གངས་ཅན་བོད་པའི་ལོ་གསར་རྣམ་དག་ལ་དགའ་བསུ་ཞུ།

——ཨེ་མ་ཧོ།

 
སྔ་ལོ་རྫོགས་ནས་ཕྱི་ལོ་ཚེས།།
བྱ་བ་གལ་ཆེའི་དམ་བཅའ་དང་།།
འབྱུང་འགྱུར་ཕྱི་ཚེས་སྒྲུབ་པའི་ཆོས།།
དེ་རིང་ལོ་སར་ཉི་མ་ལགས།།

རྒྱ་ལོ་རྩིས་ནས་ཡོན་རྒྱལ་རབས།།
ཧོར་ལོ་རྩིས་ན་དམག་འཁྲུག་རབས།།
དབྱིན་ལོ་རྩིས་ན་བདུན་ཕྲག་སོང་།།
དེ་རིང་བོད་ལོ་ངོ་མ་ཡིན།།

རྒྱལ་ཟླའི་ཡར་ངོའི་ཚེས་གཅིག་ལ།།
མཁན་སློབ་ཆོས་རྒྱལ་དམ་ཚོས།།
བོད་ལོ་ཚེས་པའི་ལུགས་སྲོལ་ཡོད།།
གཞན་ཡང་མཁའ་འགྲོ་རྒྱ་མཚོ་རྒྱུད།།
འབྱུང་རྩིས་ངོ་མཚར་ཉི་མ་གསལ།།

དགོངས་འདུས་བཀའ་གཏེར་ཕལ་མོར་ཆེར།།
ཚེས་གཅིག་ལོ་སར་དེ་རིང་བརྩི།།
ཟླ་གཉིས་ངོས་འཛིན་ཁྱུང་ཕུག་ལུགས།།
གསུམ་པ་དུས་འཁོར་གསེར་འོད་ལུགས།།

བཞི་བ་རྒྱ་གར་དམ་པའི་ལུགས།།
ལྔ་བ་དབང་ཕྱུག་དེ་བའི་ལུགས།།
དྲུག་པ་ཟ་ཧོར་རྒྱལ་པོའི་ལུགས།།
བདུན་པ་མངོན་འདུལ་འཛིན་པའི་ལུགས།།

བརྒྱད་པ་པཎ་ཆེན་ཁ་ཅིག་ལུགས།།
དགུ་བ་འདུལ་འཛིན་ཕྱི་མའི་ལུགས།།
བཅུ་བ་མདོ་སྡེ་སྙིང་པོའི་ལུགས།།
བཅུ་གཅིག་ནག་རྩིས་འགའ་ཞིག་ལུགས།།

བཅུ་གཉིས་གསོ་བྱེད་མན་ངག་ལུགས།།
གང་ལྟར་བོད་བརྒྱུད་མེས་པའི་ལུགས།།
རྒྱལ་ཟླའི་ཡར་ངོའི་ཚེས་གཅིག་ལགས།།
གངས་ཅན་བདེ་བའི་སྨོན་ལམ་འདེབས།།

སྐྱེ་རྒུ་འགྲོ་བ་མ་ལུས་པ།།
ཚེ་བསོད་རྒྱས་པའི་བཀྲ་ཤིས་ཤོག།།
བདེ་ལེགས་ཡོན་ཏན་ཕུན་ཚོགས་ཤིང་།།
རྒྱལ་བསྟན་དར་ཞིང་རྒྱས་གྱུར་ཅིག།

ཅེས་པ་འདི་ཡང་རབ་གནས་ཤིང་ལུག་རྒྱལ་ཟླའི་ཡར་ངོའི་ཚེས་པ་གཅིག་གམ་གངས་ཅན་བོད་པའི་མེས་པོའི་ལོ་སར་རྣམ་དག་གི་ཉིན་མོར་བྱ་བྲལ་ཆོས་དབྱིངས་མཆོག་གིས་གསུང་སྐུལ་བཞིན་གང་ཤར་དུ་དབྱིན་ཡུལ་ཀུན་བཟང་ཆོས་གླིང་ནས་ཤྲྰི་སྨྱོན་པས་བྲིས་པར་དགེའོ།། །།