ཚོགས་གཙོའི་ཆད་པ་ལྟག་ལོག་དགོས།

ཨེ་མ་ཧོ།

༡ སྦྱོར་བའི་བདེན་གཏམ།

དེང་དུས་འབྱུང་འགྱུར་གངས་ཅན་བོད་མིའི་བདེ་སྐྱིད་ལ་དམིགས་ནས་ཆོས་ཀྱི་རྩ་བ་སྲིད་ཞེས་པ་བཞིན་དུ་གངས་ཅན་བོད་མིའི་སྤྱི་མགྲིན་ཆོག་པའི་བདེན་པ་དྲང་པོ་སྤྱི་ཕན་ཁོ་ན་དོན་དུ་གཉེར་བ་ཞིག་ལ་སྲིད་སྐྱོང་གདམས་དགོས་པ་ང་ཚོས་ལས་འགན་རེད། མཁས་དབང་བློ་བཟང་སེངྒེ་དང་། ཨ་ཚོགས་ཀླུ་མཁར་བྱམས་དང་། ཚོགས་གཙོ་སྤེན་པ་ཚེ་རིང་། ལུག་རྫི་སོགས་དམངས་གཙོ་ལོངས་སུ་སྤྱོད་ནས་ལོང་པ་རེད། སྔོན་འགྲོ་དང་དངོས་གཞི་མཇུག་འབྲས་གསུམ་ལས་དང་པོའི་སྐབས་སུ་བློ་སེང་དང་སྤེན་ཚེ་དང་ཀླུ་མཁར་བྱམས་ལ་ཐོབ་པ་རེད། ཡིན་ན་ཡང་རང་བཙན་བཀག་པ་རེད་ཅེས་གསར་བསྒྲགས་ལ་བལྟས་ན་གསལ་བོ་ཤེས། བདག་གིས་ཞུ་འདོད་པ་དེ་ཚོགས་གཙོ་མཆོག་གཞུང་གིས་དབང་ཤེད་ལ་བརྟེན་ནས་ཨ་རི་དང་ཡུ་རོབ་སོགས་སུ་ཚོགས་བཤད་གསལ་བསྒྲགས་རྒྱ་ཆེན་པོ་བྱས་ནས་བློ་སེང་ལ་དོག་པ་ཟ་དགོས་པ་བྱས་ཡོད། ཡིན་ན་ཡང་བདེན་ལུང་བ་གཉིས་དེ་ཕུ་ཐག་རིང་ཞེས་པ་བཞིན་དུ་གཞུང་འབྲེལ་གྱིས་བདེན་ཁ་རྣམ་དག་སྤྲད་པས་བློ་སེང་ལ་རྒྱལ་ཁ་ཐོབ་ཡོད། ཡིན་ན་ཡང་གསལ་བསྒྲགས་ཙམ་མིན་པར་ཐག་གཅོད་ནན་མོས་དགོས་པ་མ་གཏོགས་བདེན་པ་ལས་རྫུན་པ་རྒྱལ་བའི་གཡང་ཁ་ཆེན་པོ་བྱས་ཚར། ངོས་ནས་ཀླུ་བྱམས་ལ་རྒྱ་ཆ་བརྒྱ་དུང་ལེན་བྱས་པ་ཡིན། གཙོ་བོ་ལོ་རྒྱུས་དང་ཕུག་མདུན་རིངམོ་ལ་བསམ་ཞིབ་བྱས་པ་ལས་ཆོས་ལུགས་དང་ཆོལ་ཁའི་ཕྱོགས་ཞེན་སྤུ་ཙམ་མེད་པར་སྲིད་སྐྱོང་ཀླུ་མཁར་ངོ་ཡང་མི་ཤེས་ཀྱང་ཁོའི་ལོ་རྒྱུས་ཚང་མ་བདེན་པའི་ལམ་ནས་གསལ་ཐག་ཆོད་པར་ཤེས་ནས་འོས་ཁོ་ལ་གདམས་པ་ཡིན། ད་ཡིན་ན་འོས་མི་གཉིས་ལས་མང་མི་ཉན་པར་ཡིན་ན་ཀླུ་མཁར་དང་བློ་སེང་གཉིས་འགྲན་རྩོད་དགོས་པར་གསལ་བོ་ཆགས་ཟིན་པས་དབུ་འཛིན་མགོ་གཙོ་དབང་ཆ་ལྡན་པ་ཚོགས་གཟུ་གནས་བློ་གྲོས་དང་བདེན་པའི་རྒྱ་མ་བགྲང་ཐག་མི་ནོར་བར་ཤིན་ཏུ་གཅེས་སོ།།

 

༢ དངོས་གཞི་འོས་འདེམས་འགྱུར་བ་གཏོང་དགོས།

བཀའ་ཤག་དང་དབུ་འཛིན་རྣམ་པས་བདེན་པ་དྲང་པོས་ལམ་ནས་མ་འོངས་བོད་ཀྱི་བདེན་མཐའ་ལས་སྒེར་སྤྱོད་ཧྲག་འཛིན་དུ་མི་འགྲོ་བར་གསལ་བསྒྲགས་ལག་ལེན་དུ་ངེས་པར་འབྱོང་དགོས་པ་རྩ་བའི་དམ་ཚིག་རེད། དེས་ན་དུས་དབང་དང་དོན་སྤྱོད་སྐོར་ལ་བཀའ་ཤག་གི་གསར་འགོད་གསལ་བསྒྲགས་ཐེངས་དང་པོ།
ཕྱི་ལོ་ ༢༠༡༥ ཟླ་ ༨ ཚེས་ ༣༡ ཉིན། བཀའ་ཤག་ནས་དེའི་སྐོར་ལ་གསར་འགོད་གསལ་བསྒྲགས་བྱས་པའི་ཚིག་དུམ་ཞིག་དྲངས་ན་འདི་རེད། “དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག་བོད་མིའི་སྒྲིག་འཛུགས་ཀྱིས་སྲིད་སྐྱོང་བློ་བཟང་སེངྒེ་མཆོག་དང་། དུས་དབང་གྲ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་པདྨ་ཆོས་འབྱོར་མཆོག ཚོགས་གཞོན་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་བཅས་ཆེད་ཕེབས་གནང་སྟེ་ཕྱི་ནང་གི་གསར་འགོད་པ་ ༢༠ བརྒལ་བ་ལྷན་འཛོམས་ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསར་འགོད་གསལ་བསྒྲགས་གནང་དོན། དད་ལྡན་ཆོས་ཞུ་བ་ལྷན་རྒྱས་ལ། ཇི་ལྟར་དགོངས་མངའ་ལྟར། བོད་མིའི་སྒྲིག་འཛུགས་བཀའ་ཤག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལོ་གཅིག་སྔོན་ནས་ཇི་ལྟར་གསོལ་འདེབས་ཞུས་པ་བཞིན། ཕྱི་ལོ་ ༢༠༡༦ ལོའི་ཟླ་ ༡ པོའི་ནང་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་བསྩལ་རྒྱུའི་བཀའ་བཞེས་བཟང་པོ་སྨིན་སྩལ་ཐོབ་པ་གསལ་བསྒྲགས་སྔོན་སོང་ལྟར་ཡང་།
འདི་ལོ་སྔར་དང་མི་འདྲ་བར་༸སྐུའི་གྱ་སྟོན་གྱི་མཛད་འཆར་དང་བརྟན་བཞུགས་བཅས་ཤིན་ཏུ་མང་པོ་བྱུང་བ་དང་། རིང་མིན་ཕྱི་ཟླ་ ༩ པའི་ནང་ཨིན་ལེན་དུ་བདུན་ཕྲག་གཅིག་རིང་དང་། དེ་རྗེས་ཕྱི་ཟླ་བ་ ༡༠ པའི་ནང་ཨ་རི་ཁུལ་དུ་བདུན་ཕྲག་གསུམ། ཕྱི་ཟླ་ ༡༡ པའི་ནང་རྒྱ་གར་ནང་གསུང་ཆོས་དང་གཞན་ཆིབས་སྒྱུར་ཁག་གཅིག ཕྱི་ཟླ་ ༡༢ པའི་ནང་རྒྱ་གར་ལྷོ་ཕྱོགས་ཁུལ་བསྟུད་མར་བདུན་ཕྲག་གསུམ་རིང་མཛད་འཆར་ཤིན་ཏུ་དམ་པ། ལྷག་པར་ཕྱི་ལོ་ ༢༠༡༦ ཟླ་བ་དང་པོའི་ནང་དཔལ་དུས་ཀྱི་འཁོར་ལོའི་དབང་ཆེན་བསྩལ་བཞེད་ནི་ཆོས་འབྲེལ་གཞན་དང་མི་འདྲ་བར་སྔོན་འགྲོའི་གསུང་ཆོས་སོགས་ཀྱིས་དུས་ཡུན་འགོར་གཞི་རིང་ལ། སྒྲུབ་ཞག་གནང་སྒོ་ཁག་ཕྱག་བཞེས་མང་སྟབས་ཧ་ཅང་གི་སྐུ་ཐང་མཉེས་པོ་ཡོང་རྒྱུ་ཡིན་ན། དམིགས་བསལ་ཚོགས་ཆེན་ཐེངས་གཉིས་པའི་གྲོས་ཆོད་དགོངས་དོན་དང་། ཆོས་བརྒྱུད་ཁག་གི་དབུ་ཁྲིད་བསྟན་བདག་བླ་ཆེན་རྣམ་པས་ཉེ་ཆར་༸སྐུའི་གྱ་སྟོན་སྐབས་གསོལ་འདེབས་ཞུ་སྐུལ་དང་།
དེ་བཞིན་མང་ཚོགས་ཁྲོད་ཀྱི་ཐུགས་ཁུར་ཅན་དང་། གཞིས་བཞུགས་ཁག་གཅིག་གིས་རྣམ་ཀུན་ནས་༸གོང་ས་༸སྐྱབས་མགོན་ཆེན་པོའི་མཛད་འཆར་ཉུང་འཕྲི་དང་། སྐུ་ངལ་གསོ་རྒྱུའི་དུས་ཚོད་མང་ཙམ་ཡོང་ཐབས་སྐོར་ལ་ཡིག་ངག་གཉིས་ཐོག་ནས་ཞུ་མཁན་བྱུང་བ་བཅས་ལ་བརྟེན། སང་ལོའི་དུས་འཁོར་དབང་ཆེན་བསྩལ་རྒྱུ་སྔོན་དུ་ཞལ་བཞེས་སྐལ་བཟང་ཐོབ་ཟིན་ནའང་། བོད་མིའི་སྒྲིག་འཛུགས་བཀའ་ཤག་ནས་མཛད་འཆར་ཉུང་འཕྲི་ཡོང་བ་གསོལ་འདེབས་ཀྱིས་ཕར་འགྱངས་ཆོག་པའི་སྙན་གསལ་སྒྲོན་འབུལ་ཞུས་པ་བཞིན་བཀའ་བཞེས་ཐོབ་སྟབས། སང་ལོའི་དུས་འཁོར་དབང་ཆེན་དེ་ལོ་གཅིག་གི་རིང་ཕར་འགྱངས་གནང་གཏན་ཁེལ་བའི་གསལ་བསྒྲགས་ཞུ་རྒྱུ་དང་།
དེའི་རྐྱེན་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། དུས་དབང་སྦྱིན་བདག་ཁག དུས་དབང་གོ་སྒྲིག་ཚོགས་ཆུང་གི་ཚོགས་མི་རྣམས་དང་། དེ་བཞིན་ཕྱི་ནང་གི་དད་ལྡན་ཆོས་ཞུ་བ་མང་པོར་གང་ཅིའི་ཐུགས་སྟབས་མི་བདེ་བ་ཡོང་ངེས་ལ་བོད་མིའི་སྒྲིག་འཛུགས་བཀའ་ཤག་ནས་གོ་སྐབས་འདི་བརྒྱུད་བཟོད་གསོལ་ཞུ་རྒྱུ་དང་། དེ་དོན་འབྲེལ་ཡོད་ཀུན་གྱིས་དགོངས་ཡངས་དཀྱེལ་ཆེ་ཡོང་བ་ཞུ་རྒྱུ་བཅས། བོད་མིའི་སྒྲིག་འཛུགས་བཀའ་ཤག་ནས་ཕྱི་ལོ་ ༢༠༡༥ ཟླ་ ༨ ཚེས་ ༣༡ ལ།”
ཞེས་དུས་དབང་ཕར་འགྱངས་དགོས་སྐོར་བཀའ་ཤག་གིས་ཡར་དགའ་ལྡན་ཕོ་བྲང་ལ་སྙན་གསན་ཞུས་པ་གསལ་བོར་བཀོད་ཡོད།

དེའི་འབྲེལ་ཐག་འདི་ན་ཡོད།

http://bod.asia/…/%E0%BD%91%E0%BD%94%E0%BD%A3%E0%BC%8B%E0%…/

 

བཀའ་ཤག་གི་གསར་འགོད་གསལ་བསྒྲགས་ཐེངས་གཉིས་པ།

 
ཕྱི་ལོ་ ༢༠༡༦ ཟླ་ ༢ ཚེས་ ༥ ཉིན། ཡང་བསྐྱར་བཀའ་ཤག་གིས་བསྐྱངས་པའི་གསར་འགོད་གསལ་བསྒྲགས། བཀའ་ཤག་གི་དངོས་དོན་གསལ་བཤད་དུ།
“གནད་དོན་དེའི་བྱུང་རིམ་དངོས་ནི། ཕྱི་ལོ་ ༢༠༡༥ ཟླ་ ༨ ཚེས་ ༢༩ ཉིན་༸གོང་ས་༸སྐྱབས་མགོན་ཆེན་པོ་མཆོག་ནས་དཔལ་ལྡན་སྲིད་སྐྱོང་མཆོག་ལ་གོ་བསྡུར་འགྲེལ་བཤད་སླད་དགའ་ལྡན་ཕོ་བྲང་ཡིག་ཚང་གི་དྲུང་ཆེ་གཉིས་ཆེད་གཏོང་གནང་སྟེ། དཔལ་ལྡན་སྲིད་སྐྱོང་མཆོག་དང་། དུས་འཁོར་དབང་ཆེན་གོ་སྒྲིག་ཚོགས་ཆུང་གི་གཙོ་སྐྱོང་ཆོས་རིག་དང་བདེ་སྲུང་བཀའ་བློན་རྣམ་གཉིས་བཅས་ལྷན་འཛོམས་ཐོག་འགྲེལ་བཤད་གནང་དོན་དུ། ༸གོང་ས་མཆོག་སྨན་བཅོས་འཕྲོད་བཞེས་གནང་དགོས་སྐོར་བཀའ་བསྡུར་རིམ་པར་བྱུང་ཡོད་ཐོག ཕྱི་ལོ་ ༢༠༡༥ ཟླ་ ༧ པའི་ནང་ལྡི་ལིར་ཁྱད་མཁས་སྨན་པས་བརྟག་དཔྱད་ཞུས་སྐབས་ Prostate བསྙུན་གཞི་ངོ་སྤྲོད་བྱུང་སྟེ་སྨན་བཅོས་གནང་གལ་ཆེ་ཚུལ་ཞུས་སྐོར་དང་། ༸གོང་ས་མཆོག་ཉིད་ནས་ཀྱང་གལ་ཆེ་དོན་ཆེར་དགོངས་ཏེ། སྨན་བཅོས་གནང་རྒྱུ་དང་། དུས་འཁོར་དབང་ཆེན་གྱི་མཛད་འཆར་ཐད་ཐུགས་དམ་བརྟག་པ་ཐེངས་བདུན་གནང་བ་དང་། ཐུགས་དམ་བདུན་ཀར་སྨན་བཅོས་གནང་ན་ལེགས་པ་དང་། དུས་འཁོར་དབང་ཆེན་གྱི་མཛད་འཆར་ཕྱིར་འགྱངས་གནང་ན་ལེགས་པ་གསལ་བབས་བྱུང་སྐོར་བཅས་གསུངས་ཐོག”
ཅེས་དགའ་ལྡན་ཕོ་བྲང་ནས་མར་བཀའ་ཤག་ལ་དུས་དབང་ཕྱིར་འཐེན་དགོས་ཞེས་བཀའ་ཕེབས་ཚུལ་བཤད་འདུག

འབྲེལ་ཐག་འདི་ན་ཡོད།
http://bod.asia/…/%E0%BD%96%E0%BD%80%E0%BD%A0%E0%BC%8B%E0%…/

 
ཚོགས་གཙོའི་དྲིས་ལན་དང་པོ།

སྤྱི་འཐུས་ཚོགས་གཙོ་ལས་ཐོག་སྲིད་སྐྱོང་འོས་མི་སྤེན་པ་ཚེ་རིང་གིས། ཁོང་འོས་མིར་བཞེངས་དགོས་པའི་དམིགས་ཡུལ་སྐོར་གྱི་གཏམ་བཤད་ཨ་རིའི་མི་ནི་སོ་ཊར་གནང་སྐབས། ཁོང་གིས་དུས་དབང་ཕྱིར་འགྱངས་སྐོར་གྱི་དྲི་བ་ཞིག་གི་ལན་དུ་བཤད་དོན།
“༧རྒྱལ་བ་རིན་པོ་ཆེས་བཀའ་གནང་བ་དེ་དགོས་པའི་དབང་གིས་གསུངས་པར་ངས་ངོས་འཛིན་བྱེད་ཀྱི་ཡོད། ངས་དེ་ལ་བརྩི་ཡི་ཡིན་ཞུས་ན། ད་དུང་དེའི་སྐོར་གསལ་པོ་བཟོ་དགོས་པ་ཞིག་གཟིགས་ཀྱི་ཡོད་ན། དུས་འཁོར་དབང་ཆེན་དེ་བཀའ་ཤག་གིས་ཡར་ཞུས་ནས་༧གོང་ས་སྐྱབས་མགོན་ཆེན་པོས་ཞལ་བཞེས་གནང་བ་རེད། ལས་རིམ་དེ་ཚོ་བང་བསྒྲིགས་ནས་ཕྱི་ཟླ་༨ བར་དུ་སོང་བ་དང་། དེའི་སྔོན་སྐུའི་གྱ་སྟོན་གྱི་མཛད་རིམ་ཡོད་པ། དེ་རྗེས་དབྱིན་ཡུལ་དང་། ཨ་རི་ལ་ཆིབས་བསྒྱུར། དྷ་ས་དང་། ལྷོ་ཕྱོགས་སོགས་ལ་གསུང་ཆོས་ཡོད་པ་འཛིན་སྐྱོང་གིས་སྔོན་ནས་མཁྱེན་གྱི་ཡོད་པ་རེད། འཛིན་སྐྱོང་བཀའ་ཤག་གིས་དུས་དབང་སྐབས་གཞུང་འབྲེལ་ལས་གཞུང་འབྲེལ་མ་ཡིན་པའི་ལས་རིམ་དེ་གྲ་སྒྲིག་བྱེད་རྒྱུ་མིན་པ་ངས་སྔོན་ནས་གོ་སོང་། དྷ་སའི་སྒྲིག་འཛུགས་ཤིག་གིས་བརྟན་བཞུགས་ཕུལ་རྒྱུ་ཡིན་པ་༧གོང་ས་མཆོག་ལ་སྔོན་ནས་ཞུས་པ་དང་། ༧གོང་ས་མཆོག་གིས་ཞལ་བཞེས་གནང་ནས་བརྟན་བཞུགས་དེ་དུས་དབང་སྐབས་བང་བསྒྲིགས་ཤོག་གསུངས་པ་དེ་བཀའ་ཤག་གིས་དེ་མ་འགྲིག་པ་གཟིགས་ནས་ལས་རིམ་ནང་བཅུག་ཐུབ་ཀྱི་མེད་པའི་གནས་སྟངས་ཆགས་རེད། དེ་ནས་བཀའ་ཤག་དང་དགའ་ལྡན་ཕོ་བྲང་བར་བཀའ་མོལ་བྱུང་འདུག ད་དུང་གནས་ཚུལ་གཞན་པ་ཁ་ཤས་ཡོད་རེད། དེ་ཚོ་འདིར་བཤད་ནས་ཆོ་ཞིག་ཡོད་མ་རེད། ཕྱི་ཟླ་༨ ཚེས་༢༧ ཉིན་༧གོང་ས་མཆོག་ལ་སྙན་སེང་ཞུ་སྐབས། ༧སྐྱབས་མགོན་རིན་པོ་ཆེས་དུས་དབང་དེ་ཆབ་སྲིད་ཆགས་ཀྱི་འདུག་ཟེར་གྱི་འདུག་ལ། ཆབ་སྲིད་ངོ་མ་ཆགས་ཀྱི་འདུག དེ་འདྲ་ཡིན་ན་ཕར་འགྱངས་ཞོག་ཞེས་དགོངས་པ་ཏོག་ཙམ་འཚོམས་པའི་གནས་སྟངས་ངས་ཤེས་སོང་། ཕྱི་ཉིན་ཁོང་གིས་ཁ་སང་ངས་དྲག་པོའི་ཐོག་ནས་བཤད་པ་རེད། དེ་རིང་ང་འཇམ་པོའི་ཐོག་ནས་ཡིན་ཞེས་དགའ་ལྡན་ཕོ་བྲང་གི་དྲུང་ཆེ་གཉིས་མར་བཀའ་ཤག་ལ་བཏང་རེད། བཀའ་ཤག་གིས་ཀྱང་དུས་དབང་ཕར་འགྱངས་བྱེད་རྒྱུ་ཐག་བཅད་ཚར་ཡིན་ཞེས་གསུངས་འདུག དེའི་སྐབས་ཕྱི་ཟླ་༨ ཚེས་༢༩ ལ་ང་ཀ་ལི་མན་ཊོན་ལ་ཡོད། སྐབས་དེར་སྲིད་སྐྱོང་གིས་ཞལ་པར་ཕེབས་སོང་། དུས་དབང་སྐོར་དེ་ཡར་དགའ་ལྡན་ཕོ་བྲང་ལ་ཞུས་ཡིན། ཕར་འགྱངས་བྱེད་རྒྱུའི་ཞལ་བཞེས་བྱུང་སོང་ཟེར། གནད་དོན་དེ་དང་འདི་ཡིན་གསུང་གི་འདུག དེའི་སྐབས་ཡར་ཞུ་ཡ་དེ་བཀའ་ཤག་རེད་ཨ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱིས་ཞུས་ཡོད་པ་མ་རེད། མར་ཐོན་སྟངས་དེ་མཉམ་དུ་ཐོན་དགོས་པ་རྒྱུ་མཚན་འདྲ་མེད་འགྲོ་བསམ་སོང་། མར་ཐོན་སྟངས་ཀྱི་བརྒྱུད་རིམ་བཀའ་ཤག་གིས་གསུངས་པ་དེ་རེད། བྱུང་སྟངས་དེ་ངས་བཤད་བཞག་པ་དེ་རེད་”ཅེས་བཤད་ཡོད་པ་རེད།

 
ཚོགས་གཙོའི་དྲིས་ལན་གཉིས་པ།

ཕྱི་ལོ་ ༢༠༡༦ ཟླ་ ༢ ཚེས་ ༥ ཉིན། ཡང་བསྐྱར་བཀའ་ཤག་གིས་བསྐྱངས་པའི་གསར་འགོད་གསལ་བསྒྲགས། བཀའ་ཤག་གི་དངོས་དོན་གསལ་བཤད་ཅེས་པ་བསྒྲགས་རྗེས། གསར་འགོད་པས་ཚོགས་གཙོར་བཅར་འདྲི་ཞུས་སྐབས།
“དེ་རིང་གསལ་བཤད་འདིའི་ནང་གསལ་བོ་ག་རེ་གསུངས་ཡོད་པ་རེད་ཟེར་ན། བཀའ་ཤག་གིས་ཡར་ཞུས་པ་མ་ཡིན་པ་དང་། ༧གོང་མཆོག་གི་དགོངས་པ་དེ་དྲུང་ཆེ་གཉིས་མར་བཏང་བའི་གནས་སྟངས་གསུངས་ཡོད་པ་རེད། གནས་ཚུལ་དེ་ཕྱི་ལོགས་ལ་ཐོན་སྟངས་དེ་ག་འདྲ་ཞིག་ཐོན་དགོས་ཀྱི་ཡོད་མེད་ཐོག་ལ་བཀའ་ཤག་ནས་གསོལ་འདེབས་ཞུས་བ་ཡིན་པ་དེ་གསལ་ཡོད་སྟབས། རང་བཞིན་གྱིས་སྤྱི་ཚོགས་ནང་གླེང་སློང་མང་པོ་ཞིག་བྱུང་བ་རེད། ཚོགས་གཙོས་དེའི་སྐོར་ལ་མང་ཚོགས་ལ་གང་ཡང་ཞུས་མེད། ཡིན་ནའང་ཕྱི་ཟླ་ ༨ ཚེས་ཉེར་བདུན་དང་ཉེར་བརྒྱད་ལ་ག་རེ་བྱུང་ཡོད་མེད་དང་། ཕྱི་ཚེས་ ༢༩ ཉིན་དྲུང་ཆེ་གཉིས་མར་ཕེབས་ཏེ་གསལ་བཤད་གནང་བ་དེ་དག་སྲིད་སྐྱོང་གིས་ང་ལ་གསལ་བོ་གསུང་ཡོད་ན། ངས་དེ་ལྟར་ཞུ་དགོས་པའི་གནས་སྟངས་ཆགས་ཀྱི་ཡོད་པ་མ་རེད། ངས་གསལ་བཤད་ཞུ་རྒྱུ་གཅིག་དེ་ཡིན། ཕྱི་ཚེས་ ༣༠ ཉིན་སྲིད་སྐྱོང་མཆོག་གིས་ང་ལ་ཞལ་པར་གནང་བའི་སྐབས་སུ། ཕོ་བྲང་གི་དྲུང་ཆེ་གཉིས་མར་ཕེབས་ཏེ་ང་ལ་འདི་ལྟར་གསུངས་སོང་ཞེས་ནང་དོན་གསུང་ཡོད་ན། ད་ལྟའི་གནས་སྟངས་འདི་ཆགས་ཀྱི་ཡོད་པ་མ་རེད། ནང་དོན་གསལ་བོ་གསུངས་མེད་པའི་ཐོག་ནས་བཀའ་ཤག་གིས་ཡར་གསོལ་འདེབས་ཞུས་པ་ཡིན་ཟེར་བ་དེ་ཏག་ཏག་བསྡད་མེད་སྟབས་མང་ཚོགས་ནང་བསམ་ཚུལ་བྱུང་བ་དང་། ངས་གནས་ཚུལ་གང་ཤེས་པ་དེ་ངས་གསལ་བཤད་ཞུས་པ་རེད་མ་གཏོགས་བཀའ་ཤག་མ་བརྩིས་པ་དང་། བོད་མིའི་སྒྲིག་འཛུགས་ལ་ང་སྒེར་གྱི་ཁེ་ཕན་ཆེད་དུ་དེ་འདྲ་བྱས་པ་རྩ་བ་ཉིད་ནས་མིན་ཞེས་གསལ་བཤད་ཞུ་བཞིན་ཡོད།” ཅེས་བཤད་འདུག

འབྲེལ་ཐག་འདི་ན་ཡོད།

http://tibettimes.net/%E0%BD%91%E0%BD%B4%E0%BD%A6%E0%BC%8B…/

 

༣ མཐར་དོན་ཚོགས་གཙོ་དངོས་འདེམས་ལས་ཕྱིར་ཕུད་དགོས།

འདིར་ངེས་པ་ཤེས་དགོས་པ་ཞིག་ལ་གསལ་བསྒྲགས་ཙམ་མིན་པར་ལག་ལེན་གནད་ལ་ཁེལ་བ་དགོས་པ་རེད་མ་གཏོགས། བཙན་བྱོལ་སྒྲིག་འཛུགས་ཀྱི་འབྱུང་འགྱུར་མདུན་ལམ་ལ་གནོད་ཚབ་ཆེ་བས་ཚོགས་གཙོའ་རྩ་དགོངས་ཞུ་བའམ་དངོས་གཞི་འོས་འདེམས་ལས་ཕྱིར་ཕུས་གཏོང་དགོས།
དེས་ན་དངོས་གཞི་འགྲན་རྩོད་པ་ཀླུ་བྱམས་དང་བློ་སེང་གཉིས་དགོས་པ་དུས་སུ་བབས་པ་ལས་སྲིད་སྐྱོང་འོས་འདེམས་དེ་རྩེད་ཆས་དང་བེད་སྤྱོད་ལོག་པར་མི་གཏོང་བར་མཁྱེན་ནོ།།
ཆོས་ལུགས་དང་ཆོལ་ཁའི་ཕྱོགས་གྱི་དྲི་མ་དབེན་པའི་བློ་གཟུ་བོར་གནས་པའི་ཐོག་ནས་དབྱིན་ཡུལ་ཀུན་བཟང་ཆོས་གླིང་ནས་ཨེ་མ་ཧོས་ནང་ཇའི་སྐབས་སུ་གང་དྲན་དུ་བོད་བསྟན་སྲིད་ལ་ཕན་པའི་ཐབས་སུ་བགྱིས་པར་དགེའོ།། །།