རྩོམ་པ་པོ། སྒྲོལ་ཚེ།
གསེར་རྟ་ལྔ་རིག་ནང་བསྟན་ཆོས་ཀྱི་གྲོང་ཁྱེར་ཆེན་མོ་ནི། མདོ་ཁམས་དཔལ་ཤུལ་གསེར་རྟའི་ས་ཁོངས་གསེར་ཁོག་བླ་མ་རུང་ཞེས་པར་ཡོད། ༸སྐྱབས་རྗེ་དམ་པ་བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་སྐུ་སྐྱེ་གོང་མ་ཁྲག་འཐུང་བདུད་འཇོམས་གླིང་པས་ཕྱི་ལོ་༡༨༨༠ ལོར་ཐོག་མར་ཕྱག་བཏབ་སྟེ་མཚན་ལ་གསང་ཆེན་འོད་སྐུར་གྲོལ་བའི་དབེན་ཁྲོད་ཅེས་གསོལ་ནས་སྐལ་ལྡན་གྱི་སློབ་ཚོགས་དུ་མ་སྨིན་གྲོལ་ལ་བཀོད། འཇའ་ལུས་པ་བཅུ་གསུམ་བྱུང་བ་སོགས་བྱུང་། ཕྱིས་སུ་ཆོས་སྡེ་དེ་ཉིད་འཐོར་ཞིག་ཏུ་གྱུར་ནའང་༸ཆོས་རྗེ་དམ་པ་ཡིད་བཞིན་ནོར་བུའམ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་ཞུས་ན་༧ཆོས་རྗེ་དམ་པ་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་དཔལ་བཟང་པོ་མཆོག་གིས་གནས་དེར་ཕྱི་ལོ་ ༡༩༨༠ ལོར་འཆད་ཉན་ཀྱི་ཆོས་གྲལ་གསར་འཛུགས་གནང་ནས་རིམ་བཞིན་ཡར་རྒྱས་སུ་ཕྱིན་པ་དང་འབྲེལ། ༸ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པས་གསེར་ཐང་བླ་རུང་ལྔ་རིག་ནང་བསྟན་སློབ་གླིང་ཞེས་པའི་མཚན་གསོལ་མཛད།
ཆོས་གླིང་འདིར་ནང་གསེས་ཀྱིས་དབྱེ་ན་དཔའ་བོའི་གླིང་ལྔ། དཔའ་མོའི་གླིང་གསུམ། དགེ་བསྙེན་གྱི་གླིང་གཉིས་ཏེ་གླིང་བཅུ་ལས་གྲུབ་པ་ཡིན། དེ་ཡང་སྟོད་ནས་རིམ་པ་བཞིན་དུ། ཤར་ཉེས་ཚོགས་རང་གྲོལ་གླིང་། །ལྷོ་འདོད་དགུ་ཀུན་འབྱུང་གླིང་། །ནུབ་སྣང་སེམས་དབང་སྡུད་གླིང་། །དབུས་དོན་གཉིས་ལྷུན་གྲུབ་གླིང་བཅས་ལྔ་རིག་ནང་བསྟན་སློབ་གླིང་ཞེས་དཔའ་བོ་བཙུན་པའི་གླིང་ལྔ་དང་། ། བར་ན་བདུད་ལས་རྣམ་རྒྱལ་གླིང་ཞེས་རྒྱལ་སྤྱིའི་སློབ་གཉེར་བ་དང་རྒྱའི་སློབ་གཉེར་བ་བཅས་རྒྱལ་སྤྱིའི་དགེ་བསྙེན་གྱི་གླིང་གཅིག སྨད་ན་ལྷན་སྐྱེས་ཆོས་སྐུའི་གླིང་། །སྔགས་སྐྱེས་ལོངས་སྐུའི་གླིང་། །ཞིང་སྐྱེས་སྤྲུལ་སྐུའི་གླིང་བཅས་དཔའ་མོ་བཙུན་མའི་གླིང་གསུམ་མམ་བཙུན་དགོན་སྐུ་གསུམ་མཁའ་འགྲོའི་འདུ་གླིང་དང་། ཉེ་འཁོར་ན་ལེགས་ཚོགས་ཆར་འབབ་གླིང་ཞེས་མདོ་དབུས་ཁམས་ནས་ཕེབས་པའི་དགེ་བསྙེན་གྱི་གླིང་གཅིག་བཅས་གླིང་ཕྲན་བཅུ་དང་གླིང་ཆེན་བཞི་ལས་གྲུབ་ཅིང་། དེ་དག་ཕལ་བ་མདོ་དབུས་ཁམས་གསུམ་ནས་ཕེབས་པའི་གྲྭ་བཙུན་ཆིག་ཁྲི་ལྷག་དང་། དགེ་བསྙེན་ཉིས་སྟོང་ལྷག་ཙམ། ཕྱི་གླིང་དང་། ནང་ལོག་ཡུལ་གྲུ་དུ་མ་ནས་ཕེབས་པའི་དད་ལྡན་ཆོས་ཞུ་བ་སྟོང་ཕྲག་དུ་མ་གཏན་སྡོད་བྱས་ཡོད་པས་ད་ལྟའི་འཛམ་གླིང་ནང་གི་ནང་བསྟན་སློབ་གླིང་ཆེ་ཤོས་དང་ཚད་ལྡན་དུ་ཆགས་གནས་ཡོད།
དེ་དག་གི་སྦྱང་བྱ་གཙོ་བོ་ནི་མདོ་ཕྱོགས་ནས་གཞུང་ཆེན་ལྔ་དང་། སྔགས་ཕྱོགས་ནས་རྒྱུད་སྡེ་བཞི་དྲུག་སོགས་ཐུན་མོང་དང་ཐུན་མོང་མ་ཡིན་པའི་རིག་པའི་གནས་མཐའ་དག་ལ་སྦྱང་བརྩོན་ལྷོད་མེད་དུ་གནང་ནས་ཆོས་བརྒྱུད་རིས་མེད་ཀྱི་གཞུང་ལུགས་ལ་མཁས་པ་གྲངས་ལས་འདས་པ་ཞིག་བྱུང་ཞིང་བོད་ཡུལ་སྟོད་སྨད་བར་གསུམ་དང་། འཛམ་གླིང་གི་ཡུལ་གྲུ་ཁག་ཏུ་ནང་པ་སངས་རྒྱས་པའི་ཆོས་ཀྱི་འཁོར་ལོ་མཚན་ཉིད་པ་སྐོར་བཞིན་ཡོད་པར་མ་ཟད། བོད་རྒྱ་དབྱིན་ཡིག་སོགས་ཡིག་རིགས་དུ་མའི་ཐོག་ནས་ནང་ཆོས་དང་ཚན་རིག་གི་ལྟ་བའི་ཟབ་ཁྱད་དང་། ལག་ལེན་གྱི་དགེ་མཚན་ཆེ་ཆུང་དག་གཤིབས་བསྡུར་བྱས་པ་སོགས་ཀྱི་མཚོན་བོད་ཀྱི་ཆོས་དང་རིགས་གཞུང་ལ་ཕན་འབྲས་རླབས་ཆེན་གྱི་འོད་སྟོང་ཆེན་པོ་གཅིག་འཕྲོ་བཞིན་པ་འདི་དང་། མཁས་བཙུན་གྲུབ་པའི་དབང་ཕྱུག་གིས་ས་ཆེན་པོ་ཁྱབ་པར་མཛད།
ཁྱད་པར་དུ༸ཆོས་རྗེ་དམ་པ་ཡིད་བཞིན་ནོར་བུ་དེ་ཉིད་ཀྱིས་འགྲོ་རྣམས་རིས་སུ་མ་ཆད་པའི་གདུལ་བྱ་མཆོག་དམན་ཀུན་ལ་བྱམས་དང་བརྩེ་བའི་གཟིགས་སྐྱོང་གནང་ནས་སྐལ་ལྡན་རྣམས་སྨིན་གྲོལ་བཀོད་པ་དང་། བོད་ཁ་བའི་ལྗོངས་སུ་བསྟན་པ་འཛིན་སྐྱོང་སྤེལ་གསུམ་སྤྱི་དང་། བོད་ཀྱི་ཡུལ་སྲོལ་གོམ་གཤིས་སྲུང་སྐྱོབ་དང་། རིག་གཞུང་དར་སྤེལ་གཙོས་པའི་མི་རིགས་ལ་གཞལ་དཀའ་བའི་མཛད་རྗེས་རླབས་པོ་ཆེ་འཛམ་གླིང་སྤྱི་དང་ལྷག་པར་མཐོ་སྒང་འཛིན་མའི་ཁྱོན་འདིར་བསྐྲུན་ནས་རེ་ཞིག་གདུལ་བྱ་ཐུན་མོང་བ་རྣམས་ཀྱི་སྣང་ངོར་བོད་རབ་བྱུང ༡༧ པའི་ཆུ་མོ་ལུག་ལོའི་ཟླ ༡༡ ཚེས ༡༥ སྤྱི་ལོ ༢༠༠༤ ཟླ ༡ ཚེས ༧ ཉིན་གྱི་ཞོགས་པ་དུས་ཚོད ༩ དང་སྐར་མ ༤༥ ཐོག་ལ་དགོངས་པ་ཆོས་དབྱིངས་སུ་བསྡུས་པའི་ཚུལ་བསྟན་པ་ལགས་སོ། ༸ཆོས་རྗེ་དམ་པ་ཡིད་བཞིན་ནོར་བུ་མཆོག་གི་གསང་གསུམ་ལས་སྐྱེས་པའི་མཁས་དབང་དེ་དག་གིས་ལེགས་བཤད་ཇི་སྙེད་ཅིག་གསར་རྩོམ་གྱིས་བོད་མི་རིགས་སྤྱི་ལ་ཚུལ་མཐུན་གྱི་བླང་དོར་གྱི་ལམ་སྟོན་དང་རྒྱལ་བསྟན་མཚན་ཉིད་དང་ལྡན་པ་ཞིག་འཛིན་སྐྱོང་སྤེལ་གསུམ་གནང་བཞིན་པ་མཆིས་སོ། །
སྙིགས་དུས་འགྲོ་བའི་མགོན་པོ་མཁན་པོ་འཇིགས་མེད་ཕུན་ཚོགས་ལགས་ཀྱི་གདན་ས་འདི་ནི་གངས་ཅན་ཡུལ་ན་གང་གིས་ཟླ་དང་བྲལ་བའི་བཤད་སྒྲུབ་ཀྱི་ཚོགས་པ་ཆེ་ཤོས་ཏེ་ཡིན་པར་གདོན་མི་ཟའོ། མགོན་པོ་གང་ཉིད་གཤེགས་ཁར་ཁོང་ལ་ཡང་སྲིད་མེད་ཅེས་ཞལ་ཆེམས་བཞག་ཡོད་པ་རེད། འོན་ཀྱང་རུལ་སོང་རེ་གཉིས་ནས་ཡང་སྲིད་རྫུན་མ་ཞིག་ངོས་འཛིན་བྱས་སྐད་ཀྱང་ཐོས། ཁོང་ལ་རྗེས་འབྲངས་སློབ་ཚོགས་ཉི་ཟླ་སྐར་གསུམ་ལ་ཅོ་འདྲི་བ་ལྟ་བུ་མདོ་དབུས་ཁམས་གསུམ་ན་ཡོད་པ་དེ་དག་གིས་སྤྲུལ་རྫུན་ཞིག་ནམ་ཡང་ཁས་ལེན་གྱི་མ་རེད་སྙམ། །