བོད་རྒྱ་འབྲེལ་མོལ་ཐད་ལག་པ་ཕྱིས་ཡོང་གི་འདུག

ཨ་ཁུ་དགྲ་ལྷ།
 
དེང་སྐབས་ང་ཚོའི་སྤྱི་ཚོགས་ནང་སྲིད་སྤྱིའི་འོས་བསྡུའི་ལས་རིམ་འགྲོ་བཞིན་པ་ཡིན་པས་གང་ཟག་སུ་ཞིག་གིས་ཆབ་སྲིད་དང་འབྲེལ་བའི་སྐད་ཆ་གང་བཤད་ཀྱང་འོས་བསྡུ་དང་འབྲེལ་བ་ཡོད་པའམ་འབྲེལ་བར་བཏགས་པ་ཞིག་ཏུ་འགྱུར་སྲིད་པས་ཆབ་སྲིད་དང་འབྲེལ་བའི་ཐད་ནས་སྐད་ཆ་མ་བཤད་པ་བཟང་ངོ་ཆེ་བར་མཐོང་ཡང་། སྲིད་སྐྱོང་ལས་ཐོག་སྐུ་ངོ་བློ་བཟང་སེང་གེའི་བཀའ་མོལ་གནང་ཕྱོགས་ཞིག་གི་ཐད་ནས་བསམ་གཞིག་གི་སྐད་ཆ་ཞིག་མ་བཤད་ཀ་མེད་རེད་འདུག
ཕྱི་ལོ་༢༠༡༦ ཟླ་༢ ཚེས་༡༡ ཉིན་ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་རྡོ་རྗེ་དགྲ་འདུལ་དང་སྐུ་ངོ་སྲིད་སྐྱོང་མཆོག་ལྷན་དུ་དཔྱད་གླེང་གནང་བའི་བརྙན་འཕྲིན་དེར་ལྟ་ཉན་བྱས་པ་ཡིན། གསར་འགོད་པས་སྲིད་སྐྱོང་འོས་མི་ཚོགས་གཙོ་སྤེན་པ་ཚེ་རིང་ལགས་ཀྱིས་འཐུས་ཤོར་ཡིན་པར་བཤད་པ་འགའ་ཞིག་གཟིགས་འབུལ་གྱིས་དེའི་ཐད་དགོངས་ཚུལ་ཇི་ཡོད་བཀའ་འདྲི་གནང་བ་ཁག་རེད། དེ་ཚོ་ཕལ་མོ་ཆེ་ནི་ངུ་བའི་ཁ་ལ་བལྟས་ན་ངུ་ཤོར་དགོད་པའི་ཁ་ལ་བལྟས་ན་དགོད་ཤོར་ཟེར་བ་ལྟར་སྲིད་སྐྱོང་དང་ཚོགས་གཙོ་གཉིས་གསུང་བཤད་སྟེགས་བུའི་མདུན་ནས་མ་གཏོགས་མཇལ་མྱོང་མེད་མཁན་གྱི་མང་ཚོགས་དེ་ཚོ་མགོ་ཡུ་འཁོར་བྱེད་ཀྱི་བཟི་སྨན་འདྲ་ཞིག་ཡིན་པ་ལས་མིག་དང་ལག་པས་ཐོགས་རེག་ཡོད་མཁན་ལ་གད་མོ་སློང་བྱེད་ཙམ་ལས་མ་འདས།
ལྷག་པར་བར་ལམ་དུས་འཁོར་དབང་ཆེན་དང་འབྲེལ་བའི་ཐད་སྲིད་སྐྱོང་འོས་མི་གཉིས་ཕན་ཚུན་ཤོད་རེས་དང་། གཞུང་ས་རྩེད་ཆས་བྱས་པ་སོགས་ཀྱི་ཡོ་འཁྱོམ་ལ་བལྟས་ན། རླུང་དམར་འཚུབ་པའི་ངན་ལྟས་སུ་མཐོང་ནས་ཕྱི་ལ་ཡོད་པའི་བོད་མི་ཚོས་གཅིག་གནང་གི་རེད་ཟེར་ནས་རེ་བ་རྒྱག་མཁན་གྱི་གཞིས་ལུས་མི་མང་ཚོའི་ངོ་རིས་ཡིད་ལ་ཤར་ཏེ་སེམས་པ་གཏིང་ནས་སྐྱོ་བ་ཞིག་བྱུང་། ༸གོང་ས་མཆོག་གི་སྐུ་གསུང་ཐུགས་གསུམ་ལྷོད་ལྷོད་རེད་གསུང་མཁན་དེ་ཚོའི་ཕྱག་རྗེས་ལ་བལྟས་ན་ལྷོད་ལྷོད་ཅེས་པའི་ཡིག་འབྲུ་གཉིས་པོ་དེ་ལ་གོ་བ་གང་ཡོད་དམ་སྙམ། གསར་འགོད་པ་དང་སྐུ་ངོ་སྲིད་སྐྱོང་གཉིས་བར་གྱི་བགྲོ་གླེང་དེ་རྫོགས་ཉེའི་མཚམས་སུ་སླེབ་དུས་དོ་སྣང་བྱེད་དགོས་པའི་གནས་དོན་ཞིག་མཐོང་བྱུང་།

གསར་འགོད་པས་གསུང་དོན། སྔོན་མ་ང་ཚོས་རྒྱ་བོད་འབྲེལ་མོལ་དང་འབྲེལ་བའི་ཐོག་ལ་ས་ཆ་འདི་རང་དུ་བཀའ་འདྲི་ཞིག་ཞུས་ཡོད་པ་རེད། དེར་ཁྱེད་རང་ནས་ལན་འདི་འདྲ་ཞིག་གནང་འདུག་པས་སྔོན་ལ་དེར་གཅིག་གཟིགས་རོགས། ཕྱི་ལོ་ ༢༠༡༥ ཟླ་༡༠ ཚེས་ ༥ ཉིན་གསར་འགོད་པ་སྐལ་ལྡན་བློ་གྲོས་ཀྱིས་དྲི་བ་ཞུས་པའི་ལན། (འབྲེལ་བ་གནང་ཡག་དེ་སྔའི་བཀའ་ཤག་ལས་ལྷག་པ་མེད་ཀྱང་དེ་ནང་བཞིན་གནང་གི་ཡོད་པ་རེད། ང་ཚོར་གནས་ཚུལ་མང་པོ་ཞིག་ཡོང་བསྡད་ཀྱི་ཡོད་ཀྱང་བོད་རྒྱ་འབྲེལ་མོལ་གྱི་འགྲོ་སྟངས་ཐོག་ནས་ཕྱི་གསལ་ནང་གསལ་བྱེད་ཀྱི་ཡོད་པ་མ་རེད། ཨ་རི་དང་རྒྱལ་སྤྱིའི་ཐོག་ནས་ཀྱང་ཨི་རག་གི་རྡུལ་ཕྲན་ཚོན་ཆ་མེད་པ་བཟོ་ཡག་དེ་ཚོ་ཤོད་ཀྱི་མེད། གྲུབ་འབྲས་སྨིན་པའི་སྐབས་སུ་ཞུ་གི་ཡོད་པ་རེད། སྔོན་མ་སྐུ་ཚབ་ཡོད་པའི་ཐོག་ནས་གནང་གི་ཡོད་རེད། ད་ལྟ་སྐུ་ཚབ་མེད་པའི་ཐོག་ནས་གནང་གི་ཡོད་ཀྱང་སྔར་ལྷག་མེད་ཀྱང་སྔོན་མ་ནང་བཞིན་འབད་བརྩོན་གནང་གི་ཡོད་རེད། གཙོ་ཆེ་ཤོས་བོད་རྒྱ་འབྲེལ་མོལ་ཐོག་ལ་༧གོང་ས་མཆོག་ནས་ཀྱང་ཐུགས་སྣང་དེ་སྔ་གནང་གི་ཡོད་རེད་ལ་ད་ལྟ་ཡིན་ནའང་གནང་གི་ཡོད་རེད། མ་འོངས་པར་ཡང་གནང་གི་རེད། ཐུགས་ཕྲལ་རྩ་བ་ནས་དགོས་པ་མ་རེད།)

གསར་འགོད་པས། ད་ལྟ་༧གོང་ས་མཆོག་ནས་རྒྱ་བོད་འབྲེལ་མོལ་ཐོག་ལ་ཐུགས་སྣང་གནང་གི་ཡོད་རེད་གསུང་དུས་སྲིད་སྐྱོང་གིས་དེའི་ཐད་འགན་མེད་པ་འདྲ་བོ་ཞིག་ལ་གོ་དགོས་པ་རེད་དམ་གང་འདྲ་རེད། ལན། དེ་འདྲ་རྩ་བ་ནས་མ་རེད། དེ་སྔ་ཡིན་ནའང་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ནས་བོད་རྒྱ་འབྲེལ་མོལ་སྒང་ལ་འགན་འཁུར་གནང་གི་ཡོད་རེད། ཡིན་ནའི་རྒྱ་ནག་གཞུང་གིས་དེ་སྔ་ནས་བཤད་བསྡད་ཡོད་རེད། ད་ལྟ་ཡང་བཤད་ཡག་ལ་ཁོང་རང་ཚོས་བཀའ་མོལ་གནང་ཡག་དེ་༧གོང་ས་མཆོག་གི་སྐུ་ཚབ་རྣམ་པའི་མཉམ་དུ་མ་གཏོགས་གཞན་མཉམ་དུ་གནང་གི་མིན་ཟེར་ནས་གསལ་པོ་ཞེ་དྲག་རེད། དེར་འགྱུར་བ་གཅིག་ཀྱང་མེད། དེ་སྔ་ཡིན་པ་ཡིན་ན་ཡང་༧གོང་ས་མཆོག་གི་དམིགས་བསལ་སྐུ་ཚབ་རྣམ་པ་དང་། རྒྱ་ནག་གཞུང་གི་སྐུ་ཚབ་བར་བཀའ་མོལ་གནང་བསྡད་ཡོད་རེད།
ད་ལྟའི་བཀའ་ཤག་དང་མ་འོངས་པའི་བཀའ་ཤག་ལ་ཡིན་ནའང་རྒྱ་ནག་གཞུང་མཉམ་དུ་བཀའ་མོལ་གནང་དགོས་ཡོད་པ་ཡིན་ན་༧གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་བར་བཀའ་མོལ་གནང་གི་རེད། དེ་འདྲ་སོང་ཙང་༧གོང་ས་མཆོག་ནས་ཡིན་པ་ཡིན་ནའི་ང་ཚོའི་བཅའ་ཁྲིམས་དོན་ཚན་དང་པོའི་ནང་ལ་རང་ཆས་ཀྱི་སྐུ་དབང་ཕུལ་བའི་ནང་ལ་ཡིན་པ་ཡིན་ན་ཡང་༧གོང་ས་མཆོག་ལ་བོད་དོན་ཐོག་ལ་རང་ཆས་ཀྱི་འགན་དབང་ཆ་ཚང་རང་ཆས་ཀྱི་སྐུ་དབང་ཡོད་ཟེར་ཡོང་དུས་༧གོང་ས་མཆོག་ནས་ཡིན་པ་ཡིན་ནའི་བོད་ནང་གི་བོད་མི་ཚོས་ང་ལ་ཡིད་ཆེས་ཡོད་རེད། ང་ལ་རེ་བ་བྱེད་ཀྱི་ཡོད་རེད། དེ་འདྲ་སོང་ཙང་བོད་དོན་གྱི་གནད་འགག་ཕྱེད་ཀ་ལ་ང་ཡིན་ནའི་མཐུན་འགྱུར་གནང་གི་རེད་ཟེར་ནས་དུས་རྟག་ཏུ་གསུང་བསྡད་ཀྱི་ཡོད་པ་རེད། དེ་འདྲ་སོང་ཙང་བོད་རྒྱ་འབྲེལ་མོལ་ཐོག་དེ་སྔ་༧གོང་ས་མཆོག་ནས་ཐུགས་སྣང་གནང་གི་ཡོད་རེད། ད་ལྟའང་གནང་གི་ཡོད་རེད། མ་འོངས་པར་ཡང་གནང་གི་རེད། འདིའི་ཐད་འཐུས་ཤོར་རྩ་བ་ཉིད་ནས་འགྲོ་ཡག་ཡོད་པ་མ་རེད་འགྲོ་གི་ཡང་མ་རེད། སྲིད་སྐྱོང་དང་བཀའ་ཤག་ཐོག་ནས་ཡིན་པ་ཡིན་ནའི་དེ་ལ་མཐུན་རྐྱེན་སྦྱར་ཡག་དང་འབད་བརྩོན་ཞུ་ཡག་ཐོག་ལ་ཡིན་པ་ཡིན་ན་ཡང་དེ་སྔ་བཀའ་ཤག་གིས་གནང་བཞག་པ་ལས་ལྷག་པ་མེད་ན་ཡང་དེ་སྔའི་བཀའ་ཤག་ནང་བཞིན་གནང་བསྡད་ཡོད། ཡིན་ཡང་མཐའ་མ་བཀའ་མོལ་དེ་༧གོང་ས་མཆོག་གི་སྐུ་ཚབ་རྣམ་པ་མཉམ་དུ་གནང་རྒྱུ་རེད།

གསར་འགོད་པས། ག་རེ་གནང་ཡོད་མེད་གཅིག་གཉིས་ཤིག་ཞུ་ཡག་ཡོད་དམ། ལན། ད་དེ་ང་ཚོའི་འགྲོ་སྟངས་ཐོག་ནས་གསང་བ་བྱས་ཏེ་ཉར་དགོས་ཡག་དེ་གང་ཡིན་ཟེར་ན་རྒྱ་མིའི་ནང་ལ་ཚོང་པ་ཡོད་རེད། ནང་པ་ཡོད་རེད། བོད་པ་ལ་ཤ་ཞེན་བྱེད་མཁན་ཡོད་རེད། དེ་སྔ་ནས་ཁོང་རང་ཚོས་འབད་བརྩོན་གནང་བྱས་འགྲུབ་པ་ཡོད་རེད་མ་འགྲུབ་པ་ཡོད་རེད། ད་ལྟ་ཡིན་ནའི་གནང་གི་ཡོད་རེད་མ་འོངས་པར་ཡིན་ནའི་གནང་གི་རེད་བསམ་གྱི་འདུག ཅེས་གསུངས།

ཕྲན་ནས་ངལ་བར་མ་འཛེམས་པར་སྐུ་ངོ་སྲིད་སྐྱོང་མཆོག་གི་གསུང་བཤད་དུམ་བུ་ཆ་ཚང་འདིར་འདྲེན་འགོད་བྱ་དགོས་པའི་རྒྱུ་མཚན་ནི། གསུང་བཤད་འདི་ཐེངས་ཁ་ཤས་ལ་ཡང་སྐོར་བསྐྱར་སྐོར་གྱིས་ཉན་སྐབས་ཆབ་སྲིད་ཀྱི་གནད་དོན་ཞིག་གི་ཐོག་སྐུ་ངོ་སྲིད་སྐྱོང་གི་འདས་པའི་བཀའ་ཤག་དང་མ་འོངས་པའི་བཀའ་ཤག་གི་ཁ་ཕྱོགས་མངོན་གསལ་དུ་བསྟན་འདུག གསུང་བཤད་དེ་རྗེན་པར་བསྟན་ན་བོད་རྒྱ་འབྲེལ་མོལ་ཐད་དེ་སྔ་༸གོང་ས་མཆོག་ནས་གནང་བ་བཞིན་ད་ལྟའང་གནང་གི་ཡོད་པ་རེད། མ་འོངས་པར་ཡང་༸གོང་ས་མཆོག་ནས་གནང་གི་རེད། བཅའ་ཁྲིམས་ནང་དེའི་ཐད་༸གོང་ས་མཆོག་ལ་འགན་ཡོད་རེད་སྐུ་དབང་ཡོད་རེད་ཟེར་ནས་འཁོད་ཡོད་པ་རེད། བཀའ་ཤག་ནས་མཐུན་རྐྱེན་སྦྱར་ཡག་དེ་སྔོན་མ་བཞིན་སྦྱར་གྱི་ཡོད་པ་རེད་ཅེས་གསུང་གི་ཡོད་པ་རེད། སྐུ་ངོ་མཆོག་གི་ཆབ་སྲིད་དང་འབྲེལ་བའི་གལ་ཆེའི་བཀའ་མོལ་དེས་དོན་གནད་གསུམ་གྱི་ཐོག་བསམ་གཞིགས་གཏོང་དགོས་པ་ཆགས་འདུག

དང་པོ། ༸གོང་ས་མཆོག་ནས་སྲིད་སྐྱོང་ལ་ཆབ་སྲིད་དང་འབྲེལ་བའི་སྐུ་དབང་ཆ་ཚང་རྩིས་སྤྲོད་བྱས་པ་འཛམ་གླིང་ཀུན་གསལ་ཡིན་ཞིང་། དེ་ནི་༸གོང་ས་མཆོག་གི་རིང་ནས་སྙིང་དུ་བརྣག་པའི་འདོད་དོན་ཞིག་ཡིན་པའི་བཀའ་སློབ་ཕེབས་ཡོད་པ་རེད། མི་མང་གིས་༸གོང་ས་མཆོག་ནས་ཆབ་སྲིད་ཀྱི་སྐུ་དབང་མུ་མཐུད་བཞེས་རོགས་གནང་ཞེས་གསོལ་བ་ཕུར་ཚུགས་སུ་ཡང་ཡང་བཏབ་ཀྱང་། འོས་འདེམས་བྱས་པའི་དབུ་ཁྲིད་ལ་ཆབ་སྲིད་ཀྱི་སྐུ་དབང་ཆ་ཚང་རྩིས་སྤྲོད་བྱས་པའི་དགོས་དོན་ནི་༸གོང་ས་མཆོག་ནས་དུས་རྒྱུན་ཡང་ཡང་བཀའ་ཕེབས་པ་བཞིན་བོད་ཀྱི་གནད་དོན་འདི་ང་མི་གཅིག་ཡོད་མེད་ལ་མ་ལྟོས་པར་མི་རབས་རིམ་པར་རྒྱུན་གནས་དགོས་པ་ཞིག་ཡོང་ཐབས་བྱེད་དགོས་གསུངས་པ་དེ་རེད།
འོན་ཀྱང་སྲིད་སྐྱོང་དང་ཁོང་གི་བཀའ་ཤག་གིས་སྐུ་དབང་རྩིས་བཞེས་གནང་ཡོད་ཀྱང་དེ་རིང་གི་བཀའ་མོལ་འདིར་གཞིགས་ན་བོད་དོན་འཐབ་རྩོད་དང་འབྲེལ་བའི་བོད་རྒྱ་འབྲེལ་མོལ་གྱི་ཕྱག་ལས་ད་དུང་ཡང་༸གོང་ས་མཆོག་གི་ཕྱག་ལ་བཞགས་ཡོད་པར་མ་ཟད། མ་འོངས་པར་ཡང་གཞག་རྒྱུ་ཡིན་པ་དེ་གསལ་པོ་གསུངས་ཡོད། ཆབ་སྲིད་ཀྱི་སྐུ་དབང་ཆ་ཚང་ཡོད་པའི་སྲིད་སྐྱོང་དང་ཁོང་གི་གཞུང་ལ་བོད་དོན་འཐབ་རྩོད་ཀྱི་ལས་དོན་ལ་འགན་འཁུར་འདོད་མེད་ན། ༸གོང་ས་མཆོག་གིས་སྐུ་དབང་རྩིས་སྤྲོད་བྱས་པའི་དགོས་དོན་འགྲུབ་མེད་པ་རེད། བོད་དོན་འཐབ་རྩོད་དང་འབྲེལ་བའི་ལས་དོན་དེ་དག་ད་དུང་༸གོང་ས་མཆོག་སྐུ་རྐྱང་ལ་ཐུག་ཡོད་པ་གསལ་པོ་རེད།
༸གོང་ས་མཆོག་གི་སྐུ་ཚབ་མ་གཏོགས་བཙན་བྱོལ་གཞུང་གི་སྐུ་ཚབ་མཉམ་དུ་བཀའ་མོལ་གནང་གི་མིན་ཟེར་བ་དེ་རྒྱ་ནག་གཞུང་གི་སྲིད་བྱུས་རེད། སྲིད་སྐྱོང་གི་ངོས་ནས་༸གོང་ས་མཆོག་ནས་ཆབ་སྲིད་ཀྱི་སྐུ་དབང་ཆ་ཚང་བཞག་ཟིན་པས་ད་ཆ་ཆབ་སྲིད་དང་འབྲེལ་བའི་སྐད་ཆ་གང་ཞིག་བཤད་དགོས་ཀྱང་སྲིད་སྐྱོང་དང་སྲིད་སྐྱོང་གི་སྐུ་ཚབ་མཉམ་དུ་གནང་དགོས་པ་ལས་ལམ་ཀ་གཞན་མེད་པའི་བརྡ་ལན་གསལ་པོ་ཞིག་རྒྱ་ནག་གཞུང་དང་རྒྱལ་སྤྱིའི་སྡིང་ཆའི་ཐོག་ངོ་ཆ་སྤྲོད་དགོས་ཀྱང་ད་བར་དེའི་ཐད་འབད་བརྩོན་གནང་མེད་པ་ཙམ་དུ་མ་ཟད། ཆོད་སེམས་ཀྱང་མེད་པ་འདིས་ཁོང་གི་བཀའ་ཤག་འདིས་འགན་འཁུར་མེད་པའི་ཆབ་སྲིད་ཀྱི་འཛིན་སྐྱོང་གནང་གི་མེད་དམ་སྙམ། གལ་ཏེ་བོད་དོན་འཐབ་རྩོད་དང་འབྲེལ་བའི་ལས་ཀ་གནང་དགོས་ཀྱི་མེད་ན་སྲིད་སྐྱོང་ཞེས་པ་མི་དགོས་པར་ནང་སྲིད་བཀའ་བློན་དབུ་བཞུགས་ཐོག་བཀའ་ཤག་ལྷན་ཚོགས་ཤིག་བཙུགས་ན་མ་འགྲིག་པ་ཨེ་ཡོད།།

གཉིས་པ། ༸གོང་ས་མཆོག་ནས་བོད་མི་དང་། རྒྱལ་སྤྱིའི་སྤྱི་ཚོགས་གང་དུ་ཕེབས་ཀྱང་ཆབ་སྲིད་དང་འབྲེལ་བའི་དྲི་བ་ཡོད་ན་སྲིད་སྐྱོང་ལ་འདྲི་དགོས་པ་ལས་ང་ལ་ཞུ་ཡག་གང་ཡང་མེད། ངས་ཆབ་སྲིད་ཀྱི་ལས་དོན་ཆ་ཚང་བཞག་ཟིན་པ་ཡིན་གསུང་གི་ཡོད་ཀྱང་། སྲིད་སྐྱོང་མཆོག་ནས་བཅའ་ཁྲིམས་དོན་ཚན་དང་པོ་ལུང་འདྲེན་གནང་ནས་བོད་རྒྱ་འབྲེལ་མོལ་ཐད་༸གོང་ས་མཆོག་ལ་འགན་ཡོད་པ་དམིགས་བཀར་གྱིས་གསུངས་པ་འདི་རེད། ཕྲན་ནས་འདིར་བཅའ་ཁྲིམས་དོན་ཚན་དང་པོ་ཆ་ཚང་འདྲེན་འགོད་བྱས་ཡོད།

དོན་ཚན་དང་པོ། བོད་དང་བོད་མིའི་མགོན་སྐྱབས་དང་མཚོན་རྟགས།

བོད་ཀྱི་ལྷ་སྐལ་སྤྱན་རས་གཟིགས་དབང་མིའི་གཟུགས་སུ་བྱོན་པའི་ཁམས་གསུམ་ཆོས་ཀྱི་རྒྱལ་པོ་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ནི་འཇིག་ རྟེན་ཞི་བདེའི་དེད་དཔོན་དང༌། ས་སྟེང་ྋརྒྱལ་བསྟན་ཡོངས་རྫོགས་ཀྱི་མངའ་བདག བོད་མི་ཡོངས་ཀྱི་མགོན་སྐྱབས། བླ་ན་མེད་པའི་དབུ་འཁྲིད། བླང་དོར་ལམ་སྟོན་པ། བོད་མིའི་ངོ་བོ་དང༌། དེའི་ཆིག་སྒྲིལ་གྱི་མཚོན་རྟགས། བོད་མི་ཡོངས་ཀྱི་རང་དབང་ལྡན་པའི་མགྲིན་ཚབ་པ་བཅས་ཡིན། གནས་བབ་འདི་དག་ནི་ལོ་གྲངས་བརྒྱ་ཕྲག་མང་པོའི་བྱུང་རབས་དང༌། རིག་གཞུང༌། མངའ་དབང་ལྡན་པའི་བོད་མིའི་མངོན་འདོད་བཅས་ལས་གྲུབ་པ་ཡིན། དེའི་ཕྱིར་གཤམ་གསལ་གྱི་མཛད་འགན་དང་སྐུ་དབང་རྣམས་རང་ཆས་སུ་ཡོད།

༡ བོད་མིའི་བདེ་དོན་དང་བསམ་སྤྱོད་ཀྱི་ཡར་རྒྱས། ཆོས་དང་རིག་གཞུང༌། རིག་གནས་བཅས་ཀྱི་སྲུང་སྐྱོབ་དང་དར་སྤེལ། བོད་ཀྱི་རྩ་དོན་སྒྲུབ་ཐབས་ཀྱིས་མཚོན་བོད་མི་དང་བོད་མིའི་སྒྲིག་འཛུགས་ཀྱི་ལས་དོན་གང་ཅིའི་ཐོག་ལམ་སྟོན་དང་བཀའ་སློབ། སྐུལ་ལྕག་གནང་རྒྱུ།

༢ ྋགོང་ས་ྋསྐྱབས་མགོན་ཆེན་པོ་མཆོག་གིས་དགོས་གལ་ནམ་གཟིགས་སྐབས་དང༌། འགོ་འཁྲིད་རྣམས་ཀྱིས་གསོལ་འདེབས་ནམ་ཞུས་ལ་བོད་མི་རིགས་དང༌། སྤྱི་ཚོགས། བསྟན་སྲིད་ཀྱི་གལ་ཆེའི་ལས་དོན་ཐོག་གྲོས་ཚོགས་དང་བཀའ་ཤག་གི་དགོངས་པའི་དཔྱད་གཞིར་དགོངས་འཆར་གནང་རྒྱུ།

༣ བོད་མིའི་སྒྲིག་འཛུགས་དང་བོད་མི་མང་གི་ཆེད་རྒྱལ་སྤྱིའི་དབུ་འཁྲིད་རྣམ་པ་དང༌། གལ་ཆེའི་མི་སྣ་ཁག་དང་མཇལ་འཕྲད་བཀའ་བསྡུར་གནང་རྒྱུ་དང༌། བཀའ་ཤག་གིས་བསྐོ་འཛུགས་བྱས་པའི་སྐུ་ཚབ་དོན་གཅོད་དང་དམིགས་བསལ་སྐུ་ཚབ་རྣམས་ལ་ྋགོང་སྋསྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་མཚན་གནས་བསྩལ་རྒྱུ་བཅས།

བཅའ་ཁྲིམས་ནང་སྐུ་དབང་རང་ཆས་སུ་ཕུལ་བ་འདི་དག་ལ་གཞིགས་ན་བོད་དོན་འཐབ་རྩོད་ཐད་༸གོང་ས་མཆོག་ནས་ཕྱག་ལས་གནང་དགོས་པ་གསལ་མེད་པར་མ་ཟད། ༸གོང་ས་མཆོག་ནས་ཀྱང་ད་བར་བཀའ་ཤག་གི་དགོངས་སྐོར་ཁག་ལ་ལམ་སྟོན་བསམ་འཆར་ཕུལ་བ་ཙམ་ལས་ཆབ་སྲིད་ལས་དོན་ལ་འདི་བྱེད་དང་འདི་མ་བྱེད་ཅེས་གསུང་མེད་པ་གསལ་པོ་རེད། དེས་ན་སྲིད་སྐྱོང་མཆོག་ནས་བཅའ་ཁྲིམས་ནས་སྐུ་དབང་རང་ཆས་སུ་ཕུལ་ཡོད་པར་བཤད་ནས་བོད་རྒྱ་འབྲེལ་མོལ་གྱི་ལས་དོན་འགྲུབ་འབྲས་མེད་པའི་ལེ་ཁག་༸གོང་ས་མཆོག་ལ་དཀྲི་ཐབས་མེད་པ་རེད།

གསུམ་པ། འོས་བསྡུའི་ལས་རིམ་ཁྲོད་བོད་རྒྱ་འབྲེལ་མོལ་ལས་དོན་ཐད་སྐུ་ཚབ་གཅིག་ཀྱང་བསྐོ་གཞག་བྱེད་མ་ཐུབ་པ་གང་ཡིན་ནམ་ཞེས་དྲི་བ་མང་དག་ཅིག་སྲིད་སྐྱོང་གི་མདུན་ཅོག་སྟེང་དུ་སླེབ་ཡོང་དུས་བོད་རྒྱ་འབྲེལ་མོལ་གྱི་ལས་ཀ་དེ་༸གོང་ས་མཆོག་གི་ཕྱག་ལ་ཡོད་པ་དང་བཀའ་ཤག་དེའི་མཐུན་རྐྱེན་མཁོ་སྒྲུབ་པ་ཙམ་ཡིན་མདོག་བཤད་དེ་འུ་ཐུག་པའི་སྐབས་༸གོང་ས་མཆོག་ལ་ཕྱག་ཕྱིས་རྩིས་བྱེད་པ་འདིར་བོད་རྒྱ་འབྲེལ་མོལ་ལས་དོན་ཚོགས་ཆུང་དང་༸གོང་ས་མཆོག་གི་སྐུ་འགྲམ་དུ་ཡོད་པའི་གལ་ཆེའི་མི་སྣ་ཚང་མས་དོ་སྣང་འགན་འཁུར་གནང་དགོས་པ་རེད་སྙམ། བོད་དོན་དང་འབྲེལ་བའི་ཆབ་སྲིད་ཀྱི་ལས་ཀ་མང་དག་ཅིག་ད་དུང་༸གོང་མཆོག་གི་ཕྱག་ནང་བཅོལ་ཡོད་པར་མ་ཟད། སེམས་རྩ་འཁོལ་པོའི་ཐོག་ནས་མར་ཞུ་རྒྱུ་ཕར་བཞག་ད་དུང་མ་འོངས་པར་ཡང་༸གོང་ས་མཆོག་གི་ཕྱག་ལ་གཞག་རྩིས་དང་། མང་ཚོགས་ཀྱིས་ཚ་འདེད་གཏོང་སྐབས་༸གོང་ས་མཆོག་གི་ཕྱག་ལ་ཡོད་ཅེས་༸གོང་ས་མཆོག་ལག་ཕྱིས་མུ་མཐུད་གནང་རྩིས་བྱེད་ཀྱི་ཡོད་ན། ༸གོང་ས་མཆོག་གི་ཐུགས་རེ་ཆེན་པོ་གྲུབ་ཡོད་པ་དང་། ཁོང་ཐུགས་སེམས་སྤྲོ་པོའི་ངང་ནས་སྐུ་ལྷོད་ལྷོད་བཞུགས་ཡོད་པ་རེད་ཅེས་པའི་སྐད་ཆ་དེ་སྤོབས་པ་མཐོན་པོའི་ཐོག་ནས་བཤད་ཐུབ་པ་གང་ཡིན་ནམ།
དེ་རིང་ཁ་སང་སྐུ་ངོ་སྲིད་སྐྱོང་མཆོག་ནས་སྤྱི་ཚོགས་ནང་བོད་རྒྱ་འབྲེལ་མོལ་གྱི་གནས་སྟངས་ཀྱི་སྣང་བརྙན་བསྐྲུན་སྟངས་ལ་བལྟས་ན། ༸གོང་ས་མཆོག་སྐུ་ངོ་སྲིད་སྐྱོང་གི་ཆབ་སྲིད་ཀྱི་ལག་པ་རྫོར་པོ་དེ་ཕྱིས་ས་གནང་གི་མེད་དམ་སྙམ་པས་ཀུན་གྱིས་ཡིད་འཇོག་གྱིས།།