་ཁྱོད་ཀྱིས་སུ་ཞིག་བསད་ཀྱང་གཏུབ་ཀྱང་ཁྱོད་ལ་མི་ཕན་ལ་ཁྱོད་ཀྱི་སྲིད་སྐྱོང་ལའང་མི་ཕན་པས་བྱ་སྤྱོད་འདི་དག་ནི་བོད་མིའི་སྤྱི་ཚོགས་ནང་ལ་གཏན་ནས་མི་འཚམ། ཁྱོད་ལ་མཁྲིས་ནད་ཡོད་ན་མི་གང་མང་གིས་དུང་གི་ཁ་དོག་དཀར་བོ་ཡིན་པར་བརྗོད་ཀྱང་ཁྱོད་ཀྱིས་གཏན་ནས་ཁས་མ་ལེན་ལ་ཡིད་ཀྱང་མི་ཆེས་མོད། དོན་ངོ་མ་ཁྱོད་རང་ནོར་ཡོད་པ་ལྟ་བུ་རེད། དེའི་རྐྱེན་གྱིས་འོས་འཕེན་མཁན་དག་ལ་ལོག་ཤེས་དང་ཕྱོགས་རིས། རྨོངས་བློའི་མཁྲིས་ནད་མེད་པའི་སྒོ་ནས་འོས་འཕེན་རོགས་ཞུ་གི་ཡོད། དེ་ལྟར་བྱས་ན་རང་གཞན་ཀུན་ལ་བཟང་བས་གཟབ་པར་འཚལ།